Mai, pe’e mai

2 Te mau Ari’i 21–23

E fa’afāriu te mau pāpa’ira’a mo’a i tō tātou ’ā’au i te Atua ra

’Ua parau te peresideni Spencer W. Kimball ē te ’ā’amu o te ari’i Iosia, e ’itehia i roto i te 2 Te mau Ari’i 21–23, « ’o te hō’ē ïa ’o te mau ’ā’amu maita’i roa a’e i roto i te mau pāpa’ira’a mo’a ato’a » (i roto Mai, pe’e mai—nō te ta’ata hō’ē ’e te ’utuāfare : Faufa’a Tahito 2022, 129).

Nāhea tō te ari’i Iosia ’itera’a i te mau pāpa’ira’a mo’a

King Josiah Cleansing the Land of Idols [Te ari’i Iosia i te tāmāra’a i te fenua i te mau idolo], © Look and Learn / mau hōho’a nā Bridgeman

’Ua riro Iosia ’ei ari’i nō Iuda i te va’ura’a o tōna matahiti. ’Ua fatu ’āi’a ’oia nō te hō’ē bāsileia o te mau ta’ata tei ti’aturi i te mau atua ha’avare, ’ua hina’aro rā ’oia e pe’e i te Fatu. I te va’ura’a o te matahiti nō tōna fa’aterera’a, ’ua fa’aue ’oia ’ia ha’amouhia te mau fata ’e te mau idolo o te mau atua ha’avare i roto ia Iuda.

Josiah, King of Judah, Restores the Worship of God in His Kingdom [Iosia, te ari’i nō Iuda, ’ua fa’aho’i mai te ha’amorira’a i te Atua i roto i tōna bāsileia], nā te hō’ē ta’ata pāpa’i hōho’a ’ite-’ore-hia, hōho’a nā Stefano Bianchetti / mau hôho’a nā Bridgeman

’Ahuru matahiti i muri mai, ’ua ani ’oia i tōna mau ta’ata ’ia fa’ati’a fa’ahou te hiero nō Ierusalema, i reira tō te tahu’a rahi Hilikia ’itera’a mai i te mau pāpa’ira’a mo’a. I tō te ari’i Iosia tai’ora’a i te buka, ’ua fa’auruhia ’oia ’ia pe’e i tāna mau ha’api’ira’a. ’Ua ha’aputuputu ’oia i tōna nūna’a ’e ’ua tai’o atu i te buka ia rātou.

E tau roa tō te nūna’a fa’a’eta’etara’a i tō rātou ’ā’au i te Atua. ’Ua tauturu rā te mau pāpa’ira’a mo’a i te fa’afāriura’a i te ’ā’au o te nūna’a i te Atua ra. ’Ua fafau te ari’i Iosia i te nuna’a ē, e haere ’oia nā te ’ē’a o te Fatu ’e e ha’apa’o i te mau fa’auera’a.

’Āparaura’a

E aha te mau pāpa’ira’a mo’a tei ha’aputapū i tō ’outou orara’a ? E aha te mau ’īrava tā ’outou e nehenehe e tai’o i teie mahana nō te fa’auru ia ’outou ?

Te mau pāpa’ira’a mo’a nō te Faufa’a Tahito nō te mau taime ta’a ’ē

’Ia :

• Vai ’ōtahi noa ’outou :

  2 Te mau Ari’i 6:16

• Hina’aro ’outou i te pūai :

  Isaïa 40:31

• Here-’ore-hia ’outou :

  Salamo 130 ; Isaïa 54:10

• Ri’ari’a ’outou :

  Salamo 27:1 ; Isaïa 41:10

• Mo’ehia ia ’outou ’o vai ’outou :

  Genese 1:26–27

• Hina’aro ’outou ’ia ha’afātata atu i te Fa’aora :

  Isaïa 53:3–5

Mau a’o nō te tuatāpaparaʼa i te pāpa’ira’a mo’a

• ’A tu’u atu i te pure ’ei tuha’a nō tā ’outou tai’ora’a i te pāpa’ira’a mo’a. E ani i te Metua i te ao ra ’ia ha’amaita’i mai ia ’outou i te Vārua Maita’i nō te fāri’i i te hau ’e te fa’aurura’a.

• ’A tai’o ma te ’ōpuara’a e ha’apūai i tō ’outou fa’aro’o ia Iesu Mesia.

• ’A tai’o ma te ’ōpuara’a e fa’a’ohipa i te mau pāpa’ira’a mo’a i roto i tō ’outou iho orara’a. ’A uiui ia ’outou iho, e aha tā te Fatu e tāmata nei i te ha’api’i ia ’outou i roto i teie mau pāpa’ira’a mo’a ?

• ’A rave i te taime nō te feruri hōhonu. ’A tāmata ’eiaha e rū noa i tā ’outou taime tai’ora’a.

• ’A ani i te tauturu. Te tai’ora’a ’e te hō’ē hoa fa’aipoipo, te hō’ē hoa ’aore rā te hō’ē ta’ata i te fare e fa’atupu mai i te mau ’āparaura’a maita’i ’e e tauturu ia ’outou ’ia ha’amana’o e tai’o i te mau mahana ato’a.

E nehenehe ’outou e māta’ita’i i te hō’ē fa’a’ite’itera’a nō te orara’a o te ari’i Iosia i roto i te hō’ē video tei hāmanihia e te ’Ēkālesia, « Josiah and the Book of the Law [Iosia ’e te buka o te ture] », i te ChurchofJesusChrist.org.