ITULAU I LE LOTOIFALE
Faamanuiaina e Ala i le Auauna Atu
Sa mama’i uma i ma’ua ma lo’u toalua i le Koviti-19 ia Iuni 2021, ma oo i le tulaga ua lē mafai lava ona tutū i luga. O a ma pepe e toalua—o le 6-masina le matua ma le lua tausaga le matua—sa ola maloloina lava, ae sa manaomia ona la aai, ma o a’u, lo la tina, sa lē mafai lava ona tulai mai le moega.
Sa fai mai lo’u tina matou te o atu i lona fale ina ia mafai ona ia tausia a’u ma la’u fanau. O lo’u faafitauli o le tau filifili lea i le va o le manuia o o’u mātua po o la’u fanau. O lo’u tama ma lo’u tuagane sa inu i fualaau e tele mo gasegase e lē fesootai ma le Koviti. Ou te le i manao e avatu i lo’u aiga lautele le vairasi, ae sa manaomia e la’u fanau se isi e mafai ona tausia i la’ua.
O le aso fanau o lo’u tinā le aso lea na matou o ai i lona fale. Sa ia tausia a’u ma lo’u tamā, ae tausia e o’u uso ma tuagane la’u fanau. O lo’u toalua, o ia foi o le epikopo o le matou uarota, e lē i sau auā sa manaomia ona i ai o ia i le nofoaga sa loka faatasi ai ma tagata o lana uarota i ne’i vaevaeina ni tuaoi i totonu o le eria o Suva; sa loka lo matou atunuu.
Sa tausia a’u e lo’u tinā ma ou toe maloloina ai ona gasegase ai lea o ia i le KOVITI. I le taimi lea, sa matuā mamafa tele galuega o le ofisa o soifua maloloina o Fiti lea e alu ni aso faatoa tali mai le pulega ia matou valaau faafuasei. Na faatonu mai matou te o lava i matou e ave o ia i le falemai. Sa tuu lo’u tinā i se faleie mo gasegase i le KOVITI; sa leaga tele le tulaga i totonu o le faleie ma sa lagona e lo’u tamā e tatau ona i ai se mea matou te faia.
I se tasi aso na savali sa’o atu lava o ia i totonu o se faleie e tumu i gasegase o le KOVITI ona sa manaomia e lo’u tina le fesoasoani e alu i le faletaele, ma sa leai se isi iina e fesoasoani ia te ia. Sa momomo foi lona loto mo isi gasegase iina. I ni nai aso mulimuli ane na siitia ai loa Mama i le potu tigaina (ICU).
Na matou amataina ai se pusa-Meaai Maloloina mo gasegase KOVITI i totonu o faleie, e faamalosia ai lo latou puipuiga. Sa fesoasoani a matou uo ma aiga i luga o le Api o Foliga—i latou uma e auai faatasi ai ma i latou e lē auai i le Ekalesia—sa fesoasoani ia i matou e tuufaatasia taga meaai ma fualaau aina e fesoasoani ai i gasegase ina ia soifua maloloina.
Na talosaga mai sa’u uo e faia se ipu supo mo lana uo, lea sa i le fale faanofoesea mo tinā, auā sa lē i lava ni meaai na maua e i latou. O lenei tinā sa i le matou eria lea o loo i ai i vavao, ae ua lē mafai ai e tagata o lona aiga ona sopoia le tuaoi e taulimaina ona manaoga.
Sa ou lagona na manaomia ona matou faia supo mo isi tagata uma o e sa ono i ai i le tulaga lava lea. Sa ou faia se sāvali tusitusia i luga o le Api o Foliga e saili ai isi o ē sa naunau e fesoasoani e faia supo mo tinā maitaga ma tinā o pepe fou o loo faanofoesea. O lenei mea na aumaia faatasi ai le tele o tagata agalelei, na autasi i se galuega e fesoasoani ai i ē sa mafatia.
Sa kukaina e lo’u toalua ma lona uso ia supo muamua lava ma kiliva atu i le nofoaga sa faanofoesea ai ia tinā. O lo’u tamā ma o’u uso ma tuagane sa faia kiliva ae i aso e lagona ai le vaivai tele o lo’u tama e ave le taavale, ua aumai lo’u toalua ma lona uso—o ē sa nonofo i se isi taulaga—e fesoasoani mai.
E lua masina sa i ai Mama i le falemai ma na fai mai soo lava fomai atonu o le a lē manuia o ia. Na oo lava ina tiai e tagata faigaluega o le falemai ona lavalava, ma le manatu o le a i’u lona soifua. Sa faia a matou tatalo faaleaiga i po uma lava faatasi ma lo’u tinā i luga o le vitiō ma sa matou lagona atu le mamafa o lana manava, ma le ii mai i tua o leo o masini o loo mataituina ai.
I le tele lava o po i le 7.00pm tonu lava, sa telefoni mai lava Mama e faalogologo i la matou tatalo faaleaiga. I po sa lē telefoni mai ai o ia, na matou iloa sa lē lava le malosi o lana faalogona, ma na atili ai ona finafinau a matou tatalo. O la matou auaunaga i isi gasegase ma la matou tauiviga ma le Alii e ala i tatalo faaletagata lava ia ma faaleaiga sa fesoasoani ia i matou i lenei taimi taufaamata’u.
O la matou auaunaga sa ono fesoasoani i isi, ae o matou tagata sa faamanuiaina . . . Na soifua pea Mama ma foi manuia mai i le fale!