O le Tala a Nikki

Potu Tala Fou

Faatuatua, aiga ma le saunia mo luitau.

Sa taunuu Nikki Estevez i Adelaide, Ausetalia mai Filipaina ia Setema 2019.

I ni nai vaiaso talu ona taunuu sa faigata lava lona aso, sa tauivi ma le gagana ma lagona lava le faanoanoa, ae ona faalogoina loa se leo o fai mai, “Ou te fiafia i lou pulou.”

Ina ua liliu o ia i tua sa vaai ai i faifeautalai e toalua mai i Le Ekalesia a Iesu Keriso o le Au Paia o Aso e Gata Ai o loo ataata mai ia te ia. Sa iloa atu e Nikki a la pine ma na iloa ai o i laua o faifeautalai aua o lana uo sili a o tuputupu a’e i Filipaina o se tagata o le Ekalesia.

O ia faifeautalai sa auauna i le paranesi (au lotu) a le aai o Adelaide i le taimi lea ma e talu ai e lē mamao tele ese mai le nofoaga o sauniga a le paranesi sa la fesili ai ia Nikki pe manao o ia e vaavaai i le nofoaga e tapuai ai i latou i Aso Sa taitasi.

Talu ai e leai ni fuafuaga a Nikki ma sa manaomia e ia se mea ese e siitia ai lona agaga, sa malie i ai o ia.

O se tasi o mea muamua lava na ia iloa atu o se ata vali O le Muai Faaaliga, lea e faaalia mai ai Iosefa Samita o loo asia e le Atua le Tama ma Lona Alo o Iesu Keriso i le 1820. A o matamata o ia i le ata, sa oo mai i lona mafaufau upu, “O Lo’u Atalii Pele Lenei, Faalogo ia te Ia”.

Fai mai Nikki i sina taimi lava lena sa lagona ai e ia “o mea uma lava sa [ia] oo i ai i [lona] olaga na saunia [ia] e auai i le Ekalesia.”

Sa manatua e Nikki sa vaai i le ata vali lena i le fale o lana uo ma fesili ai pe aisea na i ai Iesu i lena ata. Sa faamalamalama e le tina o lana uo le Uluai Faaaliga ia te ia ma ina ua toe vaai Nikki i lena ata vali sa manatua e ia le faamalamalamaga a le tina o lana uo ae maise lava upu “O lo’u Atalii Pele lenei, faalogo ia te Ia.”

Fai mai Nikki i le taimi lava lena sa tutu mone o lona tino, lea sa ia iloa mulimuliane o le Agaga o loo fetalai atu ia te ia.

Sa faia lesona a Nikki e faifeautalai ma papatisoina ia Novema 2019, tolu masina talu ona taunuu atu i Ausetalia.

E le i umi lava ona auai Nikki i le Ekalesia ae matamata loa o ia i le Konafesi Aoao ma o se saunoaga a Elder David A. Bednar, e faaautuina “O le a Tatou Tofotofoina i Latou,” sa uuna’ia o ia e faalogo atu ma le toto’a i mea na saunoa mai ai le aposetolo a le Alii.

O le vaega e faatatau i le teuina o meaai sa faapitoa lava ona alu i ai le mafaufau o Nikki. Ina ua maea le konafesi sa musuia o ia e telefoni i lona aiga i Filipaina e faasoa i ai mea sa ia aoaoina. O lona aiga e le o ni tagata o le Ekalesia ma sa matuā lē fiafia lava ina ua manao Nikki e auai i le Ekalesia. O le mea moni, sa matuā lē fiafia lava i latou ma sa mananao e toe foi atu o ia i lona aiga i Filipaina.

Ae peitai, o lona tamā, lea na fai mai Nikki, “o se tagata e matuā faamaopoopo” ma taumafai lava ia saunia, sa faapitoa lava lona fiafia i mea sa fai atu ai lona afafine.

Fai mai Nikki i taimi o a latou talanoaga i le telefoni muamua atu na te fesili mai lava ia te ia, “O a mai lau ato mo faalavelave faafuasei?”, “O lava au maa moliuila?” ma fesili lava faapena.

O mea la sa faasoa atu e Nikki i lona aiga sa mautinoa e matuā fiafia tele i ai lona tamā.

Fai mai Nikki sa faia loa lava e lona tamā ma amata ona faatau mea sa latou talanoa i ai faapea foi mea na lisi atu i se pepa o faamatalaga a le Ekalesia mo le teuina o meaai lea na ia lafoina atu ia te ia.

E tusa pe tolu vaiaso mulimuli ane ae faatamaia loa lo latou itulagi e se faasologa o afa. Sa lē mafai e tagata o lo latou nuu ona o i fafo o o latou fale mo le fa aso ma sa motusia foi a latou laina telefoni.

Sa matuā popole tele Nikki mo ona mātua ma lona uso i lenei taimi ma matuā vevesi o ia ina ua lē mafai ona fesootai atu ia i latou. Ma o lona lē iloa po o ola ma saogalemu i latou na afaina tele ai o ia.

Ina ua iu ina mafai ona fesootai Nikki i lona aiga sa matuā faagaeetia o ia i le iloaina o loo saogalemu i latou uma.

Sa faamaualaloina foi Nikki ma maligi ona loimata ina ua ia faalogo sa talia e lona aiga ana upu e uiga i le teuina o meaai ma o lona tinā ma lona tamā, ia sa nonofo i se faatoaga, e lē gata ina sa lava mea uma sa la manaomia ae sa mafai foi ona la fesoasoani i o laua tuaoi i meaai teu sa la faaputuina i lena taimi puupuu.

O le uso o Nikki lea sa nofo na’o ia i le fogāfale pito i luga o se fale fogāfalelua sa lavea foi i le afa. O tagata sa nonofo i le fogāfale i lalo sa saili se sulufaiga auā sa matuā lolovaia atoa lo latou fale.

E lē gata sa mafai e le uso o Nikki ona avatu ia i latou se apitaga saogalemu i lona falealuga ae sa mafai foi ona ia fafagaina i latou i meaai teu sa faaputuina foi e ia faafetai i le musumusuga a Nikki e faasoa atu i lona aiga mea sa ia faalogo i ai mai i se aposetolo a Iesu Keriso.

O ni vaega ia mai i le saunoaga a Elder David A. Bednar ia Oketopa 2020:

“O le tausaga 2020 ua faailogaina, i se vaega, e se faama’i oti i le lalolagi ua tofotofoina, suesueina, ma lu’itauina ai i tatou i le mau auala. Ou te tatalo o loo tatou aoaoina o ni tagata taitoatasi ma ni aiga ni lesona taua ia e na o aafiaga faigata e mafai ona aoao ai i tatou. Ou te faamoemoe foi o le a faamamalu atoatoa atili e i tatou uma le ‘silisiliese o le Atua’ ma le mea moni e faapea ‘o le a ia faapaiaina [o tatou] puapuaga mo [lo tatou] manuia.’”¹

“O le taimi lenei e sauniuni ai ma ia tofotofoina i tatou lava ua loto ma mafai ona faia mea uma o soo se mea o le a poloaiina ai i tatou e le Alii lo tatou Atua”².