“Tekem Yumi Sef i Go long Ples we Yumi Nid blong Stap long Hem,” Liahona, Maj 2024.
Kam Folem Mi
Tekem Yumi Sef i Go long Ples we Yumi Nid blong Stap long Hem
Sevya bae i oltaem helpem yumi long rod blong yumi long plante wei.
Taem mi bin gat 12 yia nomo, famli blong mi i muvaot long sabtropikol Hong Kong i go long wan ples we i kolkol mo weta we mifala i no save gud. Kwiktaem, oli invaetem mi long fas winta haek wetem ol yang man long wod.
Long dei blong haek, mi werem ol klos we i wom olsem we mi save. Taem mifala i wokbaot sloslo kasem rod blong maonten we i gat plante win, mi glad tumas blong luk sno we i foldaon mo kavremap graon. Mi no bin werem klos blong ples mo weta ia, be mo mi gat hadtaem blong stap wetem grup blong mi. Mi talem long olgeta blong oli go fastaem mo bae mi save folem olgeta we mi biliv oli stap folem mifala.
Taem mi stap gohed long rod blong miwan, sus blong leg mo klos blong mi i kam wetwet mo ol han, leg mo fes blong mi i kam nam. I stat blong sno bigwan mekem se mi nomo save luk rod. Afta we mi stap miwan blong sam taem, mi luksave se mi lus, mi stap miwan mo no save sapos wan i save se mi lus.
Samtaem long laef ia, yumi filim se yumi no rere, lus o stap bihaen. Yumi save lusum stret daereksen mo no luksave rod we i stap long fored long yumi. I olsem se moa yumi traehad blong muv i go fored, moa yumi go longwe long ples we yumi wantem blong go kasem. Filing blong harem nogud i save kam mo temtesen blong givap i save kam moa strong.
I gud tumas we, Sevya Jisas i gat paoa blong lidim ol step blong yumi, leftemap yumi taem yumi foldaon (luk long Ol Sam 37:23–24), mo givim spel long yumi (luk long Matiu 11:28), hilim (luk long Aesea 53:5; Alma 15:8; Doktrin mo Ol Kavenan 42:48), tras (luk Doktrin mo Ol Kavenan 121:45), mo pis (luk long Mosaea 4:3; Alma 38:8; Doktrin mo Ol Kavenan 19:23). “Kam kolosap long mi,” Hem i talem, “mo bambae mi kam kolosap long yufala; lukaotem mi wetem strong tingting mo bambae yufala i faenem mi; askem mo bambae yufala i kasem; noknok, mo bae i open long yufala.” (Doktrin mo Ol Kavenan 88:63). Stret rod bae i no klia oltaem be yumi save folem Sevya wetem fet se rod blong yumi bae i finis gud mo wetem glad from bae Hem i lidim yumi sef i go long ples we yumi nid blong stap long hem.
Yumi save oltaem luk long Jisas Kraes from se Jisas Kraes i “rod ya, mo [i] stamba blong trutok, mo [i] stamba blong laef” (Jon 14:6).
Stret wei blong Rod blong Yumi
Long stadi blong yumi long Buk blong Momon long yia ia, yumi bin folem Lihae mo famli blong hem long rod blong olgeta i go long promes graon. Tingting long wanem nao famli blong Lihae i bin fesem taem oli stap wokbaot long rod blong olgeta:
-
laf jik mo poenem fingga blong stap bilivim mo folem ol profet.
-
eksjenjem ol kamfot blong wan waelples we yumi no save
-
travel we oli no klia long olsem wanem longwe blong kasem o taem.
-
hanggri, harem nogud, sik mo ded
-
ol hadwok, samtaem oli no andastanem ol risen blong olgeta o olsem wanem blong mekem i hapen
-
ol gobak, i tekem taem, ol raorao mo ol harem nogud
-
hadtaem blong stap lukaotem ol yang famli
Long rod i go, yumi luk tu olsem wanem Lod i helpem olgeta oltaem. Hem i provaedem
-
lidasip blong profet mo revelesen blong yuwan,
-
ol skripja we oli holem ol promes blesing mo ol kavenan,
-
rekod blong famli laen mo famli histri,
-
ol niu tul mo fasin blong provaedem blong ol nid blong olgeta,
-
kam antap long paoa blong winim ol hadtaem,
-
waes tingting mo instraksen blong mekem i hapen ol wok we oli nogat save long hem,
-
Liahona (wan tul blong helpem olgeta long wokbaot blong olgeta), mo
-
sefti mo proteksen blong famli blong olgeta.
Semmak olsem famli blong Lihae, bae i no se rod blong yumi bae i no gat ol jalenj mo sakrifaes. Sevya bae i oltaem helpem yumi tu long ol naesfala wei. Nifae i tijim, “wei we i stret hem i blong biliv long Kraes … wetem ful paoa blong tingting, ful maen mo ful paoa blong yufala” (2 Nifae 25:29). Sapos yumi jusum fet long Jisas Kraes, putum tingting i stap daon blong kasem toktok blong Hem mo gat strong tingting ia blong mekem, bae yumi faenem glad mo ol blesing long medel blong ol hadtaem we yumi stap fesem. Long rod i go, yumi save gat tras se yumi save mekem i hapen wanem Hem i wantem yumi blong mekem (luk long 1 Nifae 3:7).
Hemia sam long plante wei we Sevya i gohed blong helpem yumi.
Stat blong wan Dei we I Saen Gud Moa, i kam long Simon Dewey
Hem Givim Yumi Doktrin Blong Hem
Jisas Kraes i save “en stat long stat” (Ebraham 2:8). Hem tu i “makem rod mo lidim yumi long rod.”1 Doktrin blong Hem we yumi save insaed long ol skripja olsem doktrin blong Kraes, i rod we yumi evriwan i mas folem blong save kam fri mo sef.
Yumi mas gohed blong eksasaesem fet long Jisas Kraes, sakem sin oltaem, kasem baptaes, kasem presen we i Tabu Spirit, go insaed long kavenan rod mo traem bes blong yumi blong stap strong kasem en. Long en, Hem i promesem yumi fogivnes, hop mo laef we i no save finis. (Luk long 2 Nifae 31:2–20.)
Long wan wol blong ol defren rod mo ol wei we oli no semmak, doktrin blong Kraes i givim klia mo givim inaf daereksen we yumi save folem blong kipim yumi wokbaot long stret rod (luk long 2 Nifae 31:21).
Hem I Givim Yumi Kamfot
Tru long sakrifaes ia we i Atonmen blong Hem, Sevya i save olsem wanem blong gat filing ia blong stap yuwan mo nogat wan i tingbaot yu. Hem i save gud tu olsem wanem blong givim yumi kamfot. Hem i talem, “no letem tingting blong yufala i trabol” (Jon 14:1) mo “mi no save lego yufala i stap nomo olsem: Bambae mi mi save kambak bakegen long yufala” (Jon 14:18).
Sevya i promesem presen ia blong Givim Kamfot, we i Tabu Spirit long olgeta we oli biliv long Hem. Hem i talem se Kamfota: “bae i save tijim yufala long evri samting, mo bae hem i save mekem yufala i tingbaot olgeta samting ya bakegen” (Jon 14:26
Hem I Provaedem Yumi wetem Toktok blong God
Tru long Restoresen blong gospel blong Jisas Kraes long dei blong yumi, Lod i givim yumi olfala mo lata-dei skripja we oli holem toktok blong God. Nifae i tijim se “eni man we bae i lisin gud long toktok blong God, mo bae i hang strong long hem bae i neva lus” (1 Nifae 15:24).
Kakai gud evri dei long toktok blong God i protektem mo lidim yumi blong eksperiensem moa lav oltaem. Tok blong Hem i olsem laet (luk Sam 119:105) mo “bae i talem long [yumi] evri samting we [yumi] mas mekem.” (2 Nifae 32:3).
Hem I Gaedem Yumi tru long Ol Wokman blong Hem—Ol Profet mo Ol Aposol
Jisas Kraes i bin singaotem ol profet mo ol aposol blong helpem yumi. Ol kaonsel mo tijing blong olgeta i blong yumi mo blong dei blong yumi. Sapos yu faenem yu lus yuwan o konfius long rod blong yu, yu save faenem se i gat help blong tingting hevi long tri kwestin:
-
?Olsem wanem Lod i priperem mi tru ol toktok blong ol profet mo ol aposol from ol tes we mi stap eksperiensem?
-
?Wanem nao ol profet mo aposol oli invaetem mi blong mekem tedei blong rere from ol jalenj we stap long fored?
-
?Wanem nao mi stap mekem naoia blong folem ol invitesen blong profet?
Taem yumi tingting hevi long ol kwestin ia, yumi save luksave hamas gaed blong ol profet mo aposol oli impoten. Yumi save harem moa gud voes blong Lod mo tekem notis long olsem wanem Hem i oltaem helpem yumi. Sapos yumi jusum, yumi save lisin long ol profet mo ol aposol mo faenem gaed, rij samting mo proteksen long rod we i lid i gobak long Papa long Heven mo Pikinini blong Hem, Jisas Kraes.
Elda Tai long Sierra Nevada seleksen blong Kalifonia samples long 1988. Stori we hem i serem i bin tekem ples long Mount Baden Powell long San Gabriel Mountains blong Kalifonia long 1984.
Hem we i raet i glad blong givim pikja ia
Fet blong Muv I Go Fored
Lus, kolkol mo stap miwan long sno hil ia blong plante yia bifo, mi gat wari. Mi no save wanem moa blong mekem, mi nildaon long niu sno we i foldaon mo prea i go long Papa blong mi long Heven blong i help. Mi serem hadtaem mo fraet blong mi wetem Hem mo askem blong oli save faenem mo givhan long mi.
Taem mi girap afta we mi prea, sno i go daon raon long mi mo wan naes kwaet i fulumap ol tri. Mi harem wan samting i kam kwik kolosap insaed long ol bus we i distebem pis ia. Tu bigfala boe i kamkamaot. Tufala i kasem antap finis mo afta blong folem rod, tufala i jusum blong ski i kamdaon long hil. !Long evri ples, tufala i ski i kam stret long ples we mi stap long hem!
Taem tufala i askem mi wanem mi stap mekem, mi bin talem long tufala se mi lus. Tufala i invaetem mi blong joenem tufala mo tugeta mifala i ski sef i go daon long rod long fored blong hil. Long en mifala i kam wan bakegen wetem ol nara grup blong mifala.
Taem yumi i stap muv i go fored long rod blong yumi wanwan wetem fet, divosen mo stap gohed strong, bae yumi luksave olsem wanem Sevya i wokbaot wetem yumi mo oltaem helpem yumi. Jisas Kraes i rod, trutok ia mo laef ia. Bae fet blong yumi i givim pis long ol maen mo glad long rod blong yumi.