“Wan Fes long Windo,” Liahona, Maj 2024.
Ol Voes blong Ol Lata–dei Sent
Wan Fes long Windo
Mi stap tingting se neba blong mi oli mekem tumas noes, be mi faenemaot se hem i jes nidim wan fren nomo.
Hem we i raet i glad blong givim pikja ia
Oltaem mi stap luk wan semmak fes we i stap lukluk mi long wan windo blong apatmen. Mi stap tingting long miwan se, “?hem i no wan samting nogud blong wan we oltaem i stap lukluk tru long windo blong olgeta, mo stap jajem ol aktiviti blong ol neba blong olgeta?”
Afta, wan dei mi tingting se ating bae mi mas go askem sapos mi save help long eni wei. Mi disaed blong tekem sam fres bred we mi kukum wetem mi i go.
Wom bred ia i meltem hat blong olfala neba blong mi. wetem wota long ae blong hem, hem i talem long mi hamas hem i stap stap hemwan. I no gat bin gat wan i visitim hem, mo i no bin gat wan i ringim hem iven ol stret pikinini blong hem. wetem wan han we i stap seksek, hem i waepemaot ol wota blong ae we kamdaon long fes blong hem.
Hem i pulum win mo afta, i talem, “Bae i naes tumas blong lego wol ia nomo. Mi no jajem eniwan taem mi lukluk tru long windo blong mi. Mi stap wajem nomo ol pikinini oli stap pleiplei mo ol narafala samting we oli stap hapen long yad.”
Pikja i kam long Alex Nabaum
Mitufala i tokbaot gospel blong smoltaem. Long fastaem hem i no rere blong serem ol tingting blong hem from se hasban blong hem i bin givim seves olsem wan ofisol insaed long wan narafala jos. Be taem mitufala i gohed blong toktok, hem i wantem blong serem moa ol filing mo tingting blong hem wetem ol trutok we mi bin serem abaot Jisas Kraes mo gospel blong Hem we i bin kambak.
Hem i se “!I naes tumas we yumi gat semmak Jisas!”. “?Bae yumitu luk wanwan long yumitu long heven?”
Mi ansa, “Yes, bae yumi stap long ples ia tugeta—kolkolosap.”
Stat long taem ia i go, mitufala i kam gud fren blong plante yia kasem taem we hem i lego wol ia.
Naoia mi laekem blong tingting se foma neba blong mi i stap lukluk tru long windo blong hom blong hem long heven, stap folem ol aktiviti blong mifala mo stap hop se mifala i gat inaf yuniti mo lav long wanwan long mifala.