“Ol Toktok blong Trutok,” Liahona, Maj 2024.
Ol Eksampol blong Fet
Ol Toktok blong Trutok
Mi bin gat plante kwestin, be fianse blong mi mo Jos i bin helpem mi blong faenem ol ansa.
Hem we i raet i glad blong givim ol pikja ia
Taem mi stap groap long wan kalja we i no Kristin long Taewan, mi no groap blong kam wan Kristin Man. Mi bilivim God, be mi no save eni samting abaot Jisas Kraes. Relijin blong mi, hem i wok blong mi mo bisi sosol laef blong mi we i go wetem. Hemia i tekem tu plante fasin blong stap drink mo smok. Mo tu, mi wan we mi drink plante kofi mo lipton. Evri samting ia oli pat blong bisnis kalja blong mifala.
Mi kam blong save Jos Ia blong Jisas Kraes blong Ol Lata-dei Sent tru long fianse blong mi mo famli blong hem. Chase hem i blong Amerika. Hem i graop long Jos mo givim seves long wan misin, be hem i no bin aktiv long tetaem ia. Be bigfala pikinini boe blong hem i bin stap rere blong go givim seves long wan misin, mo Chase i sapotem desisen blong hem.
Long taem blong KOVID-19 lokdaon, mifala i go long haos blong papa mo mama blong Chase blong mekem sakramen miting, stap wajem ol brodkas we i stap tekem ples long jos miting haos we oli bin stap go long hem. Taem ol toktok i en, tufala boe blong Chase i blesem mo pasem bred mo wota.
Mi bin gat fulap kwestin. Fianse blong mi i bin ansarem wanwan kwestin wetem tingting we i save wet longtaem. ?Huia i Jisas? ?Wanem filing ia we mi filim insaed long hat blong mi evri taem we mifala i kam tugeta blong gat ol miting blong jos? Hem i wan filing we mi neva filim bifo. ?Wanem nao bred mo wota i ripresentem? ?From wanem wota blong ae i fulap long ae blong mi taem mi tekem sakramen? ?Wanem nao pis ia we mi stap filim ia?
Wan naet mi faenem wan websaet we i stap long lanwis blong mi we i eksplenem huia Jisas mo hemia i tokbaot laef blong Hem. Long nekis dei, mi talem long mama blong fianse blong mi se mi andastanem huia i Jisas mo se mi biliv long Hem.
Wan Sandei bisop i kam long haos from se bigfala boe blong Chase bae i odenem yangfala brata blong hem blong kam wan pris. Taem we bigfala boe i putum han blong hem long hed blong smol brata, mi nomo save stop blong krae. Hat blong mi i fulap long ol filing we mi no save stopem wota blong ae. Afta, fianse blong mi i eksplenem se mi bin filim Tabu Spirit mo se hem tu i bin filim.
Mi save luksave se lav blong fianse blong mi long jos blong hem i stap kambak long hem. Long sam wei, mi save se evri filing we mi stap filim oli konek wetem God mo long wan samting we i tru. Mi filim lav olsem we mi neva bin filim bifo.
“Mi Singaot I Go long God”
Turis visa blong mi i en mo mi mas gobak long Taewan. Long ol manis we mi bin stap miwan, mi misim wanem we mi bin filim. Blong wan smoltaem, mi bin gat filing ia blong lusum hop mo tudak i fulumap mi. Ol filing ia oli kam bigwan tumas we i mekem se mi wantem blong givap. Mi no save gud olsem wanem blong prea, be mi bin singaot i go long God mo talem long Hem evri samting we mi stap filim mo tingting long olgeta. Wan filing blong pis i kam—semmak filing we mi bin eksperiensem taem mi bin go long jos long ples we mi stap long hem. Mi save se hem i Tabu Spirit. Hem i mekem ol tingting blong mi kamdaon.
Afta long hemia, fianse blong mi i sendem ol misinari blong kam tijim mi. Mo mi bin talem long olgeta se mi bin save abaot gospel we i bin kambak se i tru mo se mi andastanem filing we i kam tru long Tabu Spirit. Be mi bin wari se bae i had tumas long mi blong stopem smok mo blong stap drink kofi mo lipton.
Mi stat blong go long jos, ridim Buk blong Momon, mo mit wetem ol sista misinari tri o fo taem long wan wik. Long en, Tabu Spirit i bin helpem mi blong stop blong smok mo drink kofi mo lipton.
Fren blong mi we mitufala i bin groap tugeta i stat blong luk ol jenis long mi evri wik. Mi invaetem hem blong kam long ol taem we mi stap mit wetem ol misinari. Taem hem i lisin, hem i filim tu Tabu Spirit mo kasem wan testemoni. Taem we ol trabol blong KOVID-19 i godaon, naoia fianse blong mi i kam aktiv long Jos, long en, hem i save kam long Taewan. Mitufala i mared mo hem i baptaesem mi. Mi kam wan niufala man.
Sista weiling Chen Canfield (Winnie) wetem ol sista misinari mo ol memba long wod we oli bin tijim mo felosip wetem hem. Hem i talem se “Mifala i gohed yet blong toktok evri wik mo wok tugeta long niufala koling blong mi long Rilif Sosaeti.”
Ol laeftaem fren blong mi mo ol bisnis fren blong mi, we i tekem tu sam long ol bank mo ol ejen blong maket stok, oli talem se oli save luk se mi defren mo mi hapi moa. Mi invaetem olgeta blong kam long baptaes blong mi, mo oli bin kam. Afta long evri samting, oli talem long mi se oli bin filim wan samting we oli neva bin filim bifo.
Mi mi no fraet blong talem long ol narawan wanem we mi save mo filim abaot Jisas Kraes—se wanem we mi save i tru. Mi save se testemoni blong mi i saen gud. Ol narawan we oli bin save ful laef blong mi oli luk hemia. Respek blong olgeta long bilif blong mi i iven stopem olgeta blong no stap smok mo stap drink strong dring long taem blong ol bisnis miting mo dina blong mifala. Hemia i wan spesel samting long kalja blong bisnis blong mifala.
Sista Canfield wetem Jin Hua, tufala i fren blong mi blong longtaem mo tufala i intres long Jos tru long taem we sista Canfield i jenisim laef blong hem.
Mi mi no fraet blong letem ol narawan oli luk, harem mo filim testemoni blong mi. Mi biliv se plante pipol we oli no save olsem wanem blong faenem God mo Jisas Kraes bae oli filim ol semmak samting we mi bin filim taem oli harem ol toktok blong trutok. Oltaem bae mi rere blong serem ol toktok we oli bin jenisim laef blong mi.