Liahona
Ol Pipol Oli Stap Raon long Mi be Yet, Mi Filim se Mi Stap Miwan
Maj 2024


“Ol Pipol Oli Stap Raon long Mi be Yet, Mi Filim se Mi Stap Miwan,” Liahona, Maj 2024.

Ol Yang Adalt

Ol Pipol Oli Stap Raon long Mi be Yet, Mi Filim se Mi Stap Miwan

Taem mi muvaot longwe long hom, koneksen blong mi we i go long heven i helpem mi blong winim ol filing blong stap stap miwan.

Pikja
wan woman wetem ol saen blong laet we i raonem hem, long taem we ol defdefren pipol oli wokbaot raonem hem

?Yu save kaen filing ia we long ples ia we yu stap long hem i gat ol pipol oli raonem yu be yet, yu filim se yu stap yuwan fultaem?

Stat long taem we mi stap lego hom kantri blong mi long Yukanda mo stap muv i go long Dubae blong wok, kolosap oltaem mi stap filim se mi stap miwan. Bak long hom long ples blong ol neba blong mi, ol pipol oli talem halo long wanwan long olgeta long rod. Mifala i savsave mifala wanwan. Mifala i sapotem mifala wanwan. Mi gat plante fren mo famli we oli bin gat semmak biliv wetem mi.

Be i no semmak long ples ia. Mi laef long wan defren kalja, long wan bigfala siti mo ol pipol we oli stap raonem mi oli wok long ol bisi wok. Mo nomata se mi traem blong go long wod blong mi mo traem blong kam blong save long ol narafala yang adalt mo ol memba blong wod, ol bisi taemtebol blong mifala oli mekem kolosap i no posibol blong luk mifala wanwan blong moa long sam aoa nomo we mifala i spenem long jos evri wik.

Dubae i bigwan mo i gat ol samting we oli naes tumas, mo mi glad blong stap long ples ia. Be i bigwan tumas we i mekem se yu save stap filim, speseli, se yu stap yuwan. Ol pipol oli gat tumas samting long ples ia mo luk olsem se oli gat evri samting we oli nidim long laef. Be, taem mi stap laef long medel blong evri naesfala samting ia mo ol naesfala bilding ia, samtaem mi stap tingting se:

?Wanem nao mi stap mekem wetem laef blong mi? ?Hemia i stret ples ia nao blong mi?

Stap Faenem Se Mi Stap Pat Bakegen

Elda D. Todd Christofferson blong Kworom blong Olgeta Twelef Aposol i eksplenem se “filing ia blong stap pat hem i impoten long saed blong bodi, tingting mo gud blong spirit.”1 Mi jes no luksave hamas filing ia blong stap pat i impoten kasem taem mi nomo filim—i tru, i no long jos mo i no long eni ples.

?Olsem wanem nao bae mi kam blong fanemaot naoia, taem mi stap longwe long evri wan we mi lavem?

Samtaem i pas, mi stat blong luksave blong “mekem Jisas Kraes i stap long medel.”2

Olsem hamas mi stap misim yet ol fren blong mi mo famli, mi stat blong luk se mi no bin seperet long evriwan long laef blong mi long taem we mi bin muvaot—mi gat yet wan Sevya mo wan Papa long Heven we i gat lav, we oltaem Hem i wantem blong stap konek wetem mi.

So mi stat blong mekem wanem we mi save mekem blong stap konek wetem Tufala moa gud evri dei. Mi stat blong stap lisin long ol Kam Folem Mi stadi brodkas taem mi stap go ronron. Mi putum hed fon blong mi long wok mo lisin long ol skripja taem mi stap finisim ol wok.

Wanem we i moa impoten i we, mi lanem se hem i wan naesfala presen ia blong save prea stret i go long Papa long Heven. Oltaem mi toktok moa wetem Hem mo tingting hevi moa bitim we mi bin stap mekem bifo. Taem mi filim se mi stap miwan, mi prea mo filim kamfot blong Hem. Taem mi stap raetem wan imel mo stap traem blong gat fasin blong save wet longtaem wetem olgeta we mi wok wetem olgeta, mi prea mo askem help blong Hem.

Mi lavem wanem we Presiden Thomas S. Monson (1927–2018) i bin talem abaot prea: “Long olgeta we … oli stap traehad long ol jalenj mo ol hadtaem we oli kam, oli bigwan mo oli smol, prea i stamba ples blong givim paoa long saed blong spirit; hem i paspot blong pis. Prea i wan wei we yumi save toktok wetem Papa blong yumi long Heven we i lavem yumi. Toktok long Hem tru long prea mo afta, lisin blong kasem ansa. Ol merikel oli hapen tru long prea.”3

Blong mekem taem from Olgeta long laef blong mi, speseli tru prea wetem tru hat, mi stat blong luk se nomata ol pipol blong mi oli no stap raon long mi mo kalja blong miwan, yet Spirit i save stap raon long mi mo filim lav blong God.

Oltaem Yumi Save Stap Konek

Ol Samting oli had yet, be mi gat hop blong fiuja. Mo mi kam blong bilivim wanem we Brata. Milton Camargo, Fas Kaonsela long Sandei Skul Jeneral Presidensi i bin tijim: “Lod Jisas Kraes i stap laef tedei. Hem i save stap aktiv, mo stap oltaem long laef blong yumi. Hem i ansa long ol problem blong yumi, be yumi mas leftemap ae blong yumi mo lukluk long Hem.”4

Yet samtaem, mi stap stap miwan, be oltaem mi save se, oltaem bae mi save prea long Papa long Heven mo save kasem Atonmen blong Jisas Kraes.

Mi save prea taem mi stap stanap o nildaon, stap miwan o long wan grup.

Mi save krae long Papa long Heven.

Mi save talem ol tangkyu.

Mi save askem daereksen mo proteksen.

Mo tru long kavenan koneksen blong mi, mi save se mi, wan pikinini gel blong wan Papa long Heven we i gat lav, bae oltaem mi stap pat blong Hem. Tru long daereksen blong Hem, mi save gat tras se mi stap long raet ples, stap mekem wanem we Hem bae i wantem mi blong mekem.

Printim