“Yu Stap Pat,” Liahona, Maj 2024.
Ol Yang Adalt
Yu Stap Pat
Yumi save faenem filing ia blong stap pat taem yumi developem wan rilesensip we i gat mining wetem Papa long Heven mo Jisas Kraes.
Infomesen i kam long Glori insaed long Ol Digri, i kam long Annie Henrie Nader
Wanwan long yumi i bin bon wetem wan filing we oltaem i stap insaed long yumi we i nid ia blong stap pat. I nomol oltaem blong yumi filim se yumi stap pat insaed long ol grup blong ol famli blong yumi, ol fren, olgeta we yumi wok tugeta long wokples, ol wod mo ol narafala pipol long laef blong yumi. Oltaem hat blong yumi i gat ol filing ia blong heven blong stap wantem tumas blong gat wan dip mo wan nid we i blong oltaem stap pat.
Yu mo mi i bin—mo yet, stap olsem—pat blong wan famli we i no save finis wetem Papa blong yumi long Heven, longtaem finis bifo yumi kam long wol. Ol skripja oli tokbaot yumi olsem “ol strenja mo ol man we oli lukaotem God long wol;” (Hibrus 11:13; Doktrin mo Ol Kavenan 45:13). Blong stap lego hom blong yumi long heven mo blong stap kam long wan wol we i fulap long ol tingting we i fasfas, filing blong stap yuwan oltaem, mo hat we soa, mo yumi save filim olsem ol strenja, we yumi stap wantem tumas blong gat wan hom mo rilesensip we i no save finis.
Sapos yu filim smol se yu misim heven, maet hem i from se tru hom blong yumi mo aedentiti blong yumi oli fasem wetem Papa blong yumi long Heven mo Sevya, Jisas Kraes. Hemia nao i from wanem hem i impoten tumas blong gat wan dip koneksen wetem Tufala. Taem yumi konek long Tufala tru long kavenan rilesensip blong yumi, bae yumi faenem tru filing blong stap pat we spirit blong yumi i stap wantem tumas.
Tabu Rilesensip blong Yumi wetem God
Ol aksen mo ol tingting blong yumi oli soem ol rilesensip we i gat valiu long yumi. Hemia i semmak wetem kavenan rilesensip blong yumi wetem Papa long Heven mo Sevya.
Taem yumi tekem se ol kavenan rilesensip blong yumi wetem God oli impoten, evri samting oli jenis. Bae yumi kasem paoa blong Hem mo kam moa olsem Hem, bitim blong paoa blong wol i pulum tingting blong yumi. Laef blong yumi bae i stat blong karem long hemwan moa mining mo paoa mo fasin blong stap gohed strong long saed blong spirit. Kwiktaem, “blong stap gat pat” i minim moa long ol pat blong wanem we yumi tingting long hem long wol “blong stap gat pat long” i stap minim.
Taem we kavenan rilesensip ia wetem God i kam faswan, ol samting we oli no gat mining long wol ia bae oli lusum valiu mo yumi faenem tru pis blong yumi wanwan mo stap gat pat. Long wan wol we oltaem i no save givim samting fri o no gat praes, Papa blong yumi long Heven we i gat lav, i givimaot ol kavenan blesing nomata wanem situesen we yumi stap long hem long wol ia (luk long 2 Nifae 9:50–51).
Presiden Russell M. Nelson i tijim i neas tumas se “taem yumi mekem wan kavenan wetem God, yumi lego fasin blong blong wol fogud. God bae i no lego rilesensip we Hem i gat wetem olgeta we oli traehad blong joen wetem Hem. Be, olgeta we oli bin mekem wan kavenan wetem God oli save kasem wan spesel kaen lav mo sore.”1
Yumi faenemaot sapos yumi gat wan rilesensip we i kolosap wetem God—oltaem Hem i gohed wetem yumi, be yumi mas jusum blong gohed wetem Hem. !Mo tabu joes ia hem i tugeta i givim paoa mo i fri! Joes ia i mekem yumi fri long ol giaman tingting abaot huia yumi mo mekem yumi fri long ol jen blong ol tingting blong wol we oli fulap mo oli fasem yumi.
Mo taem yumi faenemaot se blong stap pat wetem Papa blong yumi long Heven, nao bae yumi save lukluk i go moa mo luk ol narawan olsem we Hem i stap mekem. Taem mi andastanem hamas Hem i lavem mi, mi andastanem moa gud hamas Hem i filim abaot yu, mo paoa blong mi mo paoa long hat blong mi i wantem givhan mo karem i kam tugeta ol narawan i kam moa strong.
Pikja i kam long Nauvoo Temple long taem we san i godaon i kam long Max D. weaver
Ol Kavenan Oli Karemaot Ol Lok long Ol Blesing
Papa long Heven mo Jisas Kraes, Tufala i wantem blong yumi mekem ol kavenan wetem Tufala mekem se Tufala i save blesem yumi tru long ol wei we yumi nidim mo jenisim yumi tru long ol wei we bae oli letem yumi blong gobak long ples we Tufala i stap hem.
Bae mi invaetem yufala blong go oltaem olsem we yufala i save mekem blong go long haos blong Lod. Taem mi mekem komitmen blong stap go oltaem mo wetem tru tingting, mi kasem help blong kamaot long wol, mo ol tingting mo fasin blong mi oli kasem wan hae ples.
Taem yumi kipim ol kavenan blong yumi, yumi kasem prishud paoa we i karemaot ol lok long ol blesing blong Atonmen blong Sevya long laef blong yumi. Ol blesing ia oli tekem tu, hiling, proteksen, help, paoa, pis, niu tingting mo glad. Papa long Heven i wantem blong blesem yumi wetem evri blesing ia tru long kavenan rilesensip blong yumi.
Sapos yu no bin kasem yet ol blesing blong tempol, mi invaetem yu blong stadi long ol blesing blong tempol, prishud paoa, ol kavenan mo wanem we God i wantem long yu. Yu no wet blong kasem kea blong Hem, paoa blong Hem mo help blong Hem we i gat lav.
Presiden Nelson i bin talem:
“Mi talem strong long yu se yu no wet kasem mared, blong yu endao insaed long haos blong Lod. Stat naoia blong lanem mo gat eksperiens long wanem i minim blong gat prishud paoa olsem tul blong faet.
“Mo long wanwan long yufala we i mekem ol tempol kavenan, mi plis mo askem yufala blong lukaotem—wetem prea mo oltaem—blong andastanem ol tempol kavenan mo ol odinens. Ol doa long saed blong spirit bae oli open. Bae yu lanem olsem wanem blong openem vel bitwin heven mo wol, olsem wanem blong askem ol enjel blong God blong givhan long yu, mo kasem gud moa ol daereksen blong heven. Ol hadwok wetem strong tingting we yu mekem, bae i givim moa paoa mo mekem strong moa fandesen blong yu long saed blong spirit.”2
Blong Stap Pat tru long Fasin blong Sakem Sin
Fasin blong sakem sin we i stap gogohed i wan narafala naes wei mo wei we i gat paoa blong stap kolosap long Papa long Heven mo Jisas Kraes. Plante taem yumi stap bilivim rong se sapos yumi stap sakem sin plante taem, bae i minim se yumi mas stap longwe long Tufala. Be hemia i no tru, long nara wei nao i tru.
Fasin blong sakem sin i no muvum yu longwe long Tufala—!hemi tekem yu kam moa kolosap long Tufala!
Yu save faenem se yu gat moa pat mo gat wan dip rilesensip wetem Tufala tru long ol hadwok blong yu blong tanem yu i go long Tufala from help mo kasem fogivnes.
Wanwan long yumi i save filim se hem i stap longwe long fasin blong kam stret evri wan bitim we bae yumi wantem blong kam, be mi no ting se Papa long Heven bae i wari abaot hemia olsem we Hem i wantem luk long ol tingting blong hat mo ol hadwok blong yumi blong traem bakegen. Hem i lavem yumi, Hem i save weaples yumi stap go from mo bae Hem i lidim yumi wetem lav long rod i go.
Blong luksave ol samting we yumi no strong long olgeta mo ol mistek blong yumi, i nidim blong yumi mas gat ol filing blong wantem help, be tru long fasin blong sakem sin, yumi invaetem Papa long Heven blong stap kolosap long ol pat ia blong yumi we oli nidim help. Long wei blong Hem blong stap kolosap i letem Hem blong soem lav long yumi mo givim hiling, fogivnes mo proteksen we yumi nidim. Hem i insaed long koneksen ia we i go long God we i yumi developem tras mo faenem paoa long tingting mo tru filing blong stap gat pat.
Kriesen, i kam long Annie Henrie Nader
Stap Lukaotem wan Hae Lukluk
Lukluk blong yumi i save kontribiut long filing blong yumi blong stap gat pat insaed long Jos blong Lod. Yumi save jusum blong lukluk ia we aksen blong yumiwan i save helpem wod blong yumi, Rilif Sosaeti o kworom blong ol elda blong yumi i kam wan ples we i gat lav blong stap gat pat. Blong stap lukaotem blong helpem ol narawan blong stap gat pat i mekem i kam antap filing blong yumiwan blong stap gat pat.
From se yu wan pikinini blong God, yu gat pat—nomata olsem wanem we ol narawan oli luk long yu o wanem yu luk long yuwan. Plan ia blong stap glad, oli mekem i blong yu, mo yu gat wan impoten rol blong mekem. Wanwan long yufala i gat paoa blong kontribiut long spesel wei mo stap pat long kingdom blong God, nomata sapos yu mared o singgel, level blong edukesen o bakgraon we yu gat.
Wan tingting we i bin ripit plante taem long maen blong mi i we toktok ia “yang singgel adalt,” “yang adalt,” mo “ol singgel adalt” oli no huia stret yu. Hemia i ol toktok we i talem wanem grup yu stap long hem we i help blong tokbaot yia o sapos yu mared o singgel, be oli no inaf toktok we i talem tru aedentiti blong yu, stamba tingting mo paoa we yu gat.
Ol taetol o toktok blong komperem man i save katemdaon hamas yumi lukluk long yumi wanwan mo valiu blong yumi mo paoa we yumi gat long kingdom blong God. Wanem we i tru i we yufala i ol memba blong Jos Ia blong Jisas Kraes blong Ol Lata-dei Sent. Yu bin mekem ol kavenan wetem God. Yu save kasem prishud paoa blong Hem. Yu yu wan memba blong Rilif Sosaeti o kworom blong ol elda. Olsem we Presiden Nelson i bin tijim, yu wan pikinini blong God, wan kavenan pikinini mo wan disaepol blong Jisas Kraes. Hemia i tru we yu yu fas mo moa impoten, mo hemia i wanem we bae i “lidim yu i go from laef we i no save finis long selestial kingdom blong God.”3
Gospel i bin kambak tru long wan yang adalt–profet blong bifo—Josef Smit. Hemia i wan tingting blong tingbaot we i gat paoa. Papa long Heven mo Jisas Kraes i givim wok long Profet mo olgeta we oli wok wetem hem long wan yia ia we oli gat blong putumbak Jos. God i trastem yu tu blong stap pat long wok ia long ol las dei ia.
Sapos yu wantem save huia yu, mo sapos oli lavem yu mo luk hamas yu yu impoten, askem Papa blong yu long Heven. Oltaem bae Hem i talem trutok abaot huia yu. Hem bae i helpem yu blong luk yuwan olsem we Hem i stap luk yu—wetem bigfala paoa mo lav. Hem i save lidim yu i go long plante janis mo hamas bae yu kam antap we bae yu neva save pikjarem long maen blong yu!
Letem yumi gat ol ae blong lukluk ol narawan mo yumiwan, be i no tru long ae blong hamas yia oli gat o sapos oli mared o singgel be tru ol ae blong yuniti blong ol pipol we oli kipim ol kavenan, ol disaepol blong Jisas Kraes, ol fren, ol brata mo sista mo ol pikinini boe mo gel blong God. Mo insaed long ol wok ia mo ol rilesensip ia, bae yumi faenem filing blong stap gat pat we i moa hae mo i tru.