Aokuso

O Lo’u Tino o Se Malumalu o le Atua

Pese: “Ua Tuu Mai E Le Alii Se Malumalu”

(TT, 73)

“Tou te le iloa ea o le malumalu outou o le Atua, o loo nofo foi le Agaga o le Atua i totonu ia te outou? … Aua e paia le malumalu o le Atua, o outou lava ia” (1 Korinito 3:16–17).

Ia faaopoopo ni ou manatu i manatu ua tuuina atu iinei. Ia fuafua ni auala e faailoa atu ai le aoaoga faavae i tamaiti ma fesoasoani ia latou malamalama i ai ma faaaoga i o latou olaga. Fesili ifo ia te oe lava, “O le a se mea e fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: O lo’u tino o se malumalu.

Faailoa atu le aoaoga faavae: A o lei oo i le taimi o le Peraimeri, tusi le fuaiupu “O le malumalu outou o le Atua” (1 Korinito 3:16) i luga o le laupapa. Faaali i tamaiti ata o malumalu, ma fesili i ai pe o le a le mea e faapitoa ai le malumalu (o se maota o le Alii, e mama, lelei le tausiaina, ma o se nofoaga e mafai ona mafuta mai ai le Agaga Paia). Tusi a latou tali i luga o le laupapa. Faamatala atu o o tatou tino, e pei o malumalu, e paia ma e manaomia ona tausia ma le ava e i tatou lava ma isi.

Uunaia le [agaga] malamalama ma le faaaogaina: Kopi le ata o loo i le itulau e 43 o le tusi lesona a le vasega pepe, Vaai Ia I O Outou Tamaiti. Oti ese li’o o loo i le ata, ma tuu i se apa. Fai atu i se tamaitiiti e filifili se li’o se tasi. Fesili i tamaiti pe o faapefea ona faamanatu atu e le ata ia i latou ia tausia o latou tino faapei o malumalu. Tuu i tamaiti taitasi se kopi o le ata, ma valaaulia i latou e valivaliina. Valaaulia ia tamaiti matutua e tusi se mea se tasi i lalo ifo o li’o taitasi o le a latou faia i lenei vaiaso e tausia ai o latou tino faapei o ni malumalu. Fai i tamaiti e ave a latou ata i le fale e aoao atu ai i o latou aiga ni auala e mafai ona latou tausia ai o latou tino faapei o ni malumalu.

O kopi: Afai e leai se masini fai kopi, e mafai ona e tuuina se pepa mama i luga o le ata na tusiaina ma lolomiina, pe mafai foi ona e lolomiina mai mai le LDS.org.

Uunaia le faaaogaaga: Faaali se kopi o le “O O’u Tulaga Faatonuina o le Talalelei.” Fai i tamaiti e matau po o fea o tulaga faatonuina o le talalelei lea na aoaoina i latou i le ala e tausia ai o latou tino e pei o ni malumalu. Valaaulia tamaiti e faliu i le tagata o loo nofo lata ane ma faasoa atu se auala se tasi o loo latou tausiaina ai o latou tino e pei o se malumalu. Ona fai atu lea ia i latou e mafaufau i se auala se tasi e mafai ona latou faleleia atili ai. Valaaulia ni nai tamaiti e faasoa mai i tagata uma ni o latou manatu.

O Le A Ou Tausia Lo’u Tino

O loo maua le pepa lautele o loo i ai se savali ma le itulau o le tusi lesona a le vasega pepe i le sharingtime.lds.org

Vaiaso 2: O le ofu i ofu talafeagai e faaalia ai le ava mo le Tama Faalelagi ma a’u lava ia.

Faailoa atu le aoaoga faavae: Fai i tamaiti e sue i le 1 Korinito 3:16 ma faitau faatasi leotele le mau. Tau atu i tamaiti o se tasi o auala tatou te tausia ai o tatou tino faapei o ni malumalu o le oofu lea i ofu talafeagai. Faaali “O O’u Tulaga Faatonuina o le Talalelei,” ma tuu atu i tamaiti e faitau leotele ia tulaga faatonuina o loo faapea mai, “O le a ou ofu i ofu talafeagai e faaalia ai le ava mo le Tama Faalelagi ma a’u lava ia.”

Uunaia le [agaga] malamalama: Talanoa le uiga o le oofu i ofu talafeagai (tagai i le vaega o “Laei ma Foliga Vaaia” i le Mo Le Malosi o le Autalavou). Saunia ni nai pepa lautetele o loo i ai se savali o tusi ai i luga le “O le a ou ofu i ofu talafeagai e ala i le …”. Vaevae tamaiti i ni vaega, ma fai atu i vaega taitasi e tusi a latou tautinoga e oofu i ofu talafeagai pe tusi so latou lava ata i ofu talafeagai i se tasi o pepa. Faaali pepa o loo i ai savali i totonu o le potu o le Peraimeri.

Fetuunai gaoioiga i manaoga o lau Peraimeri (tagai i le AALVSA, 116–17). Mo se faataitaiga, e mafai ona e fetuuna’ia le gaoioiga lona lua o le vaiaso 2 mo se Peraimeri toatele i le fai atu i tamaiti taitoatasi e tusia pe tusi se ata o se manatu e tasi i se fasi pepa laitiiti. Ona faapipii uma lea o pepa i le pepa lautele.

Vaiaso 3: O Le Ola ai i le Upu o le Poto e faaalia ai le faaaloalo mo lo’u tino.

Uunaia le [agaga] malamalama: I le tasi itu o le laupapa tusi ai “Poloaiga” ma mau faasino nei: MFF 89:7–9, 12, 14, 16. I le isi itu, tusi ai “Folafolaga” ma mau faasino nei: MFF 89:18–21. Tuu atu i le afa o tamaiti e faitauina le seti muamua o mau ma vaai po o a poloaiga na tuuina mai e le Alii ia i tatou i le Upu o le Poto. Tuu atu i isi tamaiti e faitau ia mau o totoe ma vaai po o a faamanuiaga na Ia folafola mai ia i tatou pe a tatou usiusitai. Ia talanoaina le uiga o poloaiga ma faamanuiaga.

Uunaia le faaaogaaga: Valaaulia se tamaitiiti e toatasi e tau atu, “O le a ou ola i le Upu o le Poto e ala i le ” ma faatumu le avanoa i se mea o le a ia faia e ola ai i le Upu o le Poto. Ona valaaulia lea o se isi tamaitiiti e toe fai le fuaiupu ma le tali a le tamaitiiti muamua ona faaopoopo lea i ai o lana lava tali. Fai i se tamaitiiti lona tolu e toe fai le fuaitau ma tali a isi tamaiti [e toalua] ona faaopoopo lea o se isi tali. Toe fai pe a lava le taimi, ma faaopoopo se tali a tamaiti taitasi.

O Le Upu o le Poto
Poloaiga MFF 89:7–9, 12, 14, 16	Folafolaga MFF 89:18–21

Vaiaso 4: O le faitau, matamata, ma le faalogologo i mea lelei e tumau ai le mama o lo’u mafaufau.

Faailoa atu le aoaoga faavae: Faaali i tamaiti ni ipu malamalama se lua, o le tasi o loo i ai ni vai palapala ma le isi o loo i ai ni vai mama. Fesili atu i tamaiti po o fea o nei ipu latou te fia feinu ai ma pe aisea. Ta’u atu i tamaiti o o tatou mafaufau e pei o ipu malamalama, ma e tatau ona tatou tuu i ai na o mea mama ma mea lelei. Tusi le fuaiupu lenei i luga o le laupapa, ma fai atu i tamaiti tou te faitauina faatasi: “O le faitauina, matamata, ma faalogologo i mea lelei e tumau ai le mama o lo’u mafaufau.” Mafaufau e aoao atu i tamaiti ni taga o lima faigofie e fesoasoani ai ia i latou ia manatua le fuaiupu. Mo se faataitaiga, mo le upu faitauina, tuu i luma ou lima e pei o e uuina se tusi; mo le upu matamataina, tusi i lou mata; mo le faalogologo, faaofuofu lou lima i lou taliga; ma mo le mafaufau, tusi i lou muaulu. Toe fai le fuaiupu i ni nai taimi, ma sui ia taga mo upu.

Uunaia le [agaga] malamalama: Faaali i tamaiti se ata o Iesu Keriso ma tamaiti, ma fai atu ia i latou e vaai i ai mo ni nai sekone. Ufiufi le ata ma fai i tamaiti e ta’u atu ia te oe ni faamatalaga auiliili latou te manatua e uiga i ai. Fesoasoani ia malamalama tamaiti o mea tatou te vaai i ai tatou te manatuaina. Faamatala faapea a faatumuina o tatou mafaufau i mea lelei tatou te mafaufau foi i mea lelei. Toe faaali le ata, ma tuu atu i tamaiti e usu le pese “Le Alofa o Lo’u Faaola” (TT 42–43). Fai atu i tamaiti e faasoa mai po o a ni o latou lagona na maua mai le pese. Faamatala atu o le faalogologo i musika lelei e fesoasoani lea ia i tatou ia lagona le Agaga ma tausia le mama o o tatou mafaufau.

O le a sili atu ona lelei le aoaoina o tamaiti pe afai e faaaogaina ni metotia faafaiaoga eseese. Mo se faataitaiga, i le vaiaso 4, ia faailoa atu i tamaiti le mataupu faavae e ala i le vaai i se lesona faatino ona uunaia lea e faaaoga ni taga o lima faigofie e fesoasoani latou te manatua ai.