Novema

O Le Migao o le Alofa lea ma le Faaaloalo mo le Atua

“E te alofa atu i le Alii lou Atua ma lou loto atoa, ma lou agaga atoa, ma lou manatu atoa” (Mataio 22:37).

Ia faaopoopo ni ou manatu i manatu ua tuuina atu iinei. Ia fuafua ni auala e faailoa atu ai le aoaoga faavae i tamaiti ma fesoasoani ia latou malamalama i ai ma faaaoga i o latou olaga. Fesili ifo ia te oe lava, “O le a se mea e fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: O le migao o le alofa lea ma le faaaloalo mo le Atua.

Faailoa atu le aoaoga faavae: Faaali se ata o se tamaitiiti o loo tatalo, ma faamatala o loo faaalia e le tamaitiiti le alofa ma le faaaloalo mo le Atua. Ta’u atu i tamaiti o loo e mafaufau i se upu e lima-mataitusi o lona uiga o le alofa ma le faaaloalo mo le Atua. Tusi ni laina se lima i luga o le laupapa, e tasi mo mataitusi taitasi o le upu migao, ma valaaulia tamaiti e mate ia mataitusi. A o latou mateina mataitusi sao, tusi ai i avanoa talafeagai. Atonu e te manao e fesoasoani atu ia te oe se tamaitiiti matua. Mo tamaiti laiti, faaali le ata ma fesili i ai pe faapefea ona latou iloa o loo faaaloalo le tamaititi. Tuu atu i tamaiti e fai faatasi mai, “O le migao o le alofa lea ma le faaaloalo mo le Atua.”

Uunaia le [agaga] malamalama: Fai i tamaiti e sue a latou tusitusiga paia ma faitau le Ioane 14:15. (Afai na taulotoina e tamaiti lenei mau i le tausaga ua te’a, atonu e te manao e fai atu ia i latou e tauloto mai). Fesili atu i tamaiti pe faapefea ona tatou faaali lo tatou alofa mo Iesu Keriso. Usu le pese “Faaaloalo o le Alofa Lea” (TT, 12). Fai atu i tamaiti e tuu o latou lima i luga o o latou fatu i taimi taitasi latou te faalogo ai i le upu “faaaloalo” po o le “filemu.”

Toe Faamanatu: O le fesootaiga o se mataupu faavae i se gaoioiga faaletino po o se mea faitino o le a fesoasoani lea i tamaiti e manatua ai (tagai i leAALVSA, 185–186. O le gaoioiga lona lua i le vaiaso 1 o le a fesoasoani i tamaiti e manatuaina o le migao e fesootai atu i le alofa mo le Atua e ala i le valaauliaina o i latou e tuu o latou lima i luga o o latou fatu. Mafaufau e toe faamanatu atu lenei aoaoga faavae mo le tele o masina i le tuu o lou lima i luga o lou fatu pe a e faamalosiauina le migao.

Uunaia le faaaogaaga: Vavae ia tamaiti i ni vaega laiti, ma tuu i ai i latou e talanoaina ni auala e mafai ona latou faaali ai le migao mo le Tama Faalelagi ma Iesu Keriso i se tasi o nei tulaga: pe a latou i ai i le lotu, pe a latou tatalo, ma pe a latou i ai i le fale pe ma ni uo. E mafai e tamaiti laiti ona tusi ni ata o le mea e mafai ona latou faia. Tuu atu i ni isi o tamaiti e faasoa mai ni o latou manatu i le vaega atoa. Uunaia i latou e faasoa atu o latou manatu i o latou aiga i le fale.

Vaiaso 2: O le migao i le taimi o le sauniga faamanatuga e fesoasoani lea ou te manatua ai Iesu Keriso.

Uunaia le [agaga] malamalama ma le faaaogaina: Valaaulia le epikopo po o le peresitene o le paranesi ma ni nai alii o e umia le Perisitua Arona e aoao atu i tamaiti e uiga i le faamanatuga. Pe a talafeagai ai, e mafai ona e talosaga atu ia i latou e ave tamaiti i le falelotu ma aoao ia i latou po o le a se mea o faatusa i ai le faamanatuga ma faaali i ai le laulau o le faamanatuga, le nofoaga lea latou te tootutuli ai e faia le tatalo, ma le ie o loo faaaoga e ufi ai le faamanatuga. Valaaulia se isi alii o loo umia le Perisitua Arona e faamatala le mea na te faia e tufaina ai le faamanatuga i vaiaso taitasi i le aulotu ma pe aisea ua paia ai lenei avanoa. Fesili atu i tamaiti po o a ni mea o loo faia e e o loo umia le perisitua e faaalia ai le faaaloalo mo le Atua pe a latou faamanuiaina le faamanatuga (tootutuli e tatalo, ufi le faamanatuga i se ie paepae, oofu ma galulue i se tulaga faaaloalo). Valaaulia se tamaitiiti e faasoa mai po o le a se mea e mafai ona latou faia e faaali ai le faaaloalo mo Iesu Keriso i le taimi o faatinoina le faamanatuga.

Pe a valaaulia ni failauga faapitoa i le Peraimeri, faamanatu atu ia i latou ia faafaigofie a latou savali ina ia malamalama ai tamaiti. O failauga faapitoa uma e tatau ona faamaonia e le au epikopo.

Vaiaso 3: E mafai ona ou faaalia le faaaloalo mo nofoaga ma mea paia.

Faailoa atu le aoaoga faavae: Tusi “E mafai ona ou faaalia le faaaloalo i nofoaga ma mea paia” i luga o le laupapa, ma fai atu i se tamaitiiti e faitau i le Peraimeri atoa. Fai atu i tamaiti e moeiini o latou mata ma sii i luga o latou lima pe a mafai ona latou lagonaina lou faapauina o se sene po o se faamau. Ta’u atu i tamaiti o le fale o le ekalesia o se nofoaga paia ma o le nonofo filemu ma faalogo ma le faaeteete o se tasi lea o auala tatou te mafai ona faaali ai lo tatou faaaloalo. Valaaulia ia tamaiti e faasoa mai le tele o isi mea latou te mafai ona faia i totonu o fale o le ekalesia e faaalia ai le faaaloalo.

Uunaia le [agaga] malamalama: Faaali se ata o Mose ma le laau talatala na mumu, ma faamatala le tala o loo maua i le Esoto 3:1–10. Faitau leotele le fuaiupu e 5 ma tuu atu i tamaiti e faalogo pe aisea na fetalai ai le Alii ia Mose e talai ese ona seevae. Faamatala atu tatou te le tau talaia o tatou seevae e faailoa ai le migao, ae e tele ni mea e mafai ona tatou faia e faaali ai le migao mo nofoaga ma mea paia.

Uunaia le faaaogaaga: Faaali nisi o ata nei: o le malumalu po o se fale o le ekalesia, o se fale, o se aiga, o se tasi o loo tatalo, o se tamaitiiti, o tusitusiga paia, o se vaega o tamaiti, o se vasega o le Peraimeri, ma le faamanatuga. Tuu i luga se ie tele i luma o ata uma ma aveese se ata se tasi. Aveese le ie ma tuu atu i tamaiti e ta’u atu ia te oe po o lē fea ata ua misi. Faaali le ata na misi ma valaaulia ia tamaiti e faasoa mai se auala latou te faaali ai le migao po o le faaaloalo mo le nofoaga po o mea o i le ata. Toe fai mo isi ata.

O le a se mea o le a fai e tamaiti e aoao ai? O le faia o lenei fesili a o e saunia ni gaoioiga o le a fesoasoani ai i tamaiti e aoao e ala i le auai [i gaoioiga]. Mo se faataitaiga, o le gaoioiga i le vaiaso 3 e faatagaina ai tamaiti uma e auai i le talanoaina, vaavaai i ata, ma fefaasoaai ni manatu.

Vaiaso 4: O le migao mo le Atua e fesoasoani ia te au e faaaloalo ma alofa ai i isi.

Uunaia le [agaga] malamalama: Usu ia pese nei. Pe a maea pese taitasi, ia talanoaina ia fesili o loo i ai faatasi.

• “Faaaloalo o le Alofa Lea” (TT, 12). Toe usu le laina o loo faapea mai, “Pe a ou faaaloalo, e faaalia i au upu ma mea e faia.” Fesili: O a ni isi o upu po o ni fasi fuaitau o loo faaalia ai le faaaloalo i le Tama Faalelagi po o isi? O a ni isi o mea e mafai ona tatou faia e faaalia ai le faaaloalo mo isi?

• “O Le Agalelei e Amata Ia Te Au” (TT, 83). Fesili: O a ni isi o auala e mafai ona tatou faaalia ai le agalelei i a tatou uo?

• “Ou te Savali ma Oe” (TT, 78–79). Fesili: O ai ni isi o tagata o loo manaomia lo tatou agalelei? E faapefea ona tatou faaali atu le agalelei ia i latou?

Aoao atu e ala i faataitaiga o le auala e faaali ai le alofa ma le faaaloalo mo isi (tagai i le AALVSA, 176–177). Fesoasoani atu i faiaoga o lau Peraimeri i le ofoina atu lea o le faamalosiau ma le lagolagosua. Ona fesoasoani lea ia iloa e tamaiti le ala latou te mafai ai ona fealofani ma fefaamalosiau le tasi i le isi.