Iuni

O Muai Mataupu Faavae ma Sauniga o le Talalelei o le a Mafai ai ona Ou Toe Mau faatasi ma le Atua

Soo se pese e te filifilia mai le Tusipese a Tamaiti

“Matou te talitonu o muai mataupu faavae ma sauniga o le Talalelei e faapea: muamua, Faatuatua i le Alii o Iesu Keriso; lona lua, o le Salamo; lona tolu, o le Papatisoina i le faatofuina mo le faamagaloina o agasala; lona fa, o le faaee atu o lima e maua ai le mea foaifua o le Agaga Paia” (Mataupu Faavae o le Faatuatua 1:4).

Ia faaopoopo ni ou manatu i manatu ua tuuina atu iinei. Ia fuafua ni auala e faailoa atu ai le aoaoga faavae i tamaiti ma fesoasoani ia latou malamalama i ai ma faaaoga i o latou olaga. Fesili ifo ia te oe lava, “O le a se mea e fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: O le faatuatua ia Iesu Keriso e taitaiina atu ai i tatou ia alolofa ia te Ia, talitonu ia te Ia, ma tausi Ana poloaiga.

Faailoa atu le aoaoga faavae ma uunaia le [agaga] malamalama: Tusi i luga o le laupapa “O le faatuatua ia Iesu Keriso e taitaiina atu ai i tatou ia alolofa ia te Ia, talitonu ia te Ia, ma tausi Ana poloaiga”. Faaali atu i tamaiti ni fatu laau. Fesili atu: “O a ni mea e mafai ona avea ai nei fatu laau?” “E faapefea ona e iloa o le a tutupu ae nei fatu laau?” “O le a le mea e tatau ona tatou faia ina ia tutupu ae ai?” Faamatala atu o lo tatou faatuatua ia Iesu Keriso, ua pei o se fatu, e mafai ona tuputupu ae pe a tatou faafaileleina. Ia talanoaina mea e mafai ona tatou faia e fesoasoani ai ia tuputupu ae lo tatou faatuatua, ma faamatala atu le ala o le a taitaiina ai i tatou e nei mea ia alolofa atu ma faatuatua ia Iesu Keriso ma tausi Ana poloaiga. Usu le pese “Faatuatua” (TT, 50–51). Fai ni taga faigofie o lima e o faatasi ma le fuaiupu muamua.

E maua atavali i le sharingtime.lds.org

Fai Soo: E aoao tamaiti e ala i le fai soo. Mafaufau e faalauteleina le lesona faatino o le vaiaso 1 ina ia faamalosia ai le mataupu faavae o le faatuatua. Toto fatu laau i totonu o se apa, ma aumai le laau ua ola i le Peraimeri. Faamatala i tamaiti le mea na e faia e fesoasoani ai i le laau ia ola. Faatusatusa le faafaileleina o se laau fou i le faafaileleina o le faatuatua ia Iesu Keriso.

Vaiaso 2: O le salamo e aumaia ai le faamagaloga.

Faailoa atu le aoaoga faavae: Valaaulia ia tamaiti e sue a latou tusitusiga paia ma faitau le Mataupu Faavae ma Feagaiga 58:42–43. Fai atu ia i latou e faailoa mai po o le a le mea e tupu pe a tatou salamo ia tatou agasala. (Afai e mafai, valaaulia tamaiti e maka nei fuaiupu ia latou tusitusiga paia.) Faamatala faapuupuu atu i tamaiti le tala ia Enosa (tagai i le Enosa 1:1–4), ma tuu atu i se tamaitiiti e faitau le Enosa 1:5–8. Molimau atu o le Togiola a Keriso ua mafai ai ona tatou maua le faamagaloina o a tatou agasala.

Uunaia le [agaga] malamalama: Faamalamalama atu o tagata o e salamo ma ua faamagaloina a latou agasala e i ai le manao ia auauna atu i le Atua. Vaevae tamaiti i ni vaega se tolu, ma tuu atu i vaega taitasi se ata se tasi ma mau faasino nei: Alema o loo papatiso i le Vai o Mamona (Mosaea 17:2–4; 18:1–17); Iona (Iona 1–3); o Aneti-Nifae-Liae o loo tanumia a latou auupega (Alema 23:4–18; 24:6–19). Faamatala atu o nei tala o loo faamatala mai ai ni tagata o e na salamo ia latou agasala ma auauna atu i le Alii. Fai atu i vaega taitasi e toe faamanatu ia mau ma tapena e tuuina mai se tala faatino e faaalia ai le ala na salamo ai nei tagata ma auauna atu ai i le Alii (e ala i le aoaoina atu o le talalelei, auauna atu i se misiona, ma le mumusu e tau).

Vaiaso 3: Pe a ou papatiso, ou te faia se feagaiga ma le Atua.

Uunaia le [agaga] malamalama: Fai atu i se tamaitiiti e sau i luma o le potu ma tuu i luma ona lima. Ona tuu lea o se tusi i luga o lima taitasi. Faitau le Mosaea 18:7–11. Faamatala atu o se tasi o feagaiga tatou te osia pe a tatou papatiso o le “fesuiai o a outou avega e ave, ina ia mama ai.” Fesili atu i le tamaitiiti o loo uuina ia tusi pe ua lelavava ona lima. Fai i ni isi tamaiti se toalua e fesoasoani e sii i luga ona lima. Talanoa i ni isi o avega e ono tauaveina e tamaiti, e pei o le ulagia, lagonaina o le ma’i, lagonaina o le tuuatoatasi, po o le tauivi i le aoga. Fesili atu i tamaiti pe faapefea ona latou fesoasoani e faamāmā e le tasi le avega a le isi.

O le faaaogaina o tamaiti i faataitaiga vaaia o le a latou tosina atu ai ma latou saunia ai e aoao. Mo se faataitaiga, o lenei gaoioiga o loo faaalia ai le faataitaiina e tamaiti o le manatu faavae o le fesui o avega a le tasi ma le isi.

Uunaia le faaaogaaga: Ta’u atu i tamaiti o le papatisoga o le faitotoa lena e taitai atu ai i le ala o le ola e faavavau (tagai i le2 Nifae 31:17). Faapipii i se tasi itu o le potu se ata o se tamaitiiti o loo papatiso. Faapipii se ata o le Faaola i le isi itu o le potu, ma faamatala atu o lenei gaoioiga e sui tulaga ai lenei ata i le ola e faavavau. Tau atu i tamaiti o le a tatou tumau ai i le ala o le ola e faavavau pe a tatou tausia a tatou feagaiga o le papatisoga. Toe faamanatu faapuupuu atu nei feagaiga (manatuaina o Iesu Keriso, usiusitai i poloaiga, ma le fesoasoani atu i isi). Avatu i tamaiti taitasi se pepa o tusia ai se ata o le talita o le FMT. Tuu atu i tamaiti e tusi ia latou pepa se poloaiga o le a fesoasoani ia i latou e tausia ai a latou feagaiga o le papatisoga (e mafai ona latou tusia ni ata e suitulaga i le poloaiga na latou filifilia). Valaaullia se tamaitiiti e tuu lana pepa i luga o le fola o le fale i le va o ata e lua. Afai e mafai, fesoasoani atu i tamaiti e saili le poloaiga i totonu o a latou tusitusiga paia ma faitau faatasi. Toe fai seia oo ina faia e tamaiti se auala i le va o ata.

E maua faailoga i le sharingtime.lds.org

Vaiaso 4: O le Agaga Paia e faamafanafanaina ma taialaina au.

Uunaia le [agaga] malamalama: Vaevae tamaiti i ni vaega, ona tuu atu lea i vaega taitasi se fasi pepa o loo i ai mau nei:

• “E moni, e moni, ou te fai atu ia te oe, ou te tuuina atu ia te oe se vaega o lo’u Agaga, o le a faamalamalamaina ai lo’u mafaufau, e faatumuina foi lo’u agaga i le ” (MFF 11:13).

• “Afai tou te ui atu i le ala [papatisoga] ma talia le Agaga Paia, na te ia te outou mea uma e tatau ona outou faia” (2 Nifae 32:5).

• “A o le Fesoasoani, o le Agaga Paia lea, … na te outou i mea uma lava, ma faamanatu mai foi ia te outou i mea uma lava , ua ou fai atu ai ia te outou” (Ioane 14:26).

• “Ina faalagolago ia i lena Agaga e taitai e fai —ioe, e fai ia faamaoni, ma savali ma le loto maulalo, ia ; ma o lo’u lava Agaga lea” (MFF 11:12).

• “Ma o le mana foi o le Agaga Paia tou te o mea uma lava” (Moronae 10:5).

Fai i tamaiti e sue ia mau ma faatumu avanoa. Ona tuu atu lea ia i latou e talanoaina mea na aoao mai e nei mau e uiga i le ala e mafai ai ona fesoasoani le Agaga Paia ia i tatou. Valaaulia i latou e faasoa mai ni aafiaga i se taimi na fesoasoani ai le Agaga Paia ia i latou.

Tusitusiga Paia: E taua mo tamaiti le aoaoina o upu moni o le talalelei mai tusitusiga paia (tagai AALVSA, 188–189). Valaaulia ia tamaiti e faasino i upu taitasi a o e faitauina leotele se mau. Fai i tamaiti laiti e faalogo mo se upu po o se fasi fuaitau patino ma sii i luga o latou lima pe a faalogo i ai.

Uunaia le faaaogaaga: Tau atu i tamaiti e tele auala e fesoasoani ai le Agaga Paia ia i tatou. Usu le pese “O Le Agaga Paia” (TT, 56). Fai atu i tamaiti e sii o latou lima pe a latou usuina le pese e uiga i se auala e mafai ai e le Agaga Paia ona fesoasoani ia i latou. Taofi le pese ma talanoa po o le a le mea na latou aoaoina e uiga i le Agaga Paia. Faaauau ia pesepesega ma talanoaga. Faamatala se taimi na faamafanafanaina pe na taialaina ai oe e le Agaga Paia.

E maua pepa e tufa atu i le sharingtime.lds.org