Tesema
E Aoao Mai e Tusitusiga Paia ia te Au e uiga i le Soifua Mai ma le Afio Mai Faalua o le Faaola
“Aua e sau le Atalii o le tagata faatasi ma ana agelu i le mamalu o lona Tama; ona tauia lea e ia e taitasi e tusa ma lana galuega” (Mataio 16:27).
Ia faaopoopo ni ou manatu i manatu ua tuuina atu iinei. Ia fuafua ni auala e faailoa atu ai le aoaoga faavae i tamaiti ma fesoasoani ia latou malamalama i ai ma faaaoga i o latou olaga. Fesili ifo ia te oe lava, “O le a se mea e fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: Na valoia e perofeta le soifua mai o Iesu Keriso.
Uunaia le [agaga] malamalama (faitau tusitusiga paia ma faia tala faatino): Vaevae ia tamaiti i ni vaega se lima. Tuu atu i vaega taitasi mau nei ma sina fesoasoani po o se togiga faigofie e sui a’i le perofeta e faatatau i ai: Isaia 7:14; 9:6 (Isaia); 1 Nifae 11:14–21 (Nifae); Mosaea 3:5, 8 (Tupu o Peniamina); Alema 7:9–10 (Alema); Helamana 14:2–6 (Samuelu). Valaaulia vaega taitasi e faitau ma talanoaina le mea na ta’u mai e perofeta e uiga i le soifua mai o Keriso. Tuu atu i se tamaitiiti e toatasi mai vaega taitasi e faaaoga ia fesoasoaniga po o le togiga e fai ma sui o le perofeta ma ta’u i isi tamaiti po o ai le perofeta o loo ia sui ai ma faitau pe ta’u atu se faamatalaga a lena perofeta e uiga i le soifua mai o Iesu. Usu le pese “Na Ia Auina Mai Lona Alo” (TT, 20–21) po o le “Ua Faamatala e Samuelu le Tala i le Pepe o Iesu” (Liahona, Tes. 1992, 7).
Vaiaso 2: Na soifua mai Iesu Keriso.
Uunaia le [agaga] malamalama: Usu faatasi le fuaiupu muamua o le “Pese O Le Kerisimasi” (TT, 32–33). Vaevae tamaiti i ni vaega se fa, ma tuu i vaega taitasi se tasi o fuaiupu o loo totoe o le (2–5). Fai atu i tamaiti e tusi ni ata e o faatasi ma a latou fuaiupu. Usu le pese atoa, ma tuu atu i tamaiti e tuu i luga a latou ata pe a oo i a latou vaega o le pese.
Vaiaso 3: O le a toe afio mai i se aso Iesu Keriso i le fogaeleele.
Faailoa atu le aoaoga faavae: Tusi ia faaupuga nei i ni uputusi laiti: Aua e sau, le Atalii o le tagata, i le mamalu, o lona Tama. (E maua uputusi i le sharingtime.lds.org.) Faaali uputusi i se faasologa fenumiai i luga o le laupapa, ma valaaulia tamaiti e fesoasoani ia te oe e toe faatulaga sa’o. (Atonu e te manao e fai ni nai seti o uputusi ma tuu atu i tamaiti e galulue faatasi ai i ni vaega.) Pe a maea ona tuu faatasia e tamaiti faaupuga i le faatulagaga sao, tuu i ai latou te siakiina a latou tali e ala i le faitauina o le Mataio16:27.
Uunaia le [agaga] malamalama: Fai atu i ni tamaiti se toafa e o mai i luma o le potu ma uu i luga ia ata o Samuelu le sa Lamana, o le soifua mai o Iesu, o Iesu o loo aoao atu, ma le Afio Mai Faalua. Ia talanoaina ma tamaiti ia ata taitasi. Fai atu i tamaiti o loo uuina ata e tutu i soo se faasologa. Valaaulia le Peraimeri e ta’u atu i tamaiti le mea e me’i i ai ina ia sa’o le faasologa o ata.
O le faaaogaina o ata po o ni isi ata vaaia o le a fesoasoani lea i tamaiti e fesootai ai se aoaoga faavae po o se mataupu faavae i se ata i totonu o o latou mafaufau, lea o le a faateleina ai lo latou tomai e malamalama ai ma manatua mea na latou aoaoina.
E maua ata vali i le sharingtime.lds.org
Uunaia le faaaogaaga: Tusi se laina sao mai luga i lalo i le ogatotonu o le laupapa. I le pito i luga o le laupapa tusi ai “O le a toe afio mai i se aso Iesu Keriso i le fogaeleele.” I le tasi afa o le laupapa tusi ai fesili nei. I le isi afa tusi ai mau faasino i soo se faasologa.
-
O a ni isi mea ofoofogia o le a tulai mai pe a toe afio mai Keriso? (Iosefa Samita—Mataio 1:33, 36–37)
-
O a fea o le a toe afio mai ai le Faaola? (Iosefa Samita—Mataio 1:38–40)
-
Aisea e tatau ai ona tatou saunia mo le toe Afio Mai Faalua? (MFF 38:30)
-
O le a le umi o le a aumau ai le Faaola i le fogaeleele? (MFF 29:11)
Fai atu i tamaiti e galulue faatasi ma o latou faiaoga e faafetaui ia fesili i tali. Ia talanoaina faatasi ia tali. (Tagai foi i le Faamaoni i le Faatuatua [2004], 159–61). Fesili atu i tamaiti pe faapefea ona latou saunia mo le Afio Mai Faalua.
Vaiaso 4: Ina ia saunia mo le Afio Mai Faalua, o le a ou mulimuli ia Iesu Keriso.
Uunaia le [agaga] malamalama: Ta’u atu i tamaiti e masani lava ona aoao atu Iesu i ni faataoto, i le faaaogaina lea o mea faitino ma tulaga masani ai e aoao atu ai ia upu moni faaleagaga. Faamatala atu i ni nai upu le tala i taupou e toasefulu (tagai i le Mataio 25:1–13; tagai foi i le “O Le Faataoto i Taupou e Toasefulu,” Liahona, Mat. 2009, 20–21). Faamatala atu o loo faatusa ai e lenei faataoto le Afio Mai Faalua a Iesu Keriso i se faaipoipoga. Valaaulia ni tamaiti e faatino le faataoto. Fesili atu i tamaiti o loo latou faatinoina le vaega a taupou popoto po o a ni o latou lagona i le iloaina lea sa latou saunia, ma talanoa le taua o le saunia mo le toe afio mai o le Faaola.
Uunaia le faaaogaaga: Tusi se ata o se lamepa i luga o le laupapa. Ia talanoaina pe faapefea ona pei le mulimuli ia Iesu Keriso e ala i le faia o mea lelei i aso taitasi o le tuluiina o le suauu i a tatou lamepa. Tuu atu i tamaiti e tau mai ni auala e mafai ona latou mulimuli ai ia Iesu Keriso, e pei o le auauna atu i isi, totogiina o le sefuluai, ma le tatalo. Faamatala atu o mea nei e manaomia latou te faia taitoatasi; e le mafai ona faia e isi tagata ia mea mo i latou. Tuu atu i tamaiti taitasi se fasi pepa ua otiina i se faatusa o se mataua lapoa o le suauu. Fai atu ia i latou (po o o latou faiaoga) e tusi le “Ina ia saunia mo le Afio Mai Faalua, o le a ou mulimuli ia Iesu Keriso e ala lea i le ” i luga o a latou pepa. Fai atu i tamaiti e faatumu ia avanoa pe tusi se ata o se mea e mafai ona latou faia e saunia ai mo le Afio Mai Faalua. Uunaia tamaiti e ave a latou pepa i le fale e faasoa atu ai i o latou aiga mea na latou aoaoina.
E maua le lamepa ma le mataua i le sharingtime.lds.org
Ina ia saunia mo le Afio Mai Faalua, o le a ou mulimuli ia Iesu Keriso e ala i le