Ianuari

O Tusitusiga Paia o Afioga ia a le Atua

Pese: “A Ou Faalogo ma Lo’u Loto”

(itulau e 28 i lenei otootoga)

“Fiafia i le afioga a Keriso; aua faauta, e faaalia mai ia te outou i le afioga a Keriso mea uma tou te faia” (2 Nifae 32:3).

Ia faaopoopo ni ou manatu i manatu ua tuuina atu iinei. Ia fuafua ni auala e faailoa atu ai le aoaoga faavae i tamaiti ma fesoasoani ia latou malamalama i ai ma faaaoga i o latou olaga. Fesili ifo ia te oe lava, “O le a se mea e fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: O tusitusiga paia o afioga ia a le Atua.

Faailoa atu le aoaoga faavae: Aumai ni ituaiga tusi eseese (e pei o se tusikuka, se tusi o tala, ma se tusi o le aoga) i le Peraimeri, ma valaaulia ni nai tamaiti e faaali atu nei tusi ma tusitusiga paia i le Peraimeri. Valaaulia ia tamaiti e talanoaina mea e tutusa ai ma mea e eseese ai nei tusi, e aofia ai ma le au tusitala. Faailoa atu o tusitusiga paia e tulagaese ona sa tusia e perofeta a le Atua ma o afioga ia a le Atua.

Uunaia le [agaga] malamalama: Tau atu i tamaiti e fa tusi o tusitusiga paia lea tatou te faaaogaina i le Ekalesia: o le Tusi Paia, o le Tusi a Mamona, o le Mataupu Faavae ma Feagaiga, ma le Penina Tau Tele. Faamalamalama atu ua tatou ta’ua nei tusi o “tusi faavae.” Aoao atu tamaiti e uiga i nei tusi taitasi. Ia aofia ai ni nai tala po o ni aoaoga o loo maua i tusi taitasi. Taaalo i se taaloga faatusatusa (tagai AALVSA, 169) i igoa o tusitusiga faavae ma ata e faatatau i se tala po o se aoaoga e maua i tusi taitasi.

Uunaia le faaaogaaga: Valaaulia ni nai tamaiti e faasoa mai a latou mau e sili ona fiafia i ai po o se tala faatusipaia. Uunaia i latou e faasoa mai ni mea na latou aoaoina i le faitauina o tusitusiga paia. Tuu atu lau molimau e uiga i tusitusiga paia.

Luitau Faaletausaga: I le faagasologa o le tausaga, tuu ni avanoa i tamaiti e faasoa mai ai mea na latou aoaoina mai ia latou faitauga tusitusiga paia. O lenei mea o le a maua ai e tamaiti se avanoa e faasoa ai o latou aafiaga ma fesoasoani e uunaia isi e faitau tusitusiga paia i le fale.

Vaiaso 2: E tatau ona tatou fiafia i afioga a Keriso.

Uunaia le [agaga] malamalama ma le faaaogaina: Faamalamalama atu e faaaogaina e le Alii ia upu faatino e faamatala ai auala e tatau ona tatou suesue ai i tusitusiga paia. Faapipii solo i le potu ia pepa malo o i ai upu ma faaupuga nei: fiafia (tagai 2 Nifae 32:3); teu pea (tagai MFF 84:85); suesue ma le filiga (tagai Mosaea 1:7); piimau (tagai 1 Nifae 15:24). Fuafua ni auala fou e tuuina atu ai ma faamalamalamaina ai nei manatu i tamaiti. Mo se faataitaiga, e mafai ona e valaaulia tamaiti e faatino le eseesega i le va o le ai lamulamu ma le ai fiaai ona talanoaina lea pe faapefea ona fesootai lenei mea i le suesueina o tusitusiga paia. E mafai foi ona e fesili atu i tamaiti pe aisea latou te “piimau ai” i le lima o latou matua i totonu o se maketi tumutumu ona faamatala lea o se auala e mafai ona latou piimau ai i tusitusiga paia ma pe aisea e tutusa ai le taua o lena mea ma le piimau i le lima o latou matua.

Uunaia le faaaogaaga: Tuu atu se lui i tamaiti ma faiaoga e faatulaga se mausa o le suesue e le aunoa i tusitusiga paia. Faamatala atu o vaiaso taitasi, o tamaiti o e na faitau pe na faalogologo i tusitusiga paia o le a mafai ona tusi o latou igoa i se fasi pepa ma faaopoopo atu i se filifili pepa. Tau atu ia i latou a o faateleina le filifili, o le a faapena lo latou malamalama i tusitusiga paia. Mafaufau e teu le filifili i se pusa o “oloa” (o lenei pusa e mafai foi ona faaaoga e aoao atu ai po o le a le uiga o le “teu pea” i le gaoioiga o i luga) Uunaia tamaiti e faasoa atu a latou sini i le suesueina o tusitusiga paia i o latou aiga.

O lenei filifili e mafai ona avea ma se faamanatu o le tuputupu ae lea e oo mai i le faitauina o tusitusiga paia.

Natano

Ana

Ioane

Anetelea

Faaaofiaina o tamaiti uma: Mafaufau i ni auala e fesoasoani ai i tamaiti uma o lau Peraimeri ina ia faamanuiaina i a latou faitauga o tusitusiga paia i le tausaga atoa. Mo se faataitaiga, o tamaiti e le maua se lagolagosua i le aiga e mafai ona tuu i ai avanoa e faitau ai i le lotu ma faaopoopo o latou igoa i le filifili pepa.

Vaiaso 3: O afioga a Keriso o le a ta’u maia ia i tatou mea uma e tatau ona tatou faia.

Uunaia le [agaga] malamalama: Fusi mata o se tamaitiiti. Tuu atu i se isi tamaitiiti e uu se ata o Iesu Keriso i se vaega i totonu o le potu o le Peraimeri. Tuu atu i le tamaitiiti o loo fusi mata e taumafai e sue le ata e aunoa ma se fesoasoani. Toe fai le gaoioiga, a o le taimi la lea tuu atu i ni tamaiti se toalua e uu i luga se laau, maea, po o se manoa e sui ai le ai uamea lea e taialaina mai le tamaitiiti o loo fusi mata e agai atu i le ata o Keriso. Tuu atu i le tamaitiiti e mulimuli i le maea e agai i le ata. Fesili atu: “E faapefea ona pei le piimau i le maea o le faitauina o tusitusiga paia?” (Tagai 1 Nifae 15:23–25.) Faasoa atu ni nai faataitaiga mai lou olaga i se taimi na aoaoina ai oe e tusitusiga paia i le mea e tatau ona e faia. Faamatala pe na faapefea ona fesoasoani lou mulimuli i aoaoga i tusitusiga paia e te faalatalata atili ai i le Faaola.

O lesona faitino e fesoasoani i tamaiti e malamalama ai i manatu i se auala faigofie ma masani ai (tagai AALVSA, 172).

Vaiaso 4: E mafai ona ou iloa e moni tusitusiga paia.

Uunaia le [agaga] malamalama: Aumai se mea faitino se tasi pe sili atu ina ia mafai ona aoao ai tamaiti e uiga i le faaaogaina o ni isi o latou sane e lima. Mo se faataitaiga, e mafai ona e aumaia se fualaau aina po o se fugalaau, pe mafai foi ona e taina ni musika. Tuu atu se avanoa i ni nai tamaiti e vaavaai ai, sogisogi, fetagofi, tofo, pe faalogo i mea na e aumaia. (Mafaufau e fai lenei gaoioiga i ni vaega toalaiti ina ia maua ai e tamaiti uma le avanoa e auai.) Faataitai atu e mafai foi ona tatou vaavaai, fetagofi, sogisogi, ma faalogo i tusitusiga paia, ae ina ia maua se molimau [o ia tusi] e manaomia lo tatou mauaina o se molimau e ala mai le Agaga. Valaaulia tamaiti e usu le pese “Saili, Mafaufau Loloto, ma Tatalo” (TT, 66). Fai atu ia i latou e faalogo, ao latou usuina le pese, mo mea e tolu e mafai ona tatou faia e valaaulia ai le Agaga ina ia molimau mai i le moni o tusitusiga paia. Valaaulia tamaiti e fai ni taga o lima mo upu saili, mafaufau loloto, ma tatalo. Toe usu le pese, ae faaaoga taga e sui ai nei upu.

Vaega toalaiti: O le auai i ni vaega toalaiti e maua ai e isi tamaiti le avanoa e auai ai (tagai AALVSA, 169). Ua leva ona nonofo tamaiti i ni vaega o vasega. E mafai ona faaaoga ia nei vaega mo gaoioiga a vaega toalaiti. O faiaoga o vasega e mafai ona fesoasoani atu ia mautinoa e auai uma tamaiti ma faatumauina le faaaloalo.

Uunaia le faaaogaaga: Faaali se ata o Moronae, ma faitau le Moronae 10:4–5. Valaaulia ni nai tamaiti e faasoa mai o latou lagona e uiga i tusitusiga paia. E mafai foi ona latou faasoa mai po o a mea na latou faia ina ia faitau ai tusitusiga paia i le fale. (Ta’u mamao atu i ni nai tamaiti ina ia lava lo latou taimi e saunia ai.) Uunaia tamaiti e faasoa atu i o latou matua i le fale a latou molimau e uiga i tusitusiga paia.