pangserbisyo nga mga misyonaryo nag-fist bumping [nagpangka og hinay sa kinumo nga mga kamot]

5. Nagpalambo og Mental nga Kalig-on Human sa Usa ka Hitabo

Ang misyonaryo nga trabaho nagbutang og daghang mga pangayo diha sa mga tawo, ug kini nga mga pangayo makaapekto sa kada tawo sa lain-laing paagi. Ang mga abilidad nga ikaw aduna motabang kanimo sa pagtuman sa buhat sa Dios. Makasalig ka Kaniya sa paghulip sa kulang tali sa imong abilidad ug sa unsay gikinahanglan. Ang mga sugyot sa ubos mahimong motabang kanimo uban sa pipila ka mga isyu. Dangup ngadto sa seksyon “1. Nagpalambo og Kalig-on samtang Nagsinati og Kaugtas” alang sa dugang nga mga ideya.

A. Pagkat-on og Bag-ong Buluhaton

Ang pagsugod og bag-ong buluhaton mahimong makaugtas. Pagmapailubon sa imong superbisor, imong mga kauban sa trabaho, ug sa imong kaugalingon. Paningkamot nga dili ka kawad-an og kadasig o masilo samtang ikaw nagkat-on sa imong buluhaton. Sa kasagaran, imong makat-unan ang mga butang sulod sa pipila ka mga adlaw. Ania ang pipila ka mga ilhanan nga motabang kanimo samtang ikaw nagsugod sa imong buluhaton. Mahimo tingali nga ikaw mohisgot niining mga butanga ngadto sa imong lider sa pangserbisyo nga misyon.

• Pahimutang. Pagkat-on sa lugar ug sa trabaho. Atimana ang bisan unsa nga mga pagrekord. Ipahimutang ang imong dapit nga trabahoanan. Ilha ang mga ngalan sa imong mga kauban sa trabaho ug mga superbisor.

• Pagmaya. Paghimo og desisyon nga motrabaho kada adlaw nga magbaton og positibo nga kinaiya sa trabaho. Bisan og ikaw gikapoy o wala makasiguro sa unsay gipaabut, pilia ang pagkamahigalaon. Pagpositibo bisan og ikaw wala malingaw sa imong mga buluhaton o sa mga tawo nga imong katrabaho. Kini motabang kanimo nga magmalampuson. Kini motabang niadtong nagpalibut kanimo sa pagkat-on nga mosalig ug modayeg kanimo.

• Pagpakita. Kinahanglan nga untop sa panahon ang tanang mga buluhaton, angay ang panaput ug andam nga mosugod. Pangita og mga paagi sa pagtabang ug pag-apil. Pakit-a ang mga tawo nga ikaw andam sa pagsulay og bag-ong mga butang ug pagpraktis og bag-ong mga kahanas.

• Pagtuon. Kon ikaw makadawat og mga video o sinulat nga materyal nga nagpasabut sa imong trabaho tun-i kini og maayo. Pagsulat sa mga butang nga kinahanglan nimo nga hinumduman. Magpakabana ilabi na sa mga lagda sa kahilwasan. Pagbantay usab sa mga lagda mahitungod sa pagkapribado o pagkatinago. Kat-uni ang mga sumbanan nga gipaabut alang sa pagbuhat sa imong trabaho sa malampuson nga paagi.

• Pangutana. Sa matinahuron nga paagi pangutana sa imong superbisor ug sa mga kauban sa trabaho mahitungod sa bisan unsa nga wala nimo masabti. Mahimong magdala ka og gamay nga kwaderno nga kasulatan og mga pangutana ug mga tubag nga imong ikapangutana inig ka human. Pagmapailubon niadtong mga nagtudlo kanimo kon sila dili mopasabut sa mga butang sa tataw nga paagi. Sulayi ang pagsulti og usab sa unsay imong nadungog. Pangutana, “Husto ba ang nadungog ko? Aduna pa bay lain?” Pangutan-a ang imong superbisor mahitungod sa iyang mga gilauman kanimo. Pangutana kon unsa ang labing importante nga mamaayo ang pagbuhat sa imong trabaho.

• Pangita sa wala masulat nga mga lagda. Ang matag lugar nga trabahoanan adunay iyang kaugalingong paagi sa pagbuhat sa mga butang. Ang pipila niini ka mga butang wala isulat, bisan tuod og kini mga importante. Ang mao nga wala masulat nga mga lagda mahimong nag-apil kon unsaon sa pag-atubang og mga panagbangi ug asa ug kanus-a mokaon. Ang ubang mga lagda mahimong mag-apil kon unsa ka mamugnaon ang dawaton ug unsa ang buhaton sa trabaho nga wala mahuman sa wala pa matapos ang adlaw sa pagtrabaho. Pagbantay niining wala masulat nga mga lagda ug paningkamuti ang pagsunod niini.

• Pagmapailubon sa imong kaugalingon ug sa uban. Ikaw makahimo og mga sayop! Kini kabahin sa pagkat-on og bisan unsa nga bag-o. Pangayo og pasaylo ngadto sa uban, ug pangutana kanila kon unsaon nimo sa pagtarong sa imong mga kasaypanan. Pangutana kon unsay kinahanglan nimong buhaton sa sunod higayon, ug sulayi pag-usab. Ayaw pagpabilin nga maghunahuna kanunay sa mga kasaypanan––sa imo o sa lain. Pagkat-on ug padayon sa pag-uswag uban sa positibo nga kinaiya. Makakat-on ka sa pagbuhat og maayo sa imong trabaho.

  pangserbisyo nga mga misyonaryo naggamit sa mga kompyuter

Si Elder Cecil O. Samuelson mitudlo: “Tanan kanato ‘naglambo ug nagtubo pa.’ Kita makahimo sa pagpakatakus samtang nagkinahanglan pa og pag-uswag. Siguroha nga ikaw walay mas taas nga sumbanan alang sa imong kaugalingon o sa uban kay sa gipakita sa Ginoo. Pangita og katagbawan sa imong pag-uswag samtang nag-ila nga ang pagkahingpit mahimong layo pa gihapon.”

“Unsa ang Gipasabut sa Pagkamahimong Hingpit?” New Era, Ene. 2006, 11–12

B. Pagpabiling Han-ay sa mga Tumong ug mga Plano

• Paghupot og kalendaryo o planner. Sa sinugdanan sa kada semana, ibutang ang imong mga atubangunon diha sa imong kalendaryo o planner. Ilakip ang mga buluhaton nga trabaho, mga miting sa simbahan, ug ubang mga pasalig sama sa pagbasa sa mga kasulatan ug pag-ampo. Isulat ang mga ngalan, mga tumong, ug mga lista sa mga butang nga imong kinahanglang buhaton.

• Ayaw pagsalig lamang sa imong panumduman. I-tsek ang imong kalendaryo o planner sa tibuok adlaw. Alang sa importanting mga butang nga kinahanglan nimong buhaton, pagpapilit og mubong mga sulat sa pahinumdom diha sa pultahan, diha sa refrigerator, o sa kilid sa imong katre. Ibutang ang mga pahinumdom diha sa imong telepono.

• Ibutang ang tanan nga imong kinahanglanon sa sunod adlaw diha sa usa ka piho nga lugar. Buhata kini sa dili ka pa mohigda. Niana dili nimo makalimtan ang usa ka butang nga importante. Ibutang ang imong importanting mga butang diha sa samang lugar. Niana nga paagi dili ka mag-usik og panahon sa pagpangita niini.

  mga misyonaryo nga nag-uban sa pagtuon

• Pangayo og tabang sa paghinumdom sa mga butang. Kon ikaw nagkinahanglan sa paghinumdom og usa ka butang nga dili kabahin sa imong kasagarang naandan nga paagi, hangyoa ang uban sa pagtabang kanimo sa paghinumdom. Makasulti ka og, “Ako nahibalo nga kini mao ang matang sa butang nga may kalagmitan nga akong makalimtan. Mahimo bang pahinumduman ko nimo kon ako makalimot?”

• Pagpabiling nakatutok diha sa unsay imong gibuhat. Kon ikaw nakamatikod nga nalinga ka gikan sa usa ka misyonaryong kalihokan, ibalik ang imong atensyon ngadto sa imong buluhaton. Buhata kini kanunay ingon sa imong pagkinahanglan.

• Pagdesisyon sa imong mga tumong. Ingon nga kini mapuslanon nganha kanimo, ipatin-aw ang mga tumong sa matag kategoriya sa ubos. Paghimo og plano alang sa unsay imong buhaton. Idugang ang imong plano ngadto sa imong kalendaryo o planner kada semana.

  • Pisikal nga mga tumong sama sa pag-ehersisyo, pagpalambo og himsog nga pagkaon ug mga naandang pagkatulog, pag-atiman sa imong kwarto o dapit nga trabahoanan, pagdumala sa salapi, pagtabang sa panimalay, o pagdula og mga sport.

  • Emosyonal nga mga tumong sama sa paggahin og panahon alang sa mubong pagpahulay o paghunahuna og lawom, pagpamalandong, pagsulat mahitungod sa mga pagbati o mga kasinatian, mga pagpahayahay, o paggahin og panahon diha sa kinaiyahan.

  • Sosyal nga mga tumong sama sa pagbuhat og mga butang uban sa mga higala ug pamilya, pag-apil sa mga kalihokan sa young single adult, pagtabang sa uban, pagbuhat sa family history, pag-interbyu og mga sakop sa pamilya mahitungod sa ilang mga kinabuhi, o pagkat-on ug pagpraktis og sosyal nga mga kahanas.

  • Mental nga mga tumong nga mohimo kanimo og usa ka mas maayong sulugoon sa Ginoo, sama sa pagtambong og mga klase, pagkat-on og pinulongan o instrumento sa musika, pagbasa, pag-usisa og mga interes sa trabaho, o sa pagpalambo og mga kahanas sa pagpanarbaho.

  • Espiritwal nga mga tumong sama sa pag-ampo nga mas sinsero, pagtuon sa mga kasulatan sa mas hingpit nga paagi, paglihok sa mga pag-aghat sa espiritu, pag-apil diha sa ward o branch, pagtambong sa templo, o pagserbisyo sa uban nga gawas sa imong mga buluhaton sa misyon.

• Igahin ang imong adlaw sa pagbuhat unsay gusto sa Ginoo nga imong buhaton. Buhata ang unsay imong mahimo sa pag-iskedyul sa imong panahon ug sa paggamit niini og maayo. Dayon sa pagsugod sa imong adlaw, itugyan ang adlaw ngadto sa Ginoo. Hangyoa ang Ginoo sa paghimo niini nga posible alang sa tanan nga mga butang nga maghiusa sa paglihok alang sa imong kaayohan. Sa tibuok adlaw, pagmanunuton ug makiuyunon ngadto sa Espiritu.

  mga misyonaryo diha sa kalasangan

C. Pagbuntog sa Pagbati nga Dili Makasarang

• Ipadayon ang imong maayong buot kon ikaw masayop. Pangayo og pasaylo alang sa unsay imong nabuhat nga sayop ug dayon sulayi pag-usab. Hinumdumi nga ang pagkaandam sa pagpangayo og pasaylo usa ka timaan sa paglahutay ug kalig-on.

• Pangitaa ang kalig-on diha sa kahuyang. Usahay ang pagbaton og kahuyang nagtabang kanato sa pagpalambo og mga kalig-on sama sa kapuangod ug kalooy. Ang pagpaningkamot sa pagbuntog og kahuyang makatudlo kanato og pailub, pagpaubos, ug pagsalig diha sa Ginoo. Usahay ang kahuyang sama sa daling malinga adunay kalig-on nga nag-uban niini. Mahimo kang makamatikod og mga butang nga wala makita sa uban. Pangitaa ang mga kalig-on nga tingali nagagikan sa imong mga kahuyang.

  Si Presidente Thomas S. Monson mipahayag: “Ang inyong Langitnong Amahan nahigugma kaninyo—matag usa kaninyo. Kana nga gugma dili gayud mausab. … Anaa kini alang kaninyo kon kamo naguol o malipayon, nawad-an sa paglaum o malaumon. Ang gugma sa Dios anaa alang kaninyo dili igsapayan kon mobati man kamo nga angayan o dili sa gugma. Anaa ra kini kanunay.”

  “Wala Kita Mag-inusara,” Liahona, Nob. 2013, 124

• Lihoka ang imong mga kahuyang. Lihoka ang usa ka kahuyang matag higayon aron dili ka masanapan. Pagkuha og mga ideya gikan sa uban. Pag-ampo alang sa giya ug pagtabang. Paghimo og usa ka plano alang sa pagbuntog sa imong kahuyang. Paghunahuna sa mga babag nga malagmit imong ikahibalag, ug paghunahuna kon unsaon sa pag-atubang niini. Pagpraktis. Ipahiangay ang imong plano kon kinahanglan. Pagmapailubon.

• Itutok pag-usab ang imong atensyon diha sa imong personal nga misyon. Mibati ka ba og kasina sa mga kahanas sa laing tawo? Ipahimutang ang imong kabaskog ngadto sa pagpalambo sa imong mga kalig-on ug sa pagtampo niini ngadto sa trabaho. Imo kini nga misyon.