“Pagbalhin gikan sa Misyon nga Nagsangyaw sa Ebanghelyo [Proselyting],“ Pagpahiangay ngadto sa Kinabuhi sa Pangserbisyo nga Misyonaryo: Booklet nga Kapanguhaan (2020)
“Pagbalhin gikan sa Misyon nga Nagsangyaw sa Ebanghelyo [Proselyting],” Pagpahiangay ngadto sa Kinabuhi sa Pangserbisyo nga Misyonaryo
Pagbalhin gikan sa Misyon nga Nagsangyaw sa Ebanghelyo
Kon ikaw balhinon gikan sa usa ka misyon nga nagsangyaw sa ebanghelyo ngadto sa usa ka pangserbisyo nga misyon, ang pagbalhin dili makaapekto sa imong tawag isip usa ka misyonaryo.
Pag-atubang sa Kausaban
-
Ang pagbalhin gikan sa usa ka misyon nga nagsangyaw sa ebanghelyo ngadto sa usa ka pangserbisyo nga misyon makapasakit alang sa daghan nga mga misyonaryo. Mahimo kang magsinati og nagkalain-laing matang sa negatibong mga pagbati. Apan salig nga ang Manluluwas nahibalo sa imong sitwasyon. Ang iyang gugma alang kanimo hingpit. Gusto ug nagkinahanglan gihapon siya sa imong serbisyo. Nagkinahanglan Siya sa imong serbisyo sa pagtukod sa Iyang gingharian sa dili pa Siya mobalik nganhi sa yuta.
-
Kasagaran ang mga gibalhin nga mga misyonaryo mobati og nakasala. Nagmahay sila nga wala sila makahimo sa pagpabilin diha sa usa ka misyon nga nagsangyaw sa ebanghelyo. Kadtong mga pagbati nga nakasala makapugong kanila sa pagbati sa Espiritu. Kon ikaw anaa niini nga sitwasyon, hinumdumi nga ang Espiritu uban kanimo. Walay maayo nga rason nga mobati nga nakasala mahitungod sa wala mahuman nga misyon nga nagsangyaw sa ebanghelyo. Ikaw andam ug takus sa pagserbisyo (tan-awa sa Doktrina ug mga Pakigsaad 64:34).
-
Mga pagbati nga nakasala nagagikan sa kemikal nga mga reaksyon sa utok. Kini nga mga pagbati mahimong dili ang sangputanan sa sala. Importante kaayo ang pagsabot ug pag-ila sa kalainan.
Kalampusan Gihapon
Hunahunaa ang istorya ni Helaman ug sa iyang 2,060 ka batan-ong mga lalaki nga mga manggugubat (tan-awa ang Alma 57:19–27). Ang tanang 2,060 nga mga manggugubat mga samdan. Daghan kanila nakuyapan gikan sa pagkanawad-an og dugo. Ang pagkabuhi nilang tanan milagroso. Walay pagsapayan pila ka mga samad aduna ang kada usa kanila, ang tanang 2,060 milampos. Ang tanan kanila andam nga moserbisyo sa kawsa sa pagkamatarung. Sila matinud-anon, masulundon, ug imaisug. Ikaw makasunod sa ilang ehemplo ug mahimong usa ka matinud-anong misyonaryo.
Ang mga samad karon sa misyonaryo nga buhat mahimong mag-apil og pisikal, mental, ug emosyonal nga mga sakit. Kini nga mga sakit nagagikan sa daghang matang nga mga tinubdan ug mga hinungdan. Makapadayon ka sa pagserbisyo ug magmalampuson. Ikaw andam ug takos ug makagamit sa imong mga abilidad diha sa pagserbisyo sa Dios. (Tan-awa sa Doktrina ug mga Pakigsaad 4.)
Samtang ikaw nag-uswag sa imong bag-ong buluhaton, hinumdumi kining makadasig nga mga pulong gilan ni Elder Gerrit W. Gong: “Makaplagan nato ang atong mga kinabuhi pinaagi sa pagwagtang sa atong kinabuhi tungod sa Manluluwas” (“Pagkahimong Hingpit diha kang Kristo,” Liahona, Hulyo 2014, 47). Ug kamo kanunay nga makakaplag og kalig-on diha sa saad sa Manluluwas: “Umari kanako, kamong tanan nga nabudlay ug nabug-atan, ug papahulayon ko kamo. … Kay masayon ang akong yugo, ug magaan ang akong luwan” (Mateo 11:28, 30).
Padayon sa Paglambo
Karon nga ikaw nabalhin, nagpuyo ka og balik sa panimalay. Paninguha nga dili mobalik ang karaang mga batasan nga magsalig sa uban. Ikaw misyonaryo gihapon! Padayon sa pagpalambo og mga kahanas sa hamtong, sama niini:
-
Atimana ang imong kaugalingon nga mga saput pinaagi sa paglaba, paghayhay, ug pagplantsa niini sa imong kaugalingon.
-
Tan-awa ang imong personal nga pamustura. Kaligo kada adlaw, ug ipakita ang imong kaugalingon isip usa ka representante sa Manluluwas.
-
Pagkat-on sa pagluto, pamalit sa imong grocery, ug bantayi unsay imong gikaon.
-
Siguroha nga nag-ehersisyo ka kada adlaw.
-
Katulog og husto aron magpabilin nga himsog ug abtik.
-
Paghimo kada adlaw og personal nga pagtuon sa ebanghelyo ug pag-ampo.
-
Paghimo og matuman nga mga tumong ug ubos-ubos nga mga tumong, ug isulat kini.