pangserbisyo nga misyonaryo nagkompyuter

Pagsabot sa Kaugtas [Stress]

Nagpalambo og Kalig-on samtang Nagsinati og Kaugtas

Ang bag-o nga mga kasinatian (sama sa pagpasakop sa Simbahan o pagtambong og bag-o nga eskwelahan) mga makapaukyab. Apan kini makapanerbyos usab kanimo. Wala kaayo ka mahibalo kon unsa ang paabuton. Sa hinay-hinay imong makat-unan ang pag-atubang niini nga mga hagit, ug ikaw mouswag sa ngadto-ngadto. Ang pagpahiangay ngadto sa kaugtas sa positibo nga mga paagi nagpalambo og emosyonal nga kalig-on sa pagbarug og balik human sa mga kalisud.

Ang pangserbisyo nga mga misyon dili lahi. Usahay ang usa ka pangserbisyo nga misyon maingon og usa ka katingalahang espiritwal nga panimpalad. Kini ingon og usa ka hagit nga imong madumala. Sa kalma nga paagi mouswag ka uban sa hugot nga pagtuo. Imong maamguhan nga kadaghanan sa pagkanerbyos o kaguol nga imong nasinati temporaryo. Makabaton ka og kaisug sa pagpakisayud nga ikaw mopahiangay sa kadugayan. Mouswag ka sa espiritwal nga paagi ug nagbaton sa oportunidad sa pagpalambo og bag-o nga mga kahanas. Ang mga kasinatian nga kaniadto kanunay nga gikahadlokan mahimo nga mas madumala. Gani moabot ka nga makagusto sa mga aspeto sa misyonaryo nga pagserbisyo nga kanhiay gibati nga makasanap. Mosalig ka sa Espiritu. Motubo ang imong pagsalig ug makakaplag og kalipay diha sa imong pagserbisyo.

Sa ubang mga panahon, bisan pa niana, tingali imong atubangon ang wala damha nga mga problema. Ang pipila ka mga kasinatian mas malisud o dili maayo kay sa imong gidahum. Tingali naghunahuna ka kon unsaon nimo sa paglampos. Imbis bation ang kadasig sa pagsulay, tingali mahimo ka nga mabalak-on, dali nga masuko, gikapoy, o nasagmuyo. Tingali aduna kay pisikal nga mga simtoma sama sa sakit, naglain nga tiyan, dili makatulog, o balatian. Mahimong aduna kay kalisud sa pagkat-on o sa pakig-istorya og mga tawo. Tingali mobati ka nga nawad-an og kadasig o gustong moundang.

Upat ka Ang-ang sa Kaugtas

Ang mga simtoma sa kaugtas sama sa mga sukdanan sa dashboard sa sakyanan. Kini nagpahinumdom kanimo sa pagpahinay, pagpagasolina, o sa pagpatan-aw sa makina. Kini nagpahinumdom kanimo sa pagpuno sa imong espiritwal nga “tangke” ug sa pagpangita alang sa mga solusyon. Sumala sa mosunod nga tsart, kon ang mga misyonaryo maayong nagsagubang sa kaugtas, sila anaa sa “berde” nga ang-ang. Kon sila nabalaka o adunay kalisud, anaa sila sa “dalag” nga ang-ang. Kon sila nagpadayon sa pagbati og kaugtas, sila anaa sa “kahil [orange]” nga ang-ang. Ug kon bation nila nga dili makatrabaho tungod sa kaugtas, sila anaa sa “pula” nga ang-ang.

Sa tibuok panahon sa imong misyon, mahimo nimong masinati ang lain-laing mga ang-ang sa kaugtas sa lain-laing mga panahon. Mahimo nimong bation ang “kahil” karong adlawa ug mobalik ngadto sa “berde” ugma. Kini nga booklet adunay mga sugyot ug mga himan nga mahimong motabang kanimo sa pagpabilin sa––o sa pagbalik ngadto––sa berde nga ang-ang.

		Mga Timailhan nga Anaa Ka Niini nga Ang-ang	Unsa ang Buhaton
Berde	icon sa berdeng nagpahiyom nga nawong	Mga Timailhan nga Anaa Ka Niini nga Ang-ang Masaligon, malipayon Andam sa pagsagubang sa mga hagit Daling makabawi gikan sa mga kalisud Magkasinabut sa imong mga lider Gibati ang Espiritu	Unsa ang Buhaton Mao kini ang sulundon. Diha niini nga ang-ang, ikaw nagdumala sa kada adlaw nga mga kaugtas sa misyonaryo nga pagserbisyo. Ikaw nagkat-on ug nag-uswag. Padayon sa pagtrabaho og maayo ug salig sa Ginoo.
Dalag	icon sa dalag nga neutral nga nawong	Mga Timailhan nga Anaa Ka Niini nga Ang-ang Nakulbaan, naguol, huyang, mabalak-on, dili andam, dili makatulog og maayo Adunay kalisud sa pakigsinabut sa uban Adunay kalisud sa pagbati sa Espiritu	Unsa ang Buhaton Kini sagad nga makagahin og pipila ka mga panahon diha sa dalag nga ang-ang. Pagmabination sa imong kaugalingon samtang ikaw nagsagubang sa mga hagit. Pagmapailubon samtang ikaw nagkat-on og bag-ong mga kahanas, ingon sa pagkamahunahunaon. Kini nga mga kahanas motabang kanimo nga mahimong mas malig-on ug modugang sa imong abilidad sa pagserbisyo. Padayon sa pag-ampo ug sa pagserbisyo uban ang hugot nga pagtuo. Pagtuon sa mga kasulatan ug sa mga pakigpulong sa komperensya, sa imong mga lider sa pangserbisyo nga misyon, ug kini nga booklet alang sa tabang.
Kahil	icon sa kahil nga dili malipayon nga nawong	Mga Timailhan nga Anaa Ka Niini nga Ang-ang Gikapoy (sa pisikal ug sa emosyonal nga paagi) Masakiton (nagsakit nga tiyan o ubang mga simtoma) Daling masuko Grabeng nawad-an og kadasig Dili makabati sa Espiritu	Unsa ang Buhaton Walay ganahan nga maanaa sa kahil nga ang-ang sa kaugtas, apan kini dili permanente nga kahimtang. Pag-ampo alang sa giya samtang ikaw nagtuon sa mga kasulatan ug naggamit sa mga sugyot niini nga booklet. Kontaka ang imong mga lider sa pangserbisyo nga misyon kon ikaw nagpabilin diha sa kahil [orange] nga ang-ang sulod sa kapin sa tulo ka adlaw. Motabang sila nimo.
Pula	icon sa pula nga naguol nga nawong	Mga Timailhan nga Anaa Ka Niini nga Ang-ang Nagpamati nga mopadayon ug grabe nga depresyon, kataranta, o kabalaka Nagpamati nga nawad-an og paglaum Naglisod sa pagkaon o pagkatulog (mahimong mosangpot sa sakit) Nagpamati nga nasanapan ug dili makahimo sa pagpadayon Nagpamati nga daw gipasagdan ka sa Dios	Unsa ang Buhaton Kon ikaw anaa niini nga ang-ang, kontaka ang imong mga lider sa pangserbisyo nga misyon, mga sakop sa pamilya, o presidente sa stake alang sa tabang. Pangayo og panalangin sa pagkapari. Paggahin og pipila ka panahon sa pagsulat sa imong journal o pamalandonga ang mga sugyot niini nga basahon. Pag-ampo mahitungod niini. Mahimo ka nga mohangyo og pahulay gikan sa mga butang nga imong nakita nga labing malisud sa imong buluhaton. Pakigsulti sa imong mga lider sa pangserbisyo nga misyon sa pagtabang og pangita sa husto nga kausaban sa serbisyo alang kanimo.

Mahimo ka nga usa ka mapuslanon nga sulugoon sa Ginoo bisan unsa pa ang imong mga hagit. Sulayi ang paggamit sa mga ideya dinhi niini nga booklet ug padayon sa pag-uswag uban ang hugot nga pagtuo. Hunahunaa ang kasinatian ni Sister Xochilt Oteo, kinsa miserbisyo didto sa San Diego Service Mission:

Templo sa San Diego California

“Sa dihang misugod ako sa pagserbisyo sa Catholic Charities, ako naghinamhinam apan nahadlok. Gihangyo kami sa pagtudlo og usa ka klase nga mag-andam sa mga lalin ug mga refugee sa pagkat-on og basa sa Iningles. Gibati nako nga ako dili makahimo sa pagtudlo og Iningles nga klase ngadto sa mga tawo nga gikan sa tibuok kalibutan.

“Kami walay mga tighubad sa among klase, busa ang pag-istoryahanay limitado. Si Sister Pennock ug ako misulti pinaagi sa mga hulagway ug mga lihok sa kamot. Sa akong unang klase, nahadlok ako! Ako walay bisan unsa nga ideya kon unsa ang buhaton. Apan sa dihang akong gipundok ang akong klase, usa ka ulbo sa pagkakalma midagsang ngari kanako.

“Gibati ko ang Espiritu sa Ginoo. Ang akong trabaho yano––pagserbisyo sa matag estudyante, kinsa gibiyaan ang tanan aron sa pag-anha sa Estados Unidos, ug pagtabang kanila sa pagkat-on kon unsaon pagsulat ang ilang ngalan ug kinatibuk-ang impormasyon ug sa paghatag og sukaranang pagnagsultihanay sa Iningles.

“Kami mipadayon. Mga bulan sa wala madugay, didto kami sa Templo sa San Diego, isip kabahin sa among buluhaton, sa dihang among nadunggan ang mga sister nga nag-istoryahanay mahitungod sa mga refugee nga mongadto sa bunyaganan nianang adlawa. Sa akong hilabihan nga kalipay, usa niadto nga mongadto sa bunyaganan mao ang usa sa among mga estudyante kaniadto. Wala gani kami mahibalo nga siya mipasakop sa Simbahan.

“Ang among mga kasingkasing puno ug ang among mga mata naghilak samtang si Sister Pennock ug ako nahibalo nga among nabuhat ang among bahin isip pangserbisyo nga mga misyonaryo sa pagpanalangin sa mga kinabuhi sa among mga estudyante.”

Mga Gipangayo sa Misyonaryo nga Pagserbisyo

mga gipangayo ug mga kapanguhaan balanse

Ang pagserbisyo sa “tibuok ninyo nga kasingkasing, gahum, hunahuna ug kusog” (Doktrina ug mga Pakigsaad 4:2) usa ka pagdapit gikan sa Ginoo sa pagpanalangin sa inyong kinabuhi. Apan ang misyonaryo nga buhat dili sayon. Ang mga gipangayo sa misyonaryo nga pagserbisyo nahulog ngadto sa daghan nga mga kategoriya:

Kinatibuk-an (tan-awa ang “1. Nagpalambo og Kalig-on samtang Nagsinati og Kaugtas”). Atol sa imong misyonaryo nga pagserbisyo, mahimo nimong masinati ang daghang mga kausaban ug mga pagbalhin. Ang imong pamilyar nga mga paagi sa pagsagubang mahimong dili moepekto sa imong misyon. Usahay mobati ka og kabakikaw ug mahimong manlimbasug. Mahimong maghunahuna ka kon unsaon sa pagtabang sa ubang pangserbisyo nga mga misyonaryo kinsa nanlimbasog.

Pisikal (tan-awa ang “2. Nagpalambo og Pisikal nga Kalig-on”). Tingali ikaw magbarug kasagaran sa adlaw. Ang imong trabaho mahimong kapoy sa pisikal nga paagi. Ang kabag-o lamang sa sitwasyon makapaluya.

Emosyonal (tan-awa sa “3. Nagpalambo og Emosyonal nga Kalig-on sa Pagbarug og Balik Human sa mga Kalisud”). Mahimong mobati ka og kabalaka mahitungod sa tanan nimong kinahanglang tun-an o buhaton. Mahimong maglisud ka sa pagpahulay. Mahimong mawad-an ka og kadasig, malaayan o mobati nga nag-inusara.

Sosyal (tan-awa sa “4. Nagpalambo og Kalig-on sa Pagsagubang sa Nagkalain-laing Sosyal nga Sitwasyon”). Mahimong ikaw nagkinahanglan nga makaila dayon og bag-ong mga tawo. Mahimong makigsulti ka ngadto sa mga dili kaila ug makig-uban sa bag-ong mga lider sa imong dapit nga giserbisyohan.

Pagkat-on ug Trabaho (tan-awa ang “5. Nagpalambo og Mental nga Kalig-on Human sa Usa ka Hitabo”). Ikaw kinahanglan nga magkat-on og bag-ong mga kahanas sa paghuman sa imong mga buluhaton. Ikaw kinahanglan nga magplano ug magdumala sa mga tumong. Ikaw kinahanglan gayod nga mopahiangay sa mga kausaban, ug mosulbad sa tanang matang sa praktikal nga mga problema.

Espiritwal (tan-awa ang “6. Nagpalambo og Espiritwal nga Kalig-on sa Epektibong Pagsugakod sa Kalisdanan”). Ikaw mokab-ut aron sa paglig-on sa imong pagpamatuod ug sa paglikay sa tintasyon. Paninguha sa pagbati ug pag-ila sa Espiritu. Usahay, ikaw kinahanglan nga modawat og mga koreksyon, mohinulsol, ug moatubang sa imong mga kahuyang ug mga pagbasol. Pagpaubos, ug salig sa Ginoo nga mas labaw kay sa kaniadto. Samtang nagbuhat ka niining mga butanga ikaw molambo ug mouswag.

“Dili kita angayang masagmuyo kon ang atong kinasingkasing nga mga paningkamot ngadto sa pagkahingpit karon daw makapaluya ug walay katapusan. Ang pagkahingpit naghulat.”

Presidente Russell M. Nelson (“Perfection Pending,” Ensign, Nob. 1995, 86)

Pagdumala sa mga Hagit sa Imong Pangserbisyo nga Misyon

Daghan nga mga hagit sa usa ka pangserbisyo nga misyon dili mahimo nga mapakubsan. Ikaw gikinahanglan nga makakat-on og bag-ong mga butang. Kinahanglan gayud nga ikaw mosunod sa mga lagda ug magkasinabut sa ubang mga tawo. Kinahanglan gayud nga imong buhaton ang gipabuhat nga trabaho sa kahanas nga paagi ug biyaan ang imong kahayahay nga pagkabutang sa pagsulay og bag-ong mga butang.

Hinoon, ikaw adunay daghan nga mga kapanguhaan nga motabang kanimo sa pag-atubang sa mga hagit sa imong bag-ong tahas sa pagserbisyo. Kini nga booklet motabang kanimo sa pagpangita ug paggamit niini nga mga kapanguhaan. Usab, hinumdumi ang importansya sa pag-ampo, pagtuon sa kasulatan, ang giya sa Espiritu Santo, ug pagtabang sa uban. Ang labing importanting butang nga ikaw makahimo mao ang pagsalig diha sa Manluluwas ug sa Iyang Pag-ula. Siya ang walay kataposang tinubdan alang sa pagdumala sa mga kaugtas sa kinabuhi sa pangserbisyo nga misyonaryo.

Unsay Akong Sunod nga Buhaton?

Tun-i ug gamita ang impormasyon sa sunod nga seksyon “Paggamit sa Rekord sa Hagit.” Samtang ikaw nagbuhat, giyahan ka ngadto sa mga seksyon niini nga booklet. Kini nga seksyon makatabang sa imong piho nga mga kabalaka. Basaha kadto nga mga seksyon karon. Balik ngadto sa ubang mga seksyon kon kinahanglan mo kini.