Pagtipon sa Misyonaryo ug Dili Misyonaryo nga Kinabuhi

Usa sa mga katuyoan sa usa ka pangserbisyo nga misyon mao ang “pagtabang sa kada pangserbisyo nga misyonaryo sa pagpangandam alang sa usa ka tibuok kinabuhi nga serbisyo.” (“Service Missions for Young Missionaries,” dugang sa sulat ngadto sa Unang Kapangulohan, Nob. 16, 2018). Ikaw makabuhat padulong ngadto niini nga katuyoan samtang ikaw nagtuman sa imong buluhaton nga pagserbisyo samtang nagpuyo sa panimalay. Ang pagbuhat niini nga mga butanga mahimo nga usa ka hagit. Ikaw manginahanglan sa pagdumala sa imong oras sa mabinantayong paagi. Samtang ikaw nagserbisyo sa imong misyon, ikaw usab magkat-on sa pagbuhat unsa ang gikinahanglan diha kanimo sa imong kinabuhi human sa misyon. Ikaw nagkinahanglan sa pagbalanse sa trabaho, pamilya, edukasyon, simbahan, ubang serbisyo, ug panahon sa lingaw-lingaw.

Ang imong pangserbisyo nga misyon mao ang sulundon nga panahon ug kahimtang alang sa pagpalambo og kahanas sa pagdumala og oras. Maanaa kanimo ang pagkamauyunon ug lig-on nga suporta sa pag-ila ug pagpalambo sa imong talagsaon nga mga talento. Ikaw makagamit niini sa pagserbisyo sa uban.

Pakitambag sa imong lider sa pangserbisyo nga misyon ug sa presidente sa stake mahitungod sa paghimo og mga tumong. Ang imong mga lider motabang usab kanimo sa pag-ila sa imong mga talento. Ang pagpalambo sa imong mga talento kinahanglan nga ilakip sa imong mga tumong. Kini nga mga tumong mga kabahin sa imong kaugalingong gipahiangay nga plano sa misyon sa pagtabang kanimo sa pagbalanse sa imong mga prayoridad. Ikaw ang mahimong importante nga tigdesinyo sa imong plano. Kini ang mahimo nimong plano. Kini gipahiangay sa imong mga kalig-on, mga talento, karon nga kapasidad, ug umaabut nga mga paglaum ug mga damgo. Ang imong suporta nga grupo makatambag ug makaawhag kanimo, apan ang mga pagpili imo.

Uban sa imong suporta nga grupo, ikaw makatukod og matuman nga mga tumong human sa misyon ug ang mga plano sa pagkab-ot niini. Ang mga kahanas nga imong gipalambo mopanalangin kanimo ug sa uban sa tibuok nimong kinabuhi. Ikaw mahimo unsa ang imong mahigugmaong Langitnong Amahan gusto kanimo nga mahimo. Ang Ginoo motabang usab kanimo niining kulba-hinam nga panaw.

Pinaagi sa pagkat-on og gamit sa imong oras sa maalamong paagi, ikaw mangandam alang sa usa ka tibuok kinabuhi nga serbisyo. Ikaw makahimo sa pagpuyo sa duha ka labing importante nga mga sugo. Kini mao ang “higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan” ug “higugmaa ang imong silingan sama sa imong kaugalingon” (Mateo 22:37, 39).