Jesus nagkamay sa mga lalaki diha sa sakayan

Detalye gikan sa Dali, Sunod Kanako, ni James T. Harwood

Pasiuna

Makahimo Ka nga Magmalampuson uban sa Panabang sa Ginoo

Isip usa ka pangserbisyo nga misyonaryo, ikaw gitawag sa pagrepresentar ni Jesukristo. Nangalagad ka ngadto sa mga anak sa Langitnong Amahan. Ang Manluluwas nahigugma kanimo, ug Siya motabang kanimo sa pagpadayon nga mouswag. Siya misaad: “Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (Doktrina ug mga Pakigsaad 84:88).

pangserbisyo nga misyonaryo nagbasa og mga kasulatan

Gamita ang imong hugot nga pagtuo ug lihok diha sa desisyon nga imong gihimo nga buhaton ang buhat sa Ginoo. Pinaagi sa imong nagpadayon nga hugot nga pagtuo ug labing maayo nga mga paningkamot, ikaw mopalambo sa mga kahanas, mga gasa, ug mga kalig-on nga imong gikinahanglan dayon. Pagabation nimo ang panabang sa Ginoo. Motubo ka diha sa pagsalig sa imong abilidad sa pagserbisyo Kaniya.

Ang Ginoo nagsaad sa pagtabang sa mga misyonaryo. Apan daghan sa gamhanang mga misyonaryo sa kasaysayan miantus ug nanlimbasug sa ilang misyonaryo nga mga paghago. Si Ammon ug ang iyang mga kaigsoonan “nag-antus sa hilabihan, diha sa lawas ug diha sa hunahuna, sama sa kagutom, kauhaw ug kakapoy, ug usab sa dako nga paghago diha sa espiritu” (Alma 17:5). Usahay, sila nasanapan. “Karon sa diha nga ang atong mga kasingkasing nasubo, kita hapit na unta mobalik, tan-awa, ang Ginoo mihupay kanato, ug miingon: Lakaw taliwala sa inyong mga kaigsoonan, ang mga Lamanite, ug antusa uban sa pailub ang inyong mga kasakit, ug Ako mohatag nganha kaninyo sa kalampusan” (Alma 26:27).

Kini nga saad magamit diha kanimo sa imong buluhaton nga pagserbisyo ngadto sa pamilya sa Dios. Ikaw mahimong mapuslanon nga sulugoon sa Ginoo.

Si Tatso Ito, kinsa may spinal muscular atrophy, maoy usa ka ehemplo sa katumanan niini nga saad. Sa dihang ang pamilyang Ito mibalhin gikan sa Japan ngadto sa Utah, mihukom si Tatsu sa pagserbisyo isip usa ka pangserbisyo nga misyonaryo. Ang manghud nga lalaki ni Tatsu, si Dan, “nakakita kon giunsa ni Tatsu sa pagkausab” atol sa iyang misyon ug nahibalo nga si Tatsu sa tinuod “nangandam sa pagbalik ngadto sa langit.”

Sa dihang namatay si Tatsu, si Dan, kinsa usab adunay spinal muscular atrophy miadto sa templo. Gibati niya nga giaghat sa pagpangutana kon matawag ba kaha siya sa paghuman sa samang dapit nga misyon nga giserbisyohan ni Tatsu sa wala pa siya mamatay. Napanalanginan si Dan nga nakahimo sa pagbuhat sa mao. Miserbisyo siya sa LDS.org pundok sa motubag og emerhensiya ug giribyu ang “I’m a Mormon” nga mga impormasyon sa Hinapon.

Miingon si Dan nga siya usab “usa ka representante sa Dios sa matag adlaw nga kinabuhi.” Kon usa ka tawo adunay mga problema, siya sa “kanunay malipayon nga maminaw kanila ug nag-awhag kanila sa pag-adto sa ilang mga bishop sa pagdawat og panalangin.”

Samtang ang misyon ni Elder Ito walay naandan nga paagi sa pagsangyaw sa ebanghelyo, miingon siya nga sa hingpit gibati niya nga siya usa ka misyonaryo. Miingon siya nga ang iyang misyon mitabang sa “pagdugang sa akong kaandam sa pagserbisyo pa sa matag adlaw.”

pangserbisyo nga misyonaryo nagkompyuter

Elder Tatsu Ito

Unsaon sa Paggamit Niini nga Booklet

Ang usa ka pangserbisyo nga misyon mahimong makalipay ug makaugtas. Ang kakugi ug serbisyo napamatud-an nga mga himan sa pagdumala sa kaguol, nawad-an og paglaom, ug kakapoy. Kini importante alang ni bisan kinsa nga nalambigit sa buhat sa Ginoo, sa panahon pa ug sa nahuman na ang misyonaryo nga pagserbisyo. Apan ang kakugi ug serbisyo dili lamang mao ang inyong mga himan. Ang ubang mga kapanguhaan naglakip sa propesyonal nga tabang, mga panalangin sa pagkapari, tambag gikan sa sinati nga mga hamtong, ug kini nga booklet. Ang Ginoo motabang kanimo sa pagpalambo og mga kahanas ug mga kinaiya sa pagtabang kanimo nga molampus. Makakaplag ka og katagbawan ug kalampusan sa imong pangserbisyo nga misyon ug sa kinabuhi.

Kini nga booklet wala magpasabut nga basahon ang tanan sa usa ka higayon lamang. Gamita ang mga panudlo sa ubos. Ikaw pagagiyahan ngadto sa mga sugyot alang sa mga hagit nga imong giatubang. Kini nga mga ideya motabang usab samtang ikaw nagserbisyo ug nangalagad sa uban.

Unsaon sa Pagsugod

Basaha ang “Pagsabot sa Kaugtas”

Sa pagsugod, basaha ang “Pagsabot sa Kaugtas.” Makat-unan nimo kon unsa ang kaugtas ug unsa ang mga hinungdan sa kaugtas sa buhat sa pangserbisyo nga misyonaryo. Makat-unan usab nimo kon unsa nga mga kapanguhaan ang anaa sa pagdumala sa kaugtas.

Tun-i ang “Paggamit sa Rekord sa Hagit”

Sunda ang mga direksyon sa ubos “Paggamit sa Rekord sa Hagit.” Kini nga mga direksyon motabang kanimo sa pagpiho hain nga mga hagit sa imong misyonaryo nga buhat ang mahimong hinungdan sa karon dayon nga kalisud. Makakita ka og mga sugyot sulod niini nga booklet nga motabang kanimo sa pagbuntog sa kada hagit. Mga sakop sa pamilya ug mga lider sa pangserbisyo nga misyon makatabang kanimo sa paggamit niini nga mga sugyot ug mosugyot usab og ubang mga ideya. Padayon sa pagbuhat sa uban nga mga hagit pinaagi sa paggamit sa mga sugyot niini nga booklet.