pangserbisyo nga misyonaryo atubangan sa Templo sa Salt Lake

Pagpangandam sa Pangserbisyo nga Misyonaryo

Pagpahiangay ngadto sa Kinabuhi sa Pangserbisyo nga Misyonaryo

Sagad kini sa bag-ong mga misyonaryo ang pagsinati og pipila ka matang sa kaugtas o sa pagkadili komportable. Kinahanglan ka nga makakat-on og bag-ong mga buluhaton, makighimamat og bag-ong mga tawo, ug makigtrabaho sa uban. Samtang ikaw nagkat-on sa pagbuhat niining mga butanga, pagmapailubon. Makakat-on ka sa pag-ila sa mga panalangin sa paghalad sa imong kinabuhi ngadto sa Manluluwas. Hinumdumi nga ang Espiritu Santo magauban kanimo. Motabang Siya kanimo sa paghimo niini nga pagbalhin. Motabang siya kanimo sa pagpahiangay ngadto sa imong bag-ong mga responsibilidad isip pangserbisyo nga misyonaryo.

misyonaryo nga nagpahiyom

Pagpahiangay ngadto sa Bag-ong mga Kasinatian

Ang pangserbisyo nga misyonaryo sama sa daghang mga tawo kinsa mosulod og bag-ong sitwasyon. Daghan ang moagi sa nagkalain-laing mga yugto sa emosyonal nga pagpahiangay kon sila magsugod sa ilang serbisyo:

• Pagpaabut

  • Tingali mobati ka nga naghinam-hinam alang sa hagit (tan-awa sa 1 Nephi 3:7).

  • Tingali mobati ka og dugang nga kahulugan sa katuyoan ug pagkamaunungon ngadto sa Dios (tan-awa ang 3 Nephi 5:13).

  • Tingali mobati ka og kalipay ug nagpaabut nga makighimamat og bag-ong mga tawo ug magsinati og bag-ong mga dapit.

• Nagdiskobre sa wala damha

  • Tingali magsugod ka sa pagduda sa imong desisyon sa pagserbisyo (tan-awa ang Alma 26:27).

  • Tingali makamatikod ka og pisikal nga mga simtoma sa kaugtas, sama sa walay tarung nga pagkatulog, kausaban sa gana sa pagkaon, o kadaling masuko.

  • Tingali sa wala damha nakita nimo ang imong kaugalingon nga nanghinaway sa mga lagda ug sa mga gilauman sa pangserbisyo nga misyon. Tingali dili ka gusto nga mosunod niini sa hingpit nga paagi.

• “Makahimo ako niini”

  • Makakat-on ka nga andam nga mosunod sa mga lagda ug mga gilauman sa pangserbisyo nga misyon.

  • Makakat-on ka sa pagbaton og pailub (tan-awa sa Isaias 28:10; Mosiah 4:27).

  • Ang imong pisikal nga mga simtoma sa kaugtas, kon ikaw aduna, magsugod sa pagkawala.

• Emosyonal nga paningkamot nga makabarug sa kaugalingon

  • Mobati ka nga komportable nga nagbuhat sa inadlaw-adlaw nga naandan nga trabaho.

  • Imong maila ang imong personal nga mga kalig-on ug mga pag-uswag.

  • Imong masabtan unsay gipasabut sa pag-atubang sa kinabuhi og tagsa-tagsa matag higayon (tan-awa sa Doktrina ug Pakigsaad 98:12).

  • Makapalambo ka og mas dakong pagsalig sa kaugalingon ug nagkadugang nga tinguha sa pagserbisyo.

pangserbisyo nga misyonaryo atubangan sa tractor

Mga Butang nga Imong Mahimo Karon

Pangita og mga paagi sa pagserbisyo sa uban. Ang imong misyon usa ka tawag sa pagserbisyo. Tutoki sa pagtan-aw ang gawas sa imong kaugalingong mga pagbati sa pagkadili komportable. Pangalagad niadtong kinsa nagkinahanglan og mabinationg pulong, usa ka buhat sa gugmang putli, o panaghigalaay.

Pakigsulti sa uban mahitungod sa imong pagpahiangay ngadto sa imong pangserbisyo nga misyon. Paggahin og oras sa paghisgot sa mosunod nga mga hilisgutan uban sa mga ginikanan, mga lider sa pagkapari, o mga higala nga nahuman na og misyon:

• Ang Dios nanginahanglan sa daghang mga tawo sa pagbuhat og mga butang nga lapas sa unsay ilang mahimo nga buhaton. Unsay imong nakat-unan gikan sa mga ehemplo sa kasulatan? Mahimo nimong tun-an ang Exodo 4:10–12; Jeremias 1:6–9; Alma 17:9–12; Alma 26:27; Ether 12:23–27; Moises 6:31–32.

• Nganong importante nga matulog ug mobangon sa hustong oras? Nganong importante ang pagpadayon og maayo nga nutrisyon? Nganong kinahanglan nimo ang kanunay nga pag-ehersisyo? Nganong kinahanglan nimo nga adunay personal nga pag-ampo?

• Sa unsa nga paagi nga ang pagsulat og journal nagtabang kanimo sa panahon sa mga kalampusan ug mga hagit?

• Unsaon nimo pagtubag kon ang makasamok nga mga hunahuna o mga pagbati dili mawala?

• Tutok diha sa pagpalig-on sa imong relasyon ngadto sa imong Langitnong Amahan. Tinguhaa ang Espiritu pinaagi sa personal nga pag-ampo ug pagtuon sa kasulatan. Paminaw og makapabayaw nga musika, ug basaha ang imong patriyarkal nga panalangin.

• Pagmabination sa imong kaugalingon ug sa uban. Pakigsulti sa imong kaugalingon uban sa makahupay, mabination nga mga pulong nga imong gihanduraw nga gamiton sa Manluluwas. Hinumdumi, ang mga hunahuna sa pagkawalay mahimo, pagkawalay paglaum, o mapintas nga panghimaraut dili gikan sa Ginoo.

• Paabuta ang wala damha. Ang imong mga kasinatian isip usa ka pangserbisyo nga misyonaryo dili sama sa uban nga tawo. Dili tanan mahimong managsama gayud ingon sa imong giplano. Paninguha nga walay itago aron mausab aron ikaw makatuman sa imong mga responsibilidad isip usa ka pangserbisyo nga misyonaryo.

Hinumdumi, ang Espiritu magauban kanimo samtang naghimo ka niini nga pagbalhin ug motabang kanimo sa pagpahiangay ngadto sa imong bag-ong mga responsibilidad:

“Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (Doktrina ug mga Pakigsaad 84:88).

pangserbisyo nga mga misyonaryo

Katingbanan [Summary]

Hinumdumi nga ang imong kinabuhi isip usa ka pangserbisyo nga misyonaryo mahimong lahi gikan sa imong kanhiay nga kinabuhi. Apan ang Ginoo moganti ug mopanalangin kanimo. Pagpalambo og positibo nga kinaiya. Gamit og hugot nga pagtuo diha sa Ginoo. Pagmapailubon sa imong kaugalingon ug sa uban. Hinumdumi ang tambag nga gihatag ngadto ni Propeta Joseph Smith: “Ikaw masayud, akong anak, nga kining tanan nga mga butang makahatag kanimo og kasinatian, ug alang sa imong kaayohan” (Doktrina ug mga Pakigsaad 122:7).