“6. Nagpalambo og Espiritwal nga Kalig-on sa Epektibong Pagsugakod sa Kalisdanan,” Pagpahiangay ngadto sa Kinabuhi sa Pangserbisyo nga Misyonaryo: Booklet nga Kapanguhaan (2020)

“6. Nagpalambo og Espiritwal nga Kalig-on sa Epektibong Pagsugakod sa Kalisdanan,” Pagpahiangay ngadto sa Kinabuhi sa Pangserbisyo nga Misyonaryo

6. Nagpalambo og Espiritwal nga Kalig-on sa Epektibong Pagsugakod sa Kalisdanan

Usahay ang mga misyonaryo mosumbalik ngadto sa naghingapin nga kaugtas pinaagi sa pagduda sa kamatuoran sa ebanghelyo. Ang mga misyonaryo kasagaran mosumbalik niini nga paagi tungod kay kulang sila sa mga kapanguhaan sa pag-atubang sa naghingapin nga kaugtas. Kon ikaw mobati niini nga paagi, sulayi ang mga sugyot sa ubos. Pilia kadtong ingon og angay alang kanimo. Dangup ngadto sa seksyon “1. Nagpalambo og Kalig-on samtang Nagsinati og Kaugtas” alang sa dugang nga mga ideya.

A. Pagpalig-on sa Imong Pagpamatuod

Sabta nga ang mga pangutana maayo. Si Propeta Joseph Smith nakadawat og daghang mga pagpadayag agi og tubag sa iyang matinuoron nga mga pangutana. Kini maayo alang kanimo nga adunay mga pangutana mahitungod sa ebanghelyo. Samtang ikaw maninguha sa pagpangita og mga tubag, hinumdumi nga ang mga kasulatan, mga propeta, mga magtutudlo, ug ang imong kugalingong abilidad sa pagrason makatabang. Apan ang Espiritu lamang ang makapanghimatuod sa kamatuoran. Ang Espiritu nagsulti kanato nga si Jesus mao ang Kristo ug nga ang Simbahan tinuod.
Sabta unsa ang hugot nga pagtuo. Ang pagbaton og hugot nga pagtuo mao ang pagsalig sa hingpit nga kaayo, gugma, kaalam, ug pagkamakiangayon sa Dios. Kini mao ang pagsalig bisan kon kita wala makasabut sa hingpit nga paagi. Gitudlo ni Alma nga ang “hugot nga pagtuo dili ang pagbaton sa hingpit nga kasayuran sa mga butang; busa kon kamo adunay hugot nga pagtuo kamo molaum sa mga butang diin dili makita, diin mga tinuod” (Alma 32:21). Wala nimo kinahanglana ang “hingpit nga kahibalo” sa pag-angkon og hugot nga pagtuo. Tun-i ang Alma 32 alang sa tabang sa pagtukod sa imong hugot nga pagtuo.
Pagbaton og hugot nga pagtuo kon ang mga butang ingon og dili mapugngan. Tingali mobati ka og kaguol mahitungod sa piho nga mga sitwasyon o mga resulta. Kon kini mahitabo, pagpraktis og kahilom ug tutoki ang karon (tan-awa ang “1. Nagpalambo og Kalig-on samtang Nagsinati og Kaugtas”). Paniira ang mga emosyon nga ikaw aduna kon bation nimo ang pagkadili mapugnan. Bisan tuod kon kini nga mga pagbati dili komportable, dili kini makapasakit kanimo. Sa hinay-hinay, imong makat-unan ang pagbaton og mas nagkadako nga hugot nga pagtuo. Makabaton ka og hugot nga pagtuo sa panahon sa walay kasigurohan ug hagit.

Sunda ang mga sugo. Makaangkon kita sa pagsalig diha sa Ginoo kon atong makat-unan ang bili sa Iyang mga pagtulun-an. Aron pag-angkon sa Iyang pagsalig, kinahanglan gayud kita nga mobuhat sa Iyang kabubut-on. “Kon tuyuon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios, o nagsulti ba lamang ako sa kinaugalingon kong pagbulot-an” (Juan 7:17).
Pagmapailubon. Ang panahon ug kasinatian motabang kanimo sa paghimo og kahulugan sa pipila ka mga butang nga makalibug karon. Hinundumi ang pagtulun-an ni Nephi, “Ako nasayud nga ang [Dios] nahigugma sa iyang mga anak; bisan pa niana, ako wala masayud sa kahulugan sa tanan nga mga butang” (1 Nephi 11:17). Pagtukod diha sa unsay imong nahibaloan nga tinuod mahitungod sa Dios pinaagi sa Espiritu.

B. Pagkat-on sa Paghinulsol

Ang paghinulsol naglakip sa pakig-uyon sa imong kabubut-on ngadto sa Manluluwas. Ang mosunod nga mga baruganan motabang kanimo samtang ikaw naninguha sa paghinulsol.

Pagmatinuoron ngadto sa imong presidente sa stake. Kon ikaw adunay seryosong mga sala nga wala nimo ikumpisal, pakigsulti ngadto sa imong presidente sa stake. Ayaw paglipud-lipod ug pagmatinuoron. Motabang siya kanimo sa pagtarung niini nga mga butang.
Pasayloa ang imong kaugalingon human ang paghinulsol. Usahay ang mga tawo sa gihapon mobati og nakasala ug kaulaw human ang paghinulsol. Hinumdumi nga kitang tanan nagmahay sa milabay nga mga kasal-anan ug mga kasaypanan. Salig nga ang Pag-ula ni Kristo igo, bisan alang kanimo. Hinumdumi nga ang paghinulsol dili lamang gireserba nga plano kon ang orihinal nga plano dili molampos. Ang paghinulsol mao ang plano sa kalipay alang sa tanang mga tawo.
Tutoki ang mga butang nga sa tinuod importante. Himoa ang imong labing maayo sa paghinulsol matag adlaw. Dayon siguroha nga ang mga butang nga imong gikagul-an mga butang gayud nga importante. Usa ka ehemplo tingali ang pagserbisyo uban sa gugma. Ayaw kaguol mahitungod sa mga butang kabahin sa personal nga garbo, sama sa unsay gihunahuna sa uban kanimo.
Sabta ang tahas sa pagkumpisal. Dili ka kinahanglan nga mokumpisal sa dili kaayo seryoso nga mga sala o balik-balik sa pagkumpisal sa sama nga sala. Ang mga lider sa pagkapari mosulti kanimo kon ang imong pagkumpisal igo na. Ang pagpadayon sa pagbati og pagmahay ug pagkaguol mahitungod sa milabay nga mga sala sagad. Apan kini wala magpasabut nga ikaw kinahanglan nga mobalik-balik og kumpisal alang sa samang sala. Lingaha ang imong kaugalingon gikan sa mao nga mga hunahuna pinaagi sa uban nga mga kalihokan. Himoa ang tinuyo nga pagpili sa pagtuo diha sa kapasayloan sa Ginoo. Ibale-wala ang tintasyon nga mabalaka o maulaw.
Pakigsulti sa imong presidente sa stake o bishop kon ikaw nagpadayon sa pakigbisog.

C. Pagkat-on sa Pag-ampo uban sa Katuyoan nga Tinuod

Sulayi ang pag-ampo nga may tingog, bisan og sa hagawhaw lamang. Sulayi ang pag-andam og pag-ampo pinaagi sa pagsulat sa imong mga pangutana o mga kabalaka. Handurawa ang Dios nga anaa sa duol. Pangutana Kaniya kon unsa ang imong mabuhat alang Kaniya karong adlawa. Dayon lihoka ang mga ideya nga mosulod sa hunahuna. Usahay, gamita lamang ang pag-ampo sa pagpasalamat sa Dios. Pasalamat Kaniya alang sa daghan nga maayong mga butang nga Iyang gihatag kanimo.

D. Pagkat-on sa Paghigugma sa mga Kasulatan

Pag-ampo sa piho nga paagi alang sa panabang nga makasabot ug malingaw sa mga kasulatan. Gamita ang pipila sa imong panahon sa pagtuon sa pagsulat sa imong mga pagbati mahitungod sa mga kasulatan ug sa imong reaksyon ngadto niini. Isulat kon unsa ang imong nakat-unan o ang espirituhanong mga panghunahuna nga imong nadawat.

E. Pagkat-on sa Pagsalig sa Espiritu

Pagpraktis uban ang pailub. Ang pagkat-on sa pag-ila sa tingog sa Espiritu sama kaayo sa pagkat-on og usa ka pinulongan. Nagkinahanglan kini og praktis, pailub, ug pagpaubos. Paningkamuti ang pagkat-on gikan sa mga kasaypanan nga dili mohunong.
Pagkat-on gikan sa mga kinatibuk-ang komperensya. Alang sa mga ideya kon unsaon nimo nga makadawat og personal nga pagpadayag, tun-i ang pakigpulong sa kinatibuk-ang komperensya kabahin niini nga hilisgutan.

Mga Kapanguhaan sa Kasulatan

Tun-i ang mosunod nga mga tudling sa kasulatan. Kini molig-on sa imong hugot nga pagtuo nga ang Dios mohatag kanimo ug kahamugaway ug panabang. Libre ka sa pagdugang usab sa imong kaugalingong paborito nga mga tudling sa kasulatan. Samtang ikaw naghinumdom sa Manluluwas, ikaw “unta makabaton sa Iyang Espiritu uban [kanimo]” (Doktrina ug mga Pakigsaad 20:79).

Isaias 41:10: “Ayaw kahadlok; kay ania ako uban kanimo: Ayaw pagtalaw; kay ako mao ang imong Dios: palig-onon ko ikaw; oo, buligan ko ikaw; oo, ituboy ko ikaw sa tuong kamot sa akong pagkamatarung.”
Juan 14:27: “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahangalan dili magkaguol ang inyong kasingkasing, ni magtalaw.”
1 Nephi 1:20: “Ang malumo nga mga kalooy sa Ginoo anaa ibabaw sa tanan kinsa siya mipili, tungod sa ilang hugot nga pagtuo, aron mahimo sila nga malig-on maingon ngadto sa gahum sa kaluwasan.”
Jacob 3:1: “Siya mohupay kaninyo sa inyong mga kasakit, ug siya mohangyo alang sa inyong katuyoan.”
Jacob 4:7: “Ang Ginoong Dios mipakita kanamo sa among kahuyang aron kami masayud nga pinaagi sa iyang grasya, ug sa iyang walay katapusan nga pagpakig-angay ngadto sa mga katawhan, nga kami adunay gahum sa pagbuhat niini nga mga butang.”
Mosiah 4:27: “Ug tan-awa ang tanan niini nga mga butang mahimo diha sa kaalam ug kahusay; kay kini dili panginahanglan nga ang usa ka tawo kinahanglan modagan nga labaw pa kay sa iyang kusog.”
Mosiah 24:14: “Ug Ako usab mopagaan sa mga alantuson diin anaa gitungtong diha sa inyong mga abaga, gani kamo dili makabati kanila diha sa inyong mga buko-buko, bisan anaa kamo sa pagkaulipon; ug kini Ako mobuhat nga kamo mobarug ingon nga mga saksi alang kanako human niini, ug nga kamo mahimo nga masayud sa pagkatinuod nga Ako, ang Ginoong Dios, moduaw sa akong mga katawhan diha sa ilang kasakit.”
Alma 7:12: “Siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayud sumala sa unod unsaon pagtabang ang iyang mga katawhan sumala sa ilang mga kahuyang.”
Alma 26:27: “Karon sa diha nga ang atong mga kasingkasing nasubo, kita hapit na unta mobalik, tan-awa, ang Ginoo mihupay kanato, ug miingon: … antusa uban sa pailub ang inyong mga kasakit, ug Ako mohatag nganha kaninyo sa kalampusan.”
Alma 38:5: “Tungod kay ikaw mibutang sa imong pagsalig diha sa Dios mao usab nga ikaw pagaluwason gikan sa imong mga pagsulay, ug sa imong mga kasamok, ug sa imong mga kasakit.”
Ether 12:27: “Ug kon ang mga tawo moduol ngari kanako, Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.”
Doktrina ug mga Pakigsaad 6:32, 34–36: “Tan-awa Ako anaa sa taliwala kanila. … Busa, ayaw kahadlok, gagmay nga panon; pagbuhat og maayo; tuguti nga ang yuta ug impyerno maghiusa sa pagbatok kaninyo, kay kon kamo gitukod diha sa akong lig-on nga sukaranan, sila dili makabuntog. Tan-awa, Ako dili manghimaraut kaninyo. … Paghunahuna ngari kanako sa matag hunahuna; ayaw pagduha-duha, ayaw kahadlok.”
Doktrina ug mga Pakigsaad 58:2–4: “Siya nga matinud-anon bisan sa kalisdanan, ang ganti sa mao dako diha sa gingharian sa langit. Kamo dili makakita uban sa inyong kinaiyanhon nga mga mata, alang karon nga panahon, sa paagi sa inyong Dios mahitungod niadto nga mga butang nga moabut sa umaabut, ug ang himaya nga mosunod human sa daghan nga kalisdanan. Kay human sa daghan nga kalisdanan moabut ang mga panalangin.”
Doktrina ug mga Pakigsaad 84:88: “Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo.”
Doktrina ug mga Pakigsaad 122:7–9: “Kining tanan nga mga butang makahatag kanimo og kasinatian, ug alang sa imong.kaayohan. Ang Anak sa Tawo mikunsad ubos kanilang tanan. … Busa, padayon sa imong pamaagi.”
Uban nga mga tudling sa kasulatan: