2 Нифай 21–24

Мянган жил

Энэ дэлхийд нүгэл хилэнц байхгүй байсан бол амьдрал ямар байхыг төсөөл. Нэг л өдөр дэлхий тийм болох болно. Энэ нь Есүс Христийн мянган жилийн хаанчлалын үед тохиолдох болно. Нифай, Исаиа зэрэг олон бошиглогч Мянган жил хэмээх амар амгалангийн мянган жилийн талаар бошиглосон. Энэ хичээл танд Аврагчийн мянган жилийн хаанчлалыг ойлгож, үүнд бэлдэхэд тусална.

Ирээдүй

• Та ямар ямар чухал үйл явдлыг ирээдүйд тохиолдоно гэж хүлээж байна вэ? Яагаад?

• Эдгээр үйл явдлын талаар бодоход танд ямар мэдрэмж төрдөг вэ?

• Та бэлдэхийн тулд юу хийж байгаа вэ?

Мянган жил

Ирээдүйд болох нэг чухал үйл явдал бол Мянган жил юм.

• Мянган жилийн талаар та юу мэддэг вэ? Энэ талаар танд асуух зүйл байна уу?

Та асуултаа бичиж, тэмдэглэл бичих зай үлдээж болно. Өнөөдөр сурч байхдаа өөрийн асуултын хариултыг ол.

Бошиглогч Нифай эцсийн өдрүүдийн тухай бичсэн бөгөөд үүнд Исаиагийн эцсийн өдрүүдийн тухай бошиглол багтдаг. Исаиа Ассири, Вавилоны сүйрлийг Хоёр дахь ирэлтийн сүйрлийн нэг хэлбэр гэж зөгнөсөн (2 Нифай 20; 23-ыг үзнэ үү). Тэрээр мөн Есүс Христийн мянган жилийн хаанчлалын өмнөх сайн мэдээний Сэргээлтийн талаар бошиглосон. Түүний зөгнөлүүд Мянган жилийн талаарх бидний ойлголтыг гүнзгийрүүлсэн бэлгэдэл, дүрслэлээр баялаг юм.

Нифай, Исаиа хоёрын дараах бошиглолуудыг уншиж, Мянган жилийн талаарх тайлбарыг ол.

Та зарим тайлбарыг зурж болох юм.

• 1 Нифай 22:24–26

• 2 Нифай 21:6–9

• 2 Нифай 22:1–6

• 2 Нифай 24:3, 7

1. Дараах асуултуудад хариул.

• Эдгээр дүрслэлээс таны амьдрал Мянган жилд юугаараа өөр байна гэж та бодож байна вэ?

• Аврагчийн ямар дүрслэлийг та олсон бэ? Тэдгээр нь Аврагчийн талаар юу зааж байна вэ?

Бидний эдгээр судраас сурч мэдсэн нэг үнэн бол Есүс Христ Мянган жилийн хугацаанд дэлхий дээр зөв шударга, амар амгаланд хаанчлах явдал юм.

Мянган жилийн үе буюу Аврагч зөв шударга, амар амгалангаар хаанчлах үед амьдрах ямар байхыг оюун ухаандаа төсөөлөн бод. Аврагчийн амар амгалан таны амьдралыг хэрхэн адислах талаар тунгаан бод.

Тэргүүн зөвлөлийн ерөнхийлөгч Даллин Х.Өүкс Мянган жилийн өөр нэг адислалыг ийн тодорхойлсон.

Ганц бие амьдрал, хүүхэдтэй болж чадахгүй байх, үхэл хагацал, гэр бүл салалт зэрэг нь туйлын зорилгыг хясаж, амлагдсан адислалууд гүйцэлдэхийг хойшлуулдаг. … Зарлигуудаа сахин, гэрээндээ үнэнч байж, зөв бүхнийг хүсдэг охид хөвгүүдээсээ Их Эзэн мөнх байдалд ямар ч адислалыг харамлахгүй хэмээн амласан.

Мөнх бус байдлын хамгийн гол дутагдлуудын ихэнх нь бидний Эцэгийн бүх зохистой хүүхдэдээ зориулсан аз жаргалын агуу төлөвлөгөөн дэх гүйцэд бус бүхнийг гүйцэлдүүлэх Мянган жилд зохих байрандаа орох болно. Тэр нь ариун сүмийн ёслолуудын хувьд үнэн байх болно гэдгийг бид мэднэ. Энэ нь мөн гэр бүлийн харилцаа, туршлагад үнэн байх болно гэдэгт би итгэдэг. (President Dallin H. Oaks, “The Great Plan of Happiness,” Ensign, Nov. 1993, 75)

2. Дараах асуултуудын хоёрт эсвэл түүнээс олонд хариул.

• Энэ мэдэгдэл танд Тэнгэрлэг Эцэг, Есүс Христ хоёрын талаар юу заадаг вэ?

• Мянган жилийн ямар адислалыг та хамгийн их хүсэж байна вэ? Яагаад?

• Хичээлийн үеэр Мянган жилийн тухай асуултууддаа ямар хариулт олсон бэ?

Хэрэв эдгээр асуултад хариулахад танд тусламж хэрэгтэй бол Судруудын удирдамж дахь “Мянган жил”-ийг үзнэ үү.

Мянгал жилийн бэлтгэл

Солт Лэйк ариун сүмийн шинэчлэл 2020 онд эхэлсэн. Арван хоёр төлөөлөгчийн чуулгын ахлагч Гари Э.Стивэнсон эдгээр шинэчлэлийн талаар ярьсан. Тэрээр тэдгээрийг өөрсдийн амьдралтайгаа хэрхэн харьцуулсныг олж мэд.   ChurchofJesusChrist.org 

Сүмийн удирдагчид Солт Лэйк ариун сүмийн чухал шинэчлэлт нь Бригам Янгийн “мянган жилийн турш тэсэж үлдэхүйц байдлаар баригдсан ариун сүмийг” харах хүслийг гүйцэлдүүлэхэд хувь нэмрээ оруулна гэдэгт чин сэтгэлээсээ найдаж байна. Ирэх хэдэн жил Солт Лэйкийн ариун сүмд хийгдэх эдгээр сайжруулалт нь хувь хүн, гэр бүлүүдийн хувьд биднийг ч гэсэн зүйрлүүлж хэлбэл “мянган жил тэсэж үлдэхүйц байдлаар баригдахад” биднийг хөдөлгөж, урамшуулах болтугай. (Гари Э.Стивэнсон, “Ирээдүйн төлөө сайн суурь тавь,” 2020 оны 4-р сарын Ерөнхий чуулган, 61)

• Таны бодлоор “мянган жилийн турш тэсэж үлдэхүйц байдлаар баригдах” гэдэг нь юу гэсэн утгатай вэ?

3. Дараах асуултуудад хариул.

• Та Аврагчийн мянган жилийн хаанчлалын талаар бодохдоо юу мэдэрдэг вэ?

• Мянган жилд бэлдэхийн тулд та юу хийж чадах вэ?

• Эдгээр бэлтгэлийн үед танд ямар бэрхшээл тулгарч болох вэ?

Нэмэлт: Илүү ихийг судлахыг хүсэж байна уу?

Мянган жилийн үед дэлхий дээр зөвхөн Есүс Христийн Хожмын Үеийн Гэгээнтнүүдийн Сүмийн гишүүд байх уу?

Ерөнхийлөгч Жозеф Фийлдинг Смит (1878–1972) ийн заасан.

Сүмийн зарим гишүүн мянган жил ирэхэд Сүмийн зөв шударга гишүүдээс бусад бүх хүн дэлхийгээс хөөгдөнө гэсэн буруу ойлголттой байдаг. Тийм биш юм. Дэлхий дээр үлдэх нь зөвшөөрөгдсөн бүх ангиллын, янз бүрийн итгэл үнэмшлийн сая сая хүн байх болно, гэхдээ тэд цэвэр ариун амьдралаар амьдарч, ёс бус байдал, авлигаас ангид байсан хүмүүс байх болно. …

Гэсэн хэдий ч эцэст нь ус далайг дүүргэхтэй адил Их Эзэний тухай мэдлэг дэлхийг бүрхэх болно. Гэвч мянган жил ирсний дараа, бүх хүн хөрвөгдөх эсвэл нас барах хүртэл сайн мэдээг тараасаар байх болно. (Joseph Fielding Smith, Doctrines of Salvation, 1:86–87)

“Who Will Be on the Earth during the Millennium, and What Will They Be Doing?” (New Era, June 2014, 41) нийтлэл нь Мянган жилийн талаарх бусад асуултад хариулахад тусална.

Мянган жилийн үед амьдрал ямар байх вэ?

Ерөнхийлөгч Бригам Янг (1801–1877) ийн заасан.

Мянган жилийн үед—Бурханы Сүм ба Хаант улс дахь зүрх бүхэн нэгдэн нэг болж; Хаант улс тэнгэрийн эд баялгийн эсрэг бүх зүйлийг ялан дийлэхийн тулд нэмэгдэж, Сатан хүлэгдэж, түүн дээр тамга дарагдсан байна. Бусад бүх зүйл одоогийнх шигээ байх болно, бид идэж, ууж, хувцаслах болно. …

Бурханы Хаант улс дэлхий дээр хүч, алдар суу хийгээд төгс төгөлдөр байдлаар байгуулагдан, маш удаан зонхилсон ёс бусчуудын хаанчлал зогсох Мянган жилд Бурханы гэгээнтнүүд ариун сүмүүдээ барьж, тэдгээрт очиж, Бурханы ариун сүмүүд дэх багана мэт болж [Илчлэл 3:12-ыг үзнэ үү], өөрсдийн нас барагсдын төлөө ёслолуудыг гүйцэтгэх болно. Дараа нь бид найз нөхдөө ирэхийг харна. Магадгүй зарим нь энд танилцсан хүмүүс байх болно. … Тэгээд бид Эцэг Адам, Эх Ева хүртэлх өвгөд дээдсээ мэдэхийн тулд илчлэлт хүлээн авч, Бурханы ариун сүмд орж, тэдний төлөө ёслолуудыг гүйцэтгэх болно. Дараа нь Адамаас эцсийн үе хүртэлх санваарын төгс хэлхээ холбоо байж болохын тулд хэлхээ холбоо Адам руу буцаж төгс хийгдэх хүртэл [хүүхдүүд] [эцэг эхтэйгээ] лацдан холбогдох болно.

Энэ нь Мянган жилд хийх хожмын үеийн гэгээнтнүүдийн ажил байх болно. (Teachings of the Presidents of the Church: Brigham Young [2007], 333–334)

Мянган жилд Есүс Христийн Хожмын Үеийн Гэгээнтнүүдийн Сүм оршин тогтнох уу?

Ерөнхийлөгч Рассэлл М.Нэлсон ийн тунхагласан.

Мянган жилийн үед ч энэ сүм байрнаасаа хөдлөхгүй. (Russell M. Nelson, “How Firm Our Foundation,” Liahona, May 2002, 76)

1 Нифай 22:26. Сатан хэрхэн хүчгүй болох вэ?

Ерөнхийлөгч Спэнсэр В.Кимбалл (1895–1985) ийн заасан.

“Сатан аль нэг гэр бүлд хүлэгдсэн үед—Сатан хэн нэгний амьдралд хүлэгдсэн үед Мянган жил тэр гэр бүлд, тэр амьдралд аль хэдийн эхэлсэн байдаг. (Teachings of Spencer W. Kimball, ed. Edward L. Kimball [1982], 172)