1 Амозын хүү Исаиагийн харсан Вавилоны мөхлийн мэдээ оршвой.

2 Та нар тугаа өндөр уулан дээр өргө, тэдэнд дуу хоолойгоо сонордуулцгаа, гараа даллацгаа, тэд язгууртны хаалгаар орж болохын тулд буюу.

3 Ариусгагдсан тэдэндээ би зарлигласан, би түүнчлэн өөрийн хүчтэнүүдийг дуудсан, өөрөөр хэлбэл эрхэм дээдэд минь баясах тэдний дээр миний уур үгүй болой.

4 Уулан дахь ардын чимээ агуу их хүмүүсийнх адил, нэгдэн цугларсан үндэстнүүдийн хаант улсуудын шуугиант чимээ адил сонсогдоно, Түмний Их Эзэн тулааны их цэргүүдээ цуглуулж байна.

5 Тэд алсын улсаас, тэнгэрийн хаяанаас ирнэ, тийм ээ, Их Эзэн, мөн түүний хилэнгийн зэр зэвсэг, бүх нутгийг устгахаар буюу.

6 Та нар гасалцгаа, учир нь Их Эзэний өдөр ойрхон байна; энэ нь Бүхнийг Чадагчаас устгал адил ирэх болно.

7 Тиймийн тул гар болгон сульдаж, хүн бүрийн зүрх мохох болно;

8 Мөн тэд айх болно; гэнэтийн өвдөлт болон гашуудал тэднийг эзэмдэн авах болно; тэд нэг нэгэн рүүгээ гайхан харах болно; тэдний царай улалзах дөл мэт байх болно.

9 Болгоогтун, хилэн мөн догшин уур аль алиныг нь агуулсан, Их Эзэний харгис өдөр нутгийг эзгүйрүүлэхээр ирэх болно; мөн тэрээр үүний дээрх нүгэлтнүүдийг тэндээс гарган устгах болно.

10 Өөрөөр хэлбэл тэнгэрийн эрхсүүд мөн одны ордууд гэрлээ өгөхгүй байх болно; нар мандахдаа харанхуйлагдсан байх болно, мөн сар гэрлээ туяаруулахгүй болно.

11 Мөн би дэлхийг нүгэл хилэнцийнх нь учир, мөн ёс бусыг үйлдэгчдийг алдсынх нь тул шийтгэнэ; бардам нэгний ихэрхэг занг төгсгөл болгоно, мөн харгисын их занг зогсооно.

12 Би хүмүүнийг шижир алтнаас илүү эрхэм; бүр хүмүүнийг Офирын алтан ембүүнээс илүү болгоно.

13 Тиймийн тул, Түмний Их Эзэний хилэнд мөн түүний догшин хилэнгийн тэр өдөр би тэнгэрийг сэгсэрч, дэлхий байрнаасаа хөдлөх болно.

14 Мөн энэ нь хөөгдсөн гөрөөс адил байх болно, мөн хариулах хүнгүй хонь мэт байх болно; мөн хүн бүр, тэд төрөл төрөгсдөдөө эргэж ирнэ, мөн аливаа хүмүүн зугтан нутгаа бараадах болно.

15 Бардам зант тэр болгон нэвт сүлбэгдэх болно; тийм ээ, мөн ёс бусыг үйлдэгчдэд нэгдсэн бүхэн илдээр унагаагдах болно.

16 Тэдний хүүхдүүд түүнчлэн тэдний нүдний өмнө хэдэн хэсэг болон няцлагдах болно; тэдний гэр орон тоногдож мөн эхнэрүүд нь хүчирхийлэгдэх болно.

17 Болгоогтун, мөнгө болон алтыг эс үнэлж, бас үүнд үл баясах тэд болох медечүүдийг тэдний эсрэг би өдөөн хатгах болно.

18 Тэдний нумнууд залуу эрчүүдийг ч түүнчлэн хэдэн хэсэг болгон тасдах болно; мөн тэд хэвлий дэх үрсийг эс өрөвдөх болно; тэдний нүд хүүхдүүдийг ч үл хэлтрүүлэх болно.

19 Мөн Вавилон, хаант улсуудаас хамгийн сүр жавхлант, халдеичуудын гайхамшгийн үзэсгэлэн нь, Бурхан Содом, Гоморра хоёрыг устгасан тэр цагийн адил байх болно.

20 Энэ нь хэзээ ч суурьшигчидтай байхгүй, бас үеэс үед энд амьдрах нь ч үгүй; бас арабчууд тэнд хэзээ ч майхан босгохгүй; бас хоньчид тэнд сүргээ хэзээ ч хариулахгүй.

21 Харин цөлийн зэрлэг амьтад тэнд хэвтэх болно; мөн тэдний сууцнууд золгүй амьтдаар дүүрэн байх болно; мөн ууль тэнд орших болно, мөн чөтгөрүүд тэнд бүжиглэх болно.

22 Мөн арлын зэрлэг араатнууд тэдний эзгүй сууцанд, мөн луунууд тэдний тааламжит ордонд архирах болно; мөн түүний цаг нь дөхөж байна, мөн түүний өдөр нь уртасгагдахгүй байх болно. Учир нь би түүнийг даруй устгана; тийм ээ, өөрөөр хэлбэл би өөрийн хүмүүст нигүүлсэнгүй байна, харин ёс бусыг үйлдэгчид мөхөх болно.