1 Мөн эдүгээ, Нифай би, Египетэд аваачигдсан Иосефын талаар, эцгийнхээ ярьсан тэрхүү бошиглолуудын талаар өгүүлье.

2 Учир нь болгоогтун, тэрээр үнэхээр өөрийн бүх үр удмын талаар бошиглосон болой. Мөн түүний бичсэн бошиглолуудаас илүү чухал олон нь үгүй бөлгөө. Мөн тэрээр бидний тухай, мөн бидний ирээдүйн үеүдийн талаар бошиглов; мөн тэдгээр нь гуулин ялтаснууд дээр бичигдсэн болой.

3 Иймийн тул, миний эцэг Иосефын талаарх бошиглолуудын тухай яриагаа төгсгөл болгосны дараа, тэрээр Лемений хүүхдүүдийг, түүний хөвгүүд, мөн түүний охидыг дуудаж, мөн тэдэнд хандан хэлсэн болой: Болгоогтун, миний ууган хүүгийн хөвгүүд болон охид болох хөвгүүд минь, мөн охид минь, та нарыг миний үгсийг анхаарал тавин сонсоосой хэмээнэ би.

4 Учир нь Их Эзэн Бурхан ийн хэлэв: Та нар миний зарлигуудыг сахихынхаа хэрээр уг нутагт дэгжих болно; мөн та нар миний зарлигуудыг сахихгүй байхынхаа хэрээр миний оршихуйгаас тусгаарлагдах болно.

5 Гэвч болгоогтун, хөвгүүд минь мөн охид минь, би та нарт адислал үлдээлгүйгээр булшиндаа орж чадахгүй; учир нь болгоогтун, хэрэв та нар өөрсдийн явбал зохих тэр зам дээр өсгөгдөх юм бол та нар үүнээс хагацахгүйг би мэдэж байна.

6 Иймийн тул, хэрэв та нар зүхэгдэх аваас, болгоогтун, тэр зүхэл та нараас зайлуулагдаж мөн та нарын эцэг эхийн толгой дээр хариулагдана хэмээн би адислалаа та нарт үлдээж байна.

7 Иймийн тул, миний адислалын учир Их Эзэн Бурхан та нарыг мөхөхийг зөвшөөрөхгүй; иймийн тул, тэрээр та нарт мөн та нарын үр удамд үүрд нигүүлсэнгүй хандах болно.

8 Мөнхүү улиран тохиох дор миний эцэг Лемений хөвгүүд, охидод ярьснаа төгсгөл болгосны дараа, тэрээр Лемүелийн хөвгүүд, охидыг өөрийнхөө өмнө ирүүлэв.

9 Мөн тэрээр тэдэнд хандан, өгүүлсэн нь: Болгоогтун, миний хоёр дахь хүүгийн хөвгүүд, охид болох хөвгүүд минь, мөн охид минь; болгоогтун, Лемений хөвгүүд, охидод үлдээсний адил адислалыг би та нарт үлдээе; иймийн тул, та нар бүрмөсөн устгагдахгүй байх болно; харин эцэст нь та нарын үр удам адислагдах болно.

10 Мөнхүү улиран тохиох дор эцэг минь тэдэнд ярьснаа төгсгөл болгоод, болгоогтун, тэрээр Ишмэилийн хөвгүүдэд, тийм ээ, мөн бүр түүний гэрийнхэнд бүгдэд нь хандан ярив.

11 Мөн тэрээр тэдэнд хандан ярьснаа төгсгөл болгосны дараа, тэрээр Сэмд хандан ярьж, өгүүлсэн нь: Чи болон чиний үр удам адислагдсан болой; чи дүү Нифайнхаа адил уг нутгийг өвлөхийн учир буюу. Мөн чиний үр удам түүний үр удамтай хамт тоологдох болно; мөн чи дүүгийнхээ нэгэн адил, мөн чиний үр удам түүний үр удмын адил байж; мөн чи өөрийн бүх өдөрт адислагдах болно.

12 Мөнхүү улиран тохиох дор миний эцэг, Лихай, түүнд орших Их Эзэний Сүнс мөн өөрийн зүрх сэтгэлийн бодлын дагуу, өөрийнхөө гэрийнхэнд бүгдэд нь ярьсны дараа, тэрээр өндөр настай болжээ. Мөнхүү улиран тохиох дор тэрээр нас нөгчиж, оршуулагдсан болой.

13 Мөнхүү улиран тохиох дор түүнийг нас нөгчсөнөөс хойш хэдхэн хоногийн дараа, Лемен, Лемүел хоёр бас Ишмэилийн хөвгүүд Их Эзэний зэмлэлийн улмаас надад уурлаж байлаа.

14 Учир нь, Нифай би, түүний үгийн дагуу, тэдэнд хандан ярихаар албадуулсан билээ; учир нь би, мөн түүнчлэн миний эцэг нас нөгчихийнхөө өмнө тэдэнд олон зүйлийг ярьсан буюу; хэлсэн тэдгээрээс олон нь миний нөгөө ялтаснууд дээр бичигдсэн билээ; учир нь миний нөгөө ялтаснууд дээр илүү түүхэн хэсэг нь бичигдсэн болой.

15 Мөн эдгээрийн дээр өөрийн бодгалийн зүйлсийг мөн гуулин ялтаснууд дээр сийлэгдсэн тэдгээр судрын олныг би бичиглэж буй болой. Учир нь бодгаль минь судруудад баясна, мөн зүрх минь тэдгээрийг тунгаан, мөн хүүхдүүдийнхээ мэдлэг болон тусын тулд тэдгээрийг бичиглэх бөлгөө.

16 Болгоогтун, бодгаль минь Их Эзэний зүйлсэд баясаж; мөн зүрх минь өөрийн үзсэн мөн сонссон зүйлсийг үргэлж тунгаадаг.

17 Гэсэн хэдий ч, өөрийн агуу болон гайхамшигт ажлуудыг надад үзүүлэх Их Эзэний агуу сайн сайхан байлаа ч, зүрх минь хашхирч: Ай золгүй хүн юм би! Тийм ээ зүрх минь маханбодынхоо улмаас шимширч; бодгаль минь миний алдсуудын учир гашуудах ажгуу.

18 Би, намайг туйлын амархнаар түгшээх тэр уруу таталтууд болон нүглүүдэд хүрээлэгдсэн нэгэн болой.

19 Мөн намайг баясахыг хүсэх үед, миний нүглүүдийн учир зүрх минь ёолно; гэсэн хэдий ч, би хэнд найдсан болохоо мэдэж байна.

20 Миний Бурхан миний тулгуур байсан; тэрээр аглаг буйд дахь зүдгүүрүүдийн минь дундуур намайг удирдсан; мөн тэрээр гүн далай дээр намайг хамгаалсан билээ.

21 Тэрээр намайг хайраараа дүүргэсэн, бүр бүх бие минь төөнөгдтөл буюу.

22 Тэрээр миний дайснуудыг, миний өмнө салгалах хүртэл нь тэднийг шившиглэсэн буюу.

23 Болгоогтун, тэрээр өдрөөр гуйлтыг минь сонсож, мөн тэрээр надад шөнийн цагт үзэгдлүүдээр мэдлэг өгсөн болой.

24 Мөн би өдрөөр түүний өмнөх хүчит залбиралдаа зоригждог байв; тийм ээ, дуу хоолойгоо би дээдэд илгээсэн; мөн тэнгэр элч нар доош ирж, надад тохинуулсан бөлгөө.

25 Мөн түүний Сүнсний далавчнууд дээр миний бие үлэмж өндөр уулсын дээр аваачигдсан болой. Мөн нүд минь агуу зүйлсийг, тийм ээ, бүр хүмүүнд ахадхуйц агуу ихийг болгоосон буюу; тиймийн тул надад тэдгээрийг бичих нь хориглогдсон болой.

26 Ай тэгээд, хэрэв би тийм агуу их зүйлийг харж байсан юм бол, хэрэв Их Эзэн хүмүүсийн үрс дэх буун ирэлтдээ тийм их нигүүлслээр айлчилсан юм бол, яагаад зүрх сэтгэл минь шаналж, сүнс минь гунигийн хөндийд хоргодон, мөн маханбод минь туйлдан, бас хүч чадал минь зүдгүүрүүдийнхээ улмаас сулрах билээ?

27 Мөн өөрийн маханбодын улмаас яагаад би нүгэлд бууж өгөх билээ? Тийм ээ, миний амгаланг устган мөн сүнсийг минь зовоох тэр хилэнцэт нэгнийг зүрх сэтгэлдээ байрлуулан, уруу таталтад би яагаад зам тавих билээ? Би яагаад дайсныхаа улмаас уурлаж байгаа билээ?

28 Сүнс минь, сэр! Цаашид нүглээс болж бүү шантар. Баяс, ай зүрх сэтгэл минь, мөн бодгалийн минь дайсанд дахин битгий зай тавь.

29 Миний дайснуудын улмаас дахин битгий уурла. Зүдгүүрүүдийнхээ улмаас хүчээ битгий сулруул.

30 Баяс, ай зүрх сэтгэл минь, мөн Их Эзэнд залбиран гуй, мөн хэл: Ай Их Эзэн, би таныг үүрд магтан дуулах болно; тийм ээ, миний Бурхан, мөн авралын хад тандаа миний сүнс баясна.

31 Ай Их Эзэн, та сүнсийг минь гэтэлгэнэ үү? Та дайснуудын минь гараас намайг чөлөөлнө үү? Та намайг нүглийг хараад чичрэх нэгэн болгоно уу?

32 Зүрх сэтгэл минь харуусаж мөн сэтгэл минь гэмшсэний учир, миний өмнө тамын хаалга үргэлж хаалттай байгаасай! Ай Их Эзэн, би гүн хөндийн замаар алхаж болохын тулд, би тэгш зам дээр болгоомжтой байж болохын тулд, та зөв шударгынхаа хаалгануудыг миний өмнө бүү хаагаач!

33 Ай Их Эзэн, зөв шударгын орхимжоороо намайг ороогооч! Ай Их Эзэн, дайснуудынхаа өмнө зугтах замыг минь бэлтгээч! Та өмнөх замыг минь надад шулуутгаж өгөөч! Та замд минь тээглэх чулуу бүү байрлуулаач—харин өмнөх замын минь бартааг холдуулж, мөн миний замд биш, харин дайсны минь замд саад босгооч.

34 Ай Их Эзэн, би танд найдсан билээ, мөн би танд үүрд найдах болно. Би найдлагаа маханбодын гарт тавих нь үгүй; учир нь найдлагаа маханбодын гарт тавьдаг тэрээр зүхэгддэгийг би мэднэ. Тийм ээ, найдлагаа хүмүүнд тавьдаг буюу маханбодыг гараа болгох тэрбээр зүхэгддэг болой.

35 Тийм ээ, гуйсан түүнд Бурхан өгөөмрөөр өгөх болно гэдгийг би мэднэ. Тийм ээ, хэрэв би буруу бусыг гуйх аваас миний Бурхан надад өгөх болно; тиймийн тул би дуу хоолойгоо танд хандан өргөх болно; тийм ээ, Бурхан минь, миний зөв шударгын хад, би танд хандан залбиран гуйх болно. Болгоогтун, дуу хоолой минь үүрд танд, миний хад мөн миний үүрдийн Бурханд хандан дээш одох болно. Амен.