Alma 8

Pakikinig at Pagsunod sa Ama sa Langit

Maaaring mahirap sumunod sa Ama sa Langit, ngunit humahantong ito sa pinakamalaking kaligayahan. Nang manampalataya sina Alma at Amulek at sinunod nila ang tagubilin ng Diyos, pinagpala sila ng Diyos at ang mga nasa paligid nila. Ang lesson na ito ay makatutulong sa iyo na marinig at masunod ang Ama sa Langit sa iyong buhay.

Pagsunod sa Ama sa Langit

Isipin kung ano ang madarama mo kung ipagagawa sa iyo ng Ama sa Langit ang sumusunod at kung bakit ganoon ang madarama mo:

• Ibahagi ang ebanghelyo sa isang taong tumanggi sa iyong mga paanyaya noon.

• Kaibiganin at tulungan ang isang tao sa inyong paaralan na inaayawan o hindi tinatanggap.

• Ano ang ilan pang mga kautusan o pahiwatig na maaaring ibigay sa atin ng Ama sa Langit na maaaring mahirap tanggapin at sundin? Bakit kaya napakahirap ng mga sitwasyong ito?

Sa kabanatang pag-aaralan mo ngayon, iniutos ng Diyos kay Alma na harapin ang isang sitwasyon na katulad sa unang sitwasyon sa itaas, at si Amulek ay naharap sa isang sitwasyon na katulad sa pangalawa. Pag-isipan sandali kung may mga kautusan o pahiwatig mula sa Diyos na mahirap para sa iyo na sundin. Sa iyong pag-aaral, alamin kung paano nadaig nina Alma at Amulek ang kanilang mga hamon at kung paano nila sinunod ang mga utos ng Diyos. Hingin ang tulong ng Ama sa Langit para malaman kung paano mo Siya mas maririnig at masusunod.

Karanasan ni Alma

Basahin ang Alma 8:8–18, at alamin ang ipinagawa ng Diyos kay Alma at kung bakit maaaring mahirap ito para sa kanya. Sikaping ilarawan sa isipan ang mga pangyayari habang binabasa mo ang mga ito. Maaari mong panoorin ang video na “Sina Alma at Amulek ay Naligtas sa pamamagitan ng Kapangyarihan ng Diyos” mula sa time code na 0:36 hanggang 2:22, na matatagpuan sa ChurchofJesusChrist.org, at sumabay sa pagbabasa sa iyong mga banal na kasulatan.

• Anong mga parirala sa talata 14 ang nagsasaad ng nadarama ni Alma nang matanggap niya ang utos na ito?

• Anong parirala sa talata 18 ang naglalarawan kung gaano katagal bago sumunod si Alma?

• Sa inyong palagay, bakit sumunod kaagad si Alma kahit na nakadarama siya ng kalungkutan?

Karanasan ni Amulek

Basahin ang Alma 8:19–21; 10:4–11 para malaman ang sumunod na nangyari. (Maaaring makatulong na malaman na isinalaysay ni Amulek ang kanyang karanasan sa Alma 10:4–11.) Sikaping ilarawan sa isipan ang mga pangyayari habang binabasa mo ang mga ito. Maaari mong ipagpatuloy ang panonood sa video na “Sina Alma at Amulek ay Naligtas sa pamamagitan ng Kapangyarihan ng Diyos” mula sa time code na 2:22 hanggang 4:03, na matatagpuan sa ChurchofJesusChrist.org.

• Ano ang matututuhan natin sa Alma 10:4–6 tungkol kay Amulek? Bakit kaya nahirapan siyang sundin ang Diyos dahil sa mga bagay na ito?

• Sa inyong palagay, bakit patuloy na tumulong ang Ama sa Langit kay Amulek kahit hindi Siya sumunod noon?

Basahin ang Alma 8:26–32 para malaman kung paano pinagpala sina Amulek at Alma dahil sa kanilang mga ginawa.

• Anong mga alituntunin ang natutuhan ninyo mula sa salaysay nina Alma at Amulek?

Ang isa sa mga alituntuning maaaring natukoy mo ay kapag naririnig at sinusunod natin ang Ama sa Langit, pinagpapala Niya tayo at ang iba. Maririnig natin ang salita ng Diyos sa iba’t ibang paraan. Halimbawa, kapwa narinig nina Alma at Amulek ang salita ng Diyos mula sa isang anghel.

1. Maglista ng maraming paraan hangga’t kaya mo kung paano nakikipag-ugnayan sa atin ang Ama sa Langit sa ating panahon. Kung kailangan mo ng tulong, maaari mong pag-aralan ang “Paghahayag,” sa Gabay sa mga Banal na Kasulatan.

Pakikinig sa Kanya

Sabi ni Amulek, “Ako ay tinawag nang maraming ulit at tumangging makinig” (Alma 10:6). Noong bata pa siya, matagal ding hindi nakinig si Alma sa Diyos (tingnan sa Mosias 27:8).

2. Ibahagi ang iyong sagot sa sumusunod na aktibidad.

   Isipin kunwari na may kakilala ka na nahihirapang makinig at sumunod sa Diyos. Mag-ukol ng ilang minuto para pag-isipan kung ano ang maaaring makahikayat sa taong iyon na magtiwala sa Panginoon. Maaaring kabilang dito ang mga sumusunod:

   • Halimbawa ng pagsunod nina Alma at Amulek

   • Mga halimbawa ng pagsunod ng Tagapagligtas sa Ama

   • Iba pang mga kuwento sa banal na kasulatan tungkol sa pakikinig at pagsunod ng isang tao sa Diyos

   • Mga pagpapalang naranasan mo nang sikapin mong sundin ang Diyos

Maaari mong panoorin ang video na “Ang Pananampalataya ay Hindi Matatamo Kung Wala Munang Pagpiling Gagawin” mula sa time code na 1:40 hanggang 4:25, na matatagpuan sa ChurchofJesusChrist.org. Sa video, inilarawan ni Elder Neil L. Andersen ng Korum ng Labindalawang Apostol ang isang binatilyo na tapat at masunuring kumikilos ayon sa pahiwatig sa panahon ng kawalang-katiyakan.

Maglaan ng oras na isulat ang anumang impresyong maaaring natanggap mo mula sa Ama sa Langit. Pag-isipan ang magagawa mo para makakilos ayon sa mga impresyong iyon. Maaaring kabilang dito ang pagsunod sa mga partikular na kautusan o pahiwatig at anumang hakbang na dapat mong gawin. Kung mahirap sundin ang mga kautusang ito, maaari mong ipagdasal na tulungan ka ng Ama sa Langit.

Opsiyonal: Gusto Mo Bang May Matutuhan Pa?

Ano ang ilan sa mga pagpapala na bunga ng ating pagsunod sa Diyos?

Ipinahayag ni Pangulong George Q. Cannon (1827–1901):

Ang pagsunod sa Ebanghelyo ay nagdudulot [sa mga tao] ng malapit at magiliw na kaugnayan sa Panginoon. Lumilikha ito ng koneksyon sa mga tao sa lupa at sa ating Dakilang Manlilikha sa langit. Nagdudulot ito sa isipan ng tao ng ganap na tiwala sa Pinakamakapangyarihang Diyos at sa Kanyang kahandaang makinig at sumagot sa mga pagsamo ng mga nagtitiwala sa Kanya. Sa mga panahon ng pagsubok at paghihirap, hindi matutumbasan ang pagtitiwalang ito. Dumanas man ng ligalig ang indibiduwal o mga tao, magbanta man ang kalamidad at bawat pag-asa ng tao ay tila nagupo na, ngunit kapag ginamit [ng mga tao] ang mga pribilehiyong dulot ng pagsunod sa ebanghelyo, may matibay silang pagtatayuan; ang kanilang mga paa ay nakatuntong sa bato na hindi matitinag. (Gospel Truth: Discourses and Writings of George Q. Cannon, tinipon ni Jerreld L. Newquist [1987], 116)

Ano ang matututuhan natin kay Amulek?

Itinuro ni Pangulong Dieter F. Uchtdorf, habang naglilingkod noon sa Unang Panguluhan:

Marahil, tulad ni Amulek, alam ninyo sa inyong puso na “tinawag [kayo] nang maraming ulit,” ngunit kayo ay “tumangging makinig.”

Gayunman, nakikita sa inyo ng Panginoon kung ano ang nakita Niya kay Amulek—ang potensyal ng isang magiting na tagapaglingkod na may mahalagang gawaing gagawin at may patotoong maibabahagi. May paglilingkod na hindi maibibigay ng iba sa gayunding paraan. Ipinagkatiwala ng Panginoon sa inyo ang Kanyang banal na priesthood, na nagtataglay ng banal na kapangyarihan na pagpalain at pasiglahin ang iba. Makinig gamit ang inyong puso at sundin ang mga pahiwatig ng Espiritu. (Dieter F. Uchtdorf, “Matuto kina Alma at Amulek,” Liahona, Nob. 2016, 73)