“Сүнсээр заалгаж суралцах: ‘Ариун Сүнсний хүчээр,’” Мормоны Номын багшийн гарын авлага (2024)
“Сүнсээр заалгаж суралцах,” Мормоны Номын багшийн гарын авлага
Оршил
Сүнсээр заалгаж суралцах
“Ариун Сүнсний хүчээр”
Мормоны Номд бошиглогчид Ариун Сүнсний үүргийг онцлон тэмдэглэсэн байдаг. Тэнгэрлэг Эцэг, Есүс Христ хоёр танаас Өөрсдийг нь таньж мэдэн, “Ариун Сүнсний хүчээр” (Моронай 10:5) үнэнийг мэдэж авахыг хүсдэг. Энэ хичээл нь таны сүнслэг өсөлт хөгжил, ахиц дэвшилд чухал ач холбогдолтой Ариун Сүнсний гол үүргийг таньж мэдэхэд тусална.
Сүнсээр заах. Ариун Сүнс үнэнийг баталгаажуулж, Христийг гэрчилж, зүрх сэтгэлийг өөрчилдөг. Бид зөвхөн Ариун Сүнсээр дамжуулан Есүс Христэд итгэх итгэлийг хөгжүүлэн, бусдад Түүнтэй илүү адил болоход нь туслах сайн мэдээг заах зорилгоо биелүүлж чадна. Энэ үүргээ гүйцэтгэхдээ Ариун Сүнсийг хэрхэн урих арга замуудыг эрэлхийлээрэй.
Суралцагчийн бэлтгэл: Суралцагчдад Ариун Сүнстэй харилцах зарим арга замын талаар гэр бүлийнхээ гишүүнтэй эсвэл Сүмийн удирдагчтайгаа ярилцах даалгавар өгөөрэй.
Боломжит суралцах үйл ажиллагаа
Сүнслэг харилцаа
Суралцагчдад утаат дохио, телеграфын машин эсвэл морзын код ашиглаж байгаа хүний зургийг үзүүлэх талаар бод. Эдгээрийг юунд ашиглаж байсныг мэддэг эсэхийг тэднээс асуу. Суралцагчдыг багуудад хуваарилж, сүүлийн 50-100 жилд харилцаа холбоог сайжруулахад нөлөөлж, өөрчилж, сайжруулсан шинэлэг зүйлсийн жагсаалтыг гаргахад урь. Тэдний жагсаалтаас ухаалаг утсыг олж, дараах асуултуудыг асууж болно.
Дэлхийд бий болсон олон төрлийн харилцааны хэрэгслийн тухай болон тэдгээр нь таны амьдралд хэрхэн нөлөөлж болох талаар бод. Дэлхий дахинд харилцаа холбоог ихээхэн өргөжүүлсэн нэг чухал хэрэгсэл бол ухаалаг утас юм.
-
Хүмүүс байнгын холбоотой байхад ухаалаг утас ямар үүрэг гүйцэтгэж чадах вэ?
-
Энэ нь мэдлэг олж авах, ертөнцийн талаар илүү ихийг ойлгоход нь хүнд хэрхэн тусалж чадах вэ?
Ямар нэг биет харилцааны хэрэгслээс илүүтэйгээр, бидний мөнх бус амьдралын замд сүнслэг харилцаа холбоо ямар чухал болохыг Тэнгэрлэг Эцэг төгс мэдэж байсан. Түүнтэй холбоотой байж, одоогийн аз жаргал, ирээдүйн авралд тань хэрэгтэй бүхнийг ойлгоход тань туслах Ариун Сүнсийг Тэр бидэнд өгсөн.
Амьдралдаа Ариун Сүнсний нөлөөг мэдэрсэн мөчүүдээ мөн Түүний нөлөө таны амьдралыг хэрхэн адисалсан тухай бод. Ариун Сүнсээр заалгасан эсэх эсвэл Түүний нөлөөг бүхэлд нь мэдэрсэн эсэхдээ та эргэлздэг байж болох юм. Ариун Сүнсний амин чухал үүргийг судалж, таних явцдаа Түүний нөлөө таны амьдралыг хэрхэн адислахыг бодож, дараах асуултуудыг тунгаан бод.
-
Ариун Сүнсний үүргийг би хэр сайн ойлгосон бэ?
-
Ариун Сүнсний нөлөөг амьдралдаа хэрхэн илүү сайн урих вэ?
-
Өнөөг хүртэл амьдралдаа би Ариун Сүнсийг хэрхэн таньж, мэдэрсэн бэ?
Ариун Сүнсний хоёр үүрэг
Суралцагчдыг хос хосоор нь эсвэл ангийг хоёр бүлэгт хуваарил. Бүлэг тус бүр судрын хоёр эшлэлийг судалж, олж мэдсэн зүйлээ бие биетэйгээ хуваалцах даалгавар өгнө.
Ариун Сүнс олон зорилготой, мөн төрөл бүрийн үүрэг гүйцэтгэдэг. Дараах судруудыг уншаад Ариун Сүнсний хоёр чухал үүргийг олж мэдээрэй.
-
Үүрэг 1: 2 Нифай 26:12–13; 3 Нифай 28:11
-
Үүрэг 2: 1 Нифай 10:19; Моронай 10:4–5
-
Та юу олж мэдсэн бэ?
Арван хоёр төлөөлөгчийн чуулгын ахлагч Квинтин Л.Күкийн хэлсэн дараах мэдэгдлийг унш.
ЗурагАхлагч Квинтин Л.КүкАриун Сүнс бүх үнэнийг, ялангуяа Аврагчийг илчилдэг илчлэгч бөгөөд гэрчлэгч юм. Ариун Сүнсгүйгээр бид Есүс бол Христ гэдгийг үнэхээр мэдэж чадахгүй. Түүний хамгийн чухал үүрэг бол Эцэг мөн Хүүг мөн Тэдний нэр, алдар сууг гэрчлэх явдал юм. (Квинтин Л.Күк, “Бошиглогчдод үргэлжлэн ирсээр буй илчлэлт ба бидний амьдралыг удирдан чиглүүлэх хувийн илчлэлтийн адислал,” 2020 оны 4-р сарын Ерөнхий чуулган, 118)
-
Судалсан судрын эшлэлүүд, ахлагч Күкийн хэлсэн үгээс та ямар үнэнийг олж тодорхойлж болох вэ?
Таны олж мэдсэн байж болох нэг чухал үнэн бол Ариун Сүнс үнэнийг зааж, Тэнгэрлэг Эцэг, Есүс Христ хоёрыг гэрчилдэг гэсэн үнэн юм.
Энэ болон үүнтэй төстэй үнэнийг судар дээрээ эсвэл судлах тэмдэглэлдээ тэмдэглэж аваарай. Үнэнийг тогтмол тэмдэглэж авах нь таны сүнслэг ой санамжийг хүчирхэгжүүлж, шаардлагатай үед Ариун Сүнс тэднийг санаанд тань авчрах боломжтой болно (Иохан 14:26-г үзнэ үү.)
-
Ариун Сүнсний дээрх хоёр үүргийг ойлгосноор таны амьдралд ямар тустай вэ?
Ариун Сүнстэй холбоотой, мөн таны амьдралд Ариун Сүнс нөлөөлснийг хэрхэн анзаарсан тухайгаа чимээгүй тунгаан бодоорой.
Зарим суралцагч дараах асуултад хариулж чадахгүй байж магадгүй. Хэрэв шаардлагатай бол сайн мэдээний үнэн нь тэдний оюун санаанд утга учиртай, зүрх сэтгэлд нь сайхан санагдаж байгаа бол Ариун Сүнс үнэний тухай гэрчилж байгаа болохыг тэдэнд сануул. Ихэнхдээ судрын шүлгийг тэмдэглэх сэдэл нь Сүнсээр өдөөгдсөн байдаг.
Суралцагчдад Ариун Сүнсний талаар асуулт асуух даалгавар өгч болно.
-
Тэнгэрлэг Эцэг, Есүс Христ хоёртой илүү ойр болоход тань Ариун Сүнс хэрхэн тусалсан бэ?
-
Ариун Сүнс үнэний тухай гэрчилж байгааг та хэзээ мэдэрсэн бэ?
-
Ариун Сүнсийг мэдрээгүй гэж бодож байгаа бол та юу хийх ёстой вэ?
Ариун Сүнсийг мэдэрч, урих
Ариун Сүнс бидэнтэй олон арга замаар харилцана. Сүнс таны оюун ухааныг гэгээрүүлж, амар амгалан, баяр баясгаланг мэдрэхэд тусалж, зөв зүйлийг хийхэд чиглүүлнэ (Сургаал ба Гэрээ 11:12–13; Галат 5:22–23-ыг үзнэ үү). Судруудад Түүний нөлөөг ихэвчлэн бидний “мэдрэх” “намуухан зөөлөн дуугаар” дүрсэлдэг ( 1 Нифай 17:45-ыг үзнэ үү).
Арван хоёр төлөөлөгчийн чуулгын ахлагч Роналд А.Расбанд Ариун Сүнсний бидэнтэй харилцах арга замуудын заримыг ийн хуваалцсан.
ЗурагАхлагч Роналд А.РасбандӨөрийн туршлага дээр үндэслэн хэлэхэд, Сүнс бидэнтэй ихэвчлэн мэдрэмжээр харилцдаг. Та үүнийг таныг өдөөдөг танил, ойлгомжтой үгсээс мэдэрдэг. …
… Сүнс бидэнтэй бидний мэдрэх үгээр ярьдаг. Эдгээр мэдрэмж ямар нэгэн зүйлийг хэл, хий мөн тодорхой байдлаар хариу үйлд хэмээн зөөлөн нудардаг. Хэрэв бид шүтэн бишрэхдээ хайнга, хэнэггүй байж, дэлхийн зүйлд татагдах юм бол мэдрэх чадвар маань буурсан байхыг олж мэднэ. (Роналд А.Расбанд, “Ариун Сүнс биднийг хөтлөг,” 2017 оны 4-р сарын Ерөнхий чуулган, 82)
Олон суралцагч өөрсдийн эсвэл бусдын туршлагаас эсвэл судраас уншсан байж болох түүхээс улбаалан Ариун Сүнс хэн нэгэнд нөлөөлөх төрөл бүрийн арга замыг мэдэж авсан байх болно. Эдгээрээс заримыг нь хуваалцаж, самбар дээр жагсаах даалгаврыг суралцагчдадаа өг.
Хэрэв суралцагчдад тань Ариун Сүнс хэрхэн харилцдагийг ойлгоход тусламж хэрэгтэй бол Миний сайн мэдээг номло: Номлогчийн үйлчлэлд зориулсан удирдамж (2019) номын 102 дахь хуудасны үйл ажиллагааг ашиглаж болно.
Семинарын үеэр болон гэртээ сайн мэдээг судалж байхдаа бодол, мэдрэмждээ анхаарлаа хандуулахад нь суралцагчдаа урамшуулан дэмж.
-
Та Ариун Сүнсний нөлөөг ямар ямар арга замаар мэдэрсэн бэ?
-
Ариун Сүнсийг мэдэрснээ таних нь таны амьдралд хэрхэн адислал болох вэ?
Судруудад Ариун Сүнсний нөлөөг хичээнгүйлэн эрэлхийлсэн хүмүүсийн олон жишээ байдаг. Мормоны Номын Нифай мөн Мозаягийн хөвгүүд тэдний жишээ юм.
1 Нифай 2:16–17, Алма 17:2–3 бүлгүүдийг уншихдаа Ариун Сүнсийг урьсан зөв үйлдлийг эрэлхийл.
Суралцагчид дараах асуултад хариулах явцад дараах санаануудаас дурдах нь тустай байж болох юм: (1) зарлигуудыг дуулгавартай дагахыг хичээх, (2) алдаагаа наманчлах, (3) удирдамж хүсэж залбирах, (4) ) идэвхтэй оролцох, (5) сэтгэгдлээ тэмдэглэх. Хайр, баяр баясгалан, амар амгалан, даруу байдал, талархал, бишрэл хүндэтгэл, баталгаа, урам зориг, халуун дулаан сэтгэл зэрэг мэдрэмжүүдээр бид Ариун Сүнсийг таньж чадна ( Галат 5:22–23; Сургаал ба Гэрээ 9:8–9-ийг үзнэ үү).
-
Эдгээр шүлэг дээр үндэслэн, мөн таны бодлоор Ариун Сүнсийг амьдралдаа урих ямар ямар арга зам байдаг вэ?
Семинар дээр, гэртээ мөн Сүмд сайн мэдээг судлахдаа Ариун Сүнсийг илүү сайн урьж, түүнээс суралцах төлөвлөгөө гарга. Ариун Сүнсийг амьдралдаа урих тодорхой арга замын талаар, мөн таны амьдралд Сүнсний нөлөөг танихын тулд юу хийж болох талаар тодорхой тусгаарай.
Төлөвлөгөөгөө итгэлтэй гэр бүлийнхээ гишүүн эсвэл найзтайгаа хуваалцаж, ахиц дэвшлээ түүнтэй тогтмол ярилц.