Mga Pambungad na Pahina ng Aklat ni Mormon

Pahina ng Pamagat

Ang Layunin ng Aklat ni Mormon

Bakit natin kailangan ang Aklat ni Mormon samantalang mayroon na tayong salita ng Diyos sa Biblia? Sa pahina ng pamagat ng Aklat ni Mormon, tinulungan tayo ng propetang si Moroni na maunawaan kung bakit napakahalaga ng Aklat ni Mormon. Layunin ng lesson na ito na tulungan kang maunawaan at maipaliwanag ang mga layunin ng Aklat ni Mormon.

Isakatuparan ang Layunin ng Seminaries and Institutes of Religion. Tandaan na “ang ating layunin ay tulungan ang mga kabataan at young adult na maunawaan ang mga turo at Pagbabayad-sala ni Jesucristo at umasa rito, maging karapat-dapat sa mga pagpapala ng templo, at ihanda ang kanilang sarili, kanilang pamilya, at iba pa para sa buhay na walang hanggan sa piling ng kanilang Ama sa Langit” (Pagtuturo at Pag-aaral ng Ebanghelyo: Isang Hanbuk para sa mga Titser at Lider sa Seminaries and Institutes of Religion [2012], x).

Paghahanda ng estudyante: Sabihin sa mga estudyante na pagnilayan kung bakit binibigyang-diin at ginagamit nang madalas ang Aklat ni Mormon sa Ang Simbahan ni Jesucristo ng mga Banal sa mga Huling Araw.

Mga Posibleng Aktibidad sa Pag-aaral

Ang kahalagahan ng kaalaman tungkol sa layunin ng isang bagay

Maaari kang magpakita ng mga larawan ng mga kagamitan na hindi pamilyar sa mga estudyante o magdala ng mga kagamitan na iyon sa klase upang makita at mahawakan ng mga estudyante. Ang kagamitan sa ibaba ay isang cross-staff, na ginamit noong sinaunang panahon para sa nabigasyon.

Nakakita ka na ba ng kagamitan tulad ng nasa sumusunod na larawan? Ipagpalagay na kailangang ipaliwanag ang layunin at kahalagahan ng isang hindi pamilyar na kagamitan sa iba.

• Bakit nakatutulong na malaman at maunawaan ang layunin o kahalagahan ng isang bagay bago ito gamitin o ibahagi sa iba?

  

  Maaari kang magpakita ng kopya ng Aklat ni Mormon bago ang susunod na tanong.

• Paano ito maiuugnay sa pag-unawa sa layunin at kahalagahan ng Aklat ni Mormon?

Isipin kung gaano kalaki ang kumpiyansa mo sa pagpapaliwanag ng layunin at kahalagahan ng Aklat ni Mormon sa isang taong walang kaalaman tungkol dito. Habang pinag-aaralan mo ang lesson na ito, alamin kung ano ang nakatutulong sa iyo para maunawaan ang layunin at kahalagahan ng Aklat ni Mormon at kung paano mo maibabahagi sa iba ang naunawaan mo.

Pag-unawa sa layunin at kahalagahan ng Aklat ni Mormon

Maaari mong isulat sa pisara ang sumusunod na hindi kumpletong pangungusap at sabihin sa mga estudyante na kumpletuhin ang pangungusap gamit ang malalaman nila.

Ang Aklat ni Mormon ay isinulat upang …

Ang Aklat ni Mormon ay isinulat upang …

Ang pahina ng pamagat ay naglalaman ng mga huling salitang isinulat ni Moroni sa huling pahina ng mga laminang ginto. Basahin ang pahina ng pamagat at ang unang tatlong talata ng pambungad sa Aklat ni Mormon. Maghanap ng mga paraan upang makumpleto ang pangungusap sa itaas. Makatutulong sa iyo ang mga sumusunod na tanong habang ginagawa mo ito.

• Para kanino isinulat ang Aklat ni Mormon?

• Tungkol kanino ang Aklat ni Mormon?

• Bakit isinulat ang Aklat ni Mormon?

(Para sa karagdagang impormasyon, tingnan sa “Maikling Paliwanag tungkol sa Ang Aklat ni Mormon” sa mga pambungad na pahina.)

Nagpatotoo si Elder Ulisses Soares ng Korum ng Labindalawang Apostol tungkol sa mga layunin ng Aklat ni Mormon.

Pinatototohanan ko na ang Aklat ni Mormon ay kasangkapan ng Diyos upang maisagawa ang pagtitipon ng Israel sa ating panahon at maipakilala sa mga tao ang Kanyang Anak na si Jesucristo. (Ulisses Soares, “Ang Paglabas ng Aklat ni Mormon,” Liahona, Mayo 2020, 35)

• Ano ang natutuhan mo mula sa iyong sariling pag-aaral at sa pahayag ni Elder Soares tungkol sa mga layunin ng Aklat ni Mormon?

Ang isang katotohanan na maaaring natukoy mo ay ang Aklat ni Mormon ay isinulat upang makatulong sa pagtitipon ng Israel at hikayatin ang lahat ng tao na si Jesus ang Cristo.

• Anong katibayan ang nakikita mo tungkol dito sa pangalawang talata ng pahina ng pamagat?

Ang sumusunod na dalawang aktibidad ay makatutulong sa mga estudyante na mapalalim ang kanilang pag-unawa tungkol sa katotohanan sa itaas na nakasulat sa mga bold letter. Ang mga aktibidad na ito ay maaaring gawin sa iba’t ibang paraan. Maaari mong ipakita ang bawat aktibidad para sa mga estudyante o bigyan sila ng kopya ng bawat isa. Maaaring piliin ng mga estudyante na gawin ang isa sa mga ito at pagkatapos ay ituro sa isa’t isa ang natutuhan nila. Maaari din silang gumawa nang magkakapartner o sa maliliit na grupo upang magawa ang dalawang aktibidad.

Aktibidad A: Layunin ng Aklat ni Mormon na makatulong sa pagtitipon ng Israel

Ang Aklat ni Mormon ay madalas tumutukoy sa tipang ginawa ng Panginoon upang tipunin ang Israel. Basahin ang pahayag ni Pangulong Russell M. Nelson at ang dalawa o tatlo sa mga reperensyang banal na kasulatan sa ibaba.

[Sa] Aklat ni Mormon, matututuhan ninyo ang doktrina ng pagtitipon, mga katotohanan tungkol kay Jesucristo, Kanyang Pagbabayad-sala, at ang kabuuan ng Kanyang ebanghelyo na hindi makikita sa Biblia. Ang Aklat ni Mormon ay sentro [o mahalaga] sa pagtitipon ng Israel. Sa katunayan, kung wala ang Aklat ni Mormon, ang pangakong pagtitipon ng Israel ay hindi magaganap. (Russell M. Nelson at Wendy W. Nelson, “Pag-asa ng Israel [pandaigdigang debosyonal para sa mga kabataan, Hunyo 3, 2018],” suplemento sa Liahona, 13, SimbahanniJesucristo.org)

• 1 Nephi 15:14–18

• 1 Nephi 22:11–12

• 2 Nephi 29:14

• Mormon 9:36–37

• Moroni 10:31

• Sa iyong palagay, paano makatutulong ang Aklat ni Mormon sa pagtitipon ng Israel?

Isipin kung paano nakatulong ang Aklat ni Mormon sa iyo o sa iba na matipon sa totoong Simbahan ni Jesucristo. Maaari mong isulat ang mga pagpapalang dumating dahil sa pagtitipon na ito.

• Paano kaya maiiba ang iyong buhay kung wala ang Aklat ni Mormon?

• Kanino mo maibabahagi ang Aklat ni Mormon?

Aktibidad B: Layunin ng Aklat ni Mormon na hikayatin ang lahat ng tao na si Jesus ang Cristo

Pagnilayan kung ano ang nalalaman mo tungkol kay Jesucristo at kung paano nakaimpluwensya ang Aklat ni Mormon sa kaugnayan mo sa Kanya. Pagkatapos ay ilista sandali ang dalawa o tatlong banal na kasulatan mula sa Aklat ni Mormon na nagtuturo sa iyo tungkol kay Jesucristo. Kung kailangan mo ng tulong, tingnan ang entry na “Jesucristo” sa Gabay sa mga Banal na Kasulatan.

• Ano ang ipinauunawa sa iyo ng mga talatang ito tungkol kay Jesucristo?

Ang sumusunod na aktibidad ay maaaring iangkop upang magsadula ang mga estudyante nang magkakapartner o sa maliliit na grupo.

Ipagpalagay na kausap mo ang isang kaibigan na hindi pamilyar sa Aklat ni Mormon o hindi nadarama na napakahalaga nito. Ano ang maaari mong ibahagi sa taong ito tungkol sa Aklat ni Mormon at sa layunin nito? Maaari kang magsama ng mga personal na karanasan, parirala mula sa pahina ng pamagat at pambungad, o anumang reperensya mula sa Aklat ni Mormon na sa palagay mo ay maaaring makatulong.

Maaari mong tapusin ang lesson sa pagbabahagi ng iyong personal na patotoo tungkol sa layunin at kahalagahan ng Aklat ni Mormon. Maaari ding magbahagi ang mga estudyante ng kanilang patotoo o damdamin tungkol sa kanilang pag-aaral ng banal na talaang ito noon at sa hinaharap.

Komentaryo at Pinagmulang Impormasyon

Ano ang iba pang resource na makatutulong sa akin na maunawaan ang Aklat ni Mormon at ang mga layunin nito?

Ang sumusunod na video, na matatagpuan sa SimbahanniJesucristo.org, ay nakatutulong na maipaliwanag ang katangian at mga layunin ng Aklat ni Mormon.

• “Pinangalagaan ni Moroni ang Talaan para sa mga Huling Araw” (3:26)

Ano ang ibig sabihin ng ilan sa mga salita sa pahina ng pamagat?

Ang mga sumusunod na kahulugan ay makatutulong sa iyo na maunawaan ang ilan sa mga salita mula sa pahina ng pamagat ng Aklat ni Mormon.

• Ang Sambahayan ni Israel ay tumutukoy sa mga inapo nila Abraham, Isaac, at Jacob. Bukod pa rito, kabilang sa sambahayan ni Israel ang mga hindi tunay na inapo nila Abraham, Isaac, at Jacob ngunit tinanggap ang mensahe ng ipinanumbalik na ebanghelyo at sumapi sa ipinanumbalik na Simbahan sa pamamagitan ng mga tipan at ordenansa.

• Ang mga Judio ay tumutukoy noong una sa sinumang nagmula sa lipi ni Juda (isa sa labindalawang lipi ng Israel). Gayunpaman, madalas gamitin ng mga manunulat sa Aklat ni Mormon ang salitang ito upang tukuyin ang lahat ng naninirahan sa Katimugang Kaharian ng Juda sa panahon ng Lumang Tipan (2 Nephi 30:4; 33:8), kahit na sila ay mga inapo ng iba pang lipi ng Israel (Alma 10:3). Tumutukoy rin ito sa “mga taong nagsasagawa ng relihiyon, [uri] ng pamumuhay, at kaugalian ng mga Judio subalit maaari o maaaring hindi Judio sa pagsilang.” (Gabay sa mga Banal na Kasulatan, “Judio, Mga,” scriptures.ChurchofJesusChrist.org).

• Ang ibig sabihin ng mga Gentil ay “mga bayan” (Bible Dictionary, “Gentile”). “Tumutukoy ito minsan sa mga taong hindi kabilang sa angkan ng mga Israelita, minsan mga taong hindi kabilang sa angkan ng mga Judio, at minsan mga bayang walang ebanghelyo, kahit na maaaring may dugong Israelita sa mga tao. Itong huling pagkakagamit ay katangian ng salitang ginamit sa Aklat ni Mormon at sa Doktrina at mga Tipan” (Gabay sa mga Banal na Kasulatan, “Gentil, Mga,” scriptures.ChurchofJesusChrist.org).

• Ang labi ay natitirang bahagi.

Bakit napakahalaga ng Aklat ni Mormon?

Upang maunawaan ang mahalagang epekto ng Aklat ni Mormon sa buhay ng maraming tao, maaari mong pag-aralan ang mensahe ni Pangulong Russell M. Nelson na “Ang Aklat ni Mormon: Ano Kaya ang Buhay Ninyo Kung Wala Ito?” (Liahona, Nob. 2017, 60–63). Pagtuunan nang mabuti ang bahaging “Mga Listahan ni Pangulong Nelson tungkol sa Aklat ni Mormon” sa dulo ng mensahe.

Ano ang hitsura ng orihinal na pahina ng pamagat ng Aklat ni Mormon?

Maaari mong tingnan ang larawan ng pahina ng pamagat sa printer’s manuscript dito.

Maaari mong tingnan ang larawan ng pahina ng pamagat sa unang edisyon ng Aklat ni Mormon dito.

Karagdagang Aktibidad sa Pag-aaral

“Maikling Paliwanag tungkol sa Ang Aklat ni Mormon”

Upang tulungan ang mga estudyante na maunawaan kung ano ang Aklat ni Mormon at kung paano ito tinipon, maaari kang magdala ng mga aklat o kahon na kumakatawan sa iba’t ibang lamina na inilarawan sa “Maikling Paliwanag tungkol sa Ang Aklat ni Mormon.” Sabihin sa mga estudyante na basahin ang mga talatang may bilang 1–4 sa paliwanag at maghandang ipaliwanag kung paano nagmula sa iba’t ibang laminang ito ang Aklat ni Mormon.