Mga Pambungad na Pahina ng Aklat ni Mormon

Pagtatamo ng Espirituwal na Kaalaman, Bahagi 2

Suriin ang mga Konsepto at Tanong nang may Walang-hanggang Pananaw

mga estudyanteng nag-uusap

Ang isa sa mga layunin ng doctrinal mastery ay tulungan kang matutuhan at maipamuhay ang mga alituntunin para sa pagtatamo ng espirituwal na kaalaman upang maging higit na katulad ni Jesucristo. Ang lesson na ito ay makatutulong sa iyo na suriin ang mga konsepto at tanong nang may walang-hanggang pananaw at mas makita ang mga ito nang katulad ng pagtingin ng Tagapagligtas.

Pag-unawa sa iyong tungkulin sa doctrinal mastery. Sa pagsasalita sa mga titser sa seminary at institute tungkol sa doctrinal mastery, itinuro ni Pangulong M. Russell Ballard ng Korum ng Labindalawang Apostol: “Ang inisyatibong ito ay inspirado at napapanahon. Maganda ang magiging impluwensya nito sa ating mga kabataan. Gayunman, ang tagumpay ng Doctrinal Mastery, at ng lahat ng iba pang programa ng pag-aaral sa [mga seminary at institute], ay nakasalalay nang husto sa inyo” (“Ang mga Oportunidad at Responsibilidad ng mga CES Teacher sa Ika-21 Siglo” [isang gabi kasama ang General Authority, Peb. 26, 2016], broadcasts.ChurchofJesusChrist.org).

Paghahanda ng estudyante: Sabihin sa mga estudyante na pasalamatan ang Ama sa Langit sa kanilang mga personal na panalangin para sa nalaman nila tungkol sa plano ng kaligtasan. Maaari mo silang hikayatin na itanong din sa Kanya kung paano nila magagamit ang kaalamang iyon para sa kabutihan.

Mga Posibleng Aktibidad sa Pag-aaral

Mga alituntunin ng pagtatamo ng espirituwal na kaalaman

Kapag dumaranas tayo ng mga hamon sa buhay o nahaharap tayo sa mga tanong na hindi nasagot, matutulungan tayo ng mga sumusunod na alituntunin ng pagtatamo ng espirituwal na kaalaman:

1. Kumilos nang may pananampalataya.

2. Suriin ang mga konsepto at tanong nang may walang-hanggang pananaw.

3. Hangaring mas makaunawa sa pamamagitan ng sources na itinalaga ng Diyos.

Sa lesson na ito, pagtutuunan natin ang pagsuri sa mga konsepto at tanong nang may walang-hanggang pananaw.

Limitadong pananaw

Gumamit ng aktibidad na tulad ng sumusunod upang tulungan ang mga estudyante na talakayin kung paano naging mahalaga ang pananaw at konteksto sa pag-unawa:

Magpapunta ng dalawang estudyante sa harapan ng klase. Bigyan ang bawat isa ng isang pirasong papel na may maliit na butas sa gitna. Sabihin sa kanila na itapat ang papel sa isang mata, at itanong kung nakakakita ba sila sa butas nito. Pagkatapos ay hamunin sila na maglaro ng saluhan ng malambot na bagay habang nakatingin lang sa butas ng papel. Kung nahihirapan sila, tanungin sila kung bakit napakahirap kung napatunayan na nila na nakakakita sila.

• Paano ito maitutulad sa paggawa ng mga desisyong nagpapabago ng buhay o pagsagot sa mahahalagang tanong nang may limitadong pag-unawa sa plano ng kaligtasan?

Ang pagkakaroon ng mas kumpletong pananaw ay makatutulong kapag nakikipag-ugnayan sa mundong ginagalawan natin. Gayundin, ang walang-hanggang pananaw ay makatutulong sa atin habang nagtatamo tayo ng espirituwal na kaalaman.

Maaari mong markahan ang sumusunod na pangungusap mula sa talata 8 sa bahaging “Pagtatamo ng Espirituwal na Kaalaman” ng Doctrinal Mastery Core Document (2022): Upang masuri ang mga konsepto ng doktrina, tanong, at isyung panlipunan nang may walang-hanggang pananaw, isinasaalang-alang natin ang mga ito sa konteksto ng plano ng kaligtasan at ng mga turo ng Tagapagligtas.

Bago basahin ng mga estudyante ang mga sumusunod na talata, ipabuod sa kanila kung ano ang alam na nila tungkol sa alituntuning ito ng pagtatamo ng espirituwal na kaalaman.

Pag-aralan ang talata 8–10, at alamin kung ano ang makatutulong sa iyo para masuri ang mga konsepto at tanong nang may walang-hanggang pananaw.

Hikayatin ang mga estudyante na markahan ang ilang salita at parirala at ibahagi ang nalaman nila. Magbigay ng mga follow-up na tanong upang matulungan sila na maunawaan na nakikita ng Ama sa Langit at ni Jesucristo ang mga bagay-bagay nang may walang-hanggang pananaw. Kung matututuhan natin itong gawin sa ating buhay, tayo ay mas magiging higit na katulad Nila. Maaaring makatulong ang mga sumusunod na tanong.

• Ano ang ilang isyu at tanong kung saan sa palagay mo ay iba ang pananaw ng Tagapagligtas sa pananaw ng maraming tao sa mundo?

• Paano nakatutulong sa atin ang pagsuri sa mga konsepto at tanong sa konteksto ng plano ng kaligtasan upang makita natin ang mga bagay-bagay nang higit na katulad ng pagtingin dito ng Ama sa Langit at ni Jesucristo? (tingnan sa Mosias 4:9).

• Bakit maaaring maging mahalagang kasanayan ito na dapat mong matutuhan, sanayin, at gamitin sa iyong buhay?

Isang halimbawa mula sa mga banal na kasulatan

Ipinakita sa atin ng Nakababatang Alma kung paano tingnan ang mga bagay nang may walang-hanggang pananaw nang sagutin niya ang mabibigat na tanong na ikinababalisa ng kanyang anak na si Corianton.

Basahin ang Alma 40:1; 42:1, at alamin ang dalawa sa mga alalahanin ni Corianton. Maaari mong i-paraphrase ang kanyang mga alalahanin sa sarili mong mga salita.

Ngayon ay basahin ang mga chapter heading para sa Alma 40; 41; 42 para makita ang buod ng itinuro ni Alma kay Corianton nang tugunin niya ang kanyang mga alalahanin. Hanapin ang mga elemento ng plano ng kaligtasan na itinuro ni Alma.

• Anong mga elemento ng plano ang nakita mo?

• Paano kaya ito nakatulong kay Corianton na makita ang kanyang mga alalahanin nang may walang-hanggang pananaw?

Tingnan sa Ibang Paraan

babaeng gumagawa ng frame gamit ang kanyang mga daliri

Gumawa ng hugis frame gamit ang iyong mga hintuturo at hinlalaki. Pumili ng anumang bagay sa silid bilang tema ng iyong larawan.

• Ano ang napagpasyahan mong isama sa iyong frame? Bakit?

• Ano ang hindi mo isinama sa iyong larawan? Bakit?

Tulad ng mga larawan, may frame o konteksto rin ang mga tanong. Ang frame ay maaaring kumatawan sa mga paniniwala at palagay ng isang tao na nagtutulak sa kanyang tingnan ang mga tanong sa partikular na paraan. Kung minsan, ang mga paniniwala at palagay na iyon ay batay sa maling pagkaunawa o isang bagay na hindi totoo. Sa mga ganoong sitwasyon, makatutulong na tingnan sa ibang paraan ang mga ito. Tinitingnan natin sa ibang paraan kapag sinusuri natin ang mga paniniwala o palagay na iyon sa konteksto ng plano ng kaligtasan at mga turo ng Tagapagligtas.

Itinuro ni Pangulong Dallin H. Oaks ng Unang Panguluhan:

Pangulong Dallin H. Oaks

Dahil sa ating kaalaman sa planong ito at sa iba pang katotohanang inihayag ng Diyos, nagsisimula tayo sa mga palagay na kaiba sa mga taong hindi nakakaalam ng alam natin. Dahil dito, nagkakaroon tayo ng iba’t ibang konklusyon sa maraming mahalagang paksa na hinuhusgahan lang ng iba batay sa kanilang mga opinyon tungkol sa buhay sa mundo. (Dallin H. Oaks, “As He Thinketh in His Heart” [evening with a General Authority, Peb. 8, 2013], broadcasts.ChurchofJesusChrist.org)

Kunwari ay may kaibigan kang nagngangalang Adry na nagtanong, “Kung talagang may mapagmahal na Diyos, bakit Niya hahayaang magdusa ang mga tao?”

Upang maiba ang konsepto ng tanong ni Adry, tukuyin muna ang mga palagay o paniniwala na maaaring naging dahilan kung bakit niya itinanong ito.

Halimbawa, marahil naniniwala siya na walang anumang kahalagahan ang pagdurusa. Tumukoy ng isa o dalawa pa.

• Tulungan ang mga estudyante na matukoy ang iba pang mga maaaring maging palagay o paniniwala, tulad ng “Dapat itigil ng Diyos ang lahat ng pagdurusa,” “Walang malasakit ang Diyos,” o “Walang Diyos.”

Ang mga tanong na gaya ng mga sumusunod ay magagamit upang tulungan kang malaman kung gaano kahusay na nauunawaan ng mga estudyante ang kasanayan na tingnan ang mga bagay-bagay sa ibang paraan.

• Sa palagay mo, bakit kaya makatutulong kung pag-iisipan ang mga paniniwala o palagay na maaaring nakaimpluwensya sa tanong ni Adry tungkol sa Diyos?

• Paano tayo natutulungan ng nalalaman natin tungkol sa Ama sa Langit at sa Kanyang plano para makita nang naiiba ang tanong?

• Ano ang masasabi mo sa kakayahan mong lumutas ng mahihirap na tanong sa pamamagitan ng pagtingin dito sa ibang paraan? Anong mga tanong o alalahanin ang mayroon ka tungkol dito, kung mayroon man?

Kung may oras pa, maaari mong bigyan ng pagkakataon ang mga estudyante na sanayin ang kasanayan na tingnan ang sarili nilang mga tanong o alalahanin sa ibang paraan. Tingnan ang bahaging “Mga Karagdagang Aktibidad sa Pag-aaral” para sa mga ideya kung paano ito gagawin.

Maaari kang magbahagi ng personal na karanasan tungkol sa pagtingin sa mga problema o alalahanin nang may walang-hanggang pananaw.

Magkakaroon ka ng maraming pagkakataong magsanay na tingnan ang mga bagay-bagay sa ibang paraan sa seminary at sa iyong buhay. Kapag hinihingi mo ang tulong ng Espiritu Santo at pinapalawak mo ang iyong pag-unawa sa plano ng kaligtasan at sa doktrina ni Cristo, huhusay ang kakayahan mong suriin ang mga konsepto at tanong nang may walang-hanggang pananaw. Palalakasin din nito ang iyong loob sa pagbabahagi ng nalalaman mo at pagtulong sa iba sa mahihirap na tanong at alalahanin.

Komentaryo at Pinagmulang Impormasyon

Paano nakatutulong ang pag-unawa sa plano ng kaligtasan?

Itinuro ni Pangulong Dallin H. Oaks ng Unang Panguluhan:

Pangulong Dallin H. Oaks

Dahil alam ng mga Banal sa mga Huling Araw ang plano ng ating Ama sa Langit para sa Kanyang mga anak, alam natin na ang buhay na ito ay hindi isang dulang may isang yugto na nasa pagitan ng nakaraang hindi malalaman at hinaharap na walang katiyakan. Ang buhay na ito ay gaya ng pangalawang yugto sa dulang may tatlong yugto. Ang layunin nito ay inilalarawan ayon sa inihayag tungkol sa ating espirituwal na buhay sa yugto 1 at sa ating walang-hanggang tadhana sa yugto 3. (Dallin H. Oaks, “As He Thinketh in His Heart” [evening with a General Authority, Peb. 8, 2013], broadcasts.ChurchofJesusChrist.org)

Itinuro ni Pangulong M. Russell Ballard ng Korum ng Labindalawang Apostol:

Pangulong M. Russell Ballard

Sa pamamagitan ni Propetang Joseph Smith, ibinigay ng Diyos ang Aklat ni Mormon, ang Doktrina at mga Tipan, at marami pang karagdagang mga turo sa Simbahan. Kabilang dito ang kaalaman tungkol sa plano ng kaligtasan, na isang mapa kung saan tayo nanggaling, ang layunin natin dito sa lupa, at saan tayo pupunta kapag namatay tayo. Ang plano ay naglalaan din sa atin ng natatangi, at walang-hanggang pananaw na tayo ay mga espiritung anak ng Diyos. Sa pagkaunawa kung sino ang ating Ama sa Langit at sa kaugnayan natin sa Kanya at sa Kanyang Pinakamamahal na Anak na si Jesucristo, tatanggapin natin ang Kanilang mga utos at gagawa ng mga tipan sa Kanila na aakay sa atin pabalik sa Kanilang piling. (M. Russell Ballard, “Ang Diyos ang Namamahala,” Liahona, Nob. 2015, 25)

Mga Karagdagang Aktibidad sa Pag-aaral

Gumawa ng quiz o maikling pagsusulit

Hatiin ang klase sa maliliit na grupo at i-assign sa bawat grupo ang talata8,9,o 10 sa bahaging “Pagtatamo ng Espirituwal na Kaalaman” ng Doctrinal Mastery Core Document (2022).

Hilingin sa bawat grupo na magsulat ng tanong na sinasagot ng talatang naka-assign sa kanila. Ibigay ang mga tanong sa iba pang grupo, at sabihin sa mga estudyante na hanapin ang mga sagot sa mga tanong.

Magsanay na tingnan ang mga bagay-bagay sa ibang paraan

Maraming kabataan ang nahihirapan sa pagtukoy ng mga pinagbabatayang palagay at paniniwala. Maaaring mas madali silang matuto sa mga halimbawang may malinaw na elemento ng maling pagkaunawa o kasinungalingan. Kung magsasanay na tingnan ang mga bagay-bagay sa ibang paraan kasama ang mga estudyante, siguraduhing gumamit ng mga tanong na nauugnay sa kanila, at maging handa na tulungan sila na matukoy ang mga maling pagkaunawa o maling palagay.

Kapag nagsasanay, maaari kang maglista ng mga potensyal na tanong sa pisara at hayaan ang klase na pagtulungang sagutin ang mga ito nang sama-sama o sa maliliit na grupo. Kung naggrupu-grupo sila, maaari mong hayaan ang isang grupo na tukuyin ang mga paniniwala o palagay at pagkatapos ay ipasa ang tanong at mga palagay sa isa pang grupo upang suriin nila ito nang may walang-hanggang pananaw.