Mga Pambungad na Pahina ng Aklat ni Mormon

Ang Patotoo ni Joseph Smith tungkol sa Aklat ni Mormon

“Isinalin … sa pamamagitan ng kaloob at kapangyarihan ng Diyos”

© 1998 David Lindsley

Paano lumabas ang Aklat ni Mormon? Paano ito isinalin ni Joseph Smith sa Ingles mula sa isang hindi kilalang wika? Ang lesson na ito ay makatutulong sa iyo na mas maunawaan kung paano lumabas ang Aklat ni Mormon “sa pamamagitan ng kaloob at kapangyarihan ng Diyos” (Doktrina at mga Tipan 135:3).

Alamin ang pangalan ng bawat estudyante. Ang pag-alam at pagtawag sa pangalan ng bawat estudyante ay makatutulong para madama ng estudyante ang iyong pagmamahal. Mag-ukol ng oras upang malaman ang mga pangalan ng mga estudyante. Maaari kang maghanda ng mga pangalan ng mga estudyante na may mga larawan nila o magsagawa ng mga aktibidad sa klase na makatutulong sa iyo at sa mga estudyante na malaman ang pangalan ng isa’t isa.

Paghahanda ng estudyante: Sabihin sa mga estudyante na pumasok sa klase na handang ibahagi ang nalalaman nila tungkol sa paglabas ng Aklat ni Mormon at kung ano ang mga tanong nila tungkol dito.

Mga Posibleng Aktibidad sa Pag-aaral

Ang paglabas ng Aklat ni Mormon

Ipakita ang mga sumusunod na larawan. Ipaalala sa mga estudyante ang kanilang paghahanda para sa klase at sabihin sa kanila na ayusin ang mga larawan ayon sa tamang pagkakasunud-sunod. Ang tamang pagkakasunud-sunod ay D, C, B, A, E.

Iakma ang mga aktibidad sa lesson batay sa kung gaano kahusay nauunawaan ng mga estudyante ang mga pangyayaring ito.

• A.

  

• B.

  

• C.

  

• D.

  

• E.

  

• Sa iyong palagay, ano ang maaaring nadama ni Joseph Smith sa bawat isa sa mga pangyayaring ito? Bakit?

“Sa pamamagitan ng kaloob at kapangyarihan ng Diyos”

Mag-isip ng isang taong kakilala mo na maaaring makinabang sa pag-aaral pa ng tungkol sa paglabas ng Aklat ni Mormon. Maaaring ito ay isang tao na hindi miyembro ng Simbahan, o marahil ay miyembro ng Simbahan na nanghihina ang pananampalataya. Maikling ilarawan ang kanyang mga sitwasyon sa iyong study journal at tukuyin kung bakit makatutulong sa kanya na pag-aralan pa ang tungkol sa paglabas ng Aklat ni Mormon.

Habang nag-aaral ka, maghanap ng katibayan ng katotohanan na inilabas ni Joseph Smith ang Aklat ni Mormon sa pamamagitan ng kaloob at kapangyarihan ng Diyos (tingnan sa pahina ng pamagat ng Aklat ni Mormon at Doktrina at mga Tipan 135:3).

Isinulat ni Joseph Smith ang tungkol sa kanyang karanasan sa paglabas ng Aklat ni Mormon.

Ipabasa sa mga estudyante ang “Ang Patotoo ng Propetang si Joseph Smith” mula sa mga pambungad na pahina ng Aklat ni Mormon. Ang isang paraan upang magawa ito ay hatiin ang babasahin at ipabasa sa kalahati ng klase ang talata 1–14, tungkol sa pagbisita ni Moroni sa gabi. Maaaring basahin ng natitirang kalahati ng klase ang talata 15–23, tungkol sa ginawa ni Joseph matapos ang pagbisita ni Moroni.

Ang isa pang opsiyon ay ibuod ang mga bahagi ng salaysay at pumili ng mga talatang babasahin ng mga estudyante na pinakamakatutulong sa kanila. Maaari ding sumangguni ang mga estudyante sa Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 23–35.

• Anong mga pahayag ang nakita mo na nagpapahiwatig na inilabas ang Aklat ni Mormon sa pamamagitan ng kaloob at kapangyarihan ng Diyos?

• Sa iyong palagay, bakit si Joseph Smith ang napili upang magsalin ng Aklat ni Mormon, sa halip na isang kilalang iskolar sa panahong ito?

• Ano ang natutuhan mo tungkol sa paglabas ng Aklat ni Mormon na ibabahagi mo sa taong naisip mo?

Mga makasaysayang detalye

Pagkatapos matanggap ni Joseph Smith ang mga lamina, isinalin niya ang Aklat ni Mormon sa pamamagitan ng kaloob at kapangyarihan ng Diyos. “Kung minsan ay nagsasalin si Joseph sa pamamagitan ng pagtingin sa mga pansalin [ang Urim at Tummim] at pagbabasa sa Ingles ng mga titik na nasa mga lamina. Madalas na mas kumbinyente para sa kanya na gamitin ang bato ng tagakita. Ilalagay niya ang bato ng tagakita sa kanyang sumbrero, ilalapat ang kanyang mukha rito upang takpan ang liwanag, at sisilipin ang bato. Ang liwanag mula sa bato ay kikinang sa kadiliman, magsisiwalat ng mga salita na idinidikta ni Joseph” (Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 69–70).

Basahin ang sumusunod na pahayag ni Pangulong Dallin H. Oaks ng Unang Panguluhan: Maaari mo ring panoorin ang video na “Pagsalungat sa Lahat ng Bagay” sa SimbahanniJesucristo.org mula sa time code na 8:18 hanggang 9:24.

Matapos makumpleto ni Joseph Smith ang pagsasalin ng Aklat ni Mormon, kinailangan pa rin niyang maghanap ng maglilimbag nito. Hindi ito madali. Nakapanghihina ng loob ang pagkakumplikado ng napakahabang manuskritong ito at ang halaga ng paglilimbag at paggawa ng libu-libong kopya nito. Unang nilapitan ni Joseph si E. B. Grandin, isang manlilimbag sa Palmyra, at tumanggi ito. Pagkatapos ay naghanap siya ng isa pang manlilimbag sa Palmyra, na tumanggi rin sa kanya. Naglakbay siya patungong Rochester, 25 milya (40 km) ang layo, at nilapitan ang pinakakilalang tagapaglathala sa kanlurang New York, na tumanggi rin. Gusto namang gawin ito ng isang tagapaglathala sa Rochester, ngunit dahil sa mga pangyayari hindi naging katanggap-tanggap ang alternatibong ito.

Lumipas na ang mga linggo, at marahil nagugulumihanan na si Joseph sa mga humahadlang sa paggawa ng tungkuling iniatas sa kanya ng Diyos. Hindi ito ginawang madali ng Panginoon, ngunit ginawa niya itong posible. Ang ikalimang pagtatangka ni Joseph, ang muling paglapit sa tagapaglathalang si Grandin sa Palmyra, ay naging matagumpay. (Dallin H. Oaks, “Pagsalungat sa Lahat ng Bagay,” Liahona, Mayo 2016, 116)

• Paano naiimpluwensyahan ng mga makasaysayang detalyeng ito ang iyong personal na damdamin tungkol sa Aklat ni Mormon?

• Ano ang itinuturo sa iyo ng paglabas ng Aklat ni Mormon tungkol sa Ama sa Langit at kay Jesucristo?

Pagpapaliwanag ng paglabas ng Aklat ni Mormon

Sabihin sa mga estudyante na isipin kung ano ang maaari nilang ibahagi sa taong naisip nila kanina na makatutulong sa taong iyon na mas maunawaan kung paano lumabas ang Aklat ni Mormon sa pamamagitan ng kaloob at kapangyarihan ng Diyos.

Pagpartner-partnerin ang mga estudyante. Sabihin sa kanila na magsalitan sa pagganap bilang isang miyembro ng Simbahan na nagpapaliwanag at sumasagot sa mga tanong at bilang isang taong kailangang malaman pa ang tungkol sa paglabas ng Aklat ni Mormon. Lumibot sa silid at makinig sa mga paliwanag upang malaman kung kailangan pa ng karagdagang pag-aaral tungkol sa paksang ito.

Matapos makumpleto ng mga estudyante ang kanilang mga paliwanag, maaari kang magbahagi ng personal na patotoo tungkol sa kapangyarihan, kaloob, at pagmamahal ng Diyos na ipinakita sa pamamagitan ng paglabas ng Aklat ni Mormon. Anyayahan din ang mga estudyante na nais magbahagi ng kanilang mga patotoo.

Komentaryo at Pinagmulang Impormasyon

Paano isinalin ni Joseph Smith ang Aklat ni Mormon?

Itinuro ni Elder Ulisses Soares ng Korum ng Labindalawang Apostol:

Ang proseso ng pagsasalin ng Aklat ni Mormon ay isa ring himala. Ang sagradong sinaunang talaang ito ay hindi “isinalin” sa tradisyonal na paraan na tulad ng pagsasalin ng mga iskolar sa sinaunang mga teksto sa pamamagitan ng pag-aaral ng isang sinaunang wika. Dapat nating mas ituring ang proseso na isang “paghahayag” sa tulong ng pisikal na mga kasangkapang inilaan ng Panginoon, kaysa isang “pagsasalin” ng isang taong may kaalaman sa mga wika. Ipinahayag ni Joseph Smith na sa pamamagitan ng kapangyarihan ng Diyos ay “isinalin [niya] ang Aklat ni Mormon mula sa [hieroglyphs], na ang kaalaman tungkol dito ay naglaho sa mundo, kung saan napakagandang kaganapan ang naranasan [niyang] mag-isa, na isang kabataang walang pinag-aralan, upang daigin ang karunungan ng mundo at malaking kamangmangan ng labingwalong siglo, sa isang bagong paghahayag.” Maliwanag ding makikita ang tulong ng Panginoon sa pagsasalin ng mga lamina—o paghahayag, ika nga—kung iisipin ang mahimalang ikli ng panahon na ginugol ni Joseph sa pagsasalin nito. (Ulisses Soares, “Ang Paglabas ng Aklat ni Mormon,” Liahona, Mayo 2020, 33)

Paano isinalin ang Aklat ni Mormon sa iba’t ibang wika?

Mga Karagdagang Aktibidad sa Pag-aaral

Mga pisikal na kasangkapan na ginamit upang ipakita ang kapangyarihan ng Diyos

Kung makikinabang ang mga estudyante na makakita ng mga karagdagang halimbawa ng mga pisikal na kasangkapan na nagpapakita ng kapangyarihan ng Diyos, maaari mong idispley ang mga sumusunod na larawan at sabihin sa kanila na pag-aralan ang isa o mahigit pa sa mga sumusunod na salaysay.

Ang mga tumingin sa ahas na tanso ay napagaling (tingnan sa Mga Bilang 21:4–9).

Pinatnubayan ng Panginoon si Lehi at ang kanyang pamilya gamit ang Liahona (tingnan sa 1 Nephi 16:9–10, 23–29).

Pinagaling ni Jesus ang isang lalaking bulag gamit ang putik at dura (tingnan sa Juan 9:1–7).

Sabihin sa mga estudyante na ibahagi kung ano ang natutuhan nila tungkol sa Ama sa Langit at kay Jesucristo mula sa paggamit ng mga pisikal na kasangkapang ito. Talakayin kung paano natutulad sa salaysay tungkol sa pagsasalin ng Aklat ni Mormon ang mga salaysay na ito tungkol sa mga pisikal na bagay na ginamit sa mga himala. Maaari mong ibahagi kung paano pinalalakas ng mga halimbawang ito ang iyong patotoo tungkol sa Ama sa Langit, kay Jesucristo, at sa Aklat ni Mormon, at anyayahan din ang lahat ng estudyante na nais magbahagi.

Pagsagot sa mga tanong tungkol sa paglabas ng Aklat ni Mormon

Sabihin sa mga estudyante na isipin ang mga tanong na mayroon sila o maaaring mayroon ang iba tungkol sa paglabas ng Aklat ni Mormon. Isulat sa pisara ang kanilang mga tanong at sabihin sa mga estudyante na maghanap ng mga sagot sa sources na itinalaga ng Diyos. Kasama sa ilan sa mga source na ito ang sumusunod:

• Gabay sa mga Banal na Kasulatan, “Aklat ni Mormon,” “Magsalin,” “Urim at Tummim,” https://www.churchofjesuschrist.org/study/scriptures/gs?lang=tgl

• Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 (2018), kabanata 4–6.

Mga makasaysayang lugar ng Simbahan