Mga Pambungad na Pahina ng Aklat ni Mormon

Ang mga Patotoo ng Tatlong Saksi at Walong Saksi

“Nakita Namin … ang mga Lamina”

Sa loob ng ilang panahon, hindi pinahintulutan si Joseph Smith na ipakita ang mga laminang ginto kahit kanino. Bilang katuparan ng propesiya, inihayag kalaunan ng Panginoon kay Joseph na may mga karagdagang saksi na pahihintulutang makita ang mga lamina at magpapatotoo sa katotohanan ng mga ito (tingnan sa 2 Nephi 27:12–14). Ang lesson na ito ay makatutulong sa iyo na maunawaan ang kahalagahan na maraming saksi ang Aklat ni Mormon at pag-isipan ang sarili mong patotoo.

Pagtulong sa mga estudyante na matuto sa pamamagitan ng Espiritu. Ang isang paraan ay hikayatin silang pag-isipan ang kanilang mga personal na karanasan na may kaugnayan sa lesson na ito. Maglaan ng oras para pag-isipan nila ang mga pagpapalang natanggap nila sa pamamagitan ng pamumuhay ng ebanghelyo ni Jesucristo at kung paano sila nagiging higit na katulad Niya.

Paghahanda ng estudyante: Sabihin sa mga estudyante na dumating sa klase na handang magbahagi ng mga karanasan na nakatulong sa kanila o sa iba na malaman na ang Aklat ni Mormon ay mula sa Diyos.

Mga Posibleng Aktibidad sa Pag-aaral

Mga saksi sa mga lamina

Maaari mong gamitin ang sumusunod na talata upang tulungan ang mga estudyante na maunawaan kung gaano kahirap para kay Joseph Smith ang maging nag-iisang saksi ng mga laminang ginto sa loob ng ilang panahon.

Isipin kung ano kaya ang nadama ni Joseph Smith na siya lang ang nakakakita sa mga laminang ginto. Isipin kung gaano kahirap para sa iyo kung hindi ka paniniwalaan, kung kukutyain, at tatawagin kang manlilinlang dahil hindi mo maipakita sa mga tao ang mga lamina. Isipin na kailangan mong sabihin sa mga taong sumuporta sa iyo na hindi nila maaaring makita ang mga lamina.

Habang isinasalin ang Aklat ni Mormon, idinikta ni Joseph ang mga salita ng mga ipinangako ng Panginoon hinggil sa mga lamina. Basahin ang 2 Nephi 27:12–14 para makita ang mga ipinangako ng Panginoon tungkol sa mga lamina (tingnan din sa Eter 5:2–4).

• Ano ang pinakamahalaga para sa iyo tungkol sa propesiyang ito? Bakit?

• Ano kaya ang nadama ni Joseph habang binabasa niya ang propesiyang ito? Bakit?

• Ano ang natutuhan mo sa scripture passage na ito tungkol sa Panginoon at sa Aklat ni Mormon?

Ang isang katotohanan na matututuhan natin sa mga propesiyang ito ay naglaan ang Panginoon ng maraming saksi sa mga lamina ng Aklat ni Mormon.

• Bakit mas madaling maniwala na totoo ang isang bagay kapag hindi lang iisa ang saksi nito?

Habang patuloy kang nag-aaral, hingin ang tulong ng Ama sa Langit sa pamamagitan ng Espiritu Santo para maunawaan ang kahalagahan ng mga saksi ng mga laminang ginto, at isipin kung paano makatutulong sa iyo ang kanilang mga patotoo para magkaroon o mapalakas ang sarili mong patotoo.

Ipakita ang sumusunod na talata o ipabasa ito sa isang estudyante.

Naglaan ang Panginoon ng isang grupo ng tatlo at pagkatapos ay walong kalalakihan na makakakita sa mga lamina. Marami sa mga saksing ito ang may naitulong sa paglabas ng Aklat ni Mormon. Halimbawa, inanyayahan ni David Whitmer sina Joseph at Emma na manirahan sa kanila habang nagsasalin si Joseph, isinangla ni Martin Harris ang kanyang sakahan upang mabayaran ang mga gastusin sa pagpapalimbag ng Aklat ni Mormon, at si Oliver Cowdery ay nagsilbing tagasulat ng karamihan sa isinalin. Ang ama ni Joseph at ang kanyang mga kapatid na sina Hyrum at Samuel ay mga saksi rin ng mga lamina at nakatulong kay Joseph sa mahahalagang paraan. Bagama’t ilan sa mga lalaking ito ang umalis kalaunan sa Simbahan, wala ni isa sa kanila ang nagtatwa sa kanilang patotoo tungkol sa Aklat ni Mormon. (Tingnan sa Mga Paksa sa Kasaysayan ng Simbahan, “Mga Saksi ng Aklat ni Mormon,” https://www.churchofjesuschrist.org/study/history/topics?lang=tgl.)

Basahin ang “Ang Patotoo ng Tatlong Saksi” at “Ang Patotoo ng Walong Saksi,” at alamin kung ano ang nakita, nadama, at nalaman nila.

Maaari mong bigyan ang mga estudyante ng sumusunod na handout at hikayatin sila na punan ang chart nang mag-isa, bilang klase, o sa maliliit na grupo.

Ang Patotoo ng Tatlong Saksi at Walong Saksi

	Tatlong Saksi:	Walong Saksi:
Ang nakita at nadama ng mga saksi.
Ang nalaman ng mga saksi.
Ang ginawa ng mga saksi.

• Anong mga pagkakatulad at pagkakaiba ang nakita mo sa mga karanasan ng dalawang grupo?

• Bakit kaya mahalaga ang mga pagkakaiba?

Bagama’t kung minsan ay gusto nating maranasan ang naranasan ng mga saksing ito, nagpatotoo ang Panginoon na kahit makita ng mga tao ang mga bagay na ito ay hindi sila makukumbinsi sa katotohanan (tingnan sa Doktrina at mga Tipan 5:7). Ipinaliwanag ni Pangulong James E. Faust (1920–2007) ng Unang Panguluhan:

Sa ating panahon, kailangan nating malaman ang katotohanan ng nasa mga laminang ginto nang di nakikita ang mga ito. Hindi natin ito makikita at mahahawakan na tulad ng Tatlong Saksi at Walong Saksi. Ilan sa mga taong talagang nakakita at nakahawak sa mga laminang ginto ay hindi nanatiling tapat sa Simbahan. Dakilang karanasan ang makakita ng anghel, ngunit mas dakilang malaman ang kabanalan ng Tagapagligtas sa pamamagitan ng pananampalataya at patotoo ng Espiritu [tingnan sa Juan 20:29]. (James E. Faust, “Hindi Ito Mangyayari sa Akin,” Liahona, Mayo 2002, 48)

• Bakit mahalaga sa iyo ang itinuro sa pahayag na ito?

Ang iyong patotoo tungkol kay Jesucristo at sa Aklat ni Mormon

Ang isang pangunahing layunin ng Aklat ni Mormon ay hikayatin ang mga tao na si Jesus ang Cristo (tingnan ang pahina ng pamagat ng Aklat ni Mormon). Isipin kung ang personal na patotoo mo tungkol kay Jesucristo at sa Aklat ni Mormon ay kasinglakas ng ninanais mong mangyari sa iyong patotoo. Isipin kung paano maaaring maging pagpapala sa iyo at sa iba ang pagkakaroon o pagpapalakas ng patotoong iyon.

Maaari mong bigyan ng oras ang mga estudyante na pag-isipan ang kanilang paghahanda para sa klase. Pagkatapos ay ipakita ang sumusunod na talata at hikayatin silang pagnilayan at isulat ang kanilang nadarama.

Isulat ang iyong patotoo tungkol kay Jesucristo at sa Aklat ni Mormon. Kung sa palagay mo ay wala ka pang patotoo, isulat kung ano ang magagawa mo upang makatanggap nito. Isama kung paano maaaring makaimpluwensya sa sarili mong patotoo ang patotoo ng iba. Maaari mo itong dagdagan habang patuloy mong pinag-aaralan ang Aklat ni Mormon.

Matapos magkaroon ng sapat na oras na makapagsulat ang mga estudyante, hikayatin ang ilan na ibahagi ang kanilang mga patotoo tungkol kay Jesucristo at sa Aklat ni Mormon.

Komentaryo at Pinagmulang Impormasyon

Bakit napakahalaga ng mga patotoo ng Tatlong Saksi at Walong Saksi?

Pinatotohanan ni Pangulong Henry B. Eyring ng Unang Panguluhan:

Kailanman ay hindi itinatwa ng Tatlong Saksi ang patotoo nila sa Aklat ni Mormon. Hindi nila maatim dahil alam nilang totoo ito. Nagsakripisyo sila at nagpakahirap nang higit pa sa alam ng karamihan. Ganoon din ang patotoo ni Oliver Cowdery tungkol sa banal na pinagmulan ng Aklat ni Mormon noong naghihingalo na siya. Ngunit sa oras ng pagsubok, atubili sila sa paniniwalang propeta pa rin ng Diyos si Joseph at ang tanging paraan para makalapit sa Tagapagligtas ay sa pamamagitan ng Kanyang ipinanumbalik na Simbahan. Ang patuloy nilang pagpapatunay sa nakita at narinig nila sa kamangha-manghang karanasang iyon, sa matagal nilang pagkakawalay sa Simbahan at kay Joseph, ang higit na nagpapalakas sa kanilang patotoo. (Henry B. Eyring, “Isang Tumatagal na Patotoo sa Misyon ni Propetang Joseph,” Liahona, Nob. 2003, 90)

Bakit kaya ibinigay ng Panginoon ang dalawang magkaibang uri ng mga karanasang ito para sa mga saksi ng Aklat ni Mormon?

Kung pinaratangan ng mga kritiko ng Simbahan ang Tatlong Saksi na guni-guni lang nila ang kanilang pangitain, hindi nito maipaliliwanag ang karanasan ng Walong Saksi sa mga lamina. Sa kabilang banda, kung pinaratangan ng mga kritiko si Joseph Smith na pineke niya ang mga laminang ginto upang maloko ang Walong Saksi, hindi nito maipaliliwanag ang mga banal na pagpapakita, kasama na ang pagpapakita ng anghel, na naranasan ng Tatlong Saksi.

Ano ang nadama ni Joseph matapos makita ng iba ang mga lamina?

Itinala ng kanyang inang si Lucy Mack Smith na pagkatapos ng banal na patotoong ito, sinabi sa kanya ni Joseph:

Hindi ninyo alam kung gaano ako kasaya. Ipinakita ng Panginoon ang mga lamina sa tatlo pang tao maliban sa akin, na nakakita rin ng isang anghel at kailangang sumaksi sa katotohanan ng aking sinabi, sapagkat alam nila sa kanilang sarili na hindi ko nililinlang ang mga tao. At talagang nadarama ko na parang naginhawahan ako sa mabigat na pasaning halos hindi ko na makayang tiisin ngunit ngayon ay magiging kabahagi na sila sa pasaning ito, at nagagalak ang aking kaluluwa na hindi na ako lubos na nag-iisa sa mundo. (Lucy Mack Smith, History, 1844–1845, book 8, pahina 11, josephsmithpapers.org); ang pagbaybay at pagbabantas ay ginawang makabago

Anong mga karagdagang salaysay ang makatutulong sa akin na mas maunawaan ang mga karanasan ng mga saksi ng mga laminang ginto?

Ibinahagi ni Elder Ulisses Soares ng Korum ng Labindalawang Apostol ang salaysay ng mga saksi. Panoorin ang “Ang Paglabas ng Aklat ni Mormon” mula sa time code na 7:58 hanggang 10:30 upang makita ang kanyang muling paglalahad.

Ang mga karanasan ng Tatlong Saksi at Walong Saksi ay nakadetalye rin sa Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 83–86).

Ipinakita rin kay Mary Whitmer ang mga lamina. Ang kuwento ng kanyang karanasan ay makikita sa pahina 79–81 ng Mga Banal, Tomo 1.

Mga Karagdagang Aktibidad sa Pag-aaral

Iba pang mga saksi

Maaaring makatulong sa mga estudyante kung pag-iisipan nila kung paano maaaring makaimpluwensya sa sarili nilang patotoo ang mga saksi ng Aklat ni Mormon. Hikayatin silang gumawa ng listahan ng mga taong narinig nilang sumaksi o nagpatotoo sa katotohanan ng Aklat ni Mormon. Ipabahagi sa kanila kung paano sila naimpluwensyahan ng mga saksing iyon. Pagkatapos ay ipasulat sa kanila ang sarili nilang patotoo o hingan sila ng maikling paliwanag kung paano maaaring makaimpluwensya sa kanilang buhay at kaugnayan kay Jesucristo ang pagkakaroon nila ng sariling patotoo.