Faqet e Parathënies së Librit të Mormonit

Parathënia për Librin e Mormonit

Guri Kyç i Besimit Tonë

Jozef Smithi e quajti Librin e Mormonit gurin kyç të besimit tonë. Brenda librit është një ftesë për ta pyetur Perëndinë nëse ai është i vërtetë. Miliona njerëz e kanë ndjekur këtë ftesë dhe kanë marrë një dëshmi nga Fryma e Shenjtë për vërtetësinë e Librit të Mormonit. Ky mësim ka për qëllim të të ndihmojë ta shtosh dëshirën tënde për ta studiuar Librin e Mormonit çdo ditë që të forcosh dëshminë tënde rreth vërtetësisë së tij.

Nxitja e studimit të përditshëm të shkrimeve të shenjta. Një zakon i studimit të përditshëm të shkrimeve të shenjta mund t’i bekojë nxënësit për gjithë pjesën tjetër të jetës së tyre. Kërkoni mënyra se si t’u mësoni nxënësve rreth bekimeve të studimit të shkrimeve të shenjta çdo ditë.

Përgatitja e nxënësve: Ftojini nxënësit ta lexojnë ose dëgjojnë bisedën e Plakut Geri E. Stivenson “Shihni te Libri, Shihni te Zoti” nga konferenca e përgjithshme e tetorit 2016.

Veprimtari të Mundshme të të Mësuarit

Bekimet nga Libri i Mormonit

Merrni parasysh të paraqitni listën vijuese të bekimeve që vijnë nga leximi i Librit të Mormonit. Diskutoni se cilat bekime nxënësit i dëshirojnë më shumë dhe se si do të ndikonin ato në jetën e tyre të përditshme. Nxënësit gjithashtu mund të tregojnë se çfarë do të ishin të gatshëm të bënin për t’i marrë ato. Këto bekime janë të përvijuara në pohimet profetike.

Disa prej këtyre pohimeve profetike gjenden në mësim dhe të tjera janë në pjesën “Komente dhe Informacion për Rrethanat”.

Lexoje dhe merre parasysh ta shenjosh thënien nga Jozef Smithi te paragrafi 6 i parathënies së Librit të Mormonit.

• Çfarë të bën më shumë përshtypje nga thënia e Jozef Smithit?

Guri kyç i besimit tonë

Ndihmojini nxënësit ta kuptojnë rolin e një guri kyç (guri në pjesën e sipërme qendrore të një harku). Një mënyrë është të paraqitni figurën e një guri kyç në një hark dhe t’i vini nxënësit të diskutojnë se cili është guri më i rëndësishëm në një hark.

Presidenti Ezra Taft Benson (1899–1994) dha mësim:

“Libri i Mormonit është gur[i kyç] në dëshminë që japim për Jezu Krishtin, i cili është Vetë gurthemeli i çdo gjëje që bëjmë. Ai dëshmon për realitetin e Tij me fuqi dhe qartësi. …

… Libri i Mormonit është gur[i kyç] i dëshmisë. Pikërisht ashtu si qemeri shembet nëse guri [kyç] hiqet, kështu ndodh me të gjithë Kishën, qëndron ose bie me vërtetësinë e Librit të Mormonit.” (Ezra Taft Benson, “Libri i Mormonit – Gur[i Kyç] i Besimit Tonë”, , tetor 1986, f. 5, 6)

Guri kyç i dëshmisë sonë për Jezu Krishtin

• Çfarë mendoni se do të thotë që Libri i Mormonit është guri kyç i dëshmisë sonë për Jezu Krishtin?

Shkruesit në Librin e Mormonit dëshmuan vazhdimisht për Jezu Krishtin. Për të parë se si individë të ndryshëm gjetën përmendje të Jezu Krishtit në faqet e librit, shihni materialin filmik “Book of Mormon Experiment Honolulu” [“Eksperimenti Honolulu me Librin e Mormonit”] (02:35). Ky material filmik mund të gjendet te ChurchofJesusChrist.org.

Ka shumë mënyra se si nxënësit mund të marrin pjesë në ushtrimin vijues. Jini krijues dhe kërkoni mënyra për ta përfshirë çdo nxënës. Një ide është t’i jepni çdo nxënësi një faqe të kopjuar nga Libri i Mormonit dhe t’u kërkoni atyre të shenjojnë çdo përmendje të Shpëtimtarit në faqen e tyre. Faqet më pas mund të paraqiten në mënyrë të tillë që t’i shohin nxënësit e tjerë.

Përzgjidh çfarëdo faqe nga Libri i Mormonit dhe kërko çdo përmendje të Shpëtimtarit në atë faqe.

• Çfarë gjete rreth Shpëtimtarit?

• Çfarë të ndihmojnë fragmentet që gjete që të kuptosh ose të ndiesh rreth Shpëtimtarit?

Mendo se si do të bekoheshe duke pasur një dëshmi më të fortë për Jezu Krishtin. Teksa e studion Librin e Mormonit, kërko përmendje të Jezu Krishtit dhe se çfarë mëson rreth Tij. Ndërsa e bën këtë, njohuria dhe dëshmia jote për Shpëtimtarin do të rriten.

Guri kyç i dëshmisë sonë

Ftojini nxënësit të reflektojnë individualisht rreth deklaratave vijuese.

• Cila nga deklaratat vijuese i përshkruan më mirë ndjenjat e tua rreth Librit të Mormonit?

  • U mirëbesoj të tjerëve që kanë marrë dëshminë e tyre vetjake dhe më kanë siguruar se Libri i Mormonit është i vërtetë.

  • Nuk jam i sigurt nëse e di që Libri i Mormonit është i vërtetë.

  • Unë kam marrë një dëshmi nga Fryma e Shenjtë se Libri i Mormonit është i vërtetë.

• Pse mendon se Ati Qiellor mund të dojë që ta dish se Libri i Mormonit është i vërtetë?

Lexo paragrafin e parafundit te parathënia, si dhe vargjet te Moroni 10:3–5, duke kërkuar se çfarë mund të bësh për të ditur a është i vërtetë Libri i Mormonit.

• Sipas asaj që lexove, çfarë nevojitet të bëjë dikush në mënyrë që ta dijë se Libri i Mormonit është i vërtetë?

Ndihmojini nxënësit të përcaktojnë një parim të ngjashëm me sa vijon: Nëse e lexoj Librin e Mormonit, e përsiat mesazhin e tij dhe e pyes Perëndinë a është i vërtetë, atëherë mund të marr një dëshmi nga Fryma e Shenjtë.

Plaku Ulises Soares, i Kuorumit Të Dymbëdhjetë Apostujve, tregoi se si dëshmia e tij për Librin e Mormonit u rrit teksa merrte pjesë në seminar. Nëse dëshiron, mund të shohësh materialin filmik “Dalja në Dritë e Librit të Mormonit”, në dispozicion te ChurchofJesusChrist.org, nga kodi kohor 12:03 deri në 14:12.

Lexo paragrafin e fundit te parathënia e Librit të Mormonit, duke kërkuar se çfarë njohurie tjetër vjen me një dëshmi për Librin e Mormonit.

• Si mundet të ndikojë në jetën tënde pasja e një dëshmie për Librin e Mormonit?

Merreni parasysh të jepni dëshminë tuaj për Librin e Mormonit dhe t’i ftoni nxënësit e gatshëm që të japin dëshmi gjithashtu.

Studioje Librin e Mormonit çdo ditë

Presidenti Rasëll M. Nelson na bëri premtime të gjithëve ne nëse e studiojmë Librin e Mormonit çdo ditë. Lexo thënien e mëposhtme ose shih materialin filmik “Libri i Mormonit: Si do të Ishte Jeta Juaj pa Të?” te ChurchofJesusChrist.org nga kodi kohor 11:52 deri në 13:05.

“Unë ju premtoj se, kur e studioni me lutje Librin e Mormonit çdo ditë, ju do të merrni vendime më të mira – çdo ditë. Ju premtoj se, teksa e përsiatni atë që studioni, dritaret e qiellit do të hapen dhe ju do të merrni përgjigje për vetë pyetjet tuaja dhe drejtim për vetë jetën tuaj. Ju premtoj se, ndërsa e zhytni veten përditë në Librin e Mormonit, ju mund të fitoni imunitet kundër të ligave të ditës, përfshirë edhe murtajën dërrmuese të pornografisë dhe varësive të tjera që na mpijnë mendjen.

Sa herë që dëgjoj dikë, përfshirë dhe veten, të thotë: ‘E di se Libri i Mormonit është i vërtetë’, dua ta them me zë të lartë: ‘Gjë e mirë, por nuk mjafton!’ Neve na nevojitet të ndiejmë, në ‘pjes[ën] më [të] thellë’ të zemrës sonë [Alma 13:27], se Libri i Mormonit është pa dyshim fjala e Perëndisë. Ne duhet ta ndiejmë atë kaq thellësisht sa kurrë nuk do të duam të jetojmë qoftë edhe një ditë pa të.” (Rasëll M. Nelson, “Libri i Mormonit: Si do të Ishte Jeta Juaj pa Të?”,  Liahona, nëntor 2017, f. 62–63)

• Çfarë të bën përshtypje nga kjo thënie?

• Si ndihesh rreth ftesës për ta lexuar Librin e Mormonit çdo ditë?

Diskutoni rreth pengesave për studimin e përditshëm të shkrimeve të shenjta dhe mënyrave se si t’i kapërcejmë ato.

Nëse nxënësit nuk kanë vendosur ende një synim vetjak për studimin e shkrimeve të shenjta, për sa u përket krediteve për diplomimin në seminar, kjo mund të jetë një mundësi që ata ta bëjnë këtë. Nëse nxënësit dëshirojnë, ata mund t’ia tregojnë synimin një pjesëtari të familjes, udhëheqësi të Kishës apo mësuesit/es të/së seminarit. Merreni parasysh të tregoni për bekimet vetjake nga leximi i Librit të Mormonit dhe t’i ftoni nxënësit e gatshëm të bëjnë të njëjtën gjë.

Komente dhe Informacion për Rrethanat

Çfarë është një gur kyç?

Për të mësuar më shumë rreth funksionit të një guri kyç, shih materialin filmik “Shihni te Libri, Shihni te Zoti” nga kodi kohor 05:16 deri në 06:41.

Sa shpesh e përmend Libri i Mormonit Jezu Krishtin?

Plaku Geri E. Stivenson, i Kuorumit të Dymbëdhjetë Apostujve, dha mësim:

“Ju do të thelloheni nëpër pjesët e këtij libri të çmuar dhe do të ballafaqoheni me Shpëtimtarin tuaj të dashur, Zotin Jezu Krisht, thuajse në çdo faqe. Është përllogaritur se ndonjëra nga format e emrit të Tij është përdorur mesatarisht një herë në çdo 1,7 vargje.” (Geri E. Stivenson, “Shihni te Libri, Shihni te Zoti”, Liahona, nëntor 2016, f. 47)

Si mund të bekohem duke e studiuar Librin e Mormonit?

Presidenti Ezra Taft Benson (1899–1994) dëshmoi:

“Nuk është thjesht se Libri i Mormonit na mëson neve të vërtetën, edhe pse ai vërtet e bën këtë. Nuk është vetëm se Libri i Mormonit dëshmon për Krishtin, edhe pse vërtet e bën atë, gjithashtu. Por atje ka diçka më shumë. Ka një fuqi te libri që do të fillojë të vërshojë në jetën tuaj në çastin që filloni një studim serioz të tij. Ju do të gjeni një forcë më të madhe për t’i rezistuar tundimit. Ju do të gjeni forcë të shmangni mashtrimin. Ju do të gjeni forcën të qëndroni në shtegun e ngushtë dhe të ngushtuar. Shkrimet e shenjta quhen ‘fjalët e jetës’ [Doktrina e Besëlidhje 84:85] dhe askund nuk është ajo më e vërtetë sesa te Libri i Mormonit. Kur filloni të keni uri dhe etje për ato fjalë, ju do ta gjeni jetën në begati gjithnjë e më të madhe.” (Ezra Taft Benson, “Libri i Mormonit – Gur[i Kyç] i Besimit Tonë”, , tetor 2011, f. 56–57)

Presidenti Tomas S. Monson (1927–2018) dëshmoi:

“I përgjërohem secilit prej nesh që me lutje ta studiojë dhe ta përsiatë Librin e Mormonit çdo ditë. Teksa e bëjmë këtë, ne do të jemi në gjendje ta dëgjojmë zërin e Shpirtit, t’i bëjmë ballë tundimit, [t’i] mposhtim dyshimin e frikën dhe të marrim ndihmën e qiellit në jetën tonë. Kështu unë dëshmoj me gjithë zemrën time.” (Tomas S. Monson, “Fuqia e Librit të Mormonit”, Liahona, maj 2017, f. 87)

Si mund të gjej kohë për ta studiuar Librin e Mormonit?

Plaku Geri E. Stivenson, i Kuorumit të Dymbëdhjetë Apostujve, dha mësim:

“Me qëllim që të ndihmoj që Libri i Mormonit të bëhet gur[i kyç] i dëshmisë suaj, unë po ju bëj një ftesë. Së fundi mësova se shumë të rinj kalojnë një mesatare prej shtatë orësh në ditë duke parë në ekrane televizori, kompjuteri dhe celularë inteligjentë. Duke pasur parasysh këtë, a do të bënit një ndryshim të vogël? A do ta zëvendësoni një pjesë të asaj kohe të përditshme ekrani – veçanërisht kohën kushtuar mediave shoqërore, internetit, lojërave, apo televizionit – me leximin e Librit të Mormonit? Nëse studimet, të cilave iu referova, janë të sakta, ju mund të gjeni lehtësisht kohë për studimin e përditshëm të Librit të Mormonit qoftë edhe për vetëm 10 minuta në ditë. Dhe mund të studioni në një mënyrë që ju lejon ta shijoni dhe ta kuptoni – qoftë në pajisjen tuaj apo në trajtë libri.” (Geri E. Stivenson, “Shihni te Libri, Shihni te Zoti”, Liahona, nëntor 2016, f. 46–47)

Veprimtari Plotësuese të të Mësuarit

Vizatoni figurën e një harku me një gur kyç. Emërtojeni gurin kyç “Libri i Mormonit”. Ftojini nxënësit t’i emërtojnë gurët e tjerë të harkut me elemente të ungjillit të Shpëtimtarit. Më pas diskutoni se si një dëshmi për Librin e Mormonit mund të na ndihmojë të kemi gjithashtu dëshmi për elementet e tjerë të ungjillit të Shpëtimtarit. Sipas nevojës, referojuni paragrafit të fundit te parathënia e Librit të Mormonit.

Nxënësit mund të krijojnë një hark të ngjashëm me këtë: