Faqet e Parathënies së Librit të Mormonit

Dëshmitë e Tre Dëshmitarëve dhe të Tetë Dëshmitarëve

“Ne … Kemi Parë Fletët”

Për ca kohë, Jozef Smithit nuk iu lejua t’ia tregonte fletët e arta askujt. Në përmbushje të profecisë, Zoti përfundimisht i zbuloi Jozefit se dëshmitarëve të tjerë do t’u lejohej t’i shihnin fletët dhe të dëshmonin për faktin që ato ishin reale (shih te 2 Nefi 27:12–14). Ky mësim mund të të ndihmojë ta kuptosh rëndësinë e dëshmitarëve të shumtë të Librit të Mormonit dhe të reflektosh për vetë dëshminë tënde.

Ndihma ndaj nxënësve që të mësojnë me anë të Shpirtit. Një mënyrë është t’i nxitni ata të reflektojnë për përvojat e tyre vetjake në lidhje me këtë mësim. Jepuni kohë që të përsiatin për bekimet që kanë marrë duke e jetuar ungjillin e Jezu Krishtit dhe për mënyrën se si ata po bëhen më të ngjashëm me Të.

Përgatitja e nxënësve: Ftojini nxënësit të vijnë të përgatitur që të tregojnë përvoja që i kanë ndihmuar ata ose të tjerët të dinë se Libri i Mormonit është nga Perëndia.

Veprimtari të Mundshme të të Mësuarit

Dëshmitarët e fletëve

Merrni parasysh të përdorni paragrafin në vijim për t’i ndihmuar nxënësit të kuptojnë se sa e vështirë duhet të ketë qenë për Jozef Smithin të ishte i vetmi dëshmitar okular i fletëve të arta për ca kohë.

Imagjino se si do të kishte qenë për Jozef Smithin që të ishte i vetmi që mund t’i shihte fletët arta. Mendo rreth asaj se sa e vështirë do të ishte për ty të mos të të besonin, të të përqeshnin dhe të quanin mashtrues për shkak se nuk ua tregon njerëzve fletët. Imagjino sikur të të duhej t’u thoje atyre që të përkrahën që nuk mund t’i shohin fletët.

Ndërkohë që përkthente Librin e Mormonit, Jozefi diktoi fjalët e premtimit që bëri Zoti në lidhje me fletët. Lexo te 2 Nefi 27:12–14 për të parë premtimet që bëri Zoti rreth fletëve (shih edhe Ethëri 5:2–4).

• Çfarë të bëri përshtypje rreth kësaj profecie? Përse?

• Si mund të jetë ndier Jozefi kur e lexoi këtë profeci? Përse?

• Çfarë mësove nga ky fragment rreth Zotit dhe Librit të Mormonit?

Një e vërtetë që mund të mësojmë nga këto profeci është se Zoti ua dha dëshmitarëve të shumtë fletët e Librit të Mormonit.

• Pse është më e lehtë të besosh që diçka është e vërtetë kur ka më shumë se një dëshmitar për të?

Ndërsa vazhdon të studiosh, kërko ndihmën e Atit Qiellor nëpërmjet Frymës së Shenjtë që të kuptosh rëndësinë e dëshmitarëve të fletëve të arta dhe merr parasysh se si mund të të ndihmojnë dëshmitë e tyre që të fitosh një dëshmi tënde ose ta forcosh dëshminë atë.

Paraqiteni paragrafin vijues ose ftoni një nxënës ta lexojë atë.

Zoti ia dha t’i shihnin fletët një grupi prej tre dhe më pas tetë burrash. Shumë prej këtyre dëshmitarëve ndihmuan në njëfarë mënyre me daljen në dritë të Librit të Mormonit. Për shembull, Dejvid Uitmeri e ftoi Jozefin dhe Emën të jetonin me ta ndërkohë që Jozefi përkthente, Martin Harrisi hipotekoi fermën e tij për të paguar kostot e shtypjes së Librit të Mormonit dhe Oliver Kaudëri shërbeu si shkrues për një pjesë të madhe të përkthimit. Babai i Jozefit dhe vëllezërit e tij, Hajrëmi dhe Samueli, qenë gjithashtu dëshmitarë të fletëve dhe e ndihmuan Jozefin në mënyra të rëndësishme. Ndonëse disa prej këtyre burrave më vonë u larguan nga Kisha, asnjëri prej tyre nuk e mohoi kurrë dëshminë e vet për Librin e Mormonit.

Lexo te “Dëshmia e Tre Dëshmitarëve” dhe “Dëshmia e Tetë Dëshmitarëve”, duke kërkuar atë që panë, ndien dhe arritën të merrnin vesh ata.

Merrni parasysh t’u jepni nxënësve fletushkën në vijim dhe t’i ftoni ata ta plotësojnë tabelën individualisht, si klasë ose në grupe të vogla.

Dëshmitë e Tre Dëshmitarëve dhe të Tetë Dëshmitarëve

	Tre Dëshmitarët:	Tetë Dëshmitarët:
Çfarë panë dhe ndien dëshmitarët.
Çfarë arritën të merrnin vesh dëshmitarët.
Çfarë bënë dëshmitarët.

• Çfarë ngjashmërish dhe diferencash pe te përvojat e dy grupeve?

• Pse mund të jenë domethënëse diferencat?

Ndërkohë që ne ndonjëherë dëshirojmë të kemi përvoja si këta dëshmitarë, Zoti dëshmoi se as të parit e këtyre gjërave nuk do t’i bindnin njerëzit për të vërtetën (shih Doktrina e Besëlidhje 5:7). Presidenti Xhejms E. Faust (1920–2007), i Presidencës së Parë, shpjegoi:

“Në ditën dhe kohën tonë ne duhet të arrijmë ta marrim vesh vërtetësinë e asaj që ishte te fletët e arta pa i parë ato. Ato nuk janë në dispozicionin tonë për t’i parë dhe marrë në duar siç ishin për Tre Dëshmitarët dhe për Tetë Dëshmitarët. Disa prej tyre që faktikisht i panë dhe i morën në duar fletët e arta nuk i qëndruan besnikë Kishës. Të shihnim një engjëll do të ishte një përvojë e shkëlqyer, por është shumë më e shkëlqyer të arrijmë në një njohuri për hyjninë e Shpëtimtarit nëpërmjet besimit dhe dëshmisë së Shpirtit [shih te Gjoni 20:29].” (James E. Faust, “It Can’t Happen to Me”, Ensign, maj 2002, f. 48)

• Pse është e rëndësishme për ty ajo që na mësohet në këtë thënie?

Dëshmia jote për Jezu Krishtin dhe Librin e Mormonit

Një nga qëllimet kryesore të Librit të Mormonit është t’i bindë njerëzit se Jezusi është Krishti (shih te faqja e titullit të Librit të Mormonit). Mendo a është aq e fortë sa dëshiron ti që të jetë dëshmia jote vetjake për Jezu Krishtin dhe Librin e Mormonit. Përsiat për atë se si fitimi ose forcimi i asaj dëshmie mund të jetë një bekim për ty dhe të tjerët.

Merrni parasysh t’u jepni nxënësve kohë për të reflektuar mbi përgatitjen e tyre për orën mësimore. Pastaj paraqiteni paragrafin vijues dhe nxitini ata të përsiatin dhe të shkruajnë ndjenjat e tyre.

Shkruaj dëshminë tënde për Jezu Krishtin dhe Librin e Mormonit. Nëse nuk ndien se ke ende një dëshmi, shkruaj atë që mund të bësh për ta marrë një të tillë. Përfshi mënyrën se si mund të ndikojnë dëshmitë e të tjerëve te dëshmia jote. Merr parasysh të shtosh mendime te kjo ndërsa vazhdon ta studiosh Librin e Mormonit.

Pasi nxënësit të kenë kohë të mjaftueshme për të shkruar, ftojini disa të japin dëshmitë e tyre për Jezu Krishtin dhe Librin e Mormonit.

Komente dhe Informacion për Rrethanat

Pse janë dëshmitë e Tre Dëshmitarëve dhe të Tetë Dëshmitarëve kaq domethënëse?

Presidenti Henri B. Ajring, i Presidencës së Parë, dëshmoi:

“Tre Dëshmitarët kurrë nuk e mohuan dëshminë e tyre për Librin e Mormonit. Ata nuk mundeshin sepse ata e dinin se ishte e vërtetë. Ata bënë sakrifica dhe u përballën me vështirësi përtej asaj që kanë njohur ndonjëherë shumica e njerëzve. Oliver Kaudëri dha të njëjtën dëshmi rreth origjinës hyjnore të Librit të Mormonit ndërsa ishte duke vdekur. Por në kohë sprove, ata u lëkundën në besimin e tyre që Jozefi ishte ende profeti i Perëndisë dhe që e vetmja mënyrë për të ardhur te Shpëtimtari qe nëpërmjet Kishës së Tij të rivendosur. Ajo që ata vazhduan të pohojnë mbi atë që panë dhe dëgjuan në atë përvojë të mrekullueshme, gjatë periudhave të gjata të largimit nga Kisha dhe nga Jozefi, e bën dëshminë e tyre më të fuqishme.” (Henry B. Eyring, “An Enduring Testimony of the Mission of the Prophet Joseph”, Liahona, nëntor 2003, f. 90)

Pse mund t’i ketë dhënë Zoti këto dy lloje të ndryshme përvojash për dëshmitarët e Librit të Mormonit?

Nëse kritikët e Kishës do t’i akuzonin Tre Dëshmitarët se e kishin imagjinuar vegimin e tyre, kjo nuk do ta shpjegonte përvojën që patën Tetë Dëshmitarët me fletët. Nga ana tjetër, nëse kritikët do ta akuzonin Jozef Smithin që thjesht i kishte falsifikuar fletët e arta për t’i mashtruar Tetë Dëshmitarët, kjo nuk do t’i shpjegonte manifestimet hyjnore, përfshirë shfaqjen e një engjëlli, që përjetuan Tre Dëshmitarët.

Si u ndje Jozefi pasi të tjerët i kishin parë fletët?

Nëna e tij, Lusi Mek Smithi, mbajti shënim se pas kësaj dëshmie hyjnore, Jozefi i tha:

“Ti nuk e di sa i lumtur jam. Zoti ka bërë që fletët t’u tregohen edhe tre të tjerëve përveç meje, që gjithashtu kanë parë një engjëll dhe do të dëshmojnë për të vërtetën e asaj që kam thënë, sepse ata e dinë vetë se unë nuk endem përreth për të mashtruar njerëzit dhe vërtet e ndiej sikur u çlirova nga një barrë e tmerrshme, e cila ishte thuajse shumë e rëndë për mua për t’u mbajtur por tani ata do të mbajnë një pjesë të saj dhe kjo vërtet e gëzon shpirtin tim, që nuk jam më tërësisht i vetëm në botë.” (Lucy Mack Smith, History, 1844–1845, libri 8, faqja 11, josephsmithpapers.org; germëzimi dhe shenjat e pikësimit të modernizuara)

Çfarë rrëfimesh të tjera mund të më ndihmojnë t’i kuptoj më mirë përvojat e dëshmitarëve të fletëve të arta?

Plaku Ulises Soares, i Kuorumit të Dymbëdhjetë Apostujve, tregoi rrëfimin e dëshmitarëve. Shiko materialin filmik “Dalja në Dritë e Librit të Mormonit” nga kodi kohor 07:58 deri në 10:30 për të parë ritregimin e tij.

Përvojat e Tre Dëshmitarëve dhe të Tetë Dëshmitarëve jepen me hollësi te Shenjtorët: Historia e Kishës së Jezu Krishtit në Ditët e Mëvonshme, vëll. 1, Standardi i së Vërtetës, 1815–1846 [2018], f. 73–75.

Meri Uitmerit iu treguan gjithashtu fletët. Historia e përvojës së saj gjendet në faqet 70–71 të librit Shenjtorët, vëll. 1.

Veprimtari Plotësuese të të Mësuarit

Dëshmitarë të tjerë

Nxënësit mund të përfitojnë nga marrja parasysh e faktit se si mund të ndikojnë dëshmitë e të tjerëve për Librin e Mormonit te dëshmia e tyre. Ftojini ata të bëjnë një listë me njerëzit që kanë dëgjuar të dëshmojnë ose japin dëshmi për vërtetësinë e Librit të Mormonit. Kërkojuni atyre të tregojnë se si kanë ndikuar ato dëshmi tek ata. Më pas vërini të shkruajnë dëshminë e tyre ose të shpjegojnë shkurtimisht se si marrja e dëshmisë së vet mund të ndikojë në jetën dhe në marrëdhënien e tyre me Jezu Krishtin.