2 Nephi 21–24

Ang Milenyo

isang leon at isang tupa

Isipin kung ano kaya ang magiging buhay kung walang kasamaan sa mundo. Balang-araw ang mundo ay magiging ganito. Mangyayari ito sa panahon ng paghahari ni Jesucristo sa milenyo. Maraming propeta, kabilang sina Nephi at Isaias, ang nagpropesiya tungkol sa 1,000 taon ng kapayapaan na tinatawag na Milenyo. Ang lesson na ito ay makatutulong sa iyo na maunawaan at mapaghandaan ang paghahari ng Tagapagligtas sa milenyo.

Pagtuon sa Ama sa Langit at kay Jesucristo. Kapag nagpapasiya kung anong mga katotohanan o alituntunin ang makatutulong sa mga estudyante sa pagtuklas, alamin kung ano ang makatutulong sa kanila na lumapit kay Jesucristo. Matutulungan ka ng Espiritu Santo na malaman ang mga katotohanan tungkol sa Tagapagligtas at sa Kanyang nakatutubos na kapangyarihan sa bawat alituntunin, kautusan, at turo ng propeta.

Paghahanda ng estudyante: Sabihin sa mga estudyante na pagnilayan ang nalalaman nila tungkol sa Milenyo at dumating sa klase na handang magtanong tungkol dito.

Mga Posibleng Aktibidad sa Pag-aaral

Ang hinaharap

Maaaring isulat ng mga estudyante sa pisara ang kanilang mga sagot sa mga sumusunod na tanong o maaari nilang talakayin ang mga ito sa maliliit na grupo.

• Ano ang ilang mahahalagang pangyayari sa hinaharap na inaasahan mo? Bakit?

• Ano ang nadarama mo habang pinag-iisipan mo ang mga pangyayaring ito?

• Ano ang ginagawa mo para maghanda?

Ang Milenyo

Ang isang mahalagang pangyayari sa hinaharap ay ang Milenyo.

Pakinggang mabuti kung paano sumagot ang mga estudyante sa mga sumusunod na tanong. Maaari mong ilista sa pisara ang mga tanong ng mga estudyante. Sa halip na direktang sagutin ang mga ito, hikayatin ang mga estudyante na maghanap ng mga sagot habang nag-aaral sila.

Iangkop ang lesson ayon sa mga sagot na ibibigay nila. Halimbawa, kung maraming estudyante ang may parehong tanong, maaari ninyong hanapin ang sagot bilang klase. Ang mga estudyanteng may mga magkakatulad na tanong ay maaaring igrupu-grupo upang sama-samang maghanap ng mga sagot.

• Ano ang nalalaman mo tungkol sa Milenyo? Ano ang mga tanong mo tungkol dito?

Sumulat ang propetang si Nephi tungkol sa mga huling araw at isinama niya ang marami sa mga propesiya ni Isaias tungkol sa mga huling araw. Ipinropesiya ni Isaias ang pagkawasak ng Asiria at Babilonia bilang halimbawa ng pagkawasak sa Ikalawang Pagparito (tingnan sa 2 Nephi 20; 23). Ipinropesiya rin niya ang Pagpapanumbalik ng ebanghelyo bago ang paghahari ni Jesucristo sa milenyo. Ang kanyang mga propesiya ay maraming simbolismo at paglalarawan na nagpapalalim sa ating pag-unawa tungkol sa Milenyo.

Basahin ang mga sumusunod na propesiya mula kina Nephi at Isaias at maghanap ng mga paglalarawan sa Milenyo.

Maaari kang maglagay ng mga papel na may mga sumusunod na scripture reference sa buong silid at anyayahan ang mga estudyante na maglakad-lakad at basahin ang iba’t ibang scripture passage. Ang isa pang opsiyon ay anyayahan ang mga estudyante na magdrowing sa study journal o sa pisara ng ilan sa mga paglalarawan sa mga talatang ito.

Kung kailangan, tulungan ang mga estudyante na maunawaan ang mga banal na kasulatan. Halimbawa, maaari mong ipaliwanag na ang mga hayop na magkakasamang naninirahan nang hindi naglalabanan ay kumakatawan sa mga kundisyon ng kapayapaan (tingnan sa 2 Nephi 21:6–7) o na ang mga tubig na pumupuno sa karagatan ay kumakatawan sa kaalaman sa Panginoon na pumupuno sa mundo (tingnan sa 2 Nephi 21:9).

• 1 Nephi 22:24–26

• 2 Nephi 21:6–9

• 2 Nephi 22:1–6

• 2 Nephi 24:3, 7

• Mula sa mga paglalarawang ito, sa iyong palagay, paano maiiba ang iyong buhay sa Milenyo?

• Anong mga paglalarawan tungkol sa Tagapagligtas ang nahanap mo? Ano ang itinuturo sa iyo ng mga ito tungkol sa Kanya?

Isa sa mga katotohanang natutuhan natin mula sa mga banal na kasulatang ito ay si Jesucristo ay maghahari sa mundo sa kabutihan at kapayapaan sa panahon ng Milenyo.

Ilarawan sa iyong isipan kung ano ang maaaring maging pakiramdam ng mabuhay sa panahon ng Milenyo—kapag naghahari ang Tagapagligtas sa kabutihan at kapayapaan. Pag-isipan kung paano mababasbasan ng kapayapaan ng Tagapagligtas ang iyong buhay.

Inilarawan ni Pangulong Dallin H. Oaks ng Unang Panguluhan ang isa pang pagpapala ng Milenyo:

Pangulong Dallin H. Oaks

Ang hindi pagkakaroon ng asawa, hindi pagkakaroon ng mga anak, kamatayan, at diborsyo ay humahadlang sa mga pamantayan at nag-aantala sa katuparan ng mga pagpapalang ipinangako. … Nangako ang Panginoon na sa mga kawalang-hanggan walang pagpapalang ipagkakait sa kanyang mga anak na sumusunod sa mga kautusan, na tapat sa kanilang mga tipan, at hinahangad yaong matwid.

Marami sa pinakamahahalagang bagay na ipinagkait sa mortalidad ay itatama sa Milenyo, na panahon upang isakatuparan ang lahat ng hindi kumpleto sa dakilang plano ng kaligayahan para sa lahat ng karapat-dapat na anak ng ating Ama. Alam natin na totoo iyan sa mga ordenansa sa templo. Naniniwala ako na totoo rin ito sa mga ugnayan at karanasan ng pamilya. (Pangulong Dallin H. Oaks, “The Great Plan of Happiness,” Ensign, Nob. 1993, 75)

• Ano ang itinuturo sa iyo ng pahayag na ito tungkol sa Ama sa Langit at kay Jesucristo?

• Alin sa mga pagpapala ng Milenyo ang pinakahinahangad mo? Bakit?

• Sa lesson, anong mga sagot ang nahanap mo sa iyong mga tanong tungkol sa Milenyo?

Kung naghahanap pa rin ang mga estudyante ng mga sagot sa kanilang mga tanong, ituro sila sa kung saan sila makahahanap ng sagot. Maaaring makatulong ang ilan sa mga sumusunod na scripture passage: Doktrina at mga Tipan 29:11; 88:110; 101:26–34; Mga Saligan ng Pananampalataya 1:10. Tingnan din sa “Milenyo” sa Gabay sa mga Banal na Kasulatan o sa Mga Paksa ng Ebanghelyo.

Paghahanda para sa Milenyo

Ang Salt Lake Temple habang ginagawa ang renobasyon

Noong 2020, nagsimula ang mga renobasyon sa Salt Lake Temple. Nagsalita si Elder Gary E. Stevenson ng Korum ng Labindalawang Apostol tungkol sa mga renobasyong ito. Alamin kung paano niya inihambing ang mga ito sa sarili nating buhay. Panoorin ang video na “Isang Matibay na Pundasyon Laban sa Panahong Darating,” na matatagpuan sa ChurchofJesusChrist.org, mula sa time code na 14:51 hanggang 15:26, o basahin ang pahayag sa ibaba.

Elder Gary E. Stevenson

Taimitim na inaaasam ng mga pinuno ng Simbahan na malaki ang maitulong ng malawakang renobasyon ng Salt lake Temple sa katuparan ng hangarin ni Brigham Young na “maitayo ang templo sa isang paraan na magtatagal hanggang sa milenyo.” Sa darating na mga taon, nawa’y tulutan natin ang mga pagbabagong gagawin sa Salt lake Temple na antigin at hikayatin tayo, bilang mga indibiduwal at pamilya, upang tayo man—kahalintulad nito—ay “maitayo sa isang paraan na magtatagal hanggang sa milenyo.” (Gary E. Stevenson, “Isang Matibay na Pundasyon Laban sa Panahong Darating,” Liahona, Mayo 2020, 51–52)

• Ano sa palagay mo ang ibig sabihin ng “maitayo sa isang paraan na magtatagal hanggang sa milenyo”?

Maaari mong tukuying muli ang mga pangyayari sa hinaharap na inaasam ng mga estudyante at talakayin kung ano ang ginagawa nila para mapaghandaan ang mga ito. Pagkatapos ay talakayin ang mga paraan para mapaghandaan ang Milenyo.

Maaaring makinabang ang mga estudyante sa pagsagot sa mga sumusunod na tanong sa kanilang study journal.

• Kapag iniisip mo ang paghahari ng Tagapagligtas sa milenyo, ano ang nadarama mo?

• Ano ang magagawa mo ngayon para mapaghandaan ang Milenyo?

• Anong mga hamon ang maaari mong harapin habang ginagawa mo ang mga paghahandang ito?

Komentaryo at Pinagmulang Impormasyon

Ang mga miyembro lang ba ng Ang Simbahan ni Jesucristo ng mga Banal sa mga Huling Araw ang nasa mundo sa panahon ng Milenyo?

Itinuro ni Pangulong Joseph Fielding Smith (1878–1972):

Pangulong Joseph Fielding Smith

May maling ideya ang ilang miyembro ng Simbahan na kapag dumating ang milenyo, lahat ng tao ay lilipulin sa mundo maliban sa mga matwid na miyembro ng Simbahan. Hindi iyon ganoon. Magkakaroon ng milyun-milyong tao … sa lahat ng antas, at sa lahat ng paniniwala, na pahihintulutan pa ring manatili sa balat ng lupa, ngunit sila ang mga taong namuhay nang malinis, ang mga taong malaya sa kasamaan at kabulukan. …

Gayunman, sa huli, mapupuno ng kaalaman sa Panginoon ang mundo tulad ng tubig na pumupuno sa karagatan. Subalit kakailanganin ang pangangaral ng ebanghelyo, kapag nagsimula ang milenyo, hanggang sa ang lahat ng tao ay magbalik-loob o pumanaw. (Joseph Fielding Smith, Doctrines of Salvation, 1:86–87)

Ano ang magiging buhay sa Milenyo?

Itinuro ni Pangulong Brigham Young (1801–1877):

Pangulong Brigham Young

Ang Milenyo ay binubuo nito—bawat puso sa Simbahan at Kaharian ng Diyos ay nagkakaisa; ang Kaharian ay lumalago tungo sa pagtatagumpay laban sa lahat ng tumututol sa ekonomiya ng langit, at si Satanas na nakagapos at may palatandaan sa kanya. Ang lahat ng bagay ay magiging katulad ng sa ngayon, tayo ay kakain, iinom, at magsusuot ng damit. …

Sa Milenyo, kapag ang Kaharian ng Diyos ay naitatag na sa mundo na may kapangyarihan, kaluwalhatian at kaganapan, at nagapi ang matagal nang paghahari ng kasamaan, ang mga Banal sa mga Huling Araw ng Diyos ay magkakaroon ng pribilehiyong magtayo ng kanilang mga templo at makapasok sa mga ito, na nagiging tulad ng mga haligi sa mga templo ng Diyos [tingnan sa Apocalipsis 3:12], at sila ay mangangasiwa para sa kanilang yumao. At makikita natin ang ating mga kaibigan na umaakyat, at marahil ang iba ring nakasalamuha na natin dito. … At magkakaroon tayo ng paghahayag upang makilala natin ang ating mga ninuno magmula sa Amang Adan at Inang Eva, at papasok tayo sa mga templo ng Diyos at mangangasiwa para sa kanila. Pagkatapos ay maibubuklod ang [mga anak] sa [mga magulang] hanggang sa ganap na mabuo ang tanikala mula kay Adan, para magkaroon ng ganap na pagkabuo ang tanikala ng Pagkasaserdote mula kay Adan hanggang sa pagtatapos [ng mundong ito].

Ito ang magiging gawain ng mga Banal sa mga Huling Araw sa panahon ng Milenyo. (Mga Turo ng mga Pangulo ng Simbahan: Brigham Young [2007], 371–72)

Magkakaroon ba ng Ang Simbahan ni Jesucristo ng mga Banal sa mga Huling Araw sa Milenyo?

Ipinahayag ni Pangulong Russell M. Nelson:

Pangulong Russell M. Nelson

Ang Simbahang ito ay hindi matitinag mula sa kinatatayuan nito, maging hanggang sa Milenyo. (Russell M. Nelson, “How Firm Our Foundation,” Liahona, Mayo 2002, 76)

1 Nephi 22:26. Paano mawawalan ng kapangyarihan si Satanas?

Itinuro ni Pangulong Spencer W. Kimball (1895–1985):

Pangulong Spencer W. Kimball

Kapag iginapos si Satanas sa isang tahanan—kapag iginapos si Satanas sa buhay—nakapagsimula na ang Milenyo sa tahanang iyon, sa buhay na iyon. (Teachings of Spencer W. Kimball, ed. Edward L. Kimball [1982], 172)

Mga Karagdagang Aktibidad sa Pag-aaral

2 Nephi 21. Ang pagdalaw ni Moroni kay Joseph Smith

Magpakita ng larawan ng pagdalaw ni Moroni kay Joseph Smith. Ipaliwanag na noong nagpakita si Moroni kay Joseph Smith noong Setyembre 21, 1823, binanggit niya ang Isaias 11, na siya ring 2 Nephi 21 (tingnan sa Kasaysayan ni Joseph Smith 1:40). Sabihin sa mga estudyante na hanapin ang 2 Nephi 21 at maghanap ng mga propesiya na maaaring makabuluhan kay Joseph Smith at tumulong sa kanya na maghanda para sa kanyang misyon bilang propeta.

2 Nephi 21. Ang usbong, ang puno, at ang ugat

Ang aktibidad na ito ay makatutulong sa mga estudyante na matuklasan kung paano gamitin ang mga banal na kasulatan upang maunawaan ang mga banal na kasulatan. Sabihin sa mga estudyante na hanapin ang 2 Nephi 21:1–5, 10 at hanapin ang usbong, ang puno, at ang ugat. Pagkatapos ay sabihin sa mga estudyante na hanapin ang Doktrina at mga Tipan 113:1–6, at alamin ang interpretasyon ng mga simbolong ito.

2 Nephi 21:10–12. Isang sagisag sa mga bansa

Maaari kang magdala ng isang bandila sa klase at talakayin kung paano maaaring magbigay ng hudyat o senyas ang isang bandila kung saan magtitipon. Ipaliwanag na ang isang sagisag ay isang bandila.

Basahin ang 2 Nephi 21:10–12, at alamin kung ano ang gagawin ng Panginoon sa pamamagitan ni Joseph Smith at ng ipinanumbalik na ebanghelyo.

Talakayin kung paano natutulad ang ipinanumbalik na ebanghelyo sa isang sagisag. Mag-isip ng mga paraan na maaanyayahan natin ang mga tao na lumapit kay Cristo sa pamamagitan ng Kanyang ipinanumbalik na ebanghelyo.

2 Nephi 22:2. Pagtitiwala kay Jesucristo

Sabihin sa mga estudyante na ibahagi ang mga impresyon nila sa talatang ito. Magbigay ng iba’t ibang follow-up na tanong upang matulungan ang mga estudyante na maibahagi ang kanilang nadarama tungkol sa Tagapagligtas. Halimbawa: Paano pinagmumulan ng lakas si Jesucristo para sa isang tinedyer? Ano ang ilang paraan na maipapakita natin ang ating pagtitiwala kay Jesucristo? Paano makatutulong ang ating pagtitiwala kay Jesucristo upang madaig natin ang takot?