2 Nephi 26

Pagtingin, Pagmamahal, at Pakikitungo sa Kapwa tulad ng Ginagawa ng Diyos

Araw-araw ay nahaharap tayo sa mga mensahe at impormasyon na may layuning impluwensyahan ang ating damdamin at pananaw. Sa 2 Nephi 26, itinuro ni Nephi ang pananaw ng Diyos. Layunin ng lesson na ito na tulungan kang makita, mahalin, at pakitunguhan ang ating kapwa tulad ng ginagawa ng Diyos.

Pagtulong sa mga estudyante na madamang pinahahalagahan ang kanilang mga kontribusyon. Ipakita sa mga estudyante na pinahahalagahan mo ang kanilang mga tanong at komento sa pamamagitan ng pakikinig nang mabuti at tapat na pagsisikap na umunawa. Ipakita ang iyong interes sa pamamagitan ng pagtutuon ng pansin sa sinasabi ng mga estudyante at hindi sa susunod na sasabihin mo.

Paghahanda ng estudyante: Sabihin sa mga estudyante na itanong sa kanilang mga magulang o sa isang pinagkakatiwalaang kaibigan kung paano nila sinusubukang makita ang iba tulad ng ginagawa ng Tagapagligtas.

Mga Posibleng Aktibidad sa Pag-aaral

Ang ating pananaw

Sa halip na ipakita ang mga sumusunod na larawan, maaari kang magdala ng iba’t ibang uri ng salamin na maisusuot ng mga estudyante at pagkatapos ay talakayin kung paano binabago ng bawat salamin ang kanilang paningin at pananaw. Maaari mong anyayahan ang mga estudyante na ibahagi ang kanilang mga personal na karanasan sa pagsusuot ng iba’t ibang salamin o corrective lens at ang kaibhang nagagawa nito.

Suriin ang mga sumusunod na larawan at isipin kung paano nakakaapekto ang iba’t ibang salamin sa ating paningin.

• Paano maaaring makaapekto ang iba’t ibang salamin na ito sa pananaw ng isang tao?

• Ano ang ilang bagay na nakakaapekto sa pagtingin at pakikitungo natin sa ating kapwa?

Maglaan ng ilang sandali upang pagnilayan ang pananaw mo tungkol sa iba. Isipin kung ano ang maaaring humuhubog sa iyong pananaw at kung paano ito makaiimpluwensya sa nadarama at pakikitungo mo sa iba. Sa iyong pag-aaral, maghangad ng inspirasyon na malaman kung ano ang magagawa mo upang makita at pakitunguhan ang iyong kapwa tulad ng ginagawa ng Tagapagligtas.

Layunin ng lesson na ito na tulungan kang makita, mahalin, at pakitunguhan ang ating kapwa tulad ng ginagawa ng Diyos.

Ang katangian ng Diyos

Sa 2 Nephi 26, nakita ni Nephi ang ministeryo ng Tagapagligtas sa mga Nephita, gayundin ang kasamaan at lubusang pagkawasak ng kanyang mga tao. Nakita rin niya ang kasamaan ng mga Gentil sa mga huling araw. Kabaligtaran nito, binigyang-diin niya ang pagmamalasakit ng Diyos sa lahat ng Kanyang mga anak.

Isipin ang sumusunod na tatlong tanong habang binabasa mo ang 2 Nephi 26:12–13, 23–33:

Bigyan ang mga estudyante ng maraming oras upang pag-aralan ang 2 Nephi 26:12–13, 23–33, at maaari mong sabihin sa kanila na markahan ang mga salita at pariralang sumasagot sa mga sumusunod na tanong. Magkaroon ng isang mapitagang kapaligiran kung saan makapagtuturo ang Espiritu. Maaari kang magpatugtog ng mahinang musika habang naglalakad ka sa buong silid, at tahimik na tinatanong sa mga estudyante kung ano ang natututuhan, nadarama, o minamarkahan nila habang nag-aaral sila.

Maaaring makatulong na ipakita ang mga tanong habang nagbabasa ang mga estudyante.

• Paano tinitingnan ng Diyos ang Kanyang mga anak at ano ang nadarama Niya para sa kanila?

• Paano Niya ito ipinapakita?

• Paano Niya ninanais na tingnan at pakitunguhan natin ang ating kapwa?

Matapos pag-aralan ng mga estudyante ang mga turo ni Nephi tungkol sa katangian ng Diyos, anyayahan silang ibahagi ang natutuhan nila. Ang mga sumusunod na tanong, pati na ang mga karagdagang follow-up na tanong, ay maaaring makatulong na makahikayat ng pagbabahagi. Bilang alternatibo, maaaring ilista ng mga estudyante sa pisara ang mga katotohanan tungkol sa Diyos na natutuhan nila at pagkatapos ay talakayin ang kahulugan at kahalagahan ng mga ito.

• Anong mga salita, parirala, o katotohanan ang minarkahan mo na maaaring makasagot sa mga tanong? Bakit?

• Ano ang natutuhan o nadama mo tungkol sa katangian ng Diyos?

• Paano makaiimpluwensya ang pag-alala sa mga katotohanang ito tungkol sa Diyos sa iyong ugnayan sa Kanya? Paano ito makaiimpluwensya sa pakikitungo mo sa iyong kapwa?

Maaaring napansin ng mga estudyante ang iba’t ibang katotohanan tungkol sa katangian ng Diyos. Maaari mong itanong sa mga estudyante kung bakit makabuluhan ang mga katotohanang nalaman nila at purihin sila para sa kanilang mga ideya. Ang susunod na bahagi ng lesson na ito ay magtutuon sa katotohanan sa talata 33 na “pantay-pantay ang lahat sa Diyos.” Makatutulong ito sa mga estudyante na maghandang gamitin ang scripture passage na ito sa pagsasanay ng pagsasabuhay ng doctrinal mastery sa sumusunod na lesson.

Pansinin na sa 2 Nephi 26:33, binigyang-diin ni Nephi ang maraming iba’t ibang uri ng mga indibiduwal sa pamamagitan ng pagpares sa kanila sa ibang grupo. Maaaring makatulong sa iyo ang mga sumusunod na kahulugan upang mas maunawaan ang mga ito. Maaari mong isulat ang mga kahulugang ito sa iyong banal na kasulatan sa tabi ng talatang ito.

• Alipin: Isang alila.

• Di binyagan: Isang taong hindi naniniwala sa Diyos.

• Judio at Gentil: Isang pariralang tumutukoy sa lahat ng nabibilang sa sambahayan ni Israel at sa mga taong hindi nabibilang.

Ang 2 Nephi 26:33 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito. Magkakaroon ka ng pagkakataon sa susunod na lesson na magsanay na gamitin ang doktrinang itinuro sa doctrinal mastery passage na ito sa isang tanong o sitwasyon.

• Ano ang maaaring maging kaibhan kung tatanggapin at ipamumuhay ng mundo ang mga turo sa talata 33?

Pagnilayan sandali ang iyong pananaw, pati na ang nadarama at pakikitungo mo sa iyong kapwa, kumpara sa pananaw ng Diyos at sa nadarama at pakikitungo Niya sa mga tao.

Ang isang paraan upang matulungan ang mga estudyante na ihambing kung paano nila pinakikitunguhan ang iba sa kung paano pinakikitunguhan ng Diyos ang mga tao, ay sabihin sa mga estudyante na i-rephrase ang mga tanong na ibinahagi ni Nephi sa 2 Nephi 26:25–28 para maiangkop sa kanilang sarili. Halimbawa, “Ipinadarama ko ba sa mga tao na gusto kong lumayo sila sa akin? o hindi sumamba kasama ko? O ipinapalagay ko ba na hindi sila dapat makibahagi sa kabutihan ni Jesucristo?”

ChurchofJesusChrist.org

Ang mga sumusunod na tanong at talata ay makatutulong sa mga estudyante na suriin ang kanilang damdamin at pakikitungo sa kanilang kapwa at pagkatapos ay ipamuhay ang natututuhan nila. Maaaring isulat ng mga estudyante sa kanilang journal ang mga sagot nila sa mga tanong o talakayin nila ang mga ito.

• Paano maaaring makaimpluwensya sa iyo ang pag-alala sa pananaw at nadarama ng Diyos sa lahat ng tao?

• Sa anong mga paraan mo nakikita at pinakikitunguhan nang mabuti ang iba tulad ng pakikitungo ng Ama sa Langit at ni Jesus sa kanila?

• Paano makatutulong sa iyo ang pag-alala sa mga turo tungkol sa Panginoon sa 2 Nephi 26:33 na makita, mahalin, at pakitunguhan ang iyong kapwa tulad ng ginagawa ng Diyos?

Sa susunod na ilang araw, subukang pansinin kung paano mo tinitingnan, pinakikitunguhan ang iyong kapwa, at ano ang nadarama mo sa kanila. Pakinggan ang mga pahiwatig mula sa Espiritu Santo at humingi ng tulong sa Panginoon na magawa ang anumang kinakailangang pagbabago upang mas mahalin at pakitunguhan ang ating kapwa tulad ng ginagawa ng Diyos.

Komentaryo at Pinagmulang Impormasyon

Paano ako magiging higit na katulad ng Diyos sa pagtingin at pagmamahal sa aking kapwa?

Itinuro ni Pangulong Russell M. Nelson kung paano tayo matutulungan ni Jesucristo sa ating mga pagsisikap na magpakabuti:

Hindi pa natin natatamo ang pagkakasundo at respeto sa isa’t isa na magtutulot sa bawat lalaki at babae at bawat batang lalaki at babae na maging pinakamagandang bersyon ng kanilang sarili.

Ang lunas sa ating sakit ay inireseta sa atin ng Dalubhasang Manggagamot, si Jesus ang Cristo. Nang hamunin Siya ng isang nanunuyang Fariseo na tukuyin ang pinakadakilang utos sa batas, ang tugon ng Tagapagligtas ay lubos na hindi malilimutan at maikli. Ito ay puno ng katotohanan na humahantong sa masayang buhay. Ang Kanyang tagubilin ay mahalin muna ang Diyos nang buong puso, at pagkatapos, ay mahalin ang ating kapwa gaya ng pagmamahal natin sa ating sarili (tingnan sa Mateo 22:35–39). …

Magkakaugnay tayong lahat, at binigyan tayo ng Diyos ng tungkulin na tumulong na mapabuti ang buhay ng mga nasa paligid natin. Hindi natin kailangang maging magkakatulad o magkakamukha upang magkaroon ng pagmamahal para sa bawat isa. Ni hindi natin kailangang sang-ayunan ang isa’t isa upang mahalin ang bawat isa. Kung umaasa tayo na makamit ang ating inaasam na pagkakaroon ng mabuting kalooban at pagiging makatao, dapat itong magsimula sa bawat isa sa atin, nang paisa-isa. (Russell M. Nelson, “NAACP Convention Remarks” [mensaheng ibinigay sa taunang convention ng National Association for the Advancement of Colored People sa Detroit, Michigan, Hulyo 21, 2019], newsroom.ChurchofJesusChrist.org)

Ibinahagi ni Elder Dale G. Renlund ng Korum ng Labindalawang Apostol ang sumusunod:

Ang pagkakaisa ay nangangailangan ng pagsisikap. Nabubuo ito kapag nagsisikap tayong magkaroon ng pag-ibig ng Diyos sa ating puso at nakatuon tayo sa ating walang hanggang tadhana. Pinagkakaisa tayo ng ating karaniwan, pangunahing pagkakakilanlan bilang mga anak ng Diyos at ng ating katapatan sa mga katotohanan ng ipinanumbalik na ebanghelyo. Bunga nito, ang ating pagmamahal sa Diyos at ang ating pagiging disipulo ni Jesucristo ay lumilikha ng tunay na malasakit sa iba. Pinahahalagahan natin ang maraming iba’t ibang katangian, pananaw, at talento ng ibang tao. Kung hindi natin kayang unahin ang ating pagiging disipulo kay Jesucristo kaysa sa ating mga personal na interes at pananaw, kailangan nating muling suriin ang ating mga priyoridad at magbago. (Dale G. Renlund, “Winawakasan ng Kapayapaan ni Cristo ang Pagkapoot,” Liahona, Nob. 2021, 84)

Paano makatutulong ang mga turo sa 2 Nephi 26:33 para lumapit ang mga tao sa Tagapagligtas?

Ang ibig bang sabihin ng pagkakaisa kay Cristo ay kailangang magkakatulad tayong lahat?

Itinuro nina Elder Quentin L. Cook at Jeffrey R. Holland ng Korum ng Labindalawang Apostol kung paano tinutulutan ng kultura ni Cristo ang mga pagkakaiba-iba ng mga indibiduwal:

Sa ating panahon, … para sa maraming tao, mas pinapahalagahan nila ang tribalismo, na kadalasang nakabatay sa katayuan, kasarian, lahi, at kayamanan. Sa maraming bansa, kundi man halos lahat, lubhang magkaiba ang pananaw ng mga tao sa uri ng pamumuhay. Sa Simbahan ng Panginoon, ang tanging kultura na sinusunod at itinuturo natin ay ang kultura ng ebanghelyo ni Jesucristo. Ang pagkakaisang hangad natin ay ang maging kaisa ng Tagapagligtas at ng Kanyang mga turo. …

Ang pagtupad sa mga responsibilidad na itinalaga ng Diyos, batay sa kabutihan, pagkakaisa, at pagkakapantay-pantay sa harap ng Panginoon, ay nagdudulot ng kaligayahan at kapayapaan sa mundong ito at inihahanda tayo para sa daigdig na darating. (Quentin L. Cook, “Maghandang Humarap sa Diyos,” Liahona, Mayo 2018, 116)

May puwang para sa kanila na nagsasalita ng ibang mga wika, nagdiriwang ng iba’t ibang kultura, at namumuhay sa maraming lugar. May puwang para sa walang asawa, sa may asawa, sa malalaking pamilya, at sa walang anak. May puwang para sa kanila na dating may mga pag-aalinlangan hinggil sa kanilang pananampalataya at may puwang para sa kanila na nag-aalinlangan pa rin. May puwang para sa mga yaong naakit sa kapareho nila ng kasarian. Sa madaling salita, may lugar para sa lahat ng taong nagmamahal sa Diyos at gumagalang sa Kanyang mga kautusan bilang di-mababale-walang pamantayan para sa sariling pag-uugali. (Jeffrey R. Holland, “Mga Awiting Naawit at Hindi Naawit,” Liahona, Mayo 2017, 51)

Panoorin ang sumusunod na video, kung saan nagbigay ng payo si Elder Holland sa mga taong pinanghihinaan ng loob o nadaramang napag-iwanan sila sa kaharian ng Panginoon dahil sa palagay nila ay lubos silang naiiba sa lahat.

Mga Karagdagang Aktibidad sa Pag-aaral

Pagkukumpara sa Diyos at kay Satanas

Maaari mong ikumpara ang paraan ng pakikitungo ng Diyos sa Kanyang mga anak sa paraan ng pagtataguyod ni Satanas ng alitan at pagkakahati-hati. Sabihin sa mga estudyante na ilista ang mga paraan ng Diyos sa pag-aaral nila ng 2 Nephi 26:23–28, 33 at ang mga paraan ni Satanas na matatagpuan sa 2 Nephi 26:20–22, 29, 32. Sabihin sa mga estudyante na ibahagi ang natutuhan nila tungkol sa nadarama ng Ama sa Langit para sa atin at kung paano sila matutulungan ng scripture passage na ito sa pagsisikap nila na maging higit na katulad Niya.

2 Nephi 26:29–31. Huwad na pagkasaserdote [priesthood]

Maaari mong ipaliwanag kung ano ang huwad na pagkasaserdote (talata 29) at talakayin kung bakit iniutos ng Diyos na huwag magkaroon ng huwad na pagkasaserdote. Maaaring talakayin ng mga estudyante kung paano maaaring mahulog ang mga tao sa bitag ng huwad na pagkasaserdote [priesthood] at kung paano makatutulong ang pag-ibig sa kapwa na madaig ang huwad na pagkasaserdote. Makatutulong na ipaliwanag na ginagawa ito ng mga nakikibahagi sa huwad na pagkasaserdote para sa kanilang sariling kapakinabangan, at sa gayon ay inililihis ang iba mula sa Ilaw ng Sanlibutan na si Jesucristo. Madaraig natin ang huwad na pagkasaserdote [priesthood] sa pamamagitan ng pagtutuon sa Tagapagligtas.

Mga karagdagang resource

Maaari kang maglaan ng kaunting oras sa klase upang matulungan ang mga estudyante na matutuhan pa ang tungkol sa itinuturo ng Panginoon tungkol sa lahi, katarungan, at pagkakapantay-pantay para sa lahat, gamit ang resources na matatagpuan sa Gospel Library at sa mga opisyal na website ng Simbahan. Maaaring kasama sa mga resource na ito ang mga sumusunod:

• ChurchofJesusChrist.org

• Mga Paksa ng Ebanghelyo, “Hindi Matwid na Pakikitungo sa mga Taong Iba ang Lahi at Kultura,” topics.ChurchofJesusChrist.org

• topics.ChurchofJesusChrist.org

• ChurchofJesusChrist.org