Суралцахуйгаа үнэлэх 2

1 Нифай 16–2 Нифай 25

Энэ хичээл танд Мормоны Номыг судлах үедээ тавьсан зорилго, хувийн өсөлт хөгжлөө үнэлэхэд туслах зорилготой.

Суралцагчдад хувийн зорилгыг нь сануулах: Суралцагчид Хүүхэд, өсвөр үеийнхний хөтөлбөрийн нэг хэсэг болгож, Аврагчтай илүү адил болоход нь туслах сүнслэг, нийгмийн, бие махбодын, оюун санааны зорилгыг бий болгосон байж болох юм. Суралцагчдыг семинар дээр суралцаж байгаа үнэнүүд нь зорилгодоо хүрэхэд нь хэрхэн тусалж болох талаар эргэцүүлэн бодоход урь.

Суралцагчийн бэлтгэл: Суралцагчдыг 1 Нифай 16, 2 Нифай 25-р бүлгээс сурч мэдсэн зүйлийнхээ заримыг давтаж, дуртай судраа эсвэл чухал үнэнийг хуваалцахаар бэлдэж ирэхэд урь.

Боломжит суралцах үйл ажиллагаа

Сайн мэдээний хичээлийн ойлголт

Энэ хичээл нь (1) тавьсан зорилго, (2) Мормоны Номын сургаалуудыг тайлбарлах чадвар, (3) сайн мэдээний дагуу амьдрах хандлага, хүсэл, чадвар нь хэрхэн өөрчлөгдөж байгааг үнэлэхэд суралцагчдад туслах зорилготой. Ангиараа 1 Нифай 16-аас 2 Нифай 25 хүртэл судлах нь дараах үйл ажиллагаанаас өөр үнэнийг онцолсон байж болох юм. Хэрэв тийм бол тэдгээр үнэнийг оруулан, үйл ажиллагааг тохируулан өөрчилж болно.

Суралцагчдад Мормоны Номыг судалснаар сүнслэг ахиц дэвшлээ анзаарах үнэ цэнийг харахад туслахын тулд толь авчир. Суралцагчдыг өөрсдийгөө харах нь (цаадах юмсыг харах, тусгалыг нь харах гэх мэт) хэрхэн ашигтай байж болох талаар ярилцахад урь. Дараа нь тэднийг сайн мэдээнээс судлах, сонголтынхоо талаар бодож, үнэлэхийн үнэ цэнийг бодохыг урь. Дараахтай адил асуултуудыг тавих талаар бодож үз. Үүнд:

• Тольтой байхын ашиг тус юу вэ?

• Өөрсдийгөө толинд харах нь сайн мэдээнээс суралцах талаар бодож, дүгнэхтэй хэрхэн адилхан байж болох вэ?

Сүнслэг үйл явцаа эргэцүүлэн тунгаах

Хичээлийн энэ хэсэг суралцагчдад Мормоны Номыг судалснаар Тэнгэрлэг Эцэгээс илчлэлт эрэлхийлж, үйлдэх туршлагаа эргэцүүлэн бодоход туслах зорилготой.

Мормоны Номыг судалснаар Ариун Сүнснээс хүлээн авсан сануулга, мэдрэмжийн талаар эргэцүүлэн бод. Ариун Сүнсний тантай харилцах олон арга зам байдаг. Жишээлбэл: Тодорхой шүлэг таны анхаарлыг татаж, тэдгээрийг тэмдэглэж авах хүсэл төрж магадгүй юм. Танд амар амгалан эсвэл хайрын мэдрэмж төрж ч магад. Та уншаад, тодорхой замаар үйлдэх сэдэл төрсөн эсвэл асуултдаа хариулт олсон байж болох юм.

Дараах асуултуудыг дэлгэцэд харуулснаар суралцагчид өөрсдөдөө тохирох хурдаар тунгаан бодож чадна. Суралцагчдыг судлах тэмдэглэл дээрээ хоёр эсвэл гурван асуултын хариултаа бичихийг урих нь тустай байж болно.

• Мормоны Номын аль түүх эсвэл хэсэг танд Тэнгэрлэг Эцэг хүүхдүүдтэйгээ хэрхэн харилцаж байдгийг харахад тань тусалсан бэ?

• Энэ жил семинар эсвэл хувиараа судлах дээр ямар бодол эсвэл мэдрэмжийг та мэдэрсэн бэ?

• Та Тэнгэрлэг Эцэгийн илчлэлтийг эрэлхийлэхийн тулд юу хийсэн бэ?

• Та илчлэлт хайж, үүнийг ирэх үед нь таньж мэдэх бэлтгэлтэй байхын тулд юу хийсэн бэ?

• Та хүлээж авсан сэтгэгдлийнхээ дагуу хэрхэн үйлдсэн бэ?

Хүсэл эрмэлзэлтэй суралцагчдыг хариултынхаа зарим хэсгийг зохих ёсоор ангитай хуваалцахад урь. Суралцагчид мөн хоёр хоёроороо эсвэл жижиг бүлэг болон хуваалцаж болно.

Адам, Евагийн Уналт, Есүс Христийн Цагаатгалыг тайлбарла.

Дараах үйл ажиллагаагаар суралцагчдыг ангийн хамтрагчтайгаа хамт, хүн бүр дараагийн хэсгийн налуугаар бичсэн сэдвүүдээс сонгож ажиллахыг урь.

Та номлогч бөгөөд хамтрагчтайгаа хамт хэн нэгэнд Уналтын талаар зааж өгөхөөр бэлдэж байна гэж төсөөл. Та хэн нь Уналтыг болон хүн төрөлхтөнд үзүүлсэн үүний үр нөлөөг, хэн нь Аврагч бидэнд Уналтын нөлөөллийг даван гарахад хэрхэн тусалсан бэ гэдгийг заахыг шийдэх хэрэгтэй.

Сонгосон сэдвийг тайлбарлахад туслах судрыг ашигла. 2 Нифай 2:17–27; 9:6–12; 10:23–25, судлах тэмдэглэл дээрх тэмдэглэл эсвэл Сайн мэдээний сэдэв дэх “Адам, Ева хоёрын уналт”-ыг давтах нь (topics.ChurchofJesusChrist.org) хуваалцахад бэлтгэхэд тань тусалж магадгүй.

Суралцагчдыг бэлдсэн зүйлээ хамтрагчтайгаа эсвэл ангийнхантайгаа хуваалцахад урь. Эсвэл суралцагчдыг гэр бүл, найздаа эсвэл Сүмийн удирдагчид тайлбараа илгээхэд урих талаар бодож үз.

Есүс Христийн талаарх миний мэдрэмж

Хичээлийн энэ хэсэг нь суралцагчдад Есүс Христийн талаарх мэдрэмжийнхээ талаар эргэцүүлэн бодох боломжийг олгох зорилготой юм.

Дараах асуултуудыг уншиж, эргэцүүлэн бодох цагийг суралцагчдад гаргаж өг. Та “Би гайхширна” (Дуулал, ду. 98) эсвэл “Аврагчийн хайр” (Дууллууд, ду. 56) зэрэг Аврагчийн тухай дууллуудыг намуухан тоглуулж болно.

Мормоны Ном Есүс Христийн тухай гэрчилдэг. Аврагчийн талаар сурч мэдсэн, мөн мэдэрсэн зүйлээ эргэцүүлэн бод. 1 Нифай 19, 2 Нифай 9, 2 Нифай 25 зэрэг судалсан бүлгүүдээ эргэн хар. Та мөн тэмдэглэсэн хэсгүүдээ хайж олж болно. Судлах тэмдэглэлдээ бичсэн зүйлээ, ялангуяа Түүний талаарх мэдрэмжийг тань агуулсан бичлэгүүдийг эргэн харах нь тустай байж болох юм.

Суралцагчдыг Аврагчийн талаарх сэтгэгдлээ эргэцүүлсний дараа тэднийг дараах үйл ажиллагаануудаас аль нэгийг нь сонгоход эсвэл мэдрэмжээ илэрхийлэх өөрийн арга барилыг бий болгоход урь. Суралцагчдыг судраа ашиглахад зоригжуулан дэмж.

Өөрт төрсөн мэдрэмжээ илэрхийлэхэд хэцүү эсвэл Аврагчийн талаар хүчтэй мэдрэмж төрөөгүй байгаа суралцагчид байж болно. Урам зориг өгөх арга замуудыг хайж, тэдэнд хайртай гэдгээ мэдэхэд нь тусал.

• Аврагчийн талаарх мэдрэмжээ илэрхийлэх шүлэг эсвэл захидал бич. Судрын эшлэл, судрын мөр эсвэл үг ашиглах талаар бодож үз.

• Аврагчийн тухай мэдрэмжээ илэрхийлэх үгийн жагсаалт гарга. Судруудаас зарим тайлбарыг оруул. Үгийн үүл үүсгэж эсвэл цаасан дээр үг бичээд, өрөөндөө эсвэл байнга харагдах өөр газар өлгө.

• Аврагчийн талаарх сэтгэгдлээ илэрхийлэхэд тань туслах ямар нэг зүйлийг зур.

Суралцагчдад цаг гарвал Аврагчийн тухай гэрчлэлээ илэрхийлэхийн тулд өөрсдийн бүтээсэн зүйлээ хуваалцахыг зөвшөөр. Суралцагчдыг бүтээлээ гэр бүлийнхэнтэйгээ эсвэл бусадтай хуваалцахыг урих талаар бодож үз. Та мөн Аврагчид өргөх талархлын тухай гэрчлэлээ хуваалцаж болно.