“Мозая 3:19: Эгэл хүнээ орхих нь,” Мормоны Номын багшийн гарын авлага (2024)
“Мозая 3:19,” Мормоны Номын багшийн гарын авлага
Moзая 3:19
Эгэл хүнээ орхих нь
Та алдаа гаргасандаа эсвэл Бурханы бүх зарлигийг сахиж чадаагүйдээ бухимдаж байсан уу? Хаан Бенжамин бидний төгс бус мөн чанарыг “эгэл хүн” хэмээсэн. Тэрээр Есүс Христийн Цагаатгалаар дамжуулан бид үүнийг даван туулж чадна гэж заасан. Энэ хичээл суралцагчдад өөрсдийнхөө унасан чанарыг даван туулахад Аврагчийн туслалцааг эрэлхийлэхэд туслах зорилготой.
Суралцахыг урамшуулан дэмждэг орчин үүсгэх. Багш, суралцагчид Их Эзэнийг мөн бие биеэ болон Бурханы үгийг хайрлаж, хүндэлснээр амжилттай суралцах болно. Суралцагчдад бусдаас мэдрэх хүлээн зөвшөөрөгдөх байдал ба хайр нь зүрх сэтгэлийг зөөлрүүлж, айдсыг бууруулж, мэдрэмж, туршлагаа хуваалцах хүсэл, итгэлийг нь нэмэгдүүлдэг.
Суралцагчийн бэлтгэл: Суралцагчдыг Moзая 3:19-ийг уншаад, утгыг нь тунгаан бодохыг урь. Та мөн тэднийг энэ шүлгийн зарим хэсгийн талаарх ойлголтыг нэмэгдүүлэхэд туслах судрыг эсвэл Сүмийн удирдагчийн хэлсэн үгийг олоход урьж болно.
Боломжит суралцах үйл ажиллагаа
Бидний унасан чанар
Ерөнхийлөгч Даллин Х.Өүксийн түүхийг хуваалцахдаа чононы зургийг харуул.
Тэргүүн зөвлөлийн ерөнхийлөгч Даллин Х.Өүкс дараах түүхийг ийн дурссан.
Нэгдсэн Улсын индиан овгуудын нэг болох Чероки овгийн нэгэн ухаалаг эр ач хүүдээ амьдралын талаар нэгэн сургаалт зүйрлэл ярьж өгчээ. Өвөө нь Миний дотор хоёр чонын ширүүн тулаан болдог.” Нэг нь хилэнцэт бөгөөд уур хилэн, атаа хорсол, гомдол, харуусал, шунал, худал хуурмагаар дүүрэн. Нөгөө нь сайн бөгөөд нинжин сэтгэл, эелдэг, даруу байдал, үнэн, хайр, баяр баяслаар дүүрэн. Энэ тулаан бидний хүн нэг бүрийн дотор болж байдаг” хэмээн ярьжээ. “Аль чоно нь ялах вэ?” хэмээн ач хүү нь асуув. (Даллин Х.Өүкс, “Сонголтууд,” Өсвөр үеийнхний бат бөх байдлын төлөө, 2021 оны 9-р сар,13; Шэйн М.Боуэнээс сэдэвлэсэн түүх)
-
Хэрвээ та өвөөгийн оронд байсан бол ач хүүгийнхээ асуултад юу гэж хариулах вэ?
Суралцагчдыг дараах асуултын хариултыг тунгаан бодоход урь.
-
Та өөрийн доторх “хоёр чоно”-ын тэмцлийг хэрхэн анзаарсан бэ?
Ерөнхийлөгч Өүксийн хуваалцсан түүхэд өвөө нь ач хүүгийнхээ аль чоно ялах вэ гэсэн асуултад “Чиний хооллох нэг нь” гэж хариулжээ.
Хаан Бенжамин нифайчуудад хандаж хэлсэн сүүлчийн үгийнхээ нэг хэсэг болгон бидний унасан чанарыг, мөн энэ нь Бурхантай харилцах харилцаанд хэрхэн нөлөөлдөг талаар тэнгэр элчийн өөрт нь илчилсэн үнэнийг заасан.
Мозая 3:19-ийг уншаад, хаан Бенжамин түүх дээр дүрсэлсэн эхний чоно шиг зан чанартай хүнийг хэрхэн дүрсэлснийг олж мэд.
Суралцагчдаас Мозая 3:19-ийн зөвхөн эхний хэсэг (“үүрд мөнхөд” гэсэн үгээр төгссөн)-ийг уншуул.
Moзая 3:19 бол төгс эзэмших сургаалын судрын хэсэг юм. Төгс эзэмших сургаалын судрын хэсгүүдийг дараа нь амархан олохын тулд онцгойлон тэмдэглэ. Та дараагийн хичээл дээр асуултад эсвэл нөхцөл байдалд энэ хэсэгт заасан сургаалыг хэрэгжүүлэх дадлага хийх боломжтой болно.
-
Та юу олж мэдсэн бэ?
Эгэл хүн гэсэн үгсийг самбар дээр гарчиг болгон бич. Суралцагчдыг тухайн нэр томьёоны утгыг ойлгоход тусалж болох үгийг эсвэл үг хэллэгийг бодоход урь. Дараа нь тэднээс хариултаа гарчгийн доор жагсаахыг хүс.
Арван хоёр төлөөлөгчийн чуулгын ахлагч Дэвид А.Бэднар ийн заасан.
Хаан Бенжамины тодорхойлсон эгэл хүн бидний дотор ямар нэгэн хэмжээгээр оршин байдаг. Эгэл хүн нь нүглээ наманчилдаггүй, эгэл, тачаангуй, уруу таталтад амархан бууж өгдөг, хэт ихийг хүсдэг, бардам бөгөөд хувиа хичээсэн байдаг. (Дэвид А.Бэднар, “Бид ариун явдалд итгэдэг,” 2013 оны 4-р сарын Ерөнхий чуулган, 51)
-
Та яагаад эгэл хүн Бурханы дайсан гэж бодож байна вэ?
-
Бидний дотор буй эгэл хүнийг “тэжээх” гэдэг нь юу гэсэн үг байж болох вэ?
Суралцагчдад эгэл хүнийг илүү сайн ойлгоход нь туслахын тулд дараах жишээнүүдийн заримыг үзүүл эсвэл өөрийнхийгөө бод. Суралцагчдыг эгэл хүн тус бүрд хэрхэн хариу үйлдэл үзүүлж болох талаар хуваалцахад урь.
-
Хэн нэгэн таныг доромжлов.
-
Та шалгалт өгч байгаа бөгөөд өөр суралцагчийн хариултыг харах боломжтой байна.
-
Таны электрон төхөөрөмж дээр зохимжгүй зураг гарч ирнэ.
Амьдралдаа эгэл хүний хандлага, зан авирыг анзаарах зарим арга замын талаар бод. Үргэлжлүүлэн судалж байхдаа эдгээр хандлага, зан авирыг даван туулахад тань туслах сургаалуудыг хайж ол.
Эгэл хүнээ даван гарах
Мозая 3:19-ийг дахин уншаад, энэ удаад хаан Бенжамин эгэл хүнийг хэрхэн даван туулж чадах талаар заасныг олж мэд.
-
Та энэ шүлгээс эгэл хүнийг даван туулахад тань туслах юу сурч мэдсэн бэ?
Хэрвээ та өмнө нь Эгэл хүн гэдгийг самбар дээр бичсэн бол Гэгээнтэн гэсэн үгийг ашиглаж, хоёр дахь гарчгийг бич. Суралцагчид эгэл хүнээ даван гарч, Аврагчийн Цагаатгалаар дамжуулан гэгээнтэн болох тухай үнэнийг олж мэдэх үед тэдгээрийг самбар дээр хоёр дахь гарчгийн доор жагсаан бич.
Мозая 3:19-өөс бид Ариун Сүнсний таталтад автсанаар эгэл хүнээ даван гарч, Есүс Христийн Цагаатгалаар дамжуулан гэгээнтнүүд болж чадна гэдгийг сурч мэдсэн.
-
Та Есүс Христ бидэнд хэрхэн Цагаатгалаар нь дамжуулан эгэл хүнээ орхиж, гэгээнтэн болоход тусалж чадна гэж бодож байна вэ?
-
Та “Ариун Сүнсний таталтад автах” гэдэг нь ямар утгатай гэж бодож байна вэ? Үүнийг хийх нь танд эгэл хүнээ хэрхэн даван гарахад тусалж чадна гэж бодож байна вэ?
Ойлголтоо гүнзгийрүүлэхийн тулд холбогдох эшлэлийг ашиглах
Суралцагчдад Мозая 3:19-ийн сургаалын талаарх ойлголтоо гүнзгийрүүлэх цаг гаргаж, холбогдох эшлэлийн судраас судлах ур чадварыг ашигла.
Холбогдох эшлэлийг ашиглах нь судрыг судлах ур чадвар бөгөөд энэ нь судрын үг хэллэгийг илүү гүнзгий ойлгоход тусалж чадна. Мозая 3:19-ийн сургаалын талаарх ойлголтыг тань илүү гүнзгийрүүлэх холбогдох эшлэл олж, энэ ур чадвараа давт.
Gospel Library аппликэйшн дээрээс “эгэл хүн” гэсэн нэр томьёог эсвэл Мозая 3:19-өөс бусад түлхүүр үгийг хайж олох замаар холбогдох эшлэлийг ол. Та мөн Мозая 3:19-ийн зүүлт тайлбарт жагсаасан зарим судрын эшлэл ба сэдвүүдийг хайж болно.
Өөр нэгэн сонголт нь дараах судрын хэсгүүдийн заримыг эсвэл бүгдийг нь судлах юм.
Та дараах судрын эшлэлүүдийг самбарт бичиж болно. Дараа нь өөр бүлгүүдэд нэг эсвэл хэд хэдэн хэсгийг уншиж, сурч мэдсэн зүйлээ хуваалцахаар хуваарилж өг. Та мөн суралцагчдад Сүмийн удирдагчдын мэдэгдэл, холбогдох судруудыг олох цаг гаргаж өгч болно.
Суралцагчдад хангалттай судлах цаг гаргасны дараа тэднийг сурч мэдсэн зүйлсээ ангийнхантайгаа хуваалцахыг урь. Та суралцагчдаас өөрсдөд нь хамгийн их утга учиртай гэж үзсэн зүйлээ болон энэ нь Мозая 3:19-ийн сургаалтай хэрхэн холбогдож байгааг хуваалцахыг хүсэж болно. Тэд мөн Есүс Христ бидэнд эгэл хүнээ даван гарахад хэрхэн тусалдаг талаар юу сурч мэдсэнээ хуваалцаж болно. Хэд хэдэн суралцагчийг ойлголтоо хуваалцахад урь.
-
Эгэл хүнээ даван гарч, гэгээнтэн болоход Аврагч бидэнд хэрхэн тусалж чадах талаар та юу мэдэж авсан бэ?
Амьдралдаа хэрэгжүүлэх нь
Аврагчийн Цагаатгалаар дамжуулан эгэл хүнээ орхиж, гэгээнтэн болох гэдэг нь юу гэсэн үг болохыг та илүү сайн мэдэж авсан учраас эдгээр сургаалыг амьдралдаа хэрхэн хэрэгжүүлэх талаар бод. Танд хийхээр эсвэл хийхээ болихоор өдөөгдсөн ямар зүйл байгаа вэ? Төрсөн бодол, сэтгэгдлээ судлах тэмдэглэлдээ бичиж тэмдэглэ.