“Төгс эзэмших сургаал: Moзая 4:9—‘Бурханд итгэ,’” Мормоны Номын багшийн гарын авлага (2024)
“Төгс эзэмших сургаал: Moзая 4:9,” Мормоны Номын багшийн гарын авлага
Төгс эзэмших сургаал: Мозая 4:9
“Бурханд итгэ”
Moзая 4:9–10-ыг судлах үедээ та Бурханд итгэхийн ач тусыг сурч мэдсэн. Энэ хичээл танд Moзая 4:9-ийн төгс эзэмших сургаалын судрын эшлэл, түлхүүр үг хэллэгийг цээжилж, сургаалыг тайлбарлаж, сүнслэг мэдлэг олж авах зарчмуудыг бодит амьдралын нөхцөл байдалд ашиглахад тусална.
Тэнгэрлэг Эцэг, Есүс Христ хоёр дээр төвлөр. Багш нарт суралцагчдыг Тэнгэрлэг Эцэг, Есүс Христ хоёрыг таньж мэдэн, хайрлахад нь туслахаас илүү хийж чадах зүйл байхгүй. Хичээлээ заахаар бэлдэх явцдаа үүнийг хэрхэн хийх урам зоригийг үргэлжлүүлэн хайсаар бай.
Суралцагчийн бэлтгэл: Суралцагчдыг гэр бүлийнхнээсээ эсвэл найз нөхдөөсөө яагаад Бурханд итгэхээр сонгосон тухай асуухад урь.
Боломжит суралцах үйл ажиллагаа
Та төгс эзэмших сургаалын энэ хэсгийн хичээлийг “Moзая 4:9–10-р хичээлийн дараа заах ёстой бөгөөд энэ нь төгс эзэмших сургаалын Moзая 4:9 хам сэдвийн хичээл юм. Хэрэв төгс эзэмших сургаалын энэ хичээлийг өөр долоо хоног руу шилжүүлэх шаардлагатай бол холбогдох хам сэдэв бүхий хичээлийг нь тухайн долоо хоногт нь заасан байхад анхаар.
Цээжлэх ба тайлбарлах
Дараах нь суралцагчдад Moзая 4:9-д заасан сургаалыг өөрийн үгээр тайлбарлахад туслах нэг арга юм.
Moзая 4:9–10 дээрх хаан Бенжамины өөрийн хүмүүсийг Бурханд итгэхийг урьсан урилгыг судалж байсан туршлагаа эргэн сана. Шаардлагатай бол эдгээр шүлгийг дахин уншиж, өмнөх хичээлээс судлах тэмдэглэл дээрээ хийсэн схемээ эргэн харж болно.
-
Хаан Бенжамин хүмүүсээ Бурханы ямар чухал зан чанар эсвэл хандлагад итгэхийг урьсан бэ?
-
Бурханы эдгээр бурханлаг зан чанарт итгэх нь таны амьдралд хэрхэн нөлөөлж чадах вэ?
Moзая 4:9–10-д дурдсан, хаан Бенжамины хүмүүстээ итгэхийг заасан Бурханы шинж чанаруудын аль нэгийг сонго. Энэ нь юу гэсэн үг болохыг ойлгохгүй байгаа хүнд үүнийг хэрхэн тайлбарлах талаараа хуваалц.
Суралцагчдыг төгс эзэмших сургаалын хэсэг Moзая 4:9-ийн эшлэл, дагалдах судрын түлхүүр үг хэллэг нь болох “Бурханд итгэ; … түүнд бүх мэргэн ухаан байгаа гэдэгт итгэ” гэдгийг цээжлэхэд урь. Үүнийг хэрхэн гүйцэтгэж болох жишээг доор өгөв.
Судлах тэмдэглэлдээ итгэх гэдэг үгийг том үсгээр бич. Үүний доор Бурханд гэж бичээд, энэ хэллэгийн доор түүнд бүх мэргэн ухаан байгаа гэдэгт итгэ гэж бич. Дараа нь Moзая 4:9 судрын эшлэлийг доор нь том үсгээр бич. Дээрээс нь эхлэн мөр бүрийг үг, хэллэг, эшлэл рүү заахдаа чангаар хэл. Үүнийг цээжээрээ санах хүртлээ олон удаа давт.
Өмнөх үйл ажиллагааны өөр хувилбар болгон самбар дээр итгэх гэдэг үгийг бич. Mозая 4:9-ийн судрын түлхүүр үг хэллэгт энэ үг хоёр удаа гардаг гэдгийг тайлбарла. Суралцагчдыг эхлээд “Бурханд итгэ” гэсэн хэллэгийг, дараа нь “Түүнд бүх мэргэн ухаан байгаа гэдэгт итгэ” гэсэн хэллэгийг цээжлэхэд урь. Дараа нь тэдэнд Moзая 4:9 судрын эшлэлийг цээжлүүл. Дараа нь гурван суралцагчийг өрөөний урд гарч ирэхийг урь. Суралцагч бүрд цээжилсэн хэсгүүдийн аль нэгийг давтахыг даалга. Түлхүүр үг хэллэг, эшлэлийг цээжлэхэд нь суралцагчдад туслахын тулд тэднийг гурав гурваар нь бүлэгт хуваарилан, үүнийг давт.
Дадлага хийх үйл ажиллагаа
Суралцагчдыг сүнслэг мэдлэг олж авах зарчмуудыг эргэн харахыг урь. Тэд тогтоосон хугацаанд дараах зүйлийг гүйцэтгэх боломжтой. Та зарчмуудыг ангид жагсаан бичээд, дараа нь нэг зарчмыг сонгож, үүнийг хэрхэн ашигласан эсвэл ашиглаж болох талаар тайлбарлахад суралцагчдыг урьснаар энэ үйл ажиллагааг өөрчилж болно. Суралцагчид бүх гурван зарчмыг давтахын тулд бие биедээ зааж болно.
Шаардлагатай бол Төгс эзэмших сургаалыг судлах үндсэн материал (2022)-ын “Сүнслэг мэдлэг олж авах” хэсгийн 5–12-р догол мөр-ийг судлан, сүнслэг мэдлэг олж авах зарчмуудыг давт. Та бүх гурван зарчмыг цээжээрээ жагсаан бичихээр оролдож болно. Дараа нь судлах тэмдэглэлдээ эдгээр зарчмыг хэрхэн ашигласан эсвэл ашиглаж болох талаар бич.
Дараах хувилбар нь суралцагчдад Moзая 4:9-ийн сургаалыг болон сүнслэг мэдлэг олж авах зарчмуудыг бодит амьдралын нөхцөл байдалд хэрэгжүүлэх дадлага хийхэд тусалж чадна. Өөр нэг сонголт бол суралцагчдад сүнслэг мэдлэг олж авах зарчмуудыг хэрэгжүүлэх дадлага хийхийн тулд өөрсдийн жишээг зохиож, суралцах чадвараа өөрчлөх боломжийг олгох явдал юм. Энэ нь тэдний сурч мэдсэн зүйлд илүү хамааралтай бөгөөд хэрэгжүүлэхэд тусалж чадна.
Суралцагчид дараа нь ажиглаж мэдэрсэн зүйлээ бие биедээ зааж болно.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fcb%2F43%2Fcb438cea7ce677941c788437fbb559013ae83bc2%2Fcb438cea7ce677941c788437fbb559013ae83bc2.jpeg/full/!250,/0/default)
Майрагийн ангийнх нь багш шашин шүтлэгийг шоолж, Бурханд итгэдэггүй хүн байв. Багшийнх нь яриа эхэндээ Майрагийн санааг зовоож байсан ч хэдэн сар хичээлдээ явж байхдаа тэр түүний зөв юм болов уу гэж эргэлзэж эхлэв. Тэр үргэлж Бурханд итгэдэг байсан ч одоо түүнд Бурханы оршихуйд эргэлзэж эхэлж байгаа мэт санагдаж байв.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fcb%2F43%2Fcb438cea7ce677941c788437fbb559013ae83bc2%2Fcb438cea7ce677941c788437fbb559013ae83bc2.jpeg/full/!250,/0/default)
Майрагийн нөхцөл байдалд эсвэл таны амьдралд илүү хамааралтай Бурханд итгэхтэй холбоотой өөр нөхцөл байдалд туслуулахын тулд Мозая 4:9 дээрх сүнслэг мэдлэгийг болон сургаалыг олж авах зарчмуудыг ашигла.
Та ангид дараах асуултуудыг ар араас нь асуух шаардлагагүй. Эдгээр нь суралцагчдыг сүнслэг мэдлэг олж авах зарчмуудыг ашиглан дадлага хийх үед асууж болох асуултуудын жишээ байх зорилготой. Суралцагчдад бие биеэсээ асуулт асууж, хариулах боломж олго. Дараах (энд жагсаасан эсвэл бусад) асуултуудыг хэзээ асуух, хэзээ асуухгүй байхаа мэдэхийн тулд Ариун Сүнсний удирдамжийг эрэлхийл.
Итгэлээр үйлдэх
-
Бурханд итгэхийн төлөө хичээж байгаа хүн ямар итгэлтэй үйлдэл хийж болох вэ?
-
Эдгээр үйлдлийг хийх нь тэдэнд хэрхэн тусалж болох вэ?
Утга санаа, асуултыг мөнхийн талаас нь шинжлэн судлах
-
Moзая 4:9-ийн ямар сургаал ийм нөхцөлд байгаа хүнд мөнхийн хэтийн төлөвтэй болоход тусалж чадах вэ?
-
Хэн нэгний Бурханд итгэх эсвэл итгэхгүй байх шийдвэр нь тэдний ирээдүйд хэрхэн нөлөөлөх вэ?
Тэнгэрээс томилогдсон эх сурвалжаар дамжуулан илүү их ойлголт олж авахаар эрэлхийлэх
-
Ямар нэмэлт судрын хэсэг эсвэл туршлага (танд болон бусад хүнд тохиолдсон) энэ сорилтыг даван туулахад тусалж чадах вэ?
-
Ийм нөхцөлд хүмүүст туслах мэдээллийг өөр хаанаас олж болох вэ? Хамгийн багадаа ядаж нэг өөр эх сурвалжийг олж, энэ нь хэрхэн тусалж болохыг тайлбарла.
Энэ хичээлийг дуусгахын тулд та суралцагчдыг өөрсдийн болон бусад хүний Бурханд итгэх итгэл нь сорилтод орж болзошгүй нөхцөл байдлын талаар эргэцүүлэн бодохыг урьж, эдгээр туршлагад бэлтгэхэд нь тусалж болно. Та суралцагчдаас дараах асуултуудын заримыг асууснаар үүнийг хийж болно.
-
Таны өнөөдрийн туршлага эдгээр нөхцөл байдалд хэрхэн тусалж чадах вэ?
-
Та Бурханд итгэх итгэлдээ эргэлзэх үедээ ямар онцгой зүйлийг санахыг хүсэж байна вэ?
Энэхүү хэлэлцүүлгийн нэг хэсэг болгон Бурханд итгэхийн ач холбогдлын талаар гэрчилж эсвэл суралцагчдыг гэрчлэхийг урь.
Төгс эзэмших сургаалын давтлага
Дараах давтах үйл ажиллагааг энэ хичээлийн дараа удахгүй заах хичээлдээ ашигла.
Moзая 4:9-ийн судрын эшлэлийг бичиж эхлэн, Бурханд итгэ; … түүнд бүх мэргэн ухаан байгаа гэдэгт итгэ гэсэн өгүүлбэрийг самбарт нэг нэг үгээр нь бич. Дараагийн үгээ бичихээс өмнө түр зогсож, суралцагчид таныг бичихээс өмнө хэлж чадаж байгаа эсэхийг шалгаарай. Суралцагчид цээжээрээ давтан хэлж чадах хүртэл үүнийг хэд хэдэн удаа давт.