Alma 12

Matigas o Malambot na Puso

Ano sa palagay mo ang ibig sabihin ng pagkakaroon ng matigas na puso o malambot na puso sa Panginoon? Nang magsimulang magtanong nang taos-puso si Zisrom kina Alma at Amulek, itinuro ni Alma na ang mga hindi magpapatigas ng kanilang puso ay matututuhan ang mga bagay ng Diyos. Itinuro ni Alma ang plano ng pagtubos at hinikayat niya ang mga tao na suriin ang kanilang puso. Ang lesson na ito ay makatutulong sa iyo na suriin ang iyong puso at ang iyong kahandaang tanggapin ang salita ng Diyos.

Hikayatin ang mga estudyante na magnilay. Bigyan ng oras ang mga estudyante na pagnilayan ang natutuhan nila tungkol kay Jesucristo sa mga banal na kasulatan at sa mga salita ng mga propeta. Hikayatin sila na pagnilayan kung paano naipapakita ang Kanyang kapangyarihan sa mga banal na kasulatan at sa sarili nilang buhay.

Paghahanda ng estudyante: Maaari mong bigyan ang bawat estudyante ng kopya ng pagsusuri sa sarili sa lesson na ito. Sabihin sa kanila na suriin ang kanilang sarili at pagnilayan kung paano sila naapektuhan ng kanilang mga sagot.

Mga Posibleng Aktibidad sa Pag-aaral

Pagkukumpara ng puso sa clay

Maaari mong sabihin sa dalawang estudyante na gumawa ng isang bagay mula sa clay sa loob ng isang minuto. Kung maaari, bigyan ang isang estudyante ng malambot na clay at ang isa pang estudyante ng tuyo o matigas na clay. Kung may sapat na clay, maaari mong bigyan ang bawat estudyante sa klase ng kaunting clay para sa aktibidad na ito.

• Paano nakakaapekto ang paggamit ng malambot o matigas na clay sa kakayahan mong ihugis ito?

Maaari kang magdrowing ng mga puso na tulad ng mga sumusunod sa pisara.

Sa iyong study journal, magdrowing ng dalawang puso, at lagyan ang isa ng label na “matigas na puso” at ang isa naman ay lagyan ng label na “malambot na puso.” Maaaring makatulong na malaman na sa banal na kasulatan, ang puso ay kadalasang sumasagisag sa “kaisipan at kalooban” ng isang tao (Gabay sa mga Banal na Kasulatan, “Puso,” scriptures.ChurchofJesusChrist.org).

Ikumpara ang ating puso sa clay at ang Panginoon sa taong naghuhugis nito. Habang pinag-aaralan mo ang lesson na ito, hingin ang tulong ng Panginoon sa pagsagot sa mga sumusunod na tanong:

• Ano ang ibig sabihin ng pagkakaroon ng matigas na puso o malambot na puso? Bakit mahalaga ang kalagayan ng aking puso?

• Sa paanong mga paraan ako nagkakaroon ng matigas na puso o malambot na puso?

• Kung matigas ang puso ko, paano ako makahihingi ng tulong sa Panginoon na mapalambot ito?

Maaaring makatulong na ilista sa pisara ang mga tanong na ito para maisulat ng mga estudyante ang kanilang mga sagot sa kanilang study journal sa buong lesson. Hindi dapat asahang sasagutin ng mga estudyante ang mga tanong na ito sa bahaging ito ng lesson.

Habang natututo ka, maaari kang magsulat ng mga tala sa ilalim ng bawat puso na idinrowing mo sa iyong study journal.

Matitigas na puso at malalambot na puso

Habang sinisimulan ninyong pag-aralan ang Alma 12 nang magkakasama, maaaring makatulong na itanong sa mga estudyante kung ano ang naaalala nila tungkol kay Zisrom at sa pakikipag-usap niya kina Alma at Amulek.

Sinubukan ni Zisrom at ng iba pa na linlangin at pabulaanan sina Alma at Amulek sa pamamagitan ng pagtatanong ng mga bagay na naglalayong mabitag sila (tingnan sa Alma 11:21). Tumugon si Amulek sa pamamagitan ng Espiritu, at nagpatotoo siya tungkol sa Tagapagligtas at sa Huling Paghuhukom (tingnan sa Alma 11:26–46). Ipinaliwanag ni Alma na alam nila ni Amulek ang mga panlilinlang ni Zisrom sa pamamagitan ng Espiritu (tingnan sa Alma 12:3–6).

Basahin ang Alma 12:7–8, at alamin kung ano ang nangyari kay Zisrom.

• Anong mga parirala ang nagsasabi sa inyo na nagbabago si Zisrom?

• Ano sa palagay ninyo ang kaibhang naidulot ng pag-uugali ni Zisrom sa kanyang kakayahang tumanggap ng mga sagot?

Dahil talagang gustong malaman ni Zisrom ang tungkol sa Huling Paghuhukom, ginamit ni Alma ang pagkakataong ito upang ituro ang tungkol sa plano ng pagtubos ng Diyos. Gayunpaman, binalaan muna ni Alma si Zisrom na ang kanyang puso ay kailangang maging matwid sa harapan ng Diyos.

Habang binabasa mo ang Alma 12:9–11, markahan ang mga salita o parirala na tutulong sa iyo na maunawaan ang nangyayari dahil sa kalagayan ng ating puso. Maaaring makatulong na malaman na “ang mga hiwaga ng Diyos ay mga espirituwal na katotohanang nalalaman lamang sa pamamagitan ng paghahayag” (Gabay sa mga Banal na Kasulatan, “Hiwaga ng Diyos, Mga,” scriptures.churchofJesusChrist.org).

Sabihin sa mga estudyante na ibahagi ang natutuhan nila. Isulat sa pisara ang anumang alituntuning ibabahagi nila.

Ang dalawang alituntunin na maaaring natukoy mo ay (1) kung hindi natin patitigasin ang ating puso at masigasig tayong makikinig sa salita ng Diyos, malalaman natin ang mga hiwaga ng Diyos at (2) kung patitigasin natin ang ating puso, hindi natin matatanggap ang salita ng Diyos hanggang sa wala tayong malaman tungkol sa mga hiwaga ng Diyos. Maaari mong isulat ang bawat katotohanan sa tabi ng mga pusong idinrowing mo sa iyong journal.

Upang mas maunawaan ang ibig sabihin ng pagkakaroon ng matigas na puso o kung ano ang magagawa natin para mapalambot ng Panginoon ang ating puso, basahin ang ilan sa mga sumusunod na talata. Sa tabi ng mga angkop na puso sa iyong study journal, isulat ang natutuhan mo o ang mahahalagang parirala mula sa mga talatang ito at ang mga talatang nabasa mo mula sa Alma 12:7–11.

• Pinatitigas ng mga tao ang kanilang mga puso: 1 Nephi 15:3; 2 Nephi 33:2; Mosias 11:29.

• Ano ang ginawa ng mga tao para mapalambot ng Panginoon ang kanilang mga puso: 1 Nephi 2:16; Alma 24:8.

Sabihin sa mga estudyante na isulat sa pisara sa tabi ng dalawang puso ang natutuhan nila o ang mga parirala mula sa mga talata. Malapit sa malambot na puso, maaaring magmungkahi ang mga estudyante ng ilan sa mga sumusunod na ideya na humahantong sa malambot na puso: “[m]agsumamo sa Panginoon” (1 Nephi 2:16); “magtanong … nang buong sigasig” tungkol sa ebanghelyo (Alma 12:8); “pagtalima at pagsusumikap” sa ibinibigay sa atin ng Panginoon (Alma 12:9); at gawin ang mga bagay na nag-aanyaya sa Kanyang Espiritu sa ating buhay (tingnan sa Alma 24:8).

Sabihin sa mga estudyante na talakayin kung bakit nauugnay ang kalagayan ng ating puso. Ang isang paraan para magawa ito ay anyayahan ang ilang estudyante na magboluntaryong sumagot ng mga tanong sa isang panel. Maaari silang umupo sa mga silya sa harapan ng silid. Maaari mong isulat sa pisara ang mga sumusunod na tanong. Maaaring itanong ng klase sa panel ang mga tanong na ito o iba pang mga tanong upang talakayin ang kaugnayan ng kalagayan ng ating puso.

• Ano sa palagay ninyo ang mangyayari kapag ang isang taong nagtatanong ay may matigas na puso? Ano kaya ang mangyayari kapag nagtatanong tayo nang may “pagtalima at pagsusumikap” (Alma 12:9) sa Panginoon?

• Bakit kung minsan ay natutukso tayong patigasin ang ating puso?

• Sa inyong palagay, bakit makagagawa ng gayong kaibhan sa ating buhay ang kalagayan ng ating puso sa Panginoon?

Plano ng pagtubos ng Diyos

Dahil si Zisrom ay nagsimulang magkaroon ng tapat na hangaring maunawaan ang pagkabuhay na mag-uli at ang Araw ng Paghuhukom, itinuro sa kanya ni Alma ang tungkol sa plano ng pagtubos ng Diyos. Itinuro niya na ang buhay na ito ay “panahon upang maghanda sa pagharap sa Diyos” at ang tungkol sa mahalagang tungkulin ng Tagapagligtas na daigin ang ating mga kasalanan at kamatayan (tingnan sa Alma 12:16–18, 24–28, 33). Binigyang-diin niya ang kahalagahan ng hindi pagpapatigas ng ating puso.

Maaari mong anyayahan ang mga estudyante na ipikit ang kanilang mga mata habang ginagawa nila ang mga sumusunod.

Isipin sandali kung ano kaya ang pakiramdam ng tumayo sa harapan ng Diyos sa Huling Paghuhukom pagkatapos mamuhay nang may matigas na puso. Isipin din kung ano kaya ang pakiramdam pagkatapos mamuhay nang may malambot na puso.

Basahin ang Alma 12:12–15, 33–37, at alamin kung paano maaapektuhan ng iyong puso ang iyong kaugnayan sa Ama sa Langit at kay Jesucristo sa Huling Paghuhukom. Maaari mong markahan ang mahahalagang salita o parirala sa iyong mga banal na kasulatan.

• Ayon sa Alma 12:33–34, bakit mahalagang huwag patigasin ang ating puso at magsisi tayo?

• Paano naging perpektong halimbawa ang Tagapagligtas sa pagkakaroon ng malambot at mapagpakumbabang puso sa Kanyang Ama? (Tingnan sa Mateo 26:39; 2 Nephi 31:4–7; Doktrina at mga Tipan 19:18–19.)

Ang iyong puso

Tulungan ang mga estudyante na gumawa ng personal na pagsusuri sa kanilang mga puso. Ito ay dapat na maging pribadong karanasan para sa bawat estudyante. Maaari mong gamitin ang sumusunod na assessment o gumawa ng sarili mong assessment. Maaari mong ipakita ang mga tagubilin at pahayag sa pisara, at maaaring isulat ng mga estudyante ang kanilang mga sagot sa kanilang journal.

Para matulungan kang suriin ang iyong puso, sagutin ang mga sumusunod na tanong gamit ang scale na 1 hanggang 5, kung saan ang ibig sabihin ng 1 ay “hindi naging totoo sa akin” at ang ibig sabihin ng 5 ay “laging totoo sa akin.”

• Gusto kong patnubayan ako ng Ama sa Langit sa lahat ng aspeto ng aking buhay.

• Handa akong sumunod sa Ama sa Langit.

• Tinatanggap ko ang pagtutuwid sa akin.

• Nadarama ko na kailangan ko ang tulong ng Tagapagligtas sa buhay ko.

• Handa akong bumaling sa Tagapagligtas at magsisi.

Upang matulungan ang mga estudyante na pag-isipan ang natutuhan nila sa lesson na ito, ibahagi ang sumusunod na sitwasyon at hikayatin ang mga estudyante na gamitin ang mga banal na kasulatan sa kanilang sagot.

Isipin kunwari na nadama ng isang tao na matigas ang kanyang puso sa ilang paraan at nais niyang mapalambot ito ng Panginoon. Paano mo magagamit ang natutuhan mo ngayon para matulungan siya? Maaari mo ring ibahagi ang halimbawa ng Tagapagligtas at ang sarili mong mga personal na karanasan.

Maaari mong tapusin ang lesson sa pagbabahagi ng iyong patotoo tungkol sa mga katotohanan sa lesson na ito at sa kakayahan ng Panginoon na mapalambot ang ating puso upang tanggapin pa ang Kanyang mga salita.

Komentaryo at Impormasyon ng Konteksto

Alma 12:10–11. Ano ang pagkakaiba ng mga taong pinatitigas ang kanilang puso at ng mga taong hindi pinatitigas ang kanilang puso?

Itinuro ni Elder Donald L. Hallstrom ng Pitumpu:

Sinabi ni Apostol Pablo, ‘Maging tagatupad kayo ng salita, at hindi tagapakinig lamang’ (Santiago 1:22).

Ang ilan sa atin ay pinipili lang ang gustong “marinig” at “gumagawa” lang kapag madali ito. Ngunit para sa mga nagbibigay ng kanilang puso’t isipan sa Panginoon, walang kaibahan kung magaan o mabigat man ang pasanin. Nagpapakita tayo ng inilaang puso at isipan sa palagiang pagsunod sa mga kautusan ng Diyos gaano man kahirap ang mga sitwasyon. (Donald L. Hallstrom, “The Heart and a Willing Mind,” Ensign, Hun. 2011, 32)

Ano ang magagawa ko para maging marapat ang kalagayan ng aking puso?

Habang naglilingkod bilang miyembro ng Pitumpu, ipinaliwanag ni Elder Gerald N. Lund:

Ang maingat na pagsusuri sa kalagayan ng ating puso ay isa sa mahahalagang bagay na magagawa natin sa buhay na ito. …

… Ang kalagayan ng ating puso ay direktang nakakaapekto sa ating pagdama sa mga bagay na espirituwal. Gawin nating bahagi ito ng ating araw-araw na pagsisikap na buksan ang ating puso sa Espiritu. Dahil tayo ay mga tagapag-alaga ng ating puso, mapipili natin na gawin iyon. Pinipili natin ang bagay na papapasukin o pagbabawalan. Sa kabutihang palad sabik ang Panginoon na tulungan tayo na pagbutihan ang pagpili. (Gerald N. Lund, “Pagbubukas ng Ating Puso,” Liahona, Mayo 2008, 33–34)

Mga Karagdagang Aktibidad sa Pag-aaral

Matitigas na puso

Maaaring makatulong sa mga estudyante na pag-aralan ang mga talata sa banal na kasulatan na nagtuturo tungkol sa mga bunga ng pagkakaroon ng matigas na puso. Maaari mong pagpartner-partnerin ang mga estudyante at italaga sa kanila ang isa sa mga sumusunod na scripture block: Mga Hebreo 3:12–19; 1 Nephi 15:7–11; Alma 34:30–35; 3 Nephi 2:1–3. Sabihin sa mga estudyante na sama-samang basahin ang mga talata. Maaaring alamin ng isang estudyante kung paano pinatitigas ng mga tao ang kanilang puso habang inaalam ng isa pang estudyante ang mga kahihinatnan nito.

Nagpatotoo si Alma tungkol kay Jesucristo

Upang matulungan ang mga estudyante na madama ang katotohanan ng patotoo ni Alma na nakatala sa Alma 12–13, maaari mong gamitin ang video na “Binalaan ni Alma si Zisrom” (3:59), na matatagpuan sa ChurchofJesusChrist.org. Sabihin sa mga estudyante na pakinggan ang mga nangyayari kapag pinatitigas natin ang ating puso at ang mga pagpapalang matatamo sa pamamagitan ni Jesucristo ng mga taong hindi pinatitigas ang kanilang puso. Maaari mong i-pause ang video sa iba’t ibang bahagi para magbigay-diin at pagkatapos ay basahin at talakayin ang mga detalyeng pinakakapaki-pakinabang sa iyong mga estudyante.

Alma 12:19–37. Ang plano ng pagtubos

Kung makatutulong sa mga estudyante na talakayin pa ang plano ng pagtubos, ipaliwanag na isang lalaking nagngangalang Antionas, na isa sa mga punong tagapamahala sa Ammonihas, ang nagtanong tungkol sa itinuro nina Alma at Amulek tungkol sa pagkabuhay na mag-uli. Sinabi niya na itinuro ng mga banal na kasulatan na hindi tayo mabubuhay na mag-uli o mabubuhay magpakailanman dahil hinadlangan ng Diyos sina Adan at Eva na kumain ng bunga ng punungkahoy ng buhay matapos nilang kainin ang ipinagbabawal na bunga sa Halamanan ng Eden. (Tingnan sa Alma 12:20–21.)

Basahin ang Alma 12:22–37, at alamin kung paano sumagot si Alma sa pamamagitan ng pagtuturo ng tungkol sa plano ng pagtubos. Pag-isipang talakayin ang ating layunin sa mundo (tingnan sa Alma 12:24) at kung ano ang ginawa ng Ama sa Langit at ni Jesucristo para makabalik tayo sa Kanilang kinaroroonan (tingnan sa Alma 12:25, 30, 32–34).

Alma 12:32. Ang plano ng kaligtasan at mga kautusan

Itanong sa mga estudyante kung itinuro muna sa atin ng Diyos ang plano ng kaligtasan o ibinigay muna sa atin ang mga kautusan. Ipabasa sa kanila ang Alma 12:32 upang mahanap ang sagot. Sabihin sa mga estudyante na idrowing o i-outline ang plano ng kaligtasan sa kanilang study journal at ipaliwanag sa isang kapartner o maliit na grupo kung paano makatutulong sa atin ang kaalamang ito para maunawaan kung bakit kailangan nating sundin ang mga kautusan.