Alma 14

“Ito ay Alinsunod sa Kalooban ng Panginoon”

nakabilanggo sina Alma at Amulek

Dahil nabubuhay tayo sa mundong puno ng kasamaan, maraming tao ang tinatrato nang malupit at hindi makatarungan. Nang ituro nina Alma at Amulek ang ebanghelyo ni Jesucristo sa lunsod ng Ammonihas, pinahirapan ng masasamang tao ang mga mananampalataya at pinatay sila sa pamamagitan ng pagtapon sa kanila sa apoy. Pagkatapos ay ibinilanggo at labis na inusig sina Alma at Amulek. Ang layunin ng lesson na ito ay tulungan kang magtiwala sa Panginoon kapag nahaharap ka sa hirap, pagdurusa, at kawalang-katarungan.

Pagtuturo sa pamamagitan ng kapangyarihan ng Espiritu Santo. Ang Espiritu Santo ay nagpapatotoo sa lahat ng katotohanan at sumasaksi sa Ama at sa Anak. Itinuro ni Pangulong Henry B. Eyring, “Ang ating mga estudyante ay hindi makikilala ang Diyos, at gayon din ang pagmamahal, maliban kung sila ay tinuruan ng Banal na Espiritu” (“To Know and to Love God” [evening with a General Authority, Peb. 26, 2010], 2).

Paghahanda ng estudyante: Sabihin sa mga estudyante na pagnilayan ang anumang pagsubok na tiniis nila. Hikayatin silang pag-isipan kung paano nakatulong o makatutulong sa kanila ang kanilang tiwala sa Ama sa Langit at kay Jesucristo na matiis ang kanilang mga pagsubok.

Mga Posibleng Aktibidad sa Pag-aaral

Mga hamon sa buhay

Basahin ang sumusunod na pahayag ni Elder Anthony D. Perkins ng Pitumpu:

Elder Anthony D. Perkins

Saanman kayo nakatira, ang pisikal o emosyonal na pagdurusa dahil sa iba’t ibang uri ng mga pagsubok at mga kahinaang mortal ay naging bahagi, kasalukuyang bahagi, o magiging bahagi ng inyong buhay. (Anthony D. Perkins, “Alalahanin ang Inyong mga Nagdurusang Banal, O Aming Diyos,” Liahona, Nob. 2021, 103)

Hikayatin ang mga estudyante na mag-isip ng maraming sagot sa sumusunod na tanong hangga’t maaari, at maaari mong ilista ang mga ito sa pisara.

• Ano ang ilang iba’t ibang paraan na makatutugon tayo sa mga pagsubok?

Ang Alma 14 ay salaysay tungkol sa mga matwid na tao na nakaranas ng matitinding pagsubok. Karamihan sa mga pagsubok na ito ay kagagawan ng mga taong ginamit nang mali ang kanilang kalayaang pumili. Habang nag-aaral ka, isipin kung paano makatutulong sa iyo ang mga katotohanang natuklasan mo mula sa mga halimbawa nina Alma, Amulek, at ng iba pang mga matwid na tao na tumugon sa mga pagsubok ngayon at sa hinaharap.

Maaari mong isulat sa pisara ang mga sumusunod na pangalan. Sabihin sa mga estudyante na pumunta sa pisara at isulat kung ano ang dinanas ng bawat isa tulad ng inilarawan sa Alma 14:1–9. Kung ginamit mo ang video na “Naniwala si Zisrom, at ang Mabubuti ay Inusig” (3:51), na matatagpuan sa ChurchofJesusChrist.org, maaari kang mag-pause sa time code na 2:03.

• Alma at Amulek

• Zisrom

• Mga mananampalataya sa salita ng Diyos

Basahin ang Alma 14:1–9, at alamin ang mga halimbawa ng mga pagdurusang naranasan ng iba’t ibang tao. Maaari mo ring panoorin ang video na “Naniwala si Zisrom, at ang Mabubuti ay Inusig” (3:51), na matatagpuan sa ChurchofJesusChrist.org.

• Ano kaya ang mga tanong mo kung nakaranas ka ng mga pagsubok na tulad ng ilan sa mga pagsubok ng mga taong ito?

Maaari mong gamitin ang karagdagang aktibidad sa pag-aaral na may pamagat na “Alma 14:11. Walang-hanggang pananaw” upang matulungan ang mga estudyante na muling pag-aralan kung paano suriin ang mga konsepto at tanong nang may walang-hanggang pananaw.

Pagtitiwala sa Panginoon

Makatutugon tayo sa maraming paraan kapag dumaranas tayo ng pagdurusa o nasasaksihan natin ang pagdurusa ng iba. Basahin ang Alma 14:10–11, at alamin kung paano tumugon sina Amulek at Alma sa pagdurusa ng mga mananampalataya.

• Ninais mo na bang iligtas ang iyong sarili o ang ibang tao mula sa pasakit ng pagsubok, tulad ng ginawa ni Amulek? Bakit?

• Ano ang natutuhan mo tungkol sa Diyos mula sa tugon ni Alma sa talata 11?

Basahin ang Alma 14:12–13, at alamin ang katotohanang itinuro ni Alma tungkol sa kung paano tutugon kapag dumaranas tayo ng pagdurusa.

• Paano naipakita ng mga salita ni Alma na nagtitiwala siya sa Panginoon?

• Anong alituntunin ang maaari nating matutuhan mula sa halimbawa ni Alma?

Ang isang alituntunin na matututuhan natin ay kapag dumaranas tayo ng mga pagsubok at pagdurusa, mapipili nating magtiwala sa Panginoon anuman ang mangyari. Maaari mong isulat ang alituntuning ito sa iyong study journal at markahan ang pariralang “Ito ay alinsunod sa kalooban ng Panginoon” sa iyong mga banal na kasulatan.

• Sa iyong palagay, sa anong mga paraan na isang pagpili ang pagtitiwala sa Panginoon?

• Paano mo maipamumuhay ang pariralang “Ito ay alinsunod sa kalooban ng Panginoon” sa isang bagay na nararanasan mo ngayon?

Isipin kung paano mo matutulungan ang mga estudyante na suriin ang kanilang kakayahang magtiwala sa Panginoon sa panahong sinusubok sila. Maaari mong ilista sa pisara ang mga sumusunod na pahayag, at bigyan ng oras ang mga estudyante na tahimik na masuri ang kanilang sarili.

Pag-isipan ang iyong buhay at kalagayan. Ano ang ginagawa mo kapag ikaw o ang mga mahal mo sa buhay ay nakararanas ng pag-uusig, mga pagsubok, o kawalan ng katarungan? Sagutin ang mga sumusunod na pahayag gamit ang palagi, minsan, o hindi kailanman.

1. Nagtitiwala ako sa kalooban at takdang panahon ng Panginoon kapag nagdarasal ako na mapagaan ang aking mga pagsubok.

2. Tapat kong sinisikap na magtiis at umunawa kapag tila hindi makatarungan ang buhay.

3. Itinutuon ko ang aking pananampalataya kay Jesucristo at sa Kanyang mga walang-hanggang pangako sa halip na sa isang partikular na resulta na inaasam ko.

Nagbahagi si Elder Quentin L. Cook ng Korum ng Labindalawang Apostol ng isang pananaw na makatutulong sa atin na magtiwala sa Panginoon sa panahong sinusubok tayo. Panoorin ang video na “Kapayapaan sa Sarili: Ang Gantimpala ng Kabutihan” mula sa time code na 9:02 hanggang 9:33, na matatagpuan sa ChurchofJesusChrist.org, o basahin ang sumusunod:

Elder Quentin L. Cook

Lahat tayo ay nakibahagi sa mga kapulungan ng langit na naglaan ng kalayaang pumili, batid na magkakaroon ng pasakit sa mundo at maging ng napakatinding trahedya dahil sa maling paggamit ng kalayaan. Naunawaan natin na tayo ay magagalit, malilito, walang kalaban-laban, at manghihina dahil dito. Ngunit alam din natin na dadaigin at tutumbasan ng Pagbabayad-sala ng Tagapagligtas ang lahat ng kawalang-katarungan sa buhay na ito at maghahatid sa atin ng kapayapaan. (Quentin L. Cook, “Kapayapaan sa Sarili: Ang Gantimpala ng Kabutihan,” Liahona, Mayo 2013, 33–34)

• Ano ang natutuhan mo na makatutulong sa iyo kapag dumaranas ka ng pagdurusa o nalalaman mo ang pagdurusa ng iba?

Tiyaking nauunawaan ng mga estudyante ang sumusunod na impormasyon bilang bahagi ng talakayan.

Mahalagang tandaan na kung ikaw ay sinasaktan o inaabuso sa anumang paraan, dapat kang humingi ng tulong mula sa isang magulang o lider ng Simbahan upang matulungan ka nilang malutas ang problema. Mahal ka ng Panginoon at gusto Niyang makaramdam ka ng kapayapaan at kaligayahan.

Magpatuloy nang may pananampalataya at tiwala sa Panginoon

Matapos puwersahin sina Alma at Amulek na saksihan ang pagsunog sa mga matwid na mananampalataya, sila ay kinutya, binugbog, at ibinilanggo ng mga pinuno ng Ammonihas (tingnan sa Alma 14:14–17).

Magpasiya kung paano pinakamainam na mahihikayat ang mga estudyante sa iyong klase habang pinag-aaralan nila ang mga sumusunod na talata. Maaaring masiyahan ang mga estudyante sa sama-samang pagbabasa o pakikinig sa isang audio version at pagsabay sa pagbasa.

Kung makikinabang ang mga estudyante sa pagkukumpara ng salaysay na ito sa buhay ng Tagapagligtas, maaari mong gamitin ang karagdagang aktibidad sa pagtuturo na “Alma 14:14–24. Pagtulad sa halimbawa ni Jesucristo.”

Basahin ang Alma 14:18–29, at alamin kung paano nagtiwala sina Alma at Amulek sa Panginoon sa panahong sila ay nagdurusa. Maaari mo ring panoorin ang video na “Sina Alma at Amulek ay Mahimalang Naligtas mula sa Bilangguan” (2:45), na matatagpuan sa ChurchofJesusChrist.org.

• Paano patuloy na nagtiwala sa Panginoon sina Alma at Amulek sa panahong nahihirapan sila?

Sino ang kilala mo?

Maaari mong pagpartner-partnerin ang mga estudyante at anyayahan silang magbahagi tungkol sa mga taong kilala nila na mabubuting halimbawa ng pagtitiwala sa Panginoon sa mga oras ng pagsubok. Maaari ding magbahagi ang mga estudyante ng mga ideya kung paano nila mas mapagkakatiwalaan ang Panginoon sa panahong sinusubok sila.

Isipin ang isang tao sa iyong buhay na nagsisikap na magtiwala sa Panginoon sa mga oras ng pagsubok at paghihirap. Ano ang natutuhan mo mula sa kanyang halimbawa? Anong mga pagkakatulad ang nakita mo sa tugon ng taong ito at sa kung paano tumugon sina Alma at Amulek sa paghihirap?

Sumulat ng isa o dalawang partikular na bagay na magagawa mo para mas magtiwala sa Panginoon kapag mahirap o tila hindi makatarungan ang buhay. Maaari mong ilagay ang isinulat mo sa isang lugar kung saan madalas mo itong makikita.

Komentaryo at Impormasyon ng Konteksto

Paano ako matutulungan ni Jesucristo kapag hindi makatarungan ang buhay?

Ipinahayag ni Elder Dale G. Renlund ng Korum ng Labindalawang Apostol:

Elder Dale G. Renlund

Dahil tiniis ni Jesucristo ang walang-katapusang nagbabayad-salang sakripisyo, lubos Niyang nadarama ang ating nadarama. Alam Niya palagi ang nangyayari sa atin at ang ating sitwasyon.

Sa mortalidad, maaaring “lumapit tayong may katapangan” sa Tagapagligtas at tumanggap ng habag, pagpapagaling, at tulong [tingnan sa Mga Hebreo 4:16]. Kahit hindi maipaliwanag ang ating pagdurusa, maaari tayong pagpalain ng Diyos sa simple, karaniwan, at makabuluhang mga paraan. Kapag natutuhan nating kilalanin ang mga pagpapalang ito, mag-iibayo ang ating tiwala sa Diyos. Sa mga kawalang-hanggan, lulutasin ng Ama sa Langit at ni Jesucristo ang lahat ng kawalang-katarungan. Nauunawaan natin na nais nating malaman kung paano at kailan. Paano Nila gagawin iyon? Kailan Nila gagawin iyon? Sa pagkakaalam ko, hindi pa Nila naihahayag kung paano o kailan. Ang alam ko ay gagawin Nila iyon.

Sa mga di-makatarungang sitwasyon, ang isa sa ating mga gagawin ay magtiwala na “lahat ng di-makatarungan sa buhay ay naiwawasto sa pamamagitan ng Pagbabayad-sala ni Jesucristo” [Mangaral ng Aking Ebanghelyo: Gabay sa Paglilingkod ng Misyonero (2018), 57]. Dinaig ni Jesucristo ang sanlibutan at “tinanggap” ang lahat ng kawalang-katarungan. Dahil sa Kanya, maaari tayong magkaroon ng kapayapaan sa mundong ito at magalak. (Dale G. Renlund, “Nakagagalit na Kawalang-Katarungan,” Liahona, Mayo 2021, 43)

Mga Karagdagang Aktibidad sa Pag-aaral

Alma 14:11. Walang-hanggang pananaw

Maaaring makatulong sa mga estudyante na rebyuhin ang pangalawang alituntunin ng pagtatamo ng espirituwal na kaalaman, pagsusuri sa mga konsepto at tanong nang may walang-hanggang pananaw. Halimbawa, maaari mong sabihin sa mga estudyante na ipagpalagay na may isang taong malapit sa kanila na nakaranas ng trahedya at nagtanong, “Bakit nangyayari ang masasamang bagay sa mabubuting tao?” Pagkatapos ay magagamit ng mga estudyante ang mga katotohanan at alituntunin mula sa Alma 14:11 para matulungan ang kanilang kaibigan na gawing may walang-hanggang pananaw ang tanong.

Alma 14:13. “Ito ay alinsunod sa kalooban ng Panginoon.”

Kung makikinabang ang mga estudyante sa karagdagang pagsusuri ng kahulugan at kahalagahan ng pariralang ito, maaari mo silang anyayahang saliksikin ang mga banal na kasulatan para sa mga katulad na pahayag at ideya. Halimbawa, maaari mong ilista sa pisara ang mga sumusunod na reperensya at hatiin ang mga ito sa mga estudyante. Maaari mong anyayahan ang mga estudyante na ibahagi ang natutuhan nila at kung paano ito nauugnay sa pahayag ni Alma tungkol sa pananampalataya sa Alma 14:13.

• Daniel 3:12–18

• Mateo 26:36–39

• 1 Nephi 18:11–16

• Joseph Smith—Kasaysayan 1:22–25

• Ang pagbuhos ng alkitran at balahibo kay Edward Partridge (tingnan sa Mga Banal, Tomo 1, Ang Pamantayan ng Katotohanan, 206–7)

Alma 14:14–24. Pagtulad sa halimbawa ni Jesucristo

Ang Alma 14:14–24 ay naglalaman ng isang makapangyarihang kuwento tungkol kina Alma at Amulek na tinutularan ang halimbawa ni Jesucristo. Maaari mong ipabasa sa mga estudyante ang 1 Nephi 19:9 at iugnay ito sa Alma 14:14–24 sa kanilang mga banal na kasulatan. Pagkatapos ay maaaring suriin ng mga estudyante ang Alma 14:14–24, at alamin ang mga pagkakatulad ng tugon ng Tagapagligtas sa pagdurusa (tingnan sa Mateo 26:57–67; 27:26–31) at ng tugon nina Alma at Amulek. Maaari mong tukuyin ang sumusunod na alituntunin at pagkatapos ay anyayahan ang mga estudyante na mag-isip ng mga taong kilala nila na nagsisikap na mamuhay sa ganoong paraan: Kapag dumaranas tayo ng pagdurusa at paghihirap, mapipili nating mapagkumbabang tularan ang halimbawa ni Jesucristo.

Mga Mamamahayag

Matapos makumpleto ng mga estudyante ang assignment sa pagbabasa sa Alma 14:18–29, maaari mo silang anyayahang isipin na kunwari ay mga mamamahayag sila na may pagkakataong mainterbyu sina Alma at Amulek tungkol sa kanilang mga karanasan sa lunsod ng Ammonihas. Hikayatin ang mga estudyante na mag-isip ng mga itatanong nila kina Amulek at Alma hinggil sa natutuhan nila tungkol sa Panginoon at kung paano higit na magtitiwala sa Kanya sa panahong dumaranas ng mga pagsubok. Ilista sa pisara ang mga tanong na iyon. Pagkatapos ay maaari mong hatiin ang mga estudyante sa mga grupo na may tig-aapat na miyembro para magdula-dulaan, na may dalawang estudyanteng gumaganap bilang mga mamamahayag at dalawang estudyanteng gumaganap bilang Alma at Amulek. Maaaring gamitin ng mga estudyanteng gumaganap na mga mamamahayag ang mga tanong sa pisara para sa interbyu. Maaari mong hikayatin ang mga estudyante na gumaganap bilang Alma at Amulek na gamitin ang mga alituntunin at ideya mula sa Alma 14 para matulungan sila sa pagsagot.