« អាលម៉ា ៣២ ៖ ទិដ្ឋភាពទូទៅ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អាលម៉ា ៣២ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អាលម៉ា ៣២
« ពង្រឹងសេចក្ដីជំនឿរបស់អ្នក »
វត្ថុផ្សេងៗជាច្រើនអាចត្រូវបានប្រើដើម្បីជួយឲ្យយើងយល់អំពីដំណឹងល្អនៃព្រះយេស៊ូវគ្រីស្ទ ។ នៅពេលអាលម៉ា បានបង្រៀនពួកសាសន៍សូរាំ លោកបានប្រៀបធៀបព្រះបន្ទូលនៃព្រះទៅនឹងគ្រាប់ពូជមួយប្រភេទដែលយើងអាចដាំក្នុងចិត្តយើងបាន ដែលនៅទីបំផុតអាចក្លាយទៅជា « ដើមមួយ ពន្លកឡើងជាជីវិតដ៏អស់កល្បជានិច្ច » ( អាលម៉ា ៣២:៤១ ) ។ មេរៀននេះមានគោលបំណងជួយឲ្យអ្នកដាំព្រះបន្ទូលនៃព្រះនៅក្នុងចិត្តអ្នក និងបីបាច់ទីបន្ទាល់របស់អ្នកអំពីព្រះបន្ទូលនៃព្រះ ។
បង្រៀនពីលក្ខណៈដ៏ពិសិដ្ឋនៃបទពិសោធន៍ខាងវិញ្ញាណ ។ សូមរំឭកសិស្សអំពីលក្ខណៈដ៏ពិសិដ្ឋនៃបទពិសោធន៍ខាងវិញ្ញាណ ។ សិស្សមិនត្រូវមានអារម្មណ៍ថា បង្ខំឲ្យចែកចាយពីអារម្មណ៍ ឬបទពិសោធន៍របស់ពួកគេឡើយ ។ សូមលើកទឹកចិត្តពួកគេឲ្យប្រាប់គ្នាអំពីបទពិសោធន៍ផ្ទាល់ខ្លួនឲ្យបានត្រឹមត្រូវ នៅពេលបានបំផុសគំនិតដោយព្រះវិញ្ញាណ ។
ការរៀបចំសិស្ស ៖ សូមអញ្ជើញសិស្សឲ្យសួរមនុស្សជាទីស្រឡាញ់ម្នាក់ដែលមានទីបន្ទាល់អំពីដំណឹងល្អនៃព្រះយេស៊ូវគ្រីស្ទនូវអ្វីដែលបានជួយគាត់ ឬនាងឲ្យទទួល ឬពង្រឹងទីបន្ទាល់នោះបាន ។
សកម្មភាពរៀនសូត្រដែលអាចមាន
ការប្រៀបធៀប
សូមបង្ហាញប្រយោគមិនពេញលេញដូចខាងក្រោម ។ អ្នកអាចជ្រើសយកប្រយោគផ្សេងៗដែលនឹងធ្វើឲ្យសិស្សអ្នកចាប់អារម្មណ៍ ប៉ុន្តែសូមពិចារណាប្រើរបៀបប្រៀបធៀបចុងក្រោយដើម្បីជួយផ្លាស់ប្តូរទៅក្នុងខ្លឹមសារមេរៀនបាន ។
ការធ្វើការប្រៀបធៀបអាចជាវិធីដ៏មានប្រសិទ្ធភាពមួយដើម្បីបង្រៀន និងស្វែងយល់ដំណឹងល្អនៃព្រះយេស៊ូវគ្រីស្ទ ។ សូមបំពេញចន្លោះដូចខាងក្រោម ។ សូមមានភាពច្នៃប្រឌិត ហើយចាំមើលថាតើមានវិធីច្រើនជាងមួយដែលអ្នកអាចនឹងបំពេញប្រយោគនេះបានដែរឬទេ ។
-
ជីវិតគឺដូចជា ដោយសារតែ ។
-
ទូរសព្ទឆ្លាតវៃគឺដូចជា ដោយសារតែ ។
-
ការទទួលបានទីបន្ទាល់គឺដូចជា ដោយសារតែ ។
នៅពេលដែលអាលម៉ា និងអាមូលេក កំពុងបម្រើនៅក្នុងចំណោមពួកសាសន៍សូរាំ មនុស្សមួយក្រុមបានសម្តែងការព្រួយបារម្ភថា ពួកគេមិនអាចនឹងថ្វាយបង្គំព្រះបានទេ ដោយសារពួកគេត្រូវគេបណ្ដេញចេញពីកន្លែងថ្វាយបង្គំព្រះដោយសារតែភាពក្រីក្ររបស់ពួកគេ ( សូមមើល អាលម៉ា ៣២:៥ ) ។ ខណៈដែលយើងដឹងថា ព្រះអម្ចាស់បានបង្រៀនយ៉ាងច្បាស់អំពីសារៈសំខាន់នៃការទៅព្រះវិហាររបស់ទ្រង់នៅថ្ងៃឈប់សម្រាក អាលម៉ាបានឆ្លើយតបតាមរយៈការបង្រៀនអស់អ្នកដែលមិនត្រូវបានអនុញ្ញាតឲ្យចូលរួមក្នុងព្រះវិហារ អំពីសេចក្ដីពិតដ៏សំខាន់អំពីការថ្វាយបង្គំ ដែលអាចធ្វើឡើងក្នុងចិត្តយើងបាន ដោយមិនគិតពីទីកន្លែងជាក់ស្ដែងរបស់យើងឡើយ ។
សូមអានប្រយោគដំបូងរបស់ អាលម៉ា ៣២:២៨ បន្ទាប់មកអាន ខទី ៤១ ហើយរកមើលការប្រៀបធៀបដែល អាលម៉ាបានប្រើដែលអាចអនុវត្តចំពោះអ្នកផងដែរ ។
-
តើអ្នកពិនិត្យឃើញមានភាពស្រដៀងគ្នាអ្វីខ្លះរវាងការដាំដើមឈើហូបផ្លែពីគ្រាប់ពូជមួយ និងការរីកលូតលាស់ទីបន្ទាល់របស់អ្នកអំពីព្រះយេស៊ូវគ្រីស្ទ និងការបង្រៀនរបស់ទ្រង់ ?
បើសិស្សមិនប្រាកដថា តើទីបន្ទាល់គឺជាអ្វីទេនោះ សូមជួយឲ្យពួកគេយល់ថា វាគឺជា « តម្រិះ និងសាក្សីខាងវិញ្ញាណ ដែលព្រះវិញ្ញាណបរិសុទ្ធប្រទានឲ្យ » ( សេចក្តីណែនាំដល់បទគម្ពីរទាំងឡាយ « ទីបន្ទាល់ » នៅលើគេហទំព័រ scriptures.ChurchofJesusChrist.org ) ។
ការប្រៀបធៀបរបស់អាលម៉ា អំពីព្រះបន្ទូលនៃព្រះទៅនឹងគ្រាប់ពូជអាចអនុវត្តបាន ចំពោះការទទួលបានទីបន្ទាល់អំពីផ្នែកណាមួយនៃដំណឹងល្អ ។ ប៉ុន្តែក្រោយមក អាលម៉ាបានពន្យល់ថា វាគឺជាទីបន្ទាល់អំពីព្រះយេស៊ូវគ្រីស្ទដែលលោកបានសង្ឃឹមថា ពួកសាសន៍សូរាំទាំងនោះនឹងដាំនៅក្នុងចិត្តពួកគេ ( សូមមើល អាលម៉ា ៣៣:២២–២៣ ) ។
-
តើហេតុអ្វីបានជាជំនឿលើព្រះអង្គសង្គ្រោះចាត់ទុកថាជា « គ្រាប់ពូជ » ដ៏សំខាន់ដែលត្រូវដាំក្នុងចិត្តអ្នក ?
សូមចំណាយពេលបន្តិច ដើម្បីគិតអំពីភាពខ្លាំងនៃទីបន្ទាល់ជារួមដែលអ្នកកំពុងមានចំពោះព្រះយេស៊ូវគ្រីស្ទ និងការបង្រៀនរបស់ទ្រង់ ។ លើសពីនេះ សូមពិចារណាផងដែរថាតើមានផ្នែកណាមួយជាក់លាក់នៃទីបន្ទាល់របស់អ្នកដែលអ្នកចង់ពង្រឹងដែរឬទេ ដូចជាសេចក្តីស្រឡាញ់របស់ព្រះវរបិតាសួគ៌ចំពោះអ្នក ឬភាពពិតនៃការនិមិត្តដំបូងរបស់ យ៉ូសែប ស្ម៊ីធ ។ នៅពេលអ្នកបន្តសិក្សានៅថ្ងៃនេះ សូមរកមើលសេចក្ដីពិតដែលអាចជួយឲ្យអ្នកយល់កាន់តែច្បាស់អំពីរបៀបទទួលបាន ឬពង្រឹងទីបន្ទាល់របស់អ្នក ។
សូមពិចារណាបែងចែកសិស្សជាក្រុមតូចៗ និងផ្តល់សំណៅចែកឲ្យសិស្សមួយសន្លឹកម្នាក់ៗដូចខាងក្រោម ។ សូមអញ្ជើញសិស្សឲ្យអាន និងពិភាក្សាគ្នាជាក្រុមៗអំពីឯកសារដែលស្ថិតក្រោមចំណងជើងថា « ការដាំគ្រាប់ពូជ » ។ វាអាចនឹងមានអត្ថប្រយោជន៍ ដើម្បីចាត់សិស្សម្នាក់ពីក្រុមនីមួយៗឲ្យធ្វើជាអ្នកដឹកនាំការពិភាក្សា ។
បន្ទាប់មក អ្នកអាចដាក់ក្រុមបញ្ចូលគ្នា ហើយឲ្យសិស្សពិភាក្សាអំពីឯកសារនៅក្រោមចំណងជើងថា « ការថែទាំគ្រាប់ពូជ » ជាមួយក្រុមថ្មីរបស់ពួកគេ ។
ការដាំ និងថែរក្សាព្រះបន្ទូលនៃព្រះនៅក្នុងចិត្តយើង
ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤)—« អាលម៉ា ៣២ ៖ ‹ ពង្រឹងសេចក្ដីជំនឿរបស់អ្នក › »
ការដាំគ្រាប់ពូជ
សូមអាន អាលម៉ា ៣២:២១–២៣, ២៦–៣០ ហើយសម្គាល់ពាក្យ និងឃ្លាដែលជួយឲ្យអ្នកយល់ពីរបៀបចាប់ផ្តើមបណ្ដុះទីបន្ទាល់ ។
សូមចែកចាយជាមួយក្រុមរបស់អ្នកនូវពាក្យ និងឃ្លាដែលធ្វើឲ្យអ្នកចាប់អារម្មណ៍ និងមូលហេតុ ។ បន្ទាប់មក សូមពិភាក្សាសំណួរដូចខាងក្រោមនេះ ៖
-
តើអ្នកគិតថា វាមានន័យយ៉ាងណាក្នុងការ « ទុកកន្លែងមួយ » ឲ្យព្រះអង្គសង្គ្រោះ និងការបង្រៀនរបស់ទ្រង់នៅក្នុងចិត្តអ្នក ?
-
តើមានអ្វីខ្លះដែលអាចធ្វើឲ្យមនុស្សពិបាកធ្វើបែបនេះ ?
-
យោងតាម ខទី ២៨–៣០ តើមានអ្វីអាចកើតឡើង នៅពេលយើងដាក់ចិត្តយើងសម្រាប់ព្រះយេស៊ូវគ្រីស្ទ និងការបង្រៀនរបស់ទ្រង់ ?
សូមសរសេរសង្ខេបជាប្រយោគមួយអំពីអ្វីដែលអ្នកបានរៀនមកពីខគម្ពីរទាំងនេះ អំពីការជួយដល់ទីបន្ទាល់របស់អ្នកនៅក្នុងជំហានដំបូងៗរបស់វា ។
ការថែទាំគ្រាប់ពូជ
អាលម៉ាបានបង្រៀនថា ការដាំគ្រាប់ពូជ ហើយការរកឃើញថាវាល្អនោះ គឺគ្រាន់តែជាផ្នែកដំបូងនៃការបណ្តុះទីបន្ទាល់មួយប៉ុណ្ណោះ ។ សូមអាន អាលម៉ា ៣២:៣៧–៤៣ ដោយរកមើលការបង្រៀនដែលជួយអ្នកឲ្យយល់អំពីរបៀបជួយឲ្យទីបន្ទាល់មួយបន្តរីកលូតលាស់ ។
សូមចែកចាយជាមួយក្រុមរបស់អ្នកនូវពាក្យ និងឃ្លាដែលធ្វើឲ្យអ្នកចាប់អារម្មណ៍ និងមូលហេតុ ។ បន្ទាប់មក សូមពិភាក្សាសំណួរដូចខាងក្រោមនេះ ៖
-
តើអ្នកបានរៀនអ្វីខ្លះពី ខទី ៣៨–៤០ អំពីអ្វីដែលនឹងកើតឡើង បើយើងបដិសេធព្រះបន្ទូលនៃព្រះដែលបាន និងកំពុងរីកលូតលាស់នៅក្នុងចិត្តយើង ?
-
តើមានឧទាហរណ៍អ្វីខ្លះអំពីរបៀបដែលនរណាម្នាក់អាចបដិសេធទីបន្ទាល់របស់គាត់ ឬនាងអំពីព្រះយេស៊ូវគ្រីស្ទ និងការបង្រៀនរបស់ទ្រង់ ?
-
តើមានវិធីអ្វីខ្លះដែលអ្នកអាចបីបាច់ទីបន្ទាល់របស់អ្នកអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ដែលនឹងជួយធ្វើឲ្យទីបន្ទាល់កាន់តែរឹងមាំ ?
សូមសរសេរសង្ខេបជាប្រយោគមួយអំពីអ្វីដែលអ្នកបានរៀនមកពីខគម្ពីរទាំងនេះ អំពីការពង្រឹងទីបន្ទាល់មួយដែលកំពុងតែរីកចម្រើននៅក្នុងខ្លួនអ្នករួចហើយនោះ ។
© ឆ្នាំ ២០២៣ by Intellectual Reserve, Inc. All rights reserved.
បន្ទាប់ពីសិស្សបានបញ្ចប់ការសិក្សា និងការពិភាក្សាអំពីខគម្ពីរពីមុនៗជាមួយក្រុមពួកគេហើយ សូមឲ្យសិស្សពិភាក្សាគ្នាអំពីអ្វីដែលពួកគេបានរៀន ។ អ្នកអាចនឹងជ្រើសយកពីរបីសំណួរចេញពីសំណៅចែក ដើម្បីពិភាក្សាជាថ្នាក់ ដែលនឹងធានាថាសិស្សពិតជាយល់ពី គោលគំនិតដែលបានបង្រៀននៅក្នុងខគម្ពីរទាំងនេះ ។ សូមអញ្ជើញសិស្សពីរបីនាក់ឲ្យចែកចាយខ្លឹមសារសង្ខេបមួយប្រយោគរបស់ពួកគេ ដែលបានពីផ្នែកនីមួយៗនៃ សំណៅចែកនោះ ។
ដោយជាផ្នែកមួយនៃការពិភាក្សានេះ សូមឲ្យប្រាកដថា សិស្សបានលើកឡើងពីសេចក្តីពិតដែលស្រដៀងគ្នានឹងប្រយោគដូចតទៅនេះ ៖ បើយើងទុកកន្លែងមួយឲ្យព្រះយេស៊ូវគ្រីស្ទ និងការបង្រៀនរបស់ទ្រង់ក្នុងដួងចិត្តយើង នោះទីបន្ទាល់យើងនឹងចាប់ផ្តើមរីកលូតលាស់ ( សូមមើល អាលម៉ា ៣២:២៨–៣០ ) ។ នៅពេលយើងខិតខំបីបាច់ព្រះបន្ទូលនៃព្រះនៅក្នុងដួងចិត្តយើង នោះទីបន្ទាល់យើងអំពីព្រះយេស៊ូវគ្រីស្ទ និងដំណឹងល្អរបស់ទ្រង់នឹងបន្តរីកលូតលាស់ ( សូមមើល អាលម៉ា ៣២:៣៧, ៤០–៤២ ) ។
ទីបន្ទាល់របស់អ្នក
ដើម្បីជួយអ្នកឲ្យមើលឃើញរបៀបដែលការប្រៀបធៀបរបស់អាលម៉ាទាក់ទងនឹងទីបន្ទាល់របស់អ្នកអំពីព្រះយេស៊ូវគ្រីស្ទ និងដំណឹងល្អរបស់ទ្រង់ សូមគូរដ្យាក្រាមមួយដូចខាងក្រោមនៅក្នុងសៀវភៅកំណត់ហេតុការសិក្សារបស់អ្នក ។ សូមពង្រីករូបភាពរបស់អ្នកឲ្យពេញលើទំព័រទាំងមូល ដើម្បីឲ្យមានកន្លែងសរសេរបាននៅក្នុងដំណាក់កាលលូតលាស់នីមួយៗ ។
សូមបង្ហាញ ឬគូររូបភាពទាំងនេះនៅលើក្ដារខៀនដើម្បីឲ្យសិស្សចម្លងចូលក្នុងសៀវភៅកំណត់ហេតុការសិក្សារបស់ពួកគេបាន ។
សូមចំណាយពេលបន្តិចដើម្បីប្រៀបធៀបទីបន្ទាល់របស់អ្នកអំពីព្រះអង្គសង្គ្រោះ និងការបង្រៀនរបស់ទ្រង់ទៅនឹងការលូតលាស់នៃដើមឈើហូបផ្លែមួយដើម ។ សូមជ្រើសយកទិដ្ឋភាពនៃដំណឹងល្អរបស់ព្រះយេស៊ូវគ្រីស្ទឲ្យបានច្រើន ហើយសរសេរវាមួយៗនៅក្រោមដំណាក់កាលរីកលូតលាស់ ដែលអ្នកមានអារម្មណ៍ថាតំណាងឲ្យទីបន្ទាល់បច្ចុប្បន្នរបស់អ្នកនៅក្នុងផ្នែកទាំងនោះល្អបំផុត ។
ឧទាហរណ៍ មនុស្សម្នាក់អាចសរសេរថា « ព្រះយេស៊ូវគ្រីស្ទមានព្រះជន្មរស់ » នៅក្រោមដើមឈើហូបផ្លែ និង « អំណាចបព្វជិតភាព » នៅក្រោមគ្រាប់ពូជនេះ ។ បន្ទាប់មក បុគ្គលនោះអាចសរសេរផ្នែកផ្សេងៗទៀតនៃដំណឹងល្អរបស់ព្រះអង្គសង្គ្រោះដែលមានដូចជា « ព្យាការីដែលរស់នៅ » « កិច្ចការព្រះវិហារបរិសុទ្ធ » « ព្រះគម្ពីរមរមន » និង « ការអធិស្ឋាន » នៅក្រោមដំណាក់កាលរីកចម្រើនដែលតំណាងឲ្យទីបន្ទាល់របស់គាត់ ឬនាងនៅក្នុងផ្នែកនីមួយៗក្នុងចំណោមផ្នែកទាំងនោះ ។
សូមពិចារណាគូររូបនៅលើក្តារខៀនដើម្បីចែកចាយពីផ្នែកដែលទីបន្ទាល់របស់អ្នករីកលូតលាស់ពីគ្រាប់ពូជដែលអ្នកបានដាំ ។ សូមប្រយ័ត្នកុំប្រើឧទាហរណ៍ដ៏កម្រៗដែលអាចនឹងពិបាកឲ្យសិស្សភ្ជាប់ទំនាក់ទំនងបាន ។ សូមជួយឲ្យពួកគេឃើញថា ការរីកចម្រើនលូតលាស់ជាលំដាប់តាមរយៈបទពិសោធន៍ជាមួយនឹងព្រះវិញ្ញាណដឹកនាំទៅរកការបង្កើនសេចក្តីជំនឿ និងទីបន្ទាល់កាន់តែរឹងមាំបន្តិចម្តងៗ ។ អ្នកក៏អាចអញ្ជើញសិស្សឲ្យចែកចាយអំពីដំណើរការស្រដៀងគ្នាមួយអំពីផ្នែកនៃទីបន្ទាល់របស់ពួកគេផងដែរ ។
សូមដាក់ផែនការមួយអំពីរបៀបដែលអ្នកនឹងព្យាយាមអនុវត្តតាមការបង្រៀនរបស់អាលម៉ាទៅក្នុងជីវិតរបស់អ្នក ។ អ្នកអាចគិតដល់អ្វីដែលអ្នកអាចនឹងធ្វើបានដើម្បី « ទុកកន្លែងមួយ » នៅក្នុងដួងចិត្ត និងជីវិតអ្នកដើម្បីឲ្យផ្នែកមួយនៃទីបន្ទាល់អ្នកឲ្យដុះពន្លកឡើង ។ អ្នកអាចពិចារណាអំពីរបៀបដែលអ្នកអាច « បីបាច់ » ផ្នែកនានានៃទីបន្ទាល់របស់អ្នកដែលបានចាប់ផ្តើមលូតលាស់រួចមកហើយ ។ សូមកត់ត្រាគំនិត ចំណាប់អារម្មណ៍ និងគោលដៅរបស់អ្នកទៅក្នុងសៀវភៅកំណត់ហេតុការសិក្សាអ្នក ។