“Алма 57: Зарлигуудыг үргэлж дуулгавартай дагахыг хичээх нь,” Мормоны Номын багшийн гарын авлага (2024)
“Алма 57,” Мормоны Номын багшийн гарын авлага
Алма 57
Зарлигуудыг үргэлж дуулгавартай дагахыг хичээх нь
Зарлигуудыг сахих талаар та ямар хандлагатай байдаг вэ? Таны хандлага яагаад хамаатай вэ? Өөр нэгэн аюулт тулаанд тулалдаж байхдаа залуу дайчид “зарлигийн үг бүрийг яг таг” гүйцэтгэхдээ дуулгавартай байж, “Бурханд найдлагаа үргэлж тавьдаг” байв (Алма 21, 27). Энэ хичээл Бурханы зарлигуудыг үргэлж дуулгавартай дагахыг хичээхэд тань туслах зорилготой.
Суралцагчдад жилийн турш судлах ур чадвараа ашиглан, дадлага хийхэд тусал. Багш нар суралцагчдад ангидаа судар судлах олон янзын ур чадвар, сурах арга барилыг хэрхэн ашиглах талаар харуулж болно. Та түр зогсож, ямар нэг арга барил эсвэл ур чадварыг хэрхэн ашиглаж болох талаар товч ярилцаад, дараа нь хичээлийн дундуур түүгээрээ дадлага хийж болох юм. Суралцагчдыг тус ур чадварыг хувийн судлах ур чадвартаа ашиглахад нь мөн урамшуулан дэмж.
Суралцагчийн бэлтгэл: Суралцагчдыг Аврагч Тэнгэрлэг Эцэгийг дуулгавартай дагасан жишээнүүдийг болон тэдгээр жишээнээс юу сурч мэдэж болохыг тунгаан бодоход урь.
Боломжит суралцах үйл ажиллагаа
Зарлигуудад хандах хандлага
Суралцагчдыг зарлигуудыг сахих талаар суралцахад бэлдэхэд нь туслахын тулд тэднийг дараах үйл ажиллагааг хийхэд урь. Суралцагчдыг тодорхойлолтоо бодит бөгөөд хамаатай болгоход урь.
Хэн нэгэнд Бурханы зарлигуудыг сахих тал дээр байж болох гурван өөр хандлагыг мөн яагаад гэдгийг дүрсэл.
Суралцагчдыг хандлагуудын талаар ярилцаж байх хооронд тэдгээрийг самбарт бич. Суралцагчдыг хэн нэгэн яагаад ийм хандлагатай байж болох бодитой шалтгааныг хуваалцахад урамшуулан дэмж.
Судлах тэмдэглэлдээ дараах асуултуудад хариулж бичихэд цаг гарга.
-
Бурханы зарлигуудыг сахих талаар та ямар хандлагатай байдаг вэ? Таны хандлага яагаад хамаатай вэ?
-
Хэрвээ та одоогоор аль чадахаараа зарлигуудыг сахихыг хичээгээгүй байгаа бол танд үүнийг хийхэд юу саад болж байна вэ?
Та өнөөдөр судлах явцдаа таныг сүнслэгээр өдөөж урамшуулах, асуулт, санаа зовнисон зүйлд тань туслах дуулгавартай байдлын талаарх зарчмуудыг олж мэд. Тэдгээр нь таны амьдралд хэрхэн хэрэгжиж, адисалсан талаар тунгаан бод.
Залуу дайчид
Өмнөх хичээл дээр та нар нутгийн тэрхүү хэсэгт леменчүүдийн “хамгийн хүчирхэг”, “хамгийн олон тоотой” цэргүүдийг (Алма 56:34-ийг үзнэ үү) ялахад Антипуст болоод түүний хүмүүст 2000 залуу дайчин хэрхэн тусалсныг сурч мэдсэн. Алма 57-д Хиламан ахмад Моронайд бичсэн захидлаа үргэлжлүүлэв. Түүний армид аммончуудын жаран хөвгүүн нэгдсэн (Алма 57:6-г үзнэ үү) ба 2060 залуу дайчин өөр нэг аюул заналхийлэлтэй тулав. Хиламан ба түүний хүмүүсийг өмнө нь леменчүүдийн хоригдлуудыг дамжуулж байсан бүлэг цэрэгтэй нэгдэж байхад леменчүүд нифайчууд руу дайрч, тэднийг дарах гэж байв (Алма 57:1–18-ыг үзнэ үү).
Энэ түүхийг гүнзгий судалж, үүнээс сурах сургамжийг амьдралдаа хэрэгжүүлэхэд тань туслах судар судлах хоёр ур чадвар бол чухал үг эсвэл хэллэгийг тодорхойлж, тунгаан бодох явдал юм.
Юу тохиолдсоныг мэдэхийн тулд Алма 57:19–23-ыг унш. Хиламаны залуу дайчдыг дүрсэлсэн үг, хэллэгүүдийг тэмдэглэж ав.
Энэ ур чадварыг загварчлахын тулд Алма 57:19–20-ийг хамтдаа уншаад, “ухаршгүй” мөн “гуйвшгүй” зэрэг үг, хэллэгийг онцол. Суралцагчдыг эдгээр үгийн утгыг харж, ойлголтод нь хэрхэн нөлөөлснийг хуваалцахад урамшуулан дэмж. Дараа нь суралцагчдыг Алма 57:21–23 дахь бусад ач холбогдолтой үг, хэллэгийг олж, олж мэдсэн үгнийхээ талаар бодлоо хуваалцахад урь.
21-р шүлэг-т Хиламан эдгээр залуу эрийн дуулгавартай байдлыг хэрхэн дүрсэлснийг тэмдэглэж ав. Алма 58:40-ийг уншаад, дараагийн цэргийн аюул заналхийллийн дараах дайчдын Бурханд болон Түүний зарлигуудад хандсан хандлагыг олж мэд.
-
”Зарлигийн үг бүрийг яг таг гүйцэтгэх” (Алма 57:21) ба “түүний зарлигуудыг үргэлж дагахыг чармайдаг” (Алма 58:40) гэдэг нь юу гэсэн утгатай гэж та бодож байна вэ?
-
Есүс Христэд итгэх, Түүнийг дурсан санах нь Бурханы зарлигуудыг дуулгавартай дагах хүсэл болоод чадварт маань хэрхэн нөлөөлдөг вэ?
Алма 57:24–27-г уншаад, Хиламаны хөвгүүд Бурханд итгэн, Түүнийг дуулгавартай дагаснаар хоёр дахь тулалдаандаа хэрхэн адислагдсан болохыг харуулсан үг, хэллэгийг олж мэд.
Суралцагчдыг өөрсдөд нь онцгой санагдсан үг хэллэгийг мөн тэдгээр хэллэгээ яагаад чухал гэж бодож байгаагаа хуваалцахад урь.
-
Та энэ түүхээс таны өнөөдрийн амьдралтай холбогдох ямар зүйлийг сурч мэдсэн бэ?
Суралцагчдыг янз бүрийн зарчмыг хуваалцахад нь урамшуулан дэмж. Хариултуудыг самбар дээр бич.
Бид Бурханд найдаж, зарлигуудыг нь үргэлж дуулгавартай сахихыг хичээвэл Тэрээр биднийг Өөрийнхөө ер бусын хүчээр адисална гэсэн нэг зарчмыг сурч мэдэж болно.
-
“Гайхамшигт”, “ер бусын хүчтэй”, “шударга Бурхан” байдаг (Алма 57:26) гэдгийг мэдэх нь хэрхэн бидний Бурханыг дуулгавартай дагах хандлагад нөлөөлөх вэ?
-
Бид Түүний зарлигуудыг сахихыг хичээсэн ч төгс дуулгавартай байдалд хүрэхгүй байх үед Их Эзэн биднийг ямар хандлагатай байгаасай хэмээн хүсдэг гэж та бодож байна вэ? Есүс Христийн Цагаатгалын тухай таны ойлголт энэ асуултад хариулахад хэрхэн туслах вэ?
Биднийг Бурханы зарлигуудыг дуулгавартай дагах үед Тэрээр биднийг Өөрийн арга зам, цаг хугацаанд адисалдаг болохыг санах нь чухал. Залуу дайчид тулалдсан хоёр дайн тулаандаа аюултай тэмцэл, гэмтэл бэртлээс үл хамааран амь насаа аварч үлдэхээр адислагдсан байв.
Суралцагчдад дараахаас дор хаяж хоёрыг нь хийх хэдхэн минутын хугацаа өг.
-
Бурханы зарлигуудын зорилгын талаарх ойлголтоо нэмэгдүүлж, дуулгавартай байдлын тань төлөө Тэрээр таныг хэрхэн адислахыг мэдэхийн тулд дараах хэсгүүдээс дор хаяж хоёрыг унш: Абрахам 3:25; Иохан 14:15; Мозая 2:41; Алма 9:13.
-
Аврагчийн Тэнгэрлэг Эцэгт дуулгавартай байсны жишээг бодож, Түүний жишээнээс та юу сурч мэдсэнээ тунгаан бод. Арван хоёр төлөөлөгчийн чуулгын ахлагч Робэрт Д.Хэйлс (1932–2017) “Аврагчийг хайрлах бидний хайр бол Аврагчийн харуулсан дуулгавартай байдлыг олж авах түлхүүр нь юм” (““Хэрэв та нар Намайг хайрладаг бол Миний тушаалуудыг сахь,” 2014 оны 4-р сарын Ерөнхий чуулган, 55) гэдгийг заасан. Аврагчийг хайрладаг зарим шалтгаан, тэрхүү хайр тань зарлигуудыг дуулгавартай дагах таны хандлагад хэрхэн нөлөөлдөг талаар бод.
-
Бурханы зарлигуудад дуулгавартай байсан арга зам, дуулгавартай байдлын тань төлөө Түүний танд өгсөн адислалуудын талаар эргэцүүлэн бод.
Суралцагчдыг гүйцэтгэж дууссаны дараа тэднийг эдгээр зааврыг дагахын тулд чадах бүхнээ хийхэд урь: Босоод зогс. Ангийнхнаас нэг хүн сонгоод, эдгээр даалгаврын аль нэгээс юу сурч мэдсэнээ хуваалц. Ангийнхнаас өөр нэг хүнийг сонгоод, бусад даалгаврын аль нэгээс юу сурч мэдсэнээ хуваалц. Суудалдаа буцаад суу.
Суралцагчдыг хуваалцаж дууссаны дараа тэднийг өөрсдийн судалж мэдсэн зүйлээ эсвэл ангийн суралцагчийн хуваалцсан ямар нэг утга учиртай зүйлийг хуваалцахад урь.
Бурханы зарлиг, тушаалуудын нэгийг бод. Их Эзэнийг дурсан санаж, энэ зарлигийг үргэлж дуулгавартай дагахыг хичээх нь өнөөгийн өсвөр насныханд бодитоор ямар харагдаж болохыг дүрсэл. Ийм арга замаар дуулгавартай байдаг өсвөр насны хүүхэд ямар адислал хүлээн авахыг дүрсэл.
-
Бид зарлигийг дуулгавартай дагахын тулд хамгийн сайнаараа хичээхгүй байхад уруу татагдах зарим шалтгаан юу вэ? Бид эдгээр уруу таталтыг хэрхэн даван гарч чадах вэ?
-
Зарлигуудыг үргэлж сахихыг хичээх нь биднээс Аврагч Есүс Христэд найдахыг хэрхэн шаарддаг вэ?
Энэ хичээлийг дуусгахдаа, хэрхэн “Их Эзэн Бурханаа өдрөөс өдөрт дурсан санаж; [мөн] … түүний зарлигуудыг үргэлж дагахыг чармайхыг” (Алма 58:40) хүсэж байгаагаа зорилго болгож, судлах тэмдэглэлдээ бич. Та илүү сайн дуулгавартай дагахыг хүссэн тодорхой нэг зарлиг сонгож болно. Зорилгынхоо нэг хэсэг болгож өөртөө тодорхой цаг гарга—жишээ нь, “Би дараагийн таван өдрийн турш өдөр, шөнө чин сэтгэлээсээ залбирахаар хичээх болно” эсвэл “Би дараагийн дөрвөн долоо хоногийн турш Хүндэтгэлийн өдрөөр руу явах болно.”
Энэ хичээлд суралцагчдад өөрсдийнхөө явцыг үнэлэх боломж олгох “Суралцахуйгаа үнэлэх нь 7” байгаа гэдгийг мэдэх нь тустай байж болох юм.