« ហេលេមិន ៧–១០ ៖ ព្យាការីរបស់ព្រះអម្ចាស់ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« ហេលេមិន ៧–១០ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
ហេលេមិន ៧–១០
ព្យាការីរបស់ព្រះអម្ចាស់
នៅក្នុងពិភពលោកដែលពោរពេញដោយសំឡេងឈ្លោះប្រកែកគ្នា តើយើងអាចងាកទៅរកការដឹកនាំ និងសេចក្ដីពិតនៅទីណា ? របៀបមួយដែលព្រះអម្ចាស់ខិតខំដឹកនាំ និងជួយយើងនៅក្នុងជីវិតរមែងស្លាប់នេះគឺតាមរយៈការហៅព្យាការី ។ មេរៀននេះអាចជួយអ្នកឲ្យយល់អំពីតួនាទីដ៏សំខាន់របស់ព្យាការីនៅក្នុងផែនការរបស់ព្រះវរបិតាសួគ៌ ។
សូមស្រឡាញ់អ្នកទាំងឡាយដែលអ្នកបង្រៀន ។ សូមព្យាយាមបង្ហាញសេចក្ដីស្រឡាញ់ដល់សិស្សអ្នក ។ សូមបង្ហាញការចាប់អារម្មណ៍យ៉ាងស្មោះត្រង់ទៅលើជីវិតរបស់ពួកគេ សូមស្តាប់សំណួរ និងមតិរបស់ពួកគេដោយយកចិត្តទុកដាក់ ឲ្យពួកគេចូលរួមនៅក្នុងមេរៀន និងស្វាគមន៍ពួកគេនៅពេលអ្នកជួបពួកគេ ។ សូមបង្ហាញទំនុកចិត្តរបស់អ្នកថា សិស្សរបស់អ្នកអាច ហើយរស់នៅតាមដំណឹងល្អរបស់ព្រះយេស៊ូវគ្រីស្ទបាន ។
ការរៀបចំសិស្ស ៖ សូមអញ្ជើញសិស្សឲ្យពិភាក្សាជាមួយមិត្តភក្តិ ឬសមាជិកក្រុមគ្រួសារអំពីរបៀបដែលព្យាការីកំពុងនៅរស់មានឥទ្ធិពលលើជីវិតពួកគេ ។
សកម្មភាពរៀនសូត្រដែលអាចមាន
ហេតុអ្វីបានជាព្រះហៅព្យាការី ?
ដើម្បីចាប់ផ្តើមដំណើរការថ្នាក់រៀន សូមពិចារណាអញ្ជើញសិស្សឲ្យអនុវត្តការឆ្លើយតបរបស់ពួកគេចំពោះស្ថានភាពខាងក្រោម ។ អ្នកអាចសម្តែងធ្វើជាមិត្តភក្តិដែលមិនមែនជាសមាជិក ។ សូមអនុញ្ញាតឲ្យសិស្សមួយចំនួនចែកចាយអំពីរបៀបដែលពួកគេត្រូវឆ្លើយតប ។ សូមប្រាកដថា សិស្សដែលដឹងអំពីសាច់រឿងនេះនឹងត្រូវលើកយកមកបកស្រាយម្តងទៀត នៅពេលចុងបញ្ចប់នៃថ្នាក់រៀន ។
សូមស្រមៃថា មិត្តម្នាក់របស់អ្នកដែលមិនមែនជាសមាជិកសាសនាចក្របានមានការភ្ញាក់ផ្អើលនៅពេលដឹងថា អ្នកជឿថា ព្រះអម្ចាស់ហៅព្យាការីនៅសម័យយើងនេះ ។ មិត្តរបស់អ្នកឆ្ងល់ថា ហេតុអ្វីបានជាព្យាការីមានសារៈសំខាន់សម្រាប់សម័យយើងសព្វថ្ងៃនេះ ?
-
តើមានវិធីណាខ្លះដែលអ្នកអាចនឹងឆ្លើយតបទៅមិត្តរបស់អ្នកបាន ?
សូមគិតដល់អារម្មណ៍របស់អ្នកអំពីព្យាការីរបស់ព្រះអម្ចាស់ និងឆន្ទៈរបស់អ្នកនៅក្នុងការស្តាប់ និងធ្វើតាមពួកលោក ។ នៅពេលអ្នកសិក្សាថ្ងៃនេះ អ្នកនឹងមានឱកាសដើម្បីស្វែងយល់អំពីសេចក្ដីពិតសំខាន់ៗអំពីព្យាការី ។
នៅលើក្រដាសសមួយសន្លឹកនៅក្នុង ទិនានុប្បវត្តិសិក្សារបស់អ្នក សូមសរសេរចំណងជើងដូចតទៅ ៖ សេចក្ដីពិតអំពីព្យាការីរបស់ព្រះអម្ចាស់ ។ នៅក្នុងមេរៀននេះទាំងមូល សូមសរសេរសេចក្ដីពិតដែលអ្នកបានរៀនអំពីព្យាការីនៅពីក្រោមចំណងជើងនេះ ។
អ្នកក៏អាចសរសេរចំណងជើងនេះនៅលើក្ដារខៀន ហើយបន្ថែមនូវការយល់ដឹងរបស់សិស្សនៅពីក្រោមចំណងជើងនេះពេញមួយមេរៀននេះបានផងដែរ ។
ខ្លឹមសារភាគច្រើនដែលនឹងសិក្សានៅក្នុងសប្តាហ៍នេះ ( ហេលេមិន ៧–១២ ) និងនៅសប្តាហ៍ ក្រោយ ( ហេលេមិន ១៣–១៦ ) នឹងផ្តោតសំខាន់ទៅលើពួកព្យាការី ។ សូមពិចារណាណែនាំសិស្សឲ្យទុកកន្លែងគ្រប់គ្រាន់នៅក្នុងសៀវភៅកំណត់ហេតុការសិក្សាពួកគេ ដើម្បីឲ្យពួកគេអាចសរសេរបន្ថែមទៅក្នុងបញ្ជីរបស់ពួកគេនៅក្នុងរយៈពេលពីរបីសប្តាហ៍ខាងមុខទៀត ។
ព្យាការី នីហ្វៃ
នៅថ្ងៃនេះអ្នកនឹងរៀនអំពី នីហ្វៃ ដែលជាកូនរបស់ ហេលេមិន ។ បន្ទាប់ពីពួកសាសន៍នីហ្វៃនៅដែនដីភាគខាងជើងបានបដិសេធ នីហ្វៃបានវិលត្រឡប់ទៅផ្ទះលោកនៅសារ៉ាហិមឡាវិញ ។ ប្រជាជននៅទីនោះ ក៏ទុច្ចរិតខ្លាំងដែរ ។ ដោយការទួញសោកចំពោះអំពើទុច្ចរិតរបស់ពួកគេ នីហ្វៃបានទៅលើប៉មនៅក្នុងសួនរបស់លោក ហើយបានអំពាវនាវទៅកាន់ព្រះ ( សូមមើល ហេលេមិន ៧:១–១១ ) ។
សូមអាន ហេលេមិន ៧:១២–២២ ដោយការរកមើលអ្វីដែលនីហ្វៃបាននិយាយបន្ទាប់ពីបានដឹងថាមានមនុស្សបានប្រមូលគ្នាដើម្បីស្តាប់ការទួញសោករបស់លោក ។
-
តើអ្វីទៅជាសេចក្ដីពិតដែលអ្នកអាចសម្គាល់អំពីព្យាការីរបស់ព្រះអម្ចាស់ ដោយផ្អែកលើអ្វីដែល នីហ្វៃ បាននិយាយនៅក្នុងខគម្ពីរទាំងនេះ ?
សេចក្ដីពិតមួយដែលអ្នកអាចរកឃើញគឺថា ព្យាការីរបស់ព្រះអញ្ជើញមនុស្សឲ្យប្រែចិត្ត ។ សូមសរសេរសេចក្តីពិតនេះនៅក្នុងបញ្ជីដែលមានក្នុងសៀវភៅកំណត់ហេតុការសិក្សារបស់អ្នក ។
-
តើវាបង្រៀនអ្នកអ្វីខ្លះអំពីព្រះដែលទ្រង់នឹងហៅព្យាការីឲ្យទួញសោកអំពីការប្រែចិត្ត ?
មនុស្សជាច្រើនបានខឹងនឹងសារលិខិតរបស់នីហ្វៃ ។ ដើម្បីជួយប្រជាជនឲ្យយល់ថា លោកកំពុងនិយាយសេចក្ដីពិត នីហ្វៃបានប្រាប់ពួកគេដោយអព្ភូតហេតុអំពីព្រឹត្តិការណ៍ដែលបានកើតឡើងនៅខណៈពេលដែលលោកកំពុងផ្សព្វផ្សាយដំណឹងល្អដល់ពួកគេ ។
សូមពិចារណាអញ្ជើញសិស្សម្នាក់ឲ្យអានសេចក្តីសង្ខេបដូចតទៅនេះអំពី ហេលេមិន ៨:២៥–២៨; ៩:១–៣៦ ។ សិស្សក៏ត្រូវបានអញ្ជើញឲ្យអានខគម្ពីរទាំងនេះមុនពេលចូលរៀន ហើយរៀបចំដើម្បីសង្ខេបរឿងនេះជាពាក្យសម្ដីរបស់ពួកគេផ្ទាល់បានផងដែរ ។ ម៉្យាងទៀត អ្នកអាចចែកចាយវីដេអូនេះ « The Murder of the Chief Judge » ចាប់ពីនាទីទី១: ២៥ ដល់នាទីទី ៤: ០១ ដែលមាននៅលើគេហទំព័រ ChurchofJesusChrist.org°។
ពីដំបូងនីហ្វៃបានប្រាប់ប្រជាជនថា មេចៅក្រមរបស់ពួកគេ គឺស៊ីសូរាំត្រូវបានគេសម្លាប់ហើយ ( សូមមើល ហេលេមិន ៨:២៧–២៨ ) ។ ប្រជាជនបានមានអារម្មណ៍ថា « នីហ្វៃនេះច្បាស់ជាបានរួមគំនិតជាមួយនឹងនរណាម្នាក់ឲ្យសម្លាប់ចៅក្រម » ( ហេលេមិន ៩:១៦ ) ។ បន្ទាប់មក នីហ្វៃបានប្រាប់ប្រជាជនឲ្យស្វែងរក ស៊ីអានទុម ដែលជាប្អូនប្រុសរបស់ស៊ីសូរាំ ហើយសួរគាត់នូវសំណួរជាក់លាក់មួយចំនួន ។ នីហ្វៃបានប្រាប់ប្រជាជនយ៉ាងច្បាស់អំពីរបៀបដែលស៊ីអានទុមនឹងឆ្លើយតប ( សូមមើល ហេលេមិន ៩:២៦–៣៦ ) ។ ការណ៍នេះបាននាំឲ្យស៊ីអានទុមសារភាពថាគាត់ជាឃាតករ ហើយថា នីហ្វៃគ្មានទោសកំហុសអ្វីទេ ( សូមមើល ហេលេមិន ៩:៣៧ ) ។
សូមអាន ហេលេមិន ៩:៣៧–៤១ ដោយការរកមើលពីរបៀបដែលមនុស្សមានប្រតិកម្មបន្ទាប់ពីបានធ្វើជាសាក្សីចំពោះព្រឹត្តិការណ៍ទាំងនេះ ។
-
តើសេចក្ដីពិតអ្វីដែលអ្នករៀនមកពីបទពិសោធន៍របស់នីហ្វៃដែលអ្នកអាចនឹងបន្ថែមចូលទៅក្នុងបញ្ជីរបស់អ្នក ?
សេចក្ដីពិតមួយដែលអ្នកប្រហែលជាបានរកឃើញនោះគឺថា ពាក្យពេចន៍របស់ពួកព្យាការីនឹងត្រូវបានបំពេញ ។
-
ហេតុអ្វីបានជាអ្នកគិតថា ការដឹងសេចក្ដីពិតនេះអំពីព្យាការីមានសារៈសំខាន់ ?
-
តើមានឧទាហរណ៍អ្វីខ្លះទៀតនៃប្រសាសន៍របស់ពួកព្យាការីត្រូវបានបំពេញ ?
សូមពិចារណាចែកចាយឧទាហរណ៍ ផ្ទាល់ខ្លួនមួយដែលបង្ហាញអំពីរបៀបដែលប្រសាសន៍របស់ពួកព្យាការី ត្រូវបានបំពេញនៅក្នុងជីវិតរបស់អ្នក ។ ឧទាហរណ៍ ប្រហែលជាពរជ័យដែលបានសន្យាមកពីការធ្វើតាមដំបូន្មានរបស់ព្យាការី ។
សេចក្តីពិតបន្ថែមទៀតអំពីពួកព្យាការី
បន្ថែមពីលើសេចក្ដីពិតដែលបានរកឃើញរួចហើយ សេចក្តីពិតជាច្រើនទៀតអំពីតួនាទី និងគោលបំណងរបស់ព្យាការីនៃព្រះអម្ចាស់ត្រូវបានបង្ហាញដោយនីហ្វៃ និងទំនាក់ទំនងរបស់លោកជាមួយប្រជាជន ។ សូមបន្តអនុវត្តជំនាញស្វែងរកសេចក្ដីពិត នៅពេលអ្នកសិក្សាវគ្គបទគម្ពីរខាងក្រោម ។ សូមបន្ថែមអ្វីដែលអ្នកបានរកឃើញទៅក្នុងបញ្ជីរបស់អ្នក ។
សូមពិចារណាបង្ហាញសេចក្ដីយោងខាងក្រោមនេះ ហើយចាត់តាំងសិស្សឲ្យសិក្សាវគ្គបទគម្ពីរនីមួយៗជាគូៗ ឬជាក្រុមតូចៗ ។ សិស្សក៏អាចត្រូវបានចាត់តាំងនូវវគ្គបទគម្ពីរខុសៗគ្នាដើម្បីសិក្សា ហើយបន្ទាប់មកបង្រៀនគ្នាទៅវិញទៅមក ។
-
ហេលេមិន ៧:២៩ ៖ ការប្រកាសរបស់នីហ្វៃទៅដល់ប្រជាជនដែលបានប្រមូលផ្តុំគ្នាបន្ទាប់ពីបានឮលោកអធិស្ឋាន
-
ហេលេមិន ៨:១–៤ ៖ ប្រតិកម្មរបស់ពួកចៅហ្វាយចំពោះពាក្យពេចន៍របស់នីហ្វៃ
-
ហេលេមិន ៨: ២២-២៣ ៖ ការឆ្លើយតបរបស់នីហ្វៃ ចំពោះប្រជាជនដែលបានជេរប្រមាថលោក និងពាក្យពេចន៍របស់លោក
-
ហេលេមិន ១០:៥-៧ ៖ ការសន្ទនារបស់ព្រះអម្ចាស់ជាមួយនឹងនីហ្វៃបន្ទាប់ពីលោកបានបញ្ចាប់ការបង្រៀនដល់ប្រជាជន
-
តើមានសេចក្ដីពិតអ្វីខ្លះអំពីពួកព្យាការីដែលអ្នកបានរកឃើញនៅក្នុងខគម្ពីរទាំងនេះ ?
សូមបន្ថែមចម្លើយរបស់សិស្សទៅក្នុងបញ្ជីនៅលើក្ដារខៀន ។ ពួកគេអាចរកឃើញសេចក្ដីពិតដូចខាងក្រោមនេះ ។
-
សារលិខិតរបស់ព្យាការីមិនមែនជាសារលិខិតរបស់លោកផ្ទាល់ខ្លួននោះទេ ។ សារលិខិតនេះបានមកពីព្រះអម្ចាស់ ។ ( ហេលេមិន ៧:២៩ )
-
ពួកទុច្ចរិតមិនចូលចិត្តពួកព្យាការីឡើយ ។ ( ហេលេមិន ៨:១–៤ )
-
ពួកព្យាការីថ្លែងទីបន្ទាល់អំពីព្រះយេស៊ូវគ្រីស្ទ ។ ( ហេលេមិន ៨:២២–២៣ )
-
ព្រះអម្ចាស់ប្រទានអំណាចផ្សារភ្ជាប់ទៅដល់ព្យាការីរបស់ទ្រង់ ។ ( ហេលេមិន ១០:៥–៧ )
សិស្សនឹងមានឱកាសរៀនបន្ថែមអំពីសេចក្តីពិតនីមួយៗទាំងនេះនៅក្នុងមេរៀនបន្ទាប់ៗទៀត ។ សេចក្ដីពិតចំនួនពីរដំបូងដែលបានរៀបរាប់នឹងត្រូវសិក្សាយ៉ាងស៊ីជម្រៅនៅក្នុង ហេលេមិន ១៣–១៦ ។ សេចក្ដីពិតទីបី និងទីបួនដែលបានរៀបរាប់នឹងត្រូវសិក្សាយ៉ាងស៊ីជម្រៅនៅក្នុងមេរៀននៅចុងសប្តាហ៍នេះ ។
សារៈសំខាន់នៃពួកព្យាការីដែលនៅរស់
សូមដាក់បង្ហាញសេចក្តីណែនាំដូចខាងក្រោម ហើយទុកពេលឲ្យសិស្សគ្រប់គ្រាន់ដើម្បីបង្កើតចម្លើយមួយទៅនឹងសាច់រឿងដែលមាននៅដើមមេរៀននេះ ។
ដើម្បីជួយរៀបចំសិស្សឲ្យត្រៀមបង្កើតចម្លើយរបស់ពួកគេ នោះវាអាចមានអត្ថប្រយោជន៍ក្នុងការសុំឲ្យសិស្សរៀបរាប់អំពីបញ្ហាប្រឈមមុខទូទៅមួយចំនួនដែលក្មេងជំទង់ជួបប្រទះនៅសព្វថ្ងៃនេះ ។ ចម្លើយរបស់ពួកគេអាចសរសេរនៅលើក្ដារខៀននៅក្បែរនឹងសេចក្ដីពិតដែលពួកគេបានរកឃើញអំពីពួកព្យាការី ។ បន្ទាប់មក សិស្សអាចចែកចាយអំពីរបៀបដែលសេចក្ដីពិតមួយចំនួនដែលពួកគេ បានរកឃើញនៅថ្ងៃនេះ អាចនឹងជួយដោះស្រាយបញ្ហាប្រឈមមុខដែលពួកគេបានគិតដល់ ។
សូមគិតត្រឡប់ទៅសាច់រឿងពីមុននៅក្នុងមេរៀនអំពីមិត្តម្នាក់របស់អ្នកដែលបានឆ្ងល់អំពីមូលហេតុដែលពួកព្យាការីមានសារៈសំខាន់ក្នុងសម័យរបស់យើង ។
សូមសរសេរការឆ្លើយតបមួយទៅកាន់មិត្តរបស់អ្នកដែលពន្យល់អំពីមូលហេតុដែលវាមានសារៈសំខាន់ដែលព្រះអម្ចាស់ហៅពួកព្យាការីនៅក្នុងសម័យរបស់យើង ។ ការឆ្លើយតបរបស់អ្នកត្រូវមានយ៉ាងតិចណាស់មួយកថាខណ្ឌ ។
សំណួរខាងក្រោមទាំងនេះ អាចជួយអ្នកនៅក្នុងការឆ្លើយតបរបស់អ្នកបាន ៖
-
តើសេចក្ដីពិតមួយ ឬច្រើនដែលអ្នកបានរកឃើញជួយយើងដោះស្រាយបញ្ហាប្រឈមមុខដែលយើងឆ្លងកាត់ដោយរបៀបណា ?
-
តើបទពិសោធន៍អ្វីខ្លះដែលបានជួយអ្នកឲ្យស្គាល់ពរជ័យនៃការមានព្យាការីរស់នៅលើផែនដីនេះ ?
សូមអញ្ជើញសិស្សឲ្យចែកចាយចម្លើយរបស់ពួកគេជាមួយដៃគូ ។ ពួកអ្នកស្ម័គ្រចិត្តដដែលដែលបានសម្តែងអំពីស្ថានភាពនេះនៅពេលថ្នាក់ចាប់ផ្ដើម ក៏អាចត្រូវបានអញ្ជើញឲ្យឡើងមកខាងមុខថ្នាក់រៀន ហើយសម្តែងអំពីស្ថានភាពនេះម្តងទៀតបានផងដែរ ។
សូមថ្លែងទីបន្ទាល់អំពីសេចក្ដីពិតទាំងឡាយដែលអ្នកបានពិភាក្សា ហើយលើកទឹកចិត្តសិស្សឲ្យធ្វើសកម្មភាពតាមចំណាប់ អារម្មណ៍ខាងវិញ្ញាណណាមួយដែលពួកគេបានទទួលនៅអំឡុងពេលបង្រៀនមេរៀននេះ ។