“Хиламан 7–10: Их Эзэний бошиглогч,” Мормоны Номын багшийн гарын авлага (2024)
“Хиламан 7–10,” Мормоны Номын багшийн гарын авлага
Хиламан 7–10
Их Эзэний бошиглогч
Зөрчилдөөнтэй дуу хоолойгоор дүүрэн энэ ертөнцөд бид хаанаас чиглэл, үнэнийг хайж олох вэ? Их Эзэний биднийг мөнх бус амьдралд удирдан чиглүүлж, туслахыг эрэлхийлдэг нэг арга бол бошиглогчийг дуудах явдал юм. Энэ хичээл Тэнгэрлэг Эцэгийн төлөвлөгөөнд бошиглогчид ямар чухал үүрэг гүйцэтгэдэг болохыг ойлгоход тань тусалж чадна.
Зааж буй хүмүүсээ хайрла. Суралцагчдадаа хайраа харуулахыг хичээ. Тэдний амьдралыг чин сэтгэлээсээ сонирхож байгаагаа харуулж, асуулт, сэтгэгдлийг нь анхааралтай сонсож, хичээлд оролцуулан, тэдэнтэй таарах үедээ эелдгээр мэндчил. Суралцагчид тань Есүс Христийн сайн мэдээнээс суралцаж, үүний дагуу амьдарч чадна гэдэгт итгэлтэй байгаагаа илэрхийл.
Суралцагчийн бэлтгэл: Суралцагчдыг өнөөгийн бошиглогчид амьдралд нь хэрхэн нөлөөлсөн талаар найзтайгаа эсвэл гэр бүлийн гишүүнтэйгээ ярилцахад урь.
Боломжит суралцах үйл ажиллагаа
Бурхан яагаад бошиглогчдыг дууддаг вэ?
Хичээлээ эхлэхдээ суралцагчдыг дараах нөхцөл байдалд хэрхэн хариу үйлдэл үзүүлэх дадлага хийхэд урь. Та гишүүн биш найзын дүрд тоглож болно. Цөөн суралцагчаас хэрхэн хариулах байснаа хуваалцахыг зөвшөөр. Хичээлийн төгсгөлд энэ жишээг дахин авч үзэх болно гэдгийг суралцагчид мэдэж байгаа эсэхийг асуу.
Сүмийн гишүүн бус найз нарын тань нэг нь өнөө үед Их Эзэн бошиглогчдыг дууддаг гэдэгт итгэдгийг тань мэдээд, гайхаж байна гэж төсөөлөөд үз. Таны найз өнөө үед бошиглогчид яагаад хэрэгтэй гэдгийг мэдэхийг хүсэж байна.
-
Та найздаа хариулт өгч болох ямар ямар арга зам байна вэ?
Их Эзэний бошиглогчдын талаарх өөрийн мэдрэмжийг, мөн тэднийг сонсож, дагах хүсэлтэй байгаа талаараа бод. Та өнөөдөр судлах явцдаа бошиглогчдын талаарх чухал үнэнийг олж тогтоох боломжтой болно.
Судлах тэмдэглэлийнхээ хоосон хуудсан дээр дараах гарчгийг бич: Их Эзэний бошиглогчдын тухай үнэн. Хичээлийн турш бошиглогчдын тухай олж мэдсэн үнэнүүдээ энэ гарчгийн доор бич.
Та энэ гарчгийг мөн самбарт бичээд, хичээлийн туршид суралцагчдын ойлголтыг нэмж бичиж болно.
Энэ долоо хоногт (Хиламан 7–12) болон дараагийн долоо хоногт (Хиламан 13–16) судлах агуулгын ихэнх хэсэг бошиглогчид дээр төвлөрөх болно. Суралцагчдыг дараагийн хоёр долоо хоногийн турш жагсаалтдаа юм нэмж оруулахын тулд судлах тэмдэглэлдээ хангалттай зай гаргахыг зааварла.
Бошиглогч Нифай
Өнөөдөр та Хиламаны хүү Нифайн талаар сурч мэдэх болно. Нифай умард нутгийн нифайчуудын эсэргүүцэлтэй тулгарсныхаа дараа Зарахемла дахь гэртээ буцаж ирэв. Тэнд хүмүүс нь мөн маш ёс бус байв. Нифай тэдний ёс бусын төлөө гашуудаж, цэцэрлэгийнхээ цамхаг руу очиж, Бурханд хандан уйлав (Хиламан 7:1–11-ийг үзнэ үү).
Хиламан 7:12–22-ыг уншаад, хүмүүс түүний уйлахыг сонсохоор цугларсныг мэдээд, Нифай юу хэлснийг олж мэд.
-
Эдгээр шүлэг дэх Нифайн хэлсэн зүйл дээр үндэслэн та Их Эзэний бошиглогчдын талаарх ямар үнэнийг тодорхойлж чадах вэ?
Таны тодорхойлж болох нэг үнэн бол Бурханы бошиглогчид хүмүүсийг наманчлахад уриалдаг гэсэн үнэн юм. Энэ үнэнийг судлах тэмдэглэл дээрх жагсаалтдаа нэм.
-
Тэрээр бошиглогчдыг наманчлалыг тунхаглуулахаар дууддаг байсан нь Бурханы талаар танд юуг зааж байна вэ?
Маш олон хүн Нифайн захиасны улмаас уурлав. Нифай үнэнийг хэлж байгаагаа хүмүүст ойлгуулахын тулд номлож байхдаа болсон үйл явдлуудын талаар тэдэнд гайхамшигт байдлаар хэлсэн.
Нэг суралцагчийг дараах Хиламан 8:25–28; 9:1–36-ийн хураангуйг уншихад урь. Суралцагчийг хичээлийн өмнө эдгээр шүлгийг уншиж, энэ түүхийг өөрийн үгээр хураангуйлахад бэлтгэхийг урьж болно. ChurchofJesusChrist.org
Нифай эхлээд хүмүүст тэдний ерөнхий шүүгч Сизромыг алагдсан гэдгийг хэлэв (Хиламан 8:27–28-ыг үзнэ үү). Хүмүүс “Нифай шүүгчийг алахаар хэн нэгэнтэй тохиролцсон байх ёстой” (Хиламан 9:16) гэж үзжээ. Дараа нь Нифай хүмүүст Сизромын ах Сийнтумыг олж, түүнээс тодорхой асуултуудыг асуу гэж хэлэв. Нифай хүмүүст Сийнтум хэрхэн хариулахыг яг таг хэлэв (Хиламан 9:26–36-г үзнэ үү). Энэ нь Сийнтумыг алуурчин гэдгээ хүлээхэд хүргэж, Нифайн гэм буруугүй байсныг харуулав (Хиламан 9:37-г үзнэ үү).
Хиламан 9:37–41-ийг уншаад, эдгээр үйл явдлыг нүдээр үзсэний дараа хүмүүс хэрхэн хариу үйлдэл үзүүлснийг олж мэд.
-
Та Нифайн туршлагаас жагсаалтдаа нэмж болох ямар үнэнийг сурч мэдсэн бэ?
Таны тодорхойлж болох нэг үнэн бол бошиглогчдын үгс биелэх болно гэсэн үнэн юм.
-
Бошиглогчдын талаарх энэ үнэнийг мэдэх нь яагаад чухал гэж та бодож байна вэ?
-
Бошиглогчдын үгс биелсэн өөр бусад ямар жишээ байдаг вэ?
Бошиглогчдын үгс таны амьдралд хэрхэн биелснийг харуулсан хувийн туршлагаа хуваалц. Жишээлбэл: Бошиглогчийн зөвлөгөөг дагаснаар амлагдсан адислал ирсэн байж болох юм.
Бошиглогчдын талаарх нэмэлт үнэн
Аль хэдийн тодорхойлогдсон үнэнүүдээс гадна Их Эзэний бошиглогчийн үүрэг, зорилгын талаарх өөр маш олон үнэнийг Нифай, түүний хүмүүстэй харьцах харилцаагаар харуулсан байдаг. Судрын дараах хэсгүүдээс судлахдаа үнэнийг тодорхойлох ур чадвараа үргэлжлүүлэн дадлагажуул. Олж мэдсэн зүйлээ жагсаалтдаа нэм.
Дараах эшлэлүүдийг үзүүлж, суралцагчдад хэсэг бүрийг хоёр хоёроороо эсвэл жижиг бүлгээр судлахаар хуваарилж өг. Суралцагчид өөр өөр судрын хэсгүүдийг судалж, дараа нь бие биедээ зааж өгч болно.
Хиламан 7:29: Залбирахыг нь сонсоод цугларсан хүмүүст хэлсэн Нифайн үг
Хиламан 8:1–4: Нифайн хэлсэн үгэнд үзүүлж буй шүүгчдийн хариу үйлдэл
Хиламан 8:22–23: Түүнийг болон түүний үгийг доромжилсон хүмүүст хэлсэн Нифайн үг
Хиламан 10:5–7: Нифайг хүмүүст зааж дууссаны дараа түүнтэй ярьсан Их Эзэний яриа
-
Та эдгээр шүлгээс бошиглогчдын талаар ямар үнэнийг олж мэдсэн бэ?
Суралцагчдын хариултыг самбар дээрх жагсаалт дээр нэм. Тэд дараах үнэнийг тодорхойлсон байж болох юм.
Дараах нь таны тодорхойлж болох зарим үнэн юм. Тухайлбал:
Бошиглогчийн захиас нь түүний хувийнх бус. Энэ нь Их Эзэнээс ирдэг. (Хиламан 7:29)
Бошиглогчид ёс бус хүмүүсийн дунд нэр хүндтэй байдаггүй. (Хиламан 8:1–4)
Бошиглогчид Есүс Христийн тухай гэрчилдэг. (Хиламан 8:22–23)
Их Эзэн Өөрийн бошиглогчид лацдах хүчийг өгдөг. (Хиламан 10:5–7)
Суралцагчид дараагийн хичээлүүд дээр эдгээр үнэн бүрийн талаар илүү ихийг мэдэх боломжтой болно. Жагсаалтад орсон эхний хоёр үнэнийг Хиламан 13–16-д илүү гүнзгийрүүлэн судлах болно. Жагсаалтад орсон гурав, дөрөв дэх үнэнийг энэ долоо хоногийн сүүлээр хичээл дээр илүү гүнзгийрүүлэн судална.
Амьд бошиглогчдын ач холбогдол
Дараах зааварчилгааг үзүүлээд, хичээлийн эхэнд хэлсэн жишээнд хариулт өгөхийн тулд суралцагчдад хангалттай хугацаа өг.
Хариултаа өгөхөөр бэлтгэхэд суралцагчдад туслахын тулд өнөө цагт өсвөр үеийнхэнд тулгарч буй хамгийн нийтлэг сорилтыг нэрлэхийг суралцагчдаас хүсэх нь тустай байж болох юм. Тэдний хариултыг самбар дээр бошиглогчдын талаар тодорхойлсон үнэнийх нь хажууд жагсааж бичиж болно. Суралцагчид дараа нь өнөөдөр тодорхойлсон зарим үнэн нь тэдний бодож байсан сорилтыг даван туулахад хэрхэн тусалж болох талаар хуваалцаж болно.
Хичээлийн эхэнд хэлж байсан, бидний цаг үед бошиглогчид яагаад хэрэгтэй байгааг мэдэхийг хүсэж байсан найзынхаа тухай жишээг эргэн сана.
Найздаа өнөө цаг үед Их Эзэн бошиглогчдыг дуудах нь яагаад чухал болохыг тайлбарласан хариултыг бич. Таны хариулт багадаа нэг догол мөр байх ёстой.
Дараах асуултууд хариулахад тань тусална.
-
Таны тодорхойлсон нэг эсвэл хэд хэдэн үнэн бидэнд тулгарч буй сорилтыг даван туулахад хэрхэн тусалж чадах вэ?
-
Дэлхий дээр амьд бошиглогчид байхын адислалыг олж танихад тань ямар туршлага тусалсан бэ?
Суралцагчдыг хариултаа хамтрагчтайгаа хуваалцахад урь. Хичээлийн эхэнд нөхцөл байдлыг сайн дураараа жүжиглэн харуулсан суралцагчдыг мөн ангийн урд гарч, нөхцөл байдлын өөр дүрд тоглоход урьж болно.
Хэлэлцсэн үнэнийхээ талаар гэрчлээд, суралцагчдыг хичээлийн үеэр авсан сүнслэг сэтгэгдлийнхээ дагуу үйлдэхэд урамшуулан дэмж.