3 Nefi 2–5

“Gati T’i Përballonin … në Fuqinë e Zotit”

nefitë duke mbledhur gjithë popullin, zotërimet dhe vathët e tyre në një vend për t’u përgatitur për luftën që po vinte

Minerva Teichert (1888–1976), The Answer of Lachoneus, 1949–1951, vaj në pëlhurë mbi dru të presuar, 91 x 122 cm. Muzeu i Arteve i Universitetit “Brigam Jang”.

Ashtu siç përballemi me sfida para rikthimit të Shpëtimtarit, nefitët u përballën me sfida në vitet përpara se Ai të vinte tek ata. Hajdutët e Gadiantonit kërcënuan se do t’i shkatërronin nefitët. Sidoqoftë, nefitët “ishin gati t’i përballonin … në fuqinë e Zotit” (3 Nefi 4:10). Si nefitët, ne mund t’i kapërcejmë sfidat duke qenë të përgatitur. Ky mësim mund të të ndihmojë të marrësh fuqinë e Zotit duke qenë i/e përgatitur shpirtërisht dhe materialisht.

Ftesa ndaj nxënësve që të ndërmarrin veprim të drejtë e të efektshëm. Ndërsa nxënësit i studiojnë shkrimet e shenjta, ndihmojini ata t’i dallojnë pasojat e zgjedhjeve dhe veprimeve të shënuara tek tregimet. Inkurajojini nxënësit t’i lidhin këto mësime me jetën e tyre dhe të përcaktojnë se si mund ta ndjekin me besnikëri Shpëtimtarin.

Përgatitja e nxënësve: Ftojini nxënësit t’i diskutojnë me pjesëtarët e familjes ose udhëheqësit e Kishës bekimet që vijnë nga të qenit të përgatitur materialisht ose shpirtërisht.

Veprimtari të Mundshme të të Mësuarit

Ji i/e përgatitur

Qëllimi i kësaj veprimtarie është t’i ndihmojë nxënësit të kuptojnë rëndësinë e të qenit të përgatitur. Ndihmojini nxënësit të mendojnë për rrethana për të cilat kanë nevojë të përgatiten. Merreni parasysh të tregoni rreth një kohe kur u bekuat ngaqë ishit i/e përgatitur ose kur patët vështirësi ngaqë ishit i/e papërgatitur.

Mendo për një kohë në jetën tënde kur u ndjeve i përgatitur ose i papërgatitur.

• Cila ishte situata dhe pse u ndjeve i/e përgatitur ose i/e papërgatitur?

• Nëse u ndjeve i/e papërgatitur, çfarë ke bërë për t’u përgatitur më mirë në të ardhmen?

• Çfarë ke bërë që të përgatitesh shpirtërisht për sfidat me të cilat po përballesh ose mund të përballesh në të ardhmen?

Ndërsa i studion vargjet tek 3 Nefi 2–5, kërko udhërrëfimin e Shpirtit që të dish se çfarë mund të bësh për t’u përgatitur materialisht dhe shpirtërisht për të ardhmen.

Përgatitjet e Lakoneusit

Profeti Samuel profetizoi se do të kishte një natë pa errësirë si një shenjë e lindjes së Jezu Krishtit. Kur kjo profeci u përmbush (shih tek 3 Nefi 1:15–19), “pjesa më e madhe e njerëzve besuan dhe u kthyen në besim te Zoti” (3 Nefi 1:22). Megjithatë, pas pak vjetësh, disa filluan të mos kishin besim.

Për veprimtarinë vijuese, mund ta ndani klasën në gjysmë ose në dyshe. Gjysma e nxënësve mund të lexojë njërin nga fragmentet vijuese dhe t’ia raportojë atë që gjeti klasës ose partnerit të vet.

Lexo tek 3 Nefi 1:27–30 dhe 3 Nefi 2:1–3, duke kërkuar arsyet pse disa njerëz u larguan nga Zoti.

• Çfarë mësimesh mund të marrim nga këto vargje që mund të na ndihmojmë të qëndrojmë të vërtetë ndaj Zotit në kohën tonë?

Hajdutët e Gadiantonit u rritën në numër dhe luftuan kundër nefitëve. Si përgjigje, “gjithë Lamanitët që ishin kthyer në besim te Zoti u bashkuan me vëllezërit e tyre, Nefitët” (3 Nefi 2:12). Gidianhi, udhëheqësi i hajdutëve të Gadiantonit, i shkroi një letër Lakoneusit, kryegjykatësit të nefitëve. Në të, ai kërcënonte se do t’i shkatërronte nefitët nëse ata nuk dorëzoheshin (shih tek 3 Nefi 3:1–10).

Lexo tek 3 Nefi 3:11–12, duke kërkuar se si u përgjigj Lakoneusi.

• Çfarë prove sheh për besimin e Lakoneusit te Zoti?

Shkruajini fjalët Përgatitjet e Nefitëve në tabelë. Merreni parasysh t’i ndani fragmentet vijuese mes disa anëtarëve ose grupeve të klasës. Ftojini nxënësit të renditin në tabelë atë që bënë njerëzit që të përgatiteshin materialisht dhe shpirtërisht.

• 3 Nefi 3:13–16

• 3 Nefi 3:17–21

• 3 Nefi 3:22–26

• 3 Nefi 4:3–4

Për t’i ndihmuar nxënësit të dallojnë përgatitjet nga ana materiale, mund të vini në dukje se si nefitët ndërtuan fortifikime, vendosën roja dhe grumbulluan furnizime dhe ushqim. Për përgatitjet shpirtërore, mund të vini në dukje se si u penduan dhe u lutën për çlirim.

• Cilat përgatitje mendon se ndihmuan më së shumti? Përse?

• Si mendon se këto përgatitje i ndihmuan që të mbështeteshin te Zoti?

Lexo tek 3 Nefi 4:7–12, duke kërkuar se si nefitët u bekuan për shkak të përgatitjeve të tyre shpirtërore dhe materiale.

• Çfarë parimesh mund të mësojmë nga ky tregim? (Shih tek 3 Nefi 4:10.)

Një nga parimet që mësojmë nga ky tregim është: Kur e përgatitim veten shpirtërisht dhe materialisht, Zoti do të na forcojë për t’i kapërcyer ose duruar sfidat.

Përgatitjet në kohën tonë

Shkruajini fjalët Paralelizma Bashkëkohorë në tabelë dhe ndihmojini nxënësit të krijojnë një listë me përgatitjet që mund të bëjmë në kohën tonë. Këto mund të jenë përgatitje të ngjashme me të nefitëve ose përgatitje të tjera që na kanë këshilluar profetët të bëjmë. Diskutoni sfida specifike me të cilat përballemi në kohën tonë dhe mënyrën se si këto përgatitje mund të na ndihmojnë të jemi të përgatitur në fuqinë e Zotit. Për t’i ndihmuar nxënësit të mendojnë ide, merreni parasysh të shfaqni materialin filmik “Temporal Preparedness Resources” [“Burime mbi të Qenit të Përgatitur Materialisht”] (3:09), në dispozicion në ChurchofJesusChrist.org.

• Zgjidh një ose më shumë përgatitje nga lista jote. Si mund të na ndihmojë ajo të kapërcejmë sfidat specifike me të cilat përballemi në kohën tonë?

• Në çfarë mënyrash mendon se përgatitja jonë e lejon Zotin të na forcojë?

Hajdutët e Gadiantonit ngritën një rrethim që dështoi sepse nefitët patën ndihmë hyjnore në përgatitjen e tyre. Përfundimisht hajdutët e Gadiantonit u zmbrapsën. Ata u përjashtuan nga ushtria nefite dhe u dorëzuan vetë si të burgosur ose u vranë (shih tek 3 Nefi 4:16–27).

Lexo tek 3 Nefi 4:30–33; 5:1–4, duke kërkuar se si reaguan njerëzit ndaj forcimit nga Zoti.

• Si e tregoi reagimi i tyre besimin e tyre te Perëndia?

Nëse doni, mund të paraqitni ftesën vijuese për të reflektuar si dhe thënien nga Presidenti Nelson për të cilën nxënësit të përsiatin dhe të reflektojnë.

Reflekto për një kohë kur mund ta kesh ndier fuqinë e Zotit duke u përgatitur materialisht dhe shpirtërisht.

Presidenti Rasëll M. Nelson dëshmoi për bekimet e të qenit të përgatitur:

Presidenti Rasëll M. Nelson

“Kundërshtari nuk resht kurrë së sulmuari. Kështu që, ne kurrë nuk mund të reshtim së përgatituri! Sa më të mbështetur te vetja të jemi – materialisht, emocionalisht dhe shpirtërisht – aq më të përgatitur jemi për të penguar sulmet e pareshtura të Satanit. …

Nuk po them se ditët përpara do të jenë të lehta, por ju premtoj se e ardhmja do të jetë e lavdishme për ata të cilët janë të përgatitur dhe që vazhdojnë të përgatiten për të qenë mjete në duart e Zotit.” (Rasëll M. Nelson, “Përqafojeni të Ardhmen me Besim”, Ensign ose Liahona, nëntor 2020, f. 76)

Sipas nevojës, jepni shembuj të gjërave për të cilat nxënësit kanë nevojë të përgatiten, për shembull shërbimi misionar, mundësi arsimore, një karrierë, katastrofa natyrore ose ardhja e Shpëtimtarit.

Mendo për një sfidë, situatë ose ngjarje për të cilën duhet të përgatitesh. Reflekto për faktin se sa i/e përgatitur ndihesh sot. Kërko udhërrëfimin e Shpirtit ndërsa u përgjigjesh këtyre pyetjeve.

• Çfarë veprimesh specifike mund të ndërmarrësh për t’u përgatitur?

• Si mund ta përfshish Zotin në përgatitjet te tua?

Dëshmoni për bekimet që vijnë nga të qenit të përgatitur. Inkurajojini nxënësit të flasin me familjet rreth sfidave me të cilat mund të përballen dhe si të përgatiten materialisht dhe shpirtërisht.

Komente dhe Informacion për Rrethanat

Si mund të përgatitemi?

Presidenti Rasëll M. Nelson dha mësim:

Presidenti Rasëll M. Nelson

“Na është premtuar që ‘nëse je[m]i të përgatitur, [ne] s’do të frikësohe[m]i’ [Doktrina e Besëlidhje 38:30]. Kjo siguri ka ndikime të thella sot. Zoti ka shpallur se pavarësisht nga sfidat e sotme të pashembullta, ata që i ndërtojnë themelet e tyre mbi Jezu Krishtin dhe kanë mësuar se si të mbështeten te fuqia e Tij, nuk kanë nevojë t’u dorëzohen shqetësimeve të pashoqe të kësaj epoke.” (Rasëll M. Nelson, “Tempulli dhe Themeli Juaj Shpirtëror”, Liahona, nëntor 2021, f. 94)

Presidenti Dallin H. Ouks, i Presidencës së Parë, shpalli:

Presidenti Dallin H. Ouks

“Duhet të bëjmë edhe përgatitje materiale dhe shpirtërore për ngjarjet e profetizuara në kohën e Ardhjes së Dytë. Dhe përgatitja që ka të ngjarë të shpërfillet, është ajo më pak e dukshmja dhe më e vështira – shpirtërorja.” (Dallin H. Oaks, “Preparation for the Second Coming”, Ensign ose Liahona, maj 2004, f. 9)

Plaku Dejvid A. Bednar, i Kuorumit të Dymbëdhjetë Apostujve, shpjegoi:

Plaku Dejvid A. Bednar

“Përpjekjet tona që të përgatitemi për përvojat sprovuese në vdekshmëri, duhet të ndjekin shembullin e Shpëtimtarit i cili gradualisht u ‘rrit në dituri, në shtat dhe në hir përpara Perëndisë dhe njerëzve’ [Lluka 2:52] – një ekuilibër i ndërthurur i gatishmërisë intelektuale, fizike, shpirtërore dhe shoqërore”. (Dejvid A. Bednar, “Ne do t’i Provojmë me Këtë”, Ensign ose Liahona, nëntor 2020, f. 9)

Plaku Kuentin L. Kuk, i Kuorumit të Dymbëdhjetë Apostujve, dha mësim:

Plaku Kuentin L. Kuk

“Stuhitë dhe tundimet e kësaj jete shpeshherë janë të paparashikueshme. Por një gjë ne e dimë: ato do të vijnë! Në mënyrë që t’i mposhtim sfidat dhe tundimet që secili prej nesh has pashmangshmërisht, do të kërkohet përgatitje e drejtë dhe përdorim i mbrojtjeve të siguruara në mënyrë të hyjnore. Ne duhet të vendosim që të jemi të denjë për në tempull pavarësisht nga çfarë na ndodh. Nëse jemi të përgatitur, nuk do të frikësohemi.” (Kuentin L. Kuk, “Të Rregullt dhe Sipas Modës së Bristolit: Jini të Denjë për në Tempull – në Kohë të Mira dhe në Kohë të Këqija”, Ensign ose Liahona, nëntor 2015, f. 39)

3 Nefi 2:15. Çfarë do të thotë që “mallkimi që ishte mbi ta u hoq”?

Në kohën e Nefit, mallkimi i lamanitëve ishte që ata u “përjasht[uan] nga prania e [Zotit] … për shkak të paudhësisë së tyre” (2 Nefi 5:20–21). Ky mallkim zgjati vetëm për aq kohë sa njerëzit ishin të ligj. Kur lamanitët më vonë e përqafuan ungjillin e Jezu Krishtit, “mallkimi i Perëndisë nuk i ndoqi më” (Alma 23:18). Tek 3 Nefi 2, mallkimi iu hoq lamanitëve që u kthyen në besim te Zoti (shihni tek 3 Nefi 2:12, 15).

Veprimtari Plotësuese të të Mësuarit

Shembulli i Shpëtimtarit për përgatitjen

Nxënësit mund të kenë dobi nga të parit e shembullit të Shpëtimtarit për përgatitjen. Ata mund të lexojnë te Lluka 2:52 dhe thënien nga Plaku Dejvid A. Bednar në pjesën “Komente dhe Informacion për Rrethanat”. Diskutoni mënyra se si nxënësit mund të përgatiten në këto fusha. Mund edhe t’i ftoni nxënësit t’u referohen synimeve që mund të kenë vendosur për zhvillimin vetjak te Fëmijët dhe Rinia.

3 Nefi 2:1–3. Kujtojini përvojat shpirtërore

Merreni parasysh diskutimin e rëndësisë së të të kujtuarit të përvojave tona shpirtërore. Pas leximit tek 3 Nefi 2:1–3, mund të diskutoni se çfarë ndodh nëse i harrojmë përvojat shpirtërore që kemi pasur. Më pas ftojini nxënësit të tregojnë veprime që ndërmarrin për ta kujtuar dhe përtërirë dëshminë e tyre për të vërtetat shpirtërore. Ata mund edhe t’i shënojnë përvojat e mëparshme shpirtërore në ditarin e tyre të studimit.

Për informacione të tjera mbi këtë temë, shihni sa vijon:

• Henri B. Ajring, “O, Kujtoni, Kujtoni”, Ensign ose Liahona, nëntor 2007, f. 66–69

• Ronald A. Rasband, “Në Mënyrë që të Mos Harroni”, Ensign ose Liahona, nëntor 2016, f. 113–115

• Nil L. Andersen, “Kujtime që të Përcaktojnë Shpirtërisht”, Ensign ose Liahona, maj 2020, f. 18–22

3 Nefi 3:2–12. Gidianhi tundon Lakoneusin

Kjo veprimtari mund t’i ndihmojë nxënësit të kuptojnë se si Satani dhe pasuesit e tij shpesh përdorin lajka, premtime të rreme dhe kërcënime për t’i udhëhequr njerëzit në udhë të gabuar. Lexoni tek 3 Nefi 3:2–10, duke kërkuar fjalë ose fraza që ilustrojnë taktikat e përdorura nga Gidianhi në përpjekje për ta dobësuar besimin e Lakoneusit. Diskutoni se si përdoren taktika të ngjashme kundër rinisë sot. Më pas lexoni tek 3 Nefi 3:11–12, duke kërkuar mënyrën se si u përgjigj Lakoneusi. Diskutoni se si burrat dhe gratë e drejta nuk kanë pse të kenë frikë nga të ligjtë ose t’i jepen kanosjes së tyre.

3 Nefi 5:23–26. Mbledhja e Izraelit

Nxënësit më pas mund ta krahasojnë mbledhjen e nefitëve tek 3 Nefi 3–4 me mbledhjen e Izraelit. Lexoni tek 3 Nefi 5:23–26 dhe diskutoni mbledhjen e Izraelit. Ndihmojini nxënësit të shohin se Izraeli mblidhet teksa njerëzit arrijnë ta “njohin Shëlbuesin e tyre që është Jezu Krishti, Biri i Perëndisë” (3 Nefi 5:26).

Shihni edhe Rasëll M. Nelson dhe Uendi W. Nelson, “Shpresa e Izraelit” (takim shpirtëror mbarëbotëror për rininë, 3 qershor 2018), material shtesë për revistat New Era dhe Ensign, ChurchofJesusChrist.org. Mund të jetë e dobishme të shihni materialin filmik të transmetimit nga kodi kohor 29:50 deri në 33:36 dhe nga 38:18 deri në 45:09.