« អេធើរ ៧–១១ ៖ ‹ ប្រាកដជាការណ៍នេះនឹងនាំទៅរកការជាប់ឃុំឃាំងជាមិនខានឡើយ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អេធើរ ៧–១១ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អេធើរ ៧–១១
« ប្រាកដជាការណ៍នេះនឹងនាំទៅរកការជាប់ឃុំឃាំងជាមិនខានឡើយ »
ដោយសារព្រះស្រឡាញ់យើង ទ្រង់ហៅព្យាការីឲ្យមកព្រមានពួកយើងពីអំពើអាក្រក់ ហើយលើកទឹកចិត្តយើងឲ្យកាន់តាមព្រះបញ្ញត្តិទាំងឡាយ ។ ពួកសាសន៍យ៉ារេឌមិនបានស្ដាប់តាមការព្រមានពីបងប្រុសរបស់យ៉ារេឌទេ ហើយការមិនស្តាប់តាមនេះបានបណ្ដាលឲ្យមានផលវិបាកដល់មនុស្សជាច្រើនជំនាន់ ។ មេរៀននេះអាចជួយអ្នកឲ្យដឹងពីសារៈសំខាន់នៃការធ្វើតាមព្យាការីរបស់ព្រះ ។
សូមបង្រៀនពីប្រសាសន៍របស់ព្យាការីដោយការប្រែចិត្តជឿ និងមានគោលបំណង ។ សេចក្តីប្រាថ្នា និងព្រះរាជបំណងរបស់ព្រះអម្ចាស់ត្រូវបានប្រាស្រ័យទាក់ទងតាមរយៈព្យាការីរបស់ទ្រង់ ។ សូមជួយសិស្សឲ្យដឹងថា ពួកគេអាចពឹងផ្អែកលើការបង្រៀនរបស់ព្យាការីសម្រាប់ការណែនាំ និងការការពារ មិនថា ការបង្រៀនដែលបានកត់ត្រាក្នុងព្រះគម្ពីរ ឬការនិយាយជាពាក្យសម្តីនៅសព្វថ្ងៃនេះនោះទេ ។
ការរៀបចំសិស្ស ៖ សូមអញ្ជើញសិស្សឲ្យមករៀនដោយបានរៀបចំខ្លួនត្រៀមដើម្បីចែកចាយពីការទូន្មាន ឬការព្រមានមួយចំនួនមកពីព្យាការី ដែលយើងបានទទួលនៅក្នុងជំនាន់របស់យើងនេះ ។ ពួកគេអាចរកមើលឧទាហរណ៍នៅក្នុង ដើម្បីកម្លាំងនៃយុវជន ៖ សេចក្តីណែនាំសម្រាប់ធ្វើការជ្រើសរើស ( កូនសៀវភៅ ឆ្នាំ ២០២២ ) ឬនៅក្នុងសន្និសីទទូទៅថ្មីៗនេះ ។
សកម្មភាពរៀនសូត្រដែលអាចមាន
ការជាប់ឃុំឃាំង
សូមពិចារណាបង្ហាញរូបភាពខាងក្រោម ឬគូររូបបន្ទប់គុកដ៏សាមញ្ញមួយដាក់នៅលើក្ដារខៀន ។
សូមមើលរូបភាពខាងក្រោមនេះ ។ តើបុគ្គលម្នាក់នេះអាចកំពុងគិត ឬមានអារម្មណ៍យ៉ាងដូចម្តេច ?
សូមពិចារណាទៅលើជម្រើសពីមុនអ្វីខ្លះដែលអាចនាំឲ្យធ្លាក់ចូលទៅក្នុងស្ថានភាពទាំងនេះ និងមូលហេតុអ្វីខ្លះដែលបុគ្គលនេះអាចសម្រេចចិត្តជ្រើសរើសយកជម្រើសទាំងនោះ ។
ការចូលរួមនៅក្នុងការប្រព្រឹត្តអំពើបាបអាចនាំមនុស្សទៅរកការជាប់ឃុំឃាំងខាងវិញ្ញាណ និងរូបកាយ ។
នៅថ្ងៃនេះ អ្នកនឹងសិក្សាអំពីដំណើររឿងមួយដែលនឹងជួយអ្នកឲ្យយល់អំពីមធ្យោបាយដ៏សំខាន់មួយក្នុងការចៀសផុតពីការជាប់ឃុំឃាំងខាងវិញ្ញាណ ។ នៅពេលដែលអ្នកសិក្សា សូមយកចិត្តទុកដាក់លើការបំផុសគំនិតពីព្រះវិញ្ញាណ ដែលអាចជួយឲ្យអ្នកយល់ដឹងពីរបៀបអនុវត្តអ្វីដែលអ្នកបានរៀនសូត្រនៅក្នុងជីវិតរបស់អ្នកផ្ទាល់ ។
« ប្រាកដជាការណ៍នេះនឹងនាំទៅរកការជាប់ឃុំឃាំងជាមិនខានឡើយ »
បន្ទាប់ពីពួកសាសន៍យ៉ារេឌបានទៅដល់ដែនដីសន្យា ពួកគេបានបម្រើព្រះអម្ចាស់ដោយស្មោះត្រង់ ហើយបានចម្រើនឡើង និងបានរីកចម្រើនខ្លាំងនៅក្នុងដែនដី ( សូមមើល អេធើរ ៦:១៧–១៨ ) ។ កាលដែលយ៉ារេឌ និងបងប្រុសរបស់លោកកៀកកាន់តែជិតដល់ទីបញ្ចប់នៃជីវិតរបស់ពួកលោក នោះពួកលោកបានប្រមូលផ្តុំប្រជាជនរបស់ពួកលោកមកជុំគ្នាដើម្បីនិយាយទៅកាន់ពួកគេ ។
សូមអាន អេធើរ ៦:១៩–២៣ ដោយស្វែងរកអ្វីដែលប្រជាជនប្រាថ្នាចង់បាន ។
-
តើបងប្រុសរបស់យ៉ារេឌបានព្រមានអ្វីខ្លះដល់ប្រជាជននៅក្នុង ខទី ២៣ ?
សូមពិចារណាអញ្ជើញសិស្សឲ្យចែកចាយពីរបៀប ដែលពួកគេអាចនឹងឆ្លើយតប ប្រសិនបើពួកគេមានវត្តមាននៅក្នុងស្ថានភាពនេះ ។ អ្នកអាចអញ្ជើញពួកគេឲ្យគិតអំពីរបៀបដែលចំណេះដឹងរបស់ពួកគេអំពីព្រះ និងព្យាការីរបស់ទ្រង់អាចមានឥទ្ធិពលលើការសម្រេចចិត្តរបស់ពួកគេ ។ ការឆ្លើយតបរបស់ពួកគេអាចកសាងសេចក្តីជំនឿ និងទីបន្ទាល់ទៅលើព្រះ និងព្យាការីរបស់ទ្រង់ ។
ការព្រមានត្រូវបានបំពេញ
ទោះបីជាបងប្រុសរបស់យ៉ារេឌបានព្រមានក៏ដោយ ក៏ប្រជាជននៅតែជ្រើសរើសយកស្ដេចមួយអង្គដដែល ។ បន្ទាប់ពីកូនប្រុសបីបួននាក់របស់ពួកគេបានបដិសេធ ទីបំផុត អូរៃហា ដែលជាកូនប្រុសរបស់យ៉ារេឌបានយល់ព្រមធ្វើជាស្តេច ហើយសោយរាជ្យដោយសុចរិតពេញមួយជីវិតរបស់គាត់ ( សូមមើល អេធើរ ៦:២៤–២៩; ៧:១ ) ។ ទោះបីជាយ៉ាងណាក៏ដោយ ការព្យាកររបស់បងប្រុសយ៉ារេឌថា ការមានស្តេចនឹងនាំទៅរកការធ្លាក់ចូលទៅក្នុងការជាប់ឃុំឃាំង បានកើតឡើងជាច្រើនដងនៅក្នុងប្រវត្តិសាស្ត្ររបស់ពួកសាសន៍យ៉ារេឌ ។
សូមអានវគ្គបទគម្ពីរខាងក្រោម ដោយរកមើលឧទាហរណ៍អំពីរបៀបដែលការព្យាកររបស់បងប្រុសយ៉ារេឌត្រូវបានបំពេញ ។ អ្នកប្រហែលជាចង់សរសេរសេចក្តីយោងទាំងនេះនៅក្នុងបទគម្ពីររបស់អ្នកនៅជាប់នឹង អេធើរ ៦:២៣ ។
សូមអញ្ជើញសិស្សណាដែលស្ម័គ្រចិត្តឲ្យប្តូរវេនគ្នាអានខគម្ពីរខ្លះៗ ឬទាំងអស់នៅខាងក្រោមនេះឲ្យឮៗ ។ ប្រសិនបើអ្នកជ្រើសរើសមិនអានខគម្ពីរទាំងអស់ សូមប្រាកដថា កុំរំលង អេធើរ ៧:១–៥ ដែលបញ្ជាក់ជាពិសេសថា ការព្យាកររបស់បងប្រុសយ៉ារេឌត្រូវបានបំពេញ ( សូមមើល អេធើរ ៧:៥ ) ។ ការអាន អេធើរ ១១:២០–២៣ ក៏អាចមានប្រយោជន៍ផងដែរ ដោយសារខគម្ពីរនេះណែនាំពីព្យាការីអេធើរ ។
-
តើអ្នកចាប់អារម្មណ៍អ្វីខ្លះពីក្នុងខគម្ពីរទាំងនេះ ?
-
តើមានសេចក្ដីពិតអ្វីខ្លះដែលយើងអាចរៀនសូត្របានពីដំណើររឿងនេះអំពីលទ្ធផលនៃការបដិសេធព្យាការីរបស់ព្រះអម្ចាស់ ?
សេចក្តីពិតមួយដែលយើងអាចរៀនសូត្របានចេញពីដំណើររឿងនេះគឺថា ការបដិសេធព្យាការីរបស់ព្រះអម្ចាស់អាចនាំទៅរកការជាប់ឃុំឃាំង ។
-
តើគំរូមួយចំនួនអំពីរបៀបដែលនរណាម្នាក់អាចជួបបទពិសោធន៍ជាប់ឃុំឃាំងតាមរយៈការមិនអើពើ ឬការបដិសេធព្យាការីរបស់ព្រះអម្ចាស់មានអ្វីខ្លះ ?
ប្រសិនបើសិស្សត្រូវការជំនួយទៅលើសំណួរមុន សូមពិចារណាចែកចាយឧទាហរណ៍ពីរបី ដូចជាលទ្ធភាពដែលការមិនគោរពតាមពាក្យសម្ដីនៃប្រាជ្ញាវាងវៃ ឬការមើលរឿងអាសអាភាស អាចនាំទៅរកការជាប់ឃុំឃាំងនៃការញៀន ។ សូមប្រាកដថា សិស្សយល់ដឹងថា រាល់អំពើបាបគ្រប់ទម្រង់បានកាត់បន្ថយអំណាចនៃព្រះវិញ្ញាណបរិសុទ្ធនៅក្នុងជីវិតរបស់យើង ។
-
ហេតុអ្វីបានជាអ្នកគិតថា មនុស្សជ្រើសរើសមិនអើពើនឹងដំបូន្មាន និងការព្រមានដែលព្រះអម្ចាស់ប្រទានមកតាមរយៈព្យាការីរបស់ទ្រង់ដូច្នេះ ?
ដំបូន្មាននៅសម័យទំនើបមកពីព្យាការីរបស់ព្រះអម្ចាស់
សូមជួយសិស្សឲ្យយល់ដឹងពីរបៀបដែលសេចក្តីពិតនេះនៅតែអនុវត្តបានរហូតមកដល់សព្វថ្ងៃនេះ ។ សកម្មភាពខាងក្រោមគឺជាវិធីមួយដើម្បីធ្វើកិច្ចការនេះ ។
សូមស្វែងរកដំបូន្មាន ឬការព្រមានមកពីព្យាការី និងសាវកនៅសម័យទំនើបនេះ ។ ការណ៍ទាំងនេះអាចចេញមកពី ដើម្បីកម្លាំងយុវជន ( កូនសៀវភៅឆ្នាំ ២០២២ ) ឬពីសុន្ទរកថាសន្និសីទទូទៅថ្មីៗនេះ ។ សូមឆែកមើលថា តើអ្នកអាចស្វែងរកពាក្យ ឬឃ្លាជាក់លាក់ដែលពិពណ៌នាអំពីរបៀបដែលយើងនឹងទទួលបានពរជ័យ នៅពេលដែលយើងធ្វើតាមដំបូន្មាននេះ ក៏ដូចជាផលវិបាកដែលយើងអាចជួបប្រទះដោយសារតែការមិនធ្វើតាមបានដែរឬទេ ។
ការដាក់សិស្សជាក្រុមតូចៗអាចមានប្រយោជន៍ ហើយចាត់តាំងឲ្យក្រុមនីមួយៗសិក្សាប្រធានបទផ្សេងៗគ្នាមកពី ដើម្បីកម្លាំងយុវជន ( កូនសៀវភៅឆ្នាំ ២០២២ ) នៅពេលដែលពួកគេបំពេញសកម្មភាពនេះ ។ សូមពិចារណាបង្ហាញសំណួរខាងក្រោមនេះ ។ សូមផ្តល់ពេលវេលាគ្រប់គ្រាន់ឲ្យសិស្សដើម្បីពិភាក្សាអំពីចម្លើយរបស់ពួកគេជាមួយក្រុមរបស់ពួកគេ ។
-
តើការព្រមាន ឬដំបូន្មានអ្វីខ្លះដែលអ្នកអាចរកឃើញ ?
-
តើព្រះអម្ចាស់នឹងប្រទានពរជ័យដល់ពួកយើងតាមរបៀបណាខ្លះ នៅពេលដែលយើងធ្វើតាមដំបូន្មាននេះ ?
-
តើការមិនអើពើនឹងដំបូន្មាននេះ ឬការព្រមានទាំងនេះអាចនាំនរណាម្នាក់ឲ្យជាប់ការឃុំឃាំងយ៉ាងដូចម្តេច ?
នៅពេលដែលសិស្សបានបញ្ចប់សកម្មភាពរួចរាល់ហើយ សូមអញ្ជើញពួកគេឲ្យចែកចាយការយល់ដឹងរបស់ពួកគេមួយចំនួនជាមួយសិស្សនៅក្នុងថ្នាក់រៀន ។
ការឲ្យសិស្សចែកចាយចម្លើយដែលពួកគេបានរកឃើញចំពោះសំណួរដែលបានរាយខាងលើ អាចមានប្រយោជន៍ ។ ឧទាហរណ៍ សិស្សដែលបានសិក្សាអំពីដំបូន្មានពីផ្នែក « ដើរក្នុងពន្លឺរបស់ព្រះ » នៅក្នុង ដើម្បីកម្លាំងយុវជន អាចចង្អុលបង្ហាញថា អ្វីដែលយើងមើល អាន ស្តាប់ ឬចូលរួមអាចនាំឲ្យមានគំនិតល្អ ឬអាចធ្វើឲ្យអារម្មណ៍របស់យើងចុះខ្សោយខាងព្រះវិញ្ញាណ ។ ( សូមមើល ដើម្បីកម្លាំងយុវជន [ កូនសៀវភៅ ឆ្នាំ ២០២២ ] ទំព័រ ១៨ ) ។
ការអនុវត្តវាទៅក្នុងជីវិតរបស់អ្នក
សូមគិតអំពីរបៀបដែលអ្នកឆ្លើយតបទៅនឹងដំបូន្មាន និងការព្រមានរបស់ព្យាការីនៃព្រះអម្ចាស់ ពរជ័យដែលអ្នកបានទទួលដោយសារការធ្វើតាមដំបូន្មាន និងការព្រមានទាំងនោះ និងដំបូន្មានដែលអ្នកប្រហែលជាត្រូវធ្វើតាមដោយស្មោះត្រង់បន្ថែមទៀត ។
សូមពិចារណាអញ្ជើញសិស្សឲ្យចែកចាយពីគំរូនៃរបៀបដែលព្រះអម្ចាស់បានប្រទានពរដល់ពួកគេ នៅពេលដែលពួកគេបានធ្វើតាមដំបូន្មានរបស់ទ្រង់តាមរយៈព្យាការីរបស់ទ្រង់ ។ អ្នកប្រហែលជាចង់ចែកចាយបទពិសោធន៍ផ្ទាល់ខ្លួនផងដែរ ។
ដំបូន្មានរបស់ព្យាការីខាងក្រោមនេះអាចជួយដល់សិស្សដែលអាចមានអារម្មណ៍បាក់ទឹកចិត្តដោយសារការជាប់ឃុំឃាំង ដែលពួកគេជួបប្រទះដោយសារតែការមិនអើពើនឹងដំបូន្មានពីព្យាការីរបស់ព្រះអម្ចាស់ ។ សូមពិចារណាអាន ម៉ូសាយ ៧:៣៣ ក្នុងថ្នាក់រៀនទាំងមូល ។
អ្នកខ្លះអាចនឹងមានអារម្មណ៍បាក់ទឹកចិត្ត នៅពេលដែលពួកគេជួបនឹងផលវិបាកដោយសារការមិនគោរពតាមដំបូន្មាន និងការព្រមានរបស់ព្រះអម្ចាស់តាមរយៈព្យាការីរបស់ទ្រង់ ។ ប៉ុន្តែ ទោះបីជាយើងបានធ្វើខុសយ៉ាងណាក៏ដោយ ក៏ព្រះអង្គសង្គ្រោះអាចរំដោះពួកយើងចេញពីការជាប់ឃុំឃាំងរបស់យើងបានដែរ នៅពេលដែលយើងបែរត្រឡប់មករកទ្រង់វិញ ។ ឧទាហរណ៍ សូមអាន អេធើរ ៧:២៥–២៧ ហើយកត់សម្គាល់ពីអ្វីដែលបានកើតឡើង នៅពេលដែលប្រជាជនបានប្រែចិត្ត ហើយបែរត្រឡប់មករកព្រះវិញ ។
-
តើវគ្គបទគម្ពីរនេះបង្រៀនអ្នកអ្វីខ្លះអំពីព្រះអម្ចាស់ ? ( សូមមើល ម៉ូសាយ ៧:៣៣ ) ។
ដើម្បីមើលឧទាហរណ៍មួយអំពីរបៀបដែលនរណាម្នាក់បានជួបបទពិសោធន៍ពីការរំដោះរបស់ព្រះអម្ចាស់ បន្ទាប់ពីការបានជួបបទពិសោធន៍ការជាប់ឃុំឃាំងខាងវិញ្ញាណ សូមពិចារណាមើលវីដេអូនេះ « The Immediate Goodness of God » ដែលមាននៅលើគេហទំព័រ ChurchofJesusChrist.org ចាប់ពីនាទីទី ៣:៣៧ ដល់នាទីទី ៦:៣៣ ។
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F02%2F45%2F024506fe823b4de67c9fc149734b2a6155b44a98%2F024506fe823b4de67c9fc149734b2a6155b44a98.jpeg/full/!250,/0/default)
សូមថ្លែងទីបន្ទាល់អំពីសេចក្តីពិតដែលបានពិភាក្សានៅថ្ងៃនេះ ហើយលើកទឹកចិត្តសិស្សឲ្យធ្វើសកម្មភាពតាមចំណាប់អារម្មណ៍ខាងវិញ្ញាណរបស់ពួកគេ ។