Etera 8

“Tsy miasa ao amin’ny tsikombakomba miafina ny Tompo”

Namely vondron’olona maromaro manerana ny Bokin’i Môrmôna ny tsikombakomba miafina. Io lamina io dia nipoitra teo amin’ny Jaredita ary nitarika ny fahapotehan’izy ireo mihitsy aza. Raha teo am-panoratany momba ny Jaredita i Môrônia mpaminany dia nampiditra fahamarinana manan-danja azontsika ianarana amin’ireo trangan-javatra manimba. Ity lesona ity dia afaka manampy anao hahatakatra ny filana mandà tsikombakomba miafina amin’ny alalan’ny fanarahana an’i Jesoa Kristy.

Ampio ny mpianatra hikatsaka ny maha zava-dehibe izany. Rehefa afaka mampifandray ny zavatra halalinin’izy ireo ao amin’ny soratra masina amin’ny toe-javatra misy azy ireo ny mpianatra, dia mazoto kokoa hianatra sy hampihatra ny fampianaran’ny filazantsara izy ireo amin’ny ankapobeny. Asao ny mpianatra mba hikatsaka ny maha zava-dehibe izany amin’ny alalan’ny fametrahana fanontaniana toy ny hoe “Ahoana no mety hitovitovian’io tranga na fampianarana io amin’ny zavatra niainanao?” na “Ahoana no iharan’io fahamarinana io amin’ny fiainanao?”

Fanomanana ny mpianatra: Asao ny mpianatra hamaky ny “Tsikombakomba Miafina” ao amin’ny Torolalana ho an’ny Soratra Masina ao amin’ny scriptures.ChurchofJesusChrist.org.

Sahanasa fianarana azo atao

Asa an-tsokosoko

Soraty eny amin’ny solaitrabe ny teny hoe tsiambaratelo, avy eo dia apetraho ireto fanontaniana manaraka ireto:

• Inona no sasantsasany amin’ireo fomba ampiasan’i Satana ny tsiambaratelo mba hanatanterahany ny tanjony ratsy?

• Ahoana no hiantraikan’ny tsiambaratelo toy izany amin’ny fifandraisan’ny olona iray amin’i Jesoa Kristy? Nahoana?

• Inona no tianao ho fantatry ny olona iray izay mahatsapa fa afaka ny ho afa-maina amin’ny fanaovan-dratsy satria hazonin’izy ireo ho tsiambaratelo izany?

Anio ianao dia hianatra mombana vondron’olona iray izay nandray anjara tamina asa miafin’ny faharatsiana fantatra amin’ny hoe tsikombakomba miafina. Rehefa mandalina ianao, dia mitadiava fampianarana izay manampy anao hahatakatra ny loza ateraky ny tsikombakomba miafina.

Faharatsiana teo amin’ny Jaredita

Mety tsaroanao fa taorian’ny nahatongavan’ny Jaredita tany amin’ny tany nampanantenaina, dia nanendry mpanjaka iray izy ireo hanapaka teo amin’izy ireo na dia teo aza ny fampitandreman’ny rahalahin’i Jareda fa hitarika amin’ny fahababoana ny fanaovana izany (jereo ny Etera 6:22–23). Tamin’ireo taranaka nanaraka izany, dia nisy mpanjaka ratsy fanahy nahatonga fizarazarana sy fijaliana teo amin’ny vahoaka.

Azonao atao ny manasa mpianatra manolo-tena vitsivitsy hifandimby hamaky mafy ireto andininy manaraka ireto amin’ny iray kilasy fa ny ambin’ny mpianatra kosa manaraka ao amin’ny soratra masin’izy ireo.

Vakio ny Etera 8:1–10, hitadiavana ny zavatra niseho tamin’ny fotoana nahatongavan’ny lehilahy iray nantsoina hoe Ômera ho mpanjaka.

Nanaiky ny teti-dratsin’ny zanany vavy i Jareda. Rehefa nangataka ny zanakavavin’i Jareda ho vadiny i Akisa, dia niditra tamina tsikombakomba miafina hamono an’i Ômera i Akisa, i Jareda, ny zanany vavy, ary ny olona hafa tao amin’ny fianakaviana (jereo ny Etera 8:11–15).

Ireo loza ateraky ny tsikombakomba miafina

Ny tsikombakomba miafina dia “vondron’olona mifamatotra amin’ny fianianana mba hanatanterahana ny tanjona ratsy izay kendreny” (“Tsikombakomba Miafina,” Torolalana ho an’ny Soratra Masina, scriptures.ChurchofJesusChrist.org). I Satana no mpamorona tsikombakomba miafina (jereo ny Helamàna 6:25–30).

Amin’ny maha mpitantara io tantara io azy, i Môrônia mpaminany dia nizara fampianarana manan-danja maromaro sy fampitandremana momba ny tsikombakomba miafina. Vakio ny Etera 8:18–25, hitadiavana ny fahatsapan’ny Tompo momba ireo tsikombakomba miafina.

Asao ny mpianatra hifanakalo hevitra momba ny zavatra nianarany tamin’ireo andininy ireo. Ankoatra ireto fanontaniana manaraka ireto, dia mety ho azonao heverina ihany koa ny hanontany hoe: “Inona no fampitandremana nomen’i Môrônia ireo izay mandray anjara amina tsikombakomba miafina?”

• Inona no nianaranao momba ny tsikombakomba miafina avy tamin’ireo andininy ireo?

Fahamarinana iray azontsika ianarana amin’ireo andininy ireo ny hoe maharikoriko eo imason’ Andriamanitra ny tsikombakomba miafina (Etera 8:18).

Mba hanampiana anao hahatakatra kokoa ny antony mampaharikoriko amin’ny Tompo ny tsikombakomba miafina, dia vakio ireto soratra masina manaraka ireto, ka tadiavo ny zavatra ianaranao momba an’i Jesoa Kristy:

• 2 Nefia 26:22–24

• Almà 39:8

Asao ny mpianatra hifanakalo hevitra momba ny zavatra nianarany tamin’ireo andininy ireo. Azo ampiasaina ireto fanontaniana manaraka ireto.

• Inona no nianaranao tamin’ireo andininy ireo ka mety ho afaka nanampy ny olona nohalalininao tao amin’ny Etera 8?

• Inona no nampianarin’ireo andininy ireo anao momba ny Tompo?

• Ahoana no ahafahan’ireo fampianarana ireo manampy ny tanora ankehitriny?

Namarana ny fampianarany momba ny tsikombakomba miafina tamin’ny alalan’ny fanazavana ny antony nampidirany ireo fampitandremana ireo i Môrônia. Vakio ny Etera 8:26, hitadiavana ny zavatra tian’i Môrônia ho fantatsika.

• Inona no nianaranao momba ny antony nampidiran’i Môrônia ireo fampianarana ireo ao amin’ny Bokin’i Môrmôna?

• Inona no nianaranao androany ka afaka mandresy lahatra anao hanara-dia an’i Jesoa Kristy feno kokoa?

Hevero ny hizara ny fijoroanao ho vavolombelona momba ny fomba andrisihan’ireo fahamarinana nampianarina tao amin’io lesona io anao mba hatoky sy hanara-dia an’i Jesoa Kristy.

Fanazavana sy fampahalalana avy amin’ny zava-miseho

Inona avy no fomba ahitantsika tsikombakomba miafina ankehitriny?

Nilaza toy izao ny Filoha M. Russell Ballard ao amin’ny Kôlejin’ny Apôstôly Roambinifolo:

Ny Bokin’i Môrmôna dia mampianatra fa ireo tsikombakomba miafina izay nirotsaka tamin’ny fanaovana heloka be vava dia fanamby lehibe tokoa, tsy ho an’ny tsirairay sy ny fianakaviana ihany fa ho an’ny fiaraha-monina iray manontolo. Anisan’ireo tsikombakomba miafina ankehitriny ireo andian-jiolahy, ireo tambazotran’ny zava-mahadomelina, ary ireo fianakaviamben’ny mpikotrika heloka bebe vava. Ireo tsikombakomba miafina amin’izao androntsika izao dia mitovy fomba fiasa amin’ireo jirik’i Gadiantôna tamin’ny fotoan’ny Bokin’i Môrmôna. Manana famantarana miafina sy teny miafina izy ireo. Mandray anjara amina fombafomba miafina sy lanonam-pandraisana ho mpikambana izy ireo. Anisan’ny tanjon’izy ireo ny -mamono sy mandroba ary mangalatra ary manao fijangajangana sy ny fomban’ny faharatsiana rehetra mifanohitra amin’ny lalàn’ny taniny ary koa ny lalàn’ny Andriamaniny- (Helamàna 6:23).

Raha tsy mitandrina isika dia afaka mahazo fahefana sy fitaomana haingana sy tanteraka tsy misy hafa amin’ny tao amin’ny Bokin’i Môrmôna ireo tsikombakomba miafina amin’izao andro izao. (M. Russell Ballard, “Standing for Truth and Right,” Ensign, nôv. 1997, 38)

Nahoana isika no mila mahitsy amin’ny tenantsika sy amin’ny Tompo momba ny fahotantsika?

Nizara toy izao ny Loholona Neil L. Andersen ao amin’ny Kôlejin’ny Apôstôly Roambinifolo:

Amin’ny faniriantsika hibebaka, ny fahitsiana dia lasa manan-danja tokoa. Voalohany indrindra, tsy maintsy mahitsy amin’ny Raintsika any An-danitra sy amin’ny tenantsika isika. Ny tsy fahitsiana sy famitahana dia fototra sy fakan’ny saika ny fahotana rehetra. Indraindray rehefa manomboka mibebaka ny olona iray, dia manomboka mampiseho ampahany kely fotsiny amin’ny olana iray lehibe kokoa izy. Indraindray isika dia mamita-tena amin’ny fieritreretana fa tsy mila lazaina ny zavatra rehetra, na hoe hadisoan’ny hafa ny ampahany amin’ny zavatra niseho. Mety hamita-tena ny olona tsara ary mety ho voafitaka Ny famitahana rehetra dia manemotra ny dingan’ny fibebahana. (Neil L. Andersen, The Divine Gift of Forgiveness [Ilay fanomezam-pahasoavan’ny famelan-keloka avy amin’ Andriamanitra] [2019], 194)

Ao amin’ity horonan-tsary manaraka “Being Honest in Our Repentance [Mahitsy amin’ny fibebahantsika]” (4:05) ity, ny Loholona Neil L. Andersen ao amin’ny Kôlejin’ny Apôstôly Roambinifolo dia miresaka momba ana hevitra mifandray amin’ny bokiny hoe The Divine Gift of Forgiveness [Ilay fanomezam-pahasoavan’ny famelan-keloka avy amin’ Andriamanitra] (2019). Izy dia mizara mombana olona roa izay nitolona tamina fahotana nitovitovy saingy tamin’ny fomba samy hafa: ny iray tamim-pahitsiana ary ny iray tsy tamim-pahitsiana.

Sahanasa fianarana fanampiny

Fanombohana azo atao solony

Ny Filoha Ezra Taft Benson (1899–1994) dia nampianatra fa ny Bokin’i Môrmôna “dia nosoratana ho an’ny androntsika” (“The Book of Mormon—The Keystone of Our Religion,” Ensign, nôv. 1986, 6).

Azonao atao ny manasa ny mpianatra hifanakalo hevitra momba ny sasany amin’ireo hafatra na fampitandremana avy ao amin’ny Bokin’i Môrmôna ka afaka manampy ny olona amin’izao androntsika izao.

Aorian’ny fizaràn’ny mpianatra ny valin-tenin’izy ireo dia hazavao fa ny iray amin’ireo fampitandremana nozarain’ny Bokin’i Môrmôna tamin’ny mpamakin’ny andro farany dia momba ny loza ateraky ny tsikombakomba miafina. Amporisiho ny mpianatra hijery tsara ny zavatra tian’ny Tompo ho fantatr’izy ireo momba ny tsikombakomba miafina sy ny fomba ahafahan’izy ireo miala amin’izany rehefa mandalina.

Ny ambin’ilay tantara

Azonao atao ny mamintina ny Etera 9:1–13 amin’ny alalan’ny fanazavana fa naharava ny fanjakan’i Ômera i Akisa sy ireo namany vokatry ny tsikombakomba miafin’izy ireo. Na izany aza dia nampitandrina an’i Ômera Andriamanitra fa tokony hitsoaka izy sy ny fianakaviany, mba hamonjeny ny ainy. Lasa mpanjaka i Jareda, zanakalahy ratsy fanahin’i Ômera ary nanome ny zanany vavy ho vadin’i Akisa. Nanohy ireo teti-dratsiny i Akisa sy ireo namany, ka namono an’i Jareda, mbamin’ ny iray tamin’ny zanakalahin’i Akisa mihitsy aza. Nitarika tamin’ny ady teo amin’i Akisa sy ny zanany lahy ireo fihetsika ireo ary farany naharava saika ny Jaredita rehetra ary namerina an’i Ômera teo amin’ny fanjakana.

Tsikombakomba miafina ao amin’ny Bokin’i Môrmôna

Azonao atao ny mijery ny Torolalana ho an’ny Soratra Masina, “Tsikombakomba Miafina,” scriptures.ChurchofJesusChrist.org, mba hahitana ohatra hafa ao amin’ny Bokin’i Môrmôna izay mampiseho fampitandremana sy loza hafa ateraky ny tsikombakomba miafina.