Moroni 4–5

Ang Sakramento

Bilang mga miyembro ng Ang Simbahan ni Jesucristo ng mga Banal sa mga Huling Araw, inaanyayahan tayong makibahagi sa mga banal na ordenansa at makipagtipan sa ating Ama sa Langit. Kapag nagsikap tayong tuparin ang ating mga tipan, pinagpapala tayo ng Ama sa Langit. Ang ordenansa kung saan pinakamadalas tayong nakikibahagi ay ang sakramento. Ang lesson na ito ay makatutulong sa iyo na tuparin ang tipan na ginagawa mo kapag tumatanggap ka ng sakramento upang mapasaiyo ang Espiritu ng Panginoon.

Unawain ang mga pangangailangan sa pag-aaral ng mga estudyante. Sikaping maunawaan ang mga pangangailangan sa pag-aaral ng mga estudyante sa iyong klase. Maaaring kabilang dito ang mga kagustuhan ng mag-aaral gayundin ang anumang hamon sa pag-aaral. Humanap ng mga paraan para maisama ang iba’t ibang pamamaraan sa pag-aaral, tulad ng mga visual aid, group work, o indibiduwal na pag-aaral, upang masulit ng mga estudyante ang kanilang karanasan sa seminary.

Paghahanda ng estudyante: Maaari mong anyayahan ang mga estudyante na pumasok sa klase na handang bigkasin ang mga panalangin sa sakramento nang walang kopya hangga’t kaya nila.

Mga Posibleng Aktibidad sa Pag-aaral

Bakit ka nagsisimba?

Upang maihanda ang mga estudyante sa pag-aaral ng tungkol sa sakramento, maaari mong ibahagi ang sumusunod na salaysay o personal na karanasan tungkol sa kahalagahan ng sakramento.

Ibinahagi ni Sister Cheryl A. Esplin, dating tagapayo sa Primary General Presidency, ang tanong ng isang anak sa 96 na taong gulang na ama nito: “Itay, bakit po kayo nagsisimba? Hindi na kayo makakita, hindi na kayo makarinig, nahihirapan na kayong maglakad. Bakit po kayo nagsisimba?” (“Ang Sakramento—Isang Pagpapanibago ng Kaluluwa,” Liahona, Nob. 2014, 14).

• Sa iyong palagay, paano kaya sinagot ng ama ang tanong na ito?

“Sumagot ang ama, ‘Dahil sa sakramento. Nagsisimba ako para makatanggap ng sakramento’” (Cheryl A. Esplin, “Ang Sakramento,” 14).

• Ano ang alam mo tungkol sa sakramento na maaaring dahilan kung bakit ganito ang sagot ng ama?

  Ang mga sumusunod na tanong ay nilayon para sa pansariling pagninilay-nilay. Maaari mong sabihin sa mga estudyante na isulat ang kanilang mga sagot sa kanilang study journal. Maaaring makatulong din na anyayahan silang magtanong tungkol sa sakramento.

• Gaano kahalaga ang sakramento para sa iyo? Bakit?

• Anong mga pagsisikap ang ginagawa mo para magkaroon ng makabuluhang karanasan sa sakramento?

Bilang bahagi ng kanyang isinulat, isinama ni Moroni ang mga panalanging ibinigay noon ni Jesucristo sa mga Nephita para sa pangangasiwa ng sakramento (tingnan sa Moroni 4:1–2). Habang pinag-aaralan mo ang mga panalanging ito sa Moroni 4–5, makinig sa mga pahiwatig upang malaman mo kung ano ang magagawa mo para matupad ang mga tipang ginagawa mo kapag tumatanggap ka ng sakramento.

Ang sakramento

Kapag tumatanggap tayo ng sakramento, nakikipagtipan tayo sa Ama sa Langit at pinaninibago natin ang mga tipang ginawa natin sa binyag (tingnan sa Mosias 18:8–10; Doktrina at mga Tipan 20:37). “Ang tipan ay isang sagradong kasunduan sa pagitan ng Diyos at ng isang tao o grupo ng mga tao. Nagtatakda ang Diyos ng mga partikular na kundisyon, at nangangako Siyang pagpapalain tayo kapag sinunod natin ang mga kundisyong iyon” (Mga Paksa ng Ebanghelyo, “Tipan,” ChurchofJesusChrist.org).

Maaari mong kopyahin ang sumusunod na chart sa pisara at anyayahan ang klase na punan ang kaliwang column gamit ang Moroni 4:3. Maaari din itong kopyahin ng mga estudyante sa kanilang study journal.

Ang Tipan sa Sakramento

Ang ipinapangako kong gawin	Mga paraan para tuparin ang aking mga pangako

• Paano mo ibubuod ang ipinapangako natin kapag tumatanggap tayo ng tinapay ng sakramento?

Ang isang paraan para ibuod ang ating bahagi sa tipan sa sakramento ay kapag tumatanggap tayo ng sakramento, nangangako tayo na magiging handa tayong taglayin sa ating sarili ang pangalan ng Tagapagligtas, lagi Siyang aalalahanin, at susundin ang Kanyang mga kautusan.

Maaaring hatiin ang mga estudyante sa grupong may tigtatatlong miyembro. Magtalaga sa bawat grupo ng isa sa mga pangakong ginagawa natin bilang bahagi ng tipan sa sakramento. Sabihin sa grupo na talakayin ang itinalagang pangako sa kanila at magbahagi ng mga ideya na magagamit para punan ang pangalawang column sa chart.

Pagkatapos ng sapat na oras, hatiin ang klase sa mga bagong grupo na may tigtatatlong miyembro. Bawat bagong grupo ay dapat binubuo ng mga estudyante na nag-aral ng iba’t ibang bahagi ng tipan sa sakramento. Sabihin sa mga estudyante na talakayin ang natutuhan nila sa kanilang orihinal na grupo at tulungan ang isa’t isa na punan ang pangalawang column sa chart.

Kung makatutulong sa mga estudyante na pag-aralan pa ang tungkol sa ibig sabihin ng pagtataglay ng pangalan ng Tagapagligtas sa kanilang sarili, maaari mong gamitin ang sumusunod na pahayag at mga tanong. Maaari mong sabihin sa mga estudyante na pag-isipan kung gaano nila ginugusto ang ninanais ng Tagapagligtas kumpara sa gusto nila o kung ano ang nais ng mundo para sa kanila.

Maaari mo ring gamitin ang Mosias 18:8–10 at Juan 14:15 upang matulungan ang mga estudyante na mapalalim ang kanilang pag-unawa sa mga paraan ng pagtupad ng tipan sa sakramento.

• Ano sa palagay mo ang ibig sabihin ng pagiging handang taglayin sa ating sarili ang pangalan ng Tagapagligtas?

Ipinaliwanag ni Pangulong Henry B. Eyring ng Unang Panguluhan:

Nangangako tayong tataglayin ang Kanyang pangalan sa ating sarili. Ibig sabihin dapat nating makita ang ating sarili na katulad Niya. Uunahin natin Siya sa ating buhay. Gugustuhin natin ang gusto Niya sa halip na ang gusto natin o ang itinuturo ng mundo na gustuhin natin. (Henry B. Eyring, “That We May Be One,” Ensign, Mayo 1998, 67)

• Paano mo mas mapagbubuti ang pagtataglay ng pangalan ng Tagapagligtas sa iyong sarili?

• Sa paanong paraan tayo matutulungan ng pagtataglay sa ating sarili ng pangalan ng Tagapagligtas para maging katulad Niya tayo?

Mapasaatin ang Kanyang Espiritu sa tuwina

Basahin ang Moroni 4:3 at 5:2, at alamin ang mga pagkakatulad at pagkakaiba ng panalangin sa tinapay at ng panalangin sa alak (tubig).

• Anong mga pagkakatulad ang nakita mo?

• Ano ang gagawin ng Ama sa Langit kung tutuparin natin ang tipang ginagawa natin sa oras ng sakramento?

Ang isang alituntuning natututuhan natin ay kapag tinupad natin ang tipang ginagawa natin sa oras ng sakramento, mapapasaatin sa tuwina ang Espiritu ng Panginoon.

• Isipin kung paano nakatutulong sa iyo ang kahandaan mong tuparin ang mga sumusunod na pangako para maging karapat-dapat ka na mapasaiyo sa tuwina ang Espiritu ng Panginoon:

  • Taglayin sa iyong sarili ang pangalan ng Tagapagligtas.

  • Lagi Siyang alalahanin.

  • Sundin ang Kanyang mga kautusan.

• Paano ka makikinabang ng pagsama sa iyo sa tuwina ng Espiritu Santo?

Itinuro ni Pangulong Dallin H. Oaks ng Unang Panguluhan kung ano ang gagawin natin kapag tumatanggap tayo ng sakramento at kung paano tayo mapagpapala sa pamamagitan ng pagtupad sa mga tipan nito. Basahin ang sumusunod na pahayag o panoorin ang video na “The Aaronic Priesthood and the Sacrament” mula sa time code na 6:48 hanggang 7:22 sa ChurchofJesusChrist.org.

Tayo ay inutusang magsisi sa ating mga kasalanan at lumapit sa Panginoon nang may bagbag na puso at nagsisising espiritu, at tumanggap ng sakramento bilang pagsunod sa mga tipan nito. Kapag pinapanibago natin ang ating mga tipan sa binyag sa ganitong paraan, pinapanibago ng Panginoon ang nakalilinis na epekto ng ating binyag. Sa ganitong paraan tayo ay malilinis at mapapasaatin sa tuwina ang Kanyang Espiritu. Ang kahalagahan nito ay makikita sa utos ng Panginoon na tumanggap tayo ng sakramento bawat linggo (tingnan sa Doktrina at mga Tipan 59:8–9). (Dallin H. Oaks, “The Aaronic Priesthood and the Sacrament,” Ensign, Nob. 1998, 38)

Pagtupad sa tipan sa sakramento

Maaari mong ibahagi ang iyong patotoo tungkol sa sakramento at anyayahan ang mga handang estudyante na gawin din iyon.

Sabihin sa mga estudyante na pagnilayan kung ano ang magagawa nila para tuparin ang kanilang tipan sa sakramento. Maaari mong ipakita ang mga sumusunod na talata at anyayahan ang mga estudyante na sumagot sa kanilang study journal. Maaari mo ring imungkahi na maaaring maging isa sa kanilang mga mithiin sa pag-unlad ng mga kabataan ang pagtupad sa tipan sa sakramento.

Isipin ang mga pagsisikap mong tuparin ang mga pangakong ginagawa mo kapag tumatanggap ka ng sakramento. Ano ang naisasakatuparan mo nang maayos? Ano ang maaaring pagbutihin pa?

Pumili ng isa o mahigit pang pangako na gusto mong pagtuunan. Magsulat ng isang partikular na bagay na magagawa mo. Maaari mong pagnilayan ito sa susunod na tatanggap ka ng sakramento.

Bigyang-pansin kung paano nakatutulong sa iyo ang pagtupad sa iyong mga tipan na mapasaiyo ang Espiritu Santo at ang kaibhang nakikita mo sa iyong buhay.

Komentaryo at Impormasyon ng Konteksto

Ano ang kaugnayan ng binyag at ng sakramento?

Itinuro ni Pangulong Russell M. Nelson:

Tinatahak natin ang landas ng tipan sa pamamagitan ng pagpapabinyag at paggawa ng unang pakikipagtipan sa Diyos. Sa tuwing nakikibahagi tayo sa sakramento, nangangako tayong muli na tataglayin natin ang pangalan ng Tagapagligtas, aalalahanin Siya, at susundin ang Kanyang mga kautusan. Bilang ganti, tinitiyak sa atin ng Diyos na maaaring palaging mapasaatin ang Espiritu ng Panginoon. (Russell M. Nelson, “Ang Kapangyarihan ng Espirituwal na Momentum,” Liahona, Mayo 2022, 98)

Paano ko palaging aalalahanin ang Tagapagligtas?

Itinuro ni Pangulong Henry B. Eyring ng Unang Panguluhan:

Ang mga salitang ito mula sa panalangin sa sakramento kung gayon ay dapat ilarawan sa ating pang-araw-araw na buhay: “Lagi siyang alalahanin.” Ang “Siya” ay tumutukoy kay Jesucristo. Ang sumunod na mga salita, “at susundin ang kanyang mga kautusan,” ay nagpapahiwatig kung ano ang kahulugan sa atin ng alalahanin Siya [Doktrina at mga Tipan 20:77]. Kapag lagi nating aalalahanin si Jesucristo, maaari nating itanong sa tahimik na panalangin, “Ano ang nais Niyang ipagawa sa akin?” (Henry B. Eyring, “Mga Panalangin nang May Pananampalataya,” Liahona, Mayo 2020, 28)

Nagbahagi si Elder Gerrit W. Gong ng Korum ng Labindalawang Apostol ng anim na paraan na lagi nating maaalala ang Tagapagligtas:

Bawat linggo, sa pakikibahagi ng sakramento, nakikipagtipan tayo na lagi Siyang aalalahanin. Mula sa halos 400 talata sa banal na kasulatan na may salitang alalahanin, narito ang anim na paraan na lagi natin Siyang maaalala.

Una, lagi natin Siyang maaalala kapag nagtiwala tayo sa Kanyang mga tipan, pangako, at pagtiyak. …

Pangalawa, lagi natin Siyang maaalala kapag pinasasalamatan at kinikilala natin ang Kanyang impluwensya sa ating buhay. …

Pangatlo, lagi natin Siyang maaalala kapag nagtitiwala tayo sa pagtiyak ng Panginoon na “Siya na nagsisi ng kanyang mga kasalanan, ay siya ring patatawarin, at ako, ang Panginoon, ay hindi na naaalaala ang mga ito” [Doktrina at mga Tipan 58:42; tingnan din sa Isaias 43:25]. …

Pang-apat, inaanyayahan Niya tayong alalahanin na lagi Niya tayong malugod na tatanggapin. …

Panglima, lagi natin Siyang maaalala sa araw ng Sabbath sa pamamagitan ng sakramento. …

Ang huli at pang-anim, inaanyayahan tayo ng Tagapagligtas na lagi Siyang alalahanin tulad ng pag-alaala Niya sa atin. (Gerrit W. Gong, “Lagi Siyang Aalalahanin,” Liahona, Mayo 2016, 108–10)

Itinuro ni Pangulong Dallin H. Oaks ng Unang Panguluhan:

Sa sacrament meeting—lalo na sa oras ng pagbibigay ng sakramento—kailangang ituon natin ang pansin sa pagsamba at iwasang gumawa pa ng iba lalo na ng mga pagkilos na makagagambala sa pagsamba ng iba. Maging ang isang taong umiidlip ay hindi dapat makagambala sa iba. Ang sacrament meeting ay hindi oras ng pagbabasa ng mga libro o magasin. Mga kabataan, hindi ito oras ng pabulong na pakikipag-usap sa cell phone o pagte-text sa mga taong nasa ibang lugar. Kapag tayo ay tumatanggap ng sakramento, gumagawa tayo ng sagradong tipan na palagi nating aalalahanin ang Tagapagligtas. Napakalungkot makita ang mga taong hayagang lumalabag sa tipang iyon sa mismong pulong kung saan ginagawa nila ang tipang ito. (Dallin H. Oaks, “Ang Sakrament Miting at ang Sakrament,” Liahona, Nob. 2008, 18–19)

Paano ako maiaangkla sa Tagapagligtas ng pagtanggap ng sakramento?

Itinuro ni Elder Dale G. Renlund ng Korum ng Labindalawang Apostol:

Bawat linggo ay tumatanggap tayo ng sakramento at nakikipagtipan sa ating Ama sa Langit. Nangangako tayong iuugnay ang ating identidad sa Tagapagligtas sa pagpapangako ng ating kahandaang taglayin sa ating sarili ang Kanyang pangalan, lagi Siyang aalalahanin, at susundin ang Kanyang mga kautusan. Ang seryosong paghahanda para sa at marapat na paggawa ng mga tipang ito bawat linggo ay nag-aangkla sa atin sa Tagapagligtas, tumutulong sa atin na isaisip ang ating pangako, at mabisang nagtutulak sa atin sa pagtahak sa landas ng tipan. (Dale G. Renlund, “Hindi Natitinag na Katapatan kay Jesucristo,” Liahona, Nob. 2019, 24)

Mga Karagdagang Aktibidad sa Pag-aaral

Moroni 4:1. “Pinangangasiwaan ng mga saserdote ang laman at dugo ni Cristo”

Para matulungan ang mga kabataang lalaki na talakayin ang kanilang responsibilidad sa paghahanda at pangangasiwa ng sakramento, ituro ang Moroni 4:1. Pagkatapos ay anyayahan ang mga kabataang lalaki na mga priest sa Aaronic Priesthood na magbahagi ng mga karanasan nila sa pangangasiwa ng sakramento at kung paano nakatulong sa kanila ang mga karanasang ito na sundin si Jesucristo. Ang mga kabataang lalaki na mga teacher sa Aaronic Priesthood ay maaari ding magbahagi ng mga karanasan sa paghahanda o pagpapasa ng sakramento.

Isulat ang mga panalangin sa sakramento nang walang kopya

Maaari mong anyayahan ang mga estudyante na isulat ang mga panalangin sa sakramento nang walang kopya. Maaari nila itong gawin sa pisara nang mag-isa, sa maliliit na grupo, o kasama ang buong klase. Maaari nilang ikumpara ang kanilang mga sagot sa Moroni 4:3 at Moroni 5:2 (tingnan din sa Doktrina at mga Tipan 20:77, 79).

Mag-follow up sa 3 Nephi 18

Maaaring makatulong na i-follow up ang mga planong ginawa ng mga estudyante para maalaala ang Tagapagligtas nang pag-aralan nila ang 3 Nephi 18. Maaari mong anyayahan ang mga estudyante na ibahagi ang ginawa nila para maalaala ang Tagapagligtas at kung paano ito nakaapekto sa kanilang karanasan sa sakramento.

Mga Video

Maaari mong gamitin ang isa sa mga sumusunod na video upang matulungan ang mga estudyante na maunawaan ang kahalagahan ng sakramento:

“Purposes of Sacrament Meeting” mula sa time code na 0:10 hanggang 1:05

“Mga Natatanging Saksi ni Cristo–Pangulong Dallin H. Oaks”