Môrônia 8

“Velona ao amin’i Kristy ny ankizy madinika”

Tao amin’ny zavatra nosoratany, i Môrônia mpaminany dia nizara taratasy nosoratan’i Môrmôna rainy ho azy, momba ny batisan’ny ankizy madinika. Ny asa soratr’i Môrmôna momba ilay lohahevitra dia avy amina fanambarana noraisiny tamin’i Jesoa Kristy. Ilay fanambarana dia maneho ny herin’ny Sorompanavotan’ny Mpamonjy sy ny fiantraikan’izany amin’ny ankizy madinika. Ity lesona ity dia natao hanampiana anao hahatakatra tsara kokoa ny antony tsy ilan’ny ankizy kely batisa sy ny zavatra ampianarin’izany antsika momba ny Ray any An-danitra sy i Jesoa Kristy.

Omeo fahafahana hifanakalo hevitra mombana lohahevitra ao amin’ny filazantsara ny mpianatra. Manokàna fotoana hizàran’ny mpianatra miresaka momba ny zavatra ianaran’izy ireo momba ny Mpamonjy sy ny filazantsarany. Izany dia afaka manampy ny mpianatra hampiditra ao anatiny sy hahatsiaro ireo fahamarinana ireo ary haneho mazava izany. Io fizàrana io dia afaka mampitombo ihany koa ny fahatokian-tenan’ny mpianatra fa afaka mizara fahamarinana amina sehatra hafa izy ireo.

Fanomanana ny mpianatra: Mety ho azonao atao ny mizara ilay tantara avy ao amin’ny fanombohan’ny lesona na zavatra mitovitovy amin’izany ary mangataka ny mpianatra hieritreritra momba ny fomba mety hahafahan’izy ireo manao fihetsika mamaly ilay toe-javatra.

Sahanasa fianarana azo atao

Ahoana no ho fihetsikao?

Hevero ny hampiseho ity horonantsary manaraka ity na hizara ilay tantara amin’ny teninao manokana.

Vakio ity tantara manaraka nozarain’ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo ity, na jereo ny “Ary hisy ankizy madinika hitarika azy ireo” manomboka eo amin’ny kaodim-potoana 4:42 hatramin’ny 5:59, hita ao amin’ny ChurchofJesusChrist.org. Alaovy sary an-tsaina hoe iray amin’ireo misiônera ao amin’ilay toe-java-misy ianao.

Nisy misiônera roa niasa tany amin’ny tendrombohitra tany amin’ny faritra atsimon’i Etazonia. Indray andro, avy eny an-tampon-kavoana izy ireo no nahatazana olona nitangorona tery ambany lavitra tery tao anatin’ny ala maozatra kely. Tsy dia matetika ireo mpitory no mba mahita olona maro azo hitoriana ka dia nidina nankeny amin’izany ala maozatra kely izany izy ireo.

Nisy zazalahy kely maty an-drano tamin’ izay ary dia efa ho atao ny fandevenana. Nampaka ny mpitandrina ireo ray aman-dreniny mba “hitondra teny” amin’ izany fandevenana ny zanakalahin’ izy ireo izany. Nijoro tery aoriana ireo misiônera raha nanomboka ny toriteniny ilay mpitandrina mandehandeha izay nanatrika an’ilay ray sy reny vonton’alahelo. Raha mba nanantena teny fampiononana avy tamin’ity lehilahy mpitandrina ity ireo ray aman-dreny dia diso fanantenana tokoa izy ireo.

Nandatsa mafy azy ireo izy tamin’ny tsy nanaovany batisa izany zazalahy kely izany. Tsy nahavita izany batisa izany izy ireo noho ny antony maro, ary ankehitriny dia tara loatra izany. Nilaza tsy tamim-pihambahambana tamin’izy ireo izy hoe lasa any amin’ny helo ilay zazalahikely. Ary hadisoan’izy ireo izany. Tsinin’izy ireo ny fijaliana tsy misy fiafarana hihatra aminy.

Rehefa vita ny toriteny sy voatototra ny fasana dia nanatona ireto ray aman-dreny vonton’ alahelo ireo misiônera lehilahy. “Mpanompon’ny Tompo izahay,” hoy izy ireo tamin’ ilay reny, “ary manana hafatra ho anareo.” (Boyd K. Packer, “Ary ny Zazakely no Hiroaka Azy,” Liahona, mey 2012, 7)

Omeo naoty amina ambaratonga 1 hatramin’ny 4 ny valinteninao amin’ity fanontaniana manaraka ity, ka ny (1) dia tsy matoky tena mihitsy, (2) somary matoky tena, (3) matoky tena, ary ny (4) tena matoky tena.

• Ahoana no fahatsapanao ny fatokian-tenanao amin’ny fampianarana sy fampiononana ireo ray aman-dreny vonton’alahelo ireo ary ny fanampiana azy ireo hahatsapa ny fitiavan’ny Tompo?

Aoriana kely ao amin’ny lesona dia hanana fahafahana hizara ny mety ho fihetsika havalin’izy ireo amin’ilay toe-java-misy ny mpianatra.

Rehefa mandalina ny Môrônia 8 ianao, dia hevero ny fomba mety hahafahanao manampy iero ray aman-dreny ireo hahatakatra tsara kokoa ny Sorompanavotan’i Jesoa Kristy mifandray amin’ny ankizy madinika. Eritrereto ihany koa ny fomba mety hanampian’ny fahamarinana avy ao amin’ny Môrônia 8 anao hahatakatra tsara kokoa ny fahatsarana sy famindram-pon’ny Ray any An-danitra sy i Jesoa Kristy.

Ny ankizy madinika dia salama

Raha nantsoina vao haingana ho amin’ny asa fanompoana an’i Jesoa Kristy i Môrônia dia naharay taratasy iray avy tamin’i Môrmôna rainy. Nanoratra tamin’ny “zanany malalany” (Môrônia 8:2) i Môrmôna fa izy dia “nahatsiaro [azy] mandrakariva tao amin’ny vava[ny]” (Môrônia 8:3). Nanoro hevitra an’i Môrônia momba ny fifanjihirana izay nitranga teo amin’ny Nefita momba ny batisan’ny ankizy madinika izy. Tatỳ aoriana teo amin’ny fiainany, dia nampiditra io taratasy io tao amin’ny rakitsorany tao amin’ireo takelaka volamena i Môrônia.

Vakio ny Môrônia 8:4–8, hitadiavana ny fihetsika navalin’i Môrmôna rehefa nandre momba ilay fifanjihirana izy.

Asao hizara ny hevi-baovao rehetra azon’izy ireo avy amin’ireo andininy ireo ny mpianatra.

Hevero ny hanao ny sarin’ity tabilao manaraka ity eny amin’ny solaitrabe sy handamina ny valintenin’ny mpianatra ho ao amin’ny tsanganana mifanaraka amin’izany. Angataho hizara ny antony mety haha zava-dehibe na manan-danja ny hevi-baovaon’izy ireo ny mpianatra.

Adikao ao amin’ny diary fandalinanao ity tabilao manaraka ity ary raketo an-tsoratra ny zavatra ianaranao amin’ireo andininy ireo. Hanampy zavatra ao amin’io tabilao io ianao ao aoriana kely ao amin’ny lesona.

Nahoana no tsy mila batisa ny ankizy madinika	Ny zavatra ianarantsika momba ny Ray any An-danitra sy i Jesoa Kristy

Fahamarinana iray azontsika ianarana amin’ireo andininy ireo ny hoe ny ankizy madinika dia natao salama tamin’ny alalan’ny Sorompanavotan’i Jesoa Kristy.

Fitaovana fandalinana soratra masina manampy ny fampiasana fanamarihana ambanim-pejy. Mariho ilay fanamarihana ambanim-pejy d eo akaikin’ny teny hoe “salama” ao amin’ny andininy 8.

Mamakia iray farafahakeliny amin’ireto andininy manaraka avy ao amin’ny fanamarihana ambanim-pejy ireto, hitadiavana ny antony maha salama ny ankizy madinika.

• Fotopampianarana sy Fanekempihavanana 29:46

  Azonao atao ny manasa ny mpianatra hamaky ihany koa ny andininy 47, izay ilazan’ny Tompo fa tsy afaka manota ny ankizy kely raha tsy lasa tompon’andraikitra. Nilaza ny Tompo fa manomboka lasa tompon’andraikitra eo anatrehany ny ankizy madinika amin’ny fahavalo taonany. Ny fanambarana momba io fahamarinana io dia hita ao amin’ny Dikantenin’i Joseph Smith ho an’ny Genesisy 17:11 sy ao amin’ny Fotopampianarana sy Fanekempihavanana 68:25–27. Hevero ny hizara ny sasany na ny rehetra amin’izy io amin’ny mpianatra raha manana fanontaniana izy ireo.

• Fotopampianarana sy Fanekempihavanana 74:7

• Inona no dikan’ny hoe “ny ankizy madinika dia salama” ao amin’ny Môrônia 8:8?

Tsy mila batisa ny ankizy madinika

Hevero ny hanao tsiroaroa ny mpianatra ary hanasa ny mpinamana tsirairay hamaky ny iray amin’ireto andian’andininy manaraka ireto.

I Môrmôna dia nanome fahatakarana hafa izay manampy antsika hianatra momba ny Ray any An-danitra sy i Jesoa Kristy avy amin’io fotopampianarana io mikasika ny ankizy. Vakio ireto andininy manaraka ireto, hitadiavana zavatra azonao ampidirina eo amin’ny andaniny roa amin’ny tabilaonao.

• Môrônia 8:10–15

• Môrônia 8:18–24

Asao hampiditra ao amin’ilay tabilao ny mpianatra. Raha ilaina, dia hevero ny hanontany ireo hevi-diso mety hananan’ny olona ka ahitsin’ireo andininy ireo.

Makà fotoana hijerena ireo fahamarinana nosoratanao ao amin’ny tsanganana faharoan’ilay tabilao. Saintsaino izao fanontaniana manaraka izao:

• Ahoana no mety hahafahan’ny fahatakarana ireo fahamarinana momba ny Ray any An-danitra sy i Jesoa Kristy ireo manampy antsika amin’ny fiainantsika ankehitriny?

Manasà mpianatra maromaro hamaly ny fanontaniana eo ambony. Raha ilaina dia hevero ny hangataka ny mpianatra hizara toe-java-misy mety hatrehin’izy ireo izay mety hanampian’ny fahalalana ireo fahamarinana ireo. Izany dia mety hahitana ny rehefa alaim-panahy hino izy ireo na ny hafa fa olona sasantsasany ihany no avelan’ Andriamanitra ho voavonjy. Araho ny bitsiky ny Fanahy, ary mitadiava fahafahana hanampiana ny mpianatra hahatsapa ny fitiavan’ny Tompo.

Eritrereto indray ilay tantarana misiônera roa tany am-piandohan’ny lesona.

• Miainga amin’ny zavatra nianaranao androany, inona no holazainao amin’ny ray aman-drenin’io ankizy io mba hanampiana azy ireo hahita fiadanana ao amin’i Jesoa Kristy?

Asao ny mpianatra mba hanoratra valiny iray amin’io fanontaniana io amin’ny alalan’ny fampiasana andininy roa farafahakeliny nohalalinin’izy ireo tao amin’ity lesona ity. Safidy iray hafa azo atao ny fizàran’ny mpianatra manisy feo ny valintenin’izy ireo amina filalaovana tantara fa tsy manoratra fotsiny. Alaivo antoka fa takatry ny mpianatra hoe ny tanjon’io fizàrana io dia ny hanampy olona hahatsapa fanantenana sy fiadanana amin’ny alalan’ny Sorompanavotan’i Jesoa Kristy; tsy natao hanakianana ny fanao ara-pivavahan’ny hafa izany.

Fanamarihana sy fampahalalana voarakitra

Afaka manota ve ny ankizy kely?

Nampianatra toy izao ny Filoha Dallin H. Oaks ao amin’ny Fiadidiana Voalohany:

Mahatakatra isika avy amin’ny fotopampianarantsika fa ‘tsy mahavita manota’ ny ankizy alohan’ny taona maha tompon’andraikitra [Môrônia 8:8]. Mandritra izany fotoana izany dia afaka manao fahadisoana ny ankizy, ary mety tena ratsy sy manimba zavatra mihitsy aza ka mila ahitsy, saingy tsy isaina ho fahotana ny zavatra nataon’izy ireo. (Dallin H. Oaks, “Sins and Mistakes,” Ensign, ôkt. 1996, 65)

Fotopampianarana sy Fanekempihavanana 29:47. Inona no dikan’ny izany hoe “manomboka lasa tompon’andraikitra” ny ankizy?

Nampianatra toy izao ny Loholona Bruce R. McConkie (1915–85) tao amin’ny Kôlejin’ny Apôstôly Roambinifolo:

Tsy tonga tampoka eo amin’ny ankizy amin’ny fotoana iray eo amin’ny fiainany ny maha tompon’andraikitra. Lasa tompon’andraikitra tsikelikely ny ankizy ao anatin’ny taona maro. Dingana miantoana ny fahatongavana ho tompon’andraikitra fa tsy tanjona hotratrarina aorian’ny fahalasanan’ny taona sy andro ary ora voafaritra. Milaza ny Tompo ao anatin’ny fanambarana ho antsika fa ‘tsy afaka manota izy ireo fa tsy nomena an’i Satana ny hery hakana fanahy ny ankizy madinika ambara-panombohan’izy ireo ho lasa tompon’andraikitra eo anoloako.’ (F&F 29:47.) Kanefa ho avy ny fotoana izay hisian’ny maha tompon’andraikitra marina ary hahatongavan’ny fahotana eo amin’ny fiainan’ireo izay mihalehibe araka ny tokony ho izy. Ny fahavalo taona no taonan’ny batisa. (Bruce R. McConkie, “The Salvation of Little Children,” Ensign, apr. 1977, 6)

Môrônia 8:12, 19, 22. Inona no dikan’ny hoe “velona ao amin’i Kristy”?

Ny hoe velona ao amin’i Kristy dia midika hoe navotana tamin’ny alalan’ny Sorompanavotan’i Jesoa Kristy ary mendrika hiaina any amin’ny fanjakana selestialy. Ireny tsy tompon’andraikitra ireny dia avotana ary velomina ao amin’i Kristy amin’ny alalan’ny herin’ny Sorompanavotan’i Jesoa Kristy. Ireo izay tompon’andraikitra dia afaka manasa ny hery manavotr’i Jesoa Kristy ho eo amin’ny fiainan’izy ireo amin’ny alalan’ny finoana, fibebahana, batisa, ary fandraisana ny Fanahy Masina (Môrônia 8:25–26).

Sahanasa fianarana fanampiny

Môrônia 8:8, 11. Salama amin’ny alalan’i Jesoa Kristy ny ankizy madinika

Fahamarinana iray mety ho azonao asongadina ny hoe ny ankizy izay maty alohan’ny taona maha tompon’andraikitra dia voavonjy any amin’ny fanjakana selestialy. Hevero ny hanasa ny mpianatra hamaky ny Môrônia 8:8, 11 sy ny Fotopampianarana sy Fanekempihavanana 137:10 mba hahitana io fahamarinana io. Ampio hahatakatra ny mpianatra fa ny ankizy madinika dia voavonjy ao amin’ny fanjakana selestialy tsy mila fibebahana sy batisa (jereo ny Môrônia 8:11). Ity horonantsary manaraka ity dia mety hanampy ny mpianatra hampitombo ny fahatakaran’izy ireo.

Môrônia 9:6. “Aoka isika hiasa amim-pahazotoana”

Raha manana fotoana ianareo, dia azonao atao ny manasa ny mpianatra hamaky avy amina taratasy hafa nosoratan’i Môrmôna ho an’i Môrônia. Hevero ny hizara rafi-tantara tahaka ity manaraka ity: “Amin’ny maha mpikambana anao ao amin’ny kilasy na kôlejy misy anao, dia angatahina hanasa ny iray amin’ny mpikambana hafa izay tsy tonga tamina fivoriam-piangonana na fiaraha-mientana tao anatin’ny herintaona mahery ianao. Rehefa avy nanome fanasana nandritra ny telo volana lasa ianao, dia mbola tsy tonga amina fivoriana na fiaraha-mientana ihany io olona io.” Asao hizara ny zavatra mety hataon’izy ireo amin’io toe-java-misy io ny mpianatra. Asao hamaky ny Môrônia 9:1–6 ny mpianatra, ka hitady torohevitra izay hihatra amin’ilay rafi-tantara. Asao hizara eritreritra momba ny zavatra ampianarin’i Môrmôna ny mpianatra. Mety ho afaka mametraka fanontaniana toy ity manaraka ity ianao: Nahoana no mety ho sarotra ny manao ny zavatra ampianarin’i Môrmôna? Nahoana no tsara ny manao ny zavatra ampianarin’i Môrmôna?

Môrônia 9:25. “Hanandratra anao kosa anie i Kristy”

Hevero ny handatsaka laoranjy voafofy sy laoranjy tsy voavofy ao anaty rano mba hahitana raha mitsingevana izy reo. Asao hisaintsaina ny zavatra mety hampianjera antsika sy ny zavatra mety hanandratra antsika eo amin’ny fiainana ny mpianatra.

Asao hamaky ny Môrônia 9:25–26 ny mpianatra, hitadiavana ny zavatra nolazain’i Môrmôna ka mety hampakatra ny môralin’i Môrônia. Hevero ny hametraka fanontaniana toy ireto: Inona no fampianarana ao amin’ireo andininy ireo afaka mampakatra ny môralinao? Nahoana? Inona araka ny eritreritrao no dikan’ny hoe afaka manandratra antsika i Jesoa Kristy? Oviana ianao no niaina ny fitaomana manandratr’i Kristy teo amin’ny fiainanao?