Moroni 10:1–7

Pagtanggap ng Sarili Mong Patotoo sa Aklat ni Mormon

kabataang nagbabasa ng Aklat ni Mormon

Nakadama ka na ba ng mga impresyon o damdamin mula sa Espiritu na totoo ang Aklat ni Mormon? Kung gayon, anong mga karanasan at gawa ang nakatulong sa iyo na matamo ito? Sa ilan sa kanyang mga huling isinulat, binigyang-diin ni Moroni na ang Diyos ang pinagmumulan ng lahat ng katotohanan. Sa pamamagitan ng Diyos, makatatanggap tayo ng personal na patotoo sa katotohanan ng Aklat ni Mormon, sa katotohanan ni Jesucristo, at sa “katotohanan ng lahat ng bagay” “sa pamamagitan ng kapangyarihan ng Espiritu Santo” (Moroni 10:5). Makatutulong sa iyo ang lesson na ito na malaman para sa iyong sarili na ang Aklat ni Mormon ay totoo.

Pagtuunan ang mga alituntuning nagpapabalik-loob. Tulungan ang mga estudyante na matuklasan ang doktrina at mga alituntunin na makapagpapatibay sa kanilang ugnayan sa Ama sa Langit at kay Jesucristo. Hikayatin ang mga estudyante na suriin kung paano mapapalalim ng mga katotohanang ito ang kanilang pagbabalik-loob at kung paano sila nito matutulungang kumilos nang may pananampalataya.

Paghahanda ng estudyante: Sabihin sa mga estudyante na basahin ang Moroni 10:1–7, at hanapin ang anumang salita o parirala na tutulong sa kanila na maunawaan kung ano ang kailangan para malaman ang katotohanan tungkol sa Aklat ni Mormon.

Mga Posibleng Aktibidad sa Pag-aaral

Patotoo tungkol sa Aklat ni Mormon

Isipin kung alin sa mga sumusunod na pahayag ang pinakanakaugnay ka nang simulan mong pag-aralan ang Aklat ni Mormon:

• Hindi ako sigurado kung alam kong totoo ang Aklat ni Mormon.

• Nagtitiwala ako sa iba na nagsabi sa akin na totoo ang Aklat ni Mormon.

• Nakatanggap ako ng mga impresyon mula sa Espiritu Santo na totoo ang Aklat ni Mormon.

Pagnilayan ang iyong patotoo tungkol sa Aklat ni Mormon ngayon. Sa iyong pag-aaral, isipin ang mga susunod na hakbang na nais ng Panginoon na gawin mo upang matamo, mapalalim, o mapatibay ang iyong patotoo.

Ang payo ni Moroni

Matapos isulat ang ilan sa mga turo ng kanyang ama, itinuro ni Moroni kung paano malalaman ng sinuman para sa kanilang sarili na totoo ang Aklat ni Mormon.

Basahin ang Moroni 10:3–5 at markahan ang sinabi ni Moroni tungkol sa kung paano natin malalaman ang katotohanan ng Aklat ni Mormon. Maaari mo ring panoorin ang video na “Inaanyayahan ni Moroni ang Lahat ng Tao na Lumapit kay Cristo” mula sa time code na 4:39 hanggang 5:32, na matatagpuan sa ChurchofJesusChrist.org.

Ang Moroni 10:4–5 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito. Magkakaroon ka ng pagkakataon sa susunod na lesson na magsanay na gamitin ang doktrinang itinuturo sa passage na ito sa isang tanong o sitwasyon.

Maaari mong isulat ang sumusunod na hindi kumpletong pahayag sa pisara at sabihin sa mga estudyante na kumpletuhin ito sa kanilang study journal. Pagkatapos ay sabihin sa kanila na kumpletuhin ito bilang isang klase sa pisara.

• Malalaman ko na totoo ang Aklat ni Mormon sa pamamagitan ng kapangyarihan ng Espiritu Santo kapag ako ay …

Ang susunod na aktibidad ay nakaayos ayon sa tatlong parirala ng payo ni Moroni. Isipin kung paano mo matutulungan ang mga estudyante na mapalalim ang kanilang pag-unawa sa tatlong pariralang ito. Maaari mong hatiin ang mga estudyante sa maliliit na grupo at italaga sa bawat grupo ang isa sa mga sumusunod na aktibidad. Alamin kung mas mainam na idispley ang mga tagubilin para sa mga aktibidad na ito o bigyan ang bawat grupo ng sarili nilang kopya. Matapos talakayin ng mga grupo ang kanilang mga sagot, maaari silang magbahagi sa klase. Maaari ding ibuod ng mga estudyante ang kanilang mga ideya sa tabi ng pahayag na nasa pisara.

Basahin ang Aklat ni Mormon

Inilarawan ni Pangulong Russell M. Nelson ang ilan sa mga pagpapalang matatanggap natin sa pamamagitan ng pag-aaral ng Aklat ni Mormon. Isipin kung paano mo naranasan ang mga pagpapalang ito nang pag-aralan mo ito.

Pangulong Russell M. Nelson

Ipinangangako ko na sa mapanalanging pag-aaral ng Aklat ni Mormon araw-araw, makagagawa kayo ng mas maiinam na desisyon—sa araw-araw. Ipinangangako ko na habang pinagninilayan ninyo ang inyong pinag-aaralan, ang mga durungawan ng langit ay mabubuksan, at tatanggap kayo ng mga sagot sa inyong sariling mga tanong at patnubay sa inyong buhay. (Russell M. Nelson, “Ang Aklat ni Mormon: Ano Kaya ang Buhay Ninyo Kung Wala Ito?,” Liahona, Nob. 2017, 62–63)

• Naranasan mo na ba ang alinman sa mga pagpapalang ipinangako ni Pangulong Nelson sa mga taong nag-aaral ng Aklat ni Mormon?

Anyayahan ang mga estudyante na gustong magbahagi ng ilan sa mga paraan na naranasan nila ang mga pagpapalang ito. Mag-ingat na huwag maipahiya ang sinumang estudyante kung wala silang maisip na anumang karanasan. Tiyakin sa kanila na mararanasan pa rin nila ang mga pagpapalang ito habang patuloy nilang pinag-aaralan ang Aklat ni Mormon.

Ang pagtukoy sa mga pagpapalang nagmumula sa pagbabasa ng Aklat ni Mormon ay makapagpapatunay na ito ay totoo at nagmumula ito sa Diyos.

Pagnilayan ang awa ng Panginoon

• Ano ang ilang halimbawa sa banal na kasulatan na kung saan tumanggap ang mga tao ng awa ng Panginoon? Maaari mong hanapin ang ilan, tulad ni Nephi (2 Nephi 4:20–25), Nakababatang Alma (Alma 36:17–21), o ang mga Nephita na pinagaling ng Tagapagligtas sa Kanyang pagdalaw (3 Nephi 17:6–9).

• Ano ang ilang halimbawa ng awa ng Panginoon sa iyong buhay o sa buhay ng isang taong kilala mo?

• Sa iyong palagay, bakit makatutulong sa iyo ang pagninilay sa awa ng Panginoon para makatanggap ka ng patotoo tungkol sa Aklat ni Mormon sa pamamagitan ng Espiritu Santo?

Magtanong sa Diyos nang may matapat na puso, tunay na layunin, at pananampalataya kay Cristo

• Sa iyong palagay, ano ang ibig sabihin ng magtanong sa Diyos nang may matapat na puso? Nang may tunay na layunin? Nang may pananampalataya kay Jesucristo (Moroni 10:4)? Kung kailangan mo ng tulong para masagot ito, basahin ang Joseph Smith—Kasaysayan 1:10–17, at alamin kung paano nanalangin ang batang Joseph Smith nang may matapat na puso, tunay na layunin, at pananampalataya kay Cristo. (Paalala: Ang pariralang tunay na layunin ay nangangahulugan na kapag nakatanggap ka ng sagot sa iyong mga panalangin, taos-puso kang kikilos ayon sa paghahayag na natanggap mo.)

• Paano makatutulong ang paggawa nito para makatanggap tayo ng patotoo sa Aklat ni Mormon sa pamamagitan ng Espiritu Santo?

Ang aking personal na patotoo tungkol sa Aklat ni Mormon

Ibinahagi ni Pangulong Henry B. Eyring ng Unang Panguluhan ang kanyang karanasan sa pagpapamuhay ng pangako ni Moroni. Basahin ang sumusunod na pahayag o panoorin ang video na “Isang Buhay na Patotoo” mula sa time code na 13:51 hanggang 14:31, na mapapanood sa ChurchofJesusChrist.org.

Pangulong Henry B. Eyring

Umaasa akong napatunayan na ninyong lahat sa inyong sarili ang pangakong iyan o na gagawin ninyo ito kaagad. Ang sagot ay maaaring hindi dumating nang minsanan at sa napakalakas na espirituwal na karanasan. Sa akin tahimik muna itong dumating. Ngunit lumalakas ito sa tuwing babasahin at ipagdarasal ko ang Aklat ni Mormon.

Hindi ako umaasa sa mga nangyari na. Upang maging tiyak ang aking buhay na patotoo hinggil sa Aklat ni Mormon, madalas kong [tanggapin] ang pangako ni Moroni. Hindi ko iniisip na ang biyaya ng patotoo ay patuloy na lang na nasa akin. (Henry B. Eyring, “Isang Buhay na Patotoo,” Liahona, Mayo 2011, 127)

• Paano naaangkop sa atin ang mga salita ni Pangulong Eyring kahit ilang beses nating binabasa ang Aklat ni Mormon?

• Sa paanong paraan patototohanan sa atin ng Espiritu Santo ang katotohanan ng Aklat ni Mormon?

• Paano mapapalakas ng patotoo sa Aklat ni Mormon ang iyong kaugnayan at patotoo sa Ama sa Langit at sa Kanyang Anak na si Jesucristo?

Sabihin sa mga estudyante na ibahagi ang kanilang mga patotoo sa Aklat ni Mormon at kung paano nila nalaman na ito ay totoo. Maaari ka ring magbahagi ng sarili mong patotoo.

Ang sumusunod ay makatutulong sa mga estudyante na ipamuhay ang Moroni 10:3–5.

Isulat sa iyong study journal kung ano ang magagawa mo para maipamuhay ang mga alituntuning itinuro sa Moroni 10:3–5. Isipin kung paano mo patuloy na pag-aaralan ang Aklat ni Mormon, pagninilayan ang awa ng Panginoon, at hihingi ng patotoo sa Diyos sa pamamagitan ng Espiritu Santo. Saan at kailan mo gagawin ang mga bagay na ito? Paano maaaring sagutin ng Panginoon ang iyong mga panalangin?

Komentaryo at Impormasyon ng Konteksto

Paano nalaman ng iba na totoo ang Aklat ni Mormon?

Ang sumusunod na resources ay makatutulong sa iyo na maunawaan ang mga karanasan ng iba at matuto mula sa mga ito. Makikita ang lahat sa ChurchofJesusChrist.org.

• “Receiving a Testimony of the Book of Mormon, Part 1” (1:30), ni Pangulong Boyd K. Packer

• “How I Know the Book of Mormon is True” (1:11)

• “Natagpuan sa Pamamagitan ng Kapangyarihan ng Aklat ni Mormon,” ni Elder Rubén V. Alliaud, mula sa time code na 1:21 hanggang 4:39

• “Bumaling sa Kanya at Darating ang mga Sagot” mula sa time code na 0:00 hanggang 1:06, ni Elder James B. Martino

• “Kung Talagang Gusto Ninyong Malaman, Malalaman Ninyo,” ni Elder Walter F. González

Sina Sister Zina Young at Sister Eliza R. Snow, mga naunang nabinyagan at lider sa ipinanumbalik na Simbahan, ay tumanggap ng patotoo sa magkaibang paraan.

Sister Zina D.H. Young

Sister Eliza R. Snow

Sinabi ni Zina na una niyang “nakita ang Aklat ni Mormon, ang kakatwa at bagong aklat na iyon, na nakapatong sa bintana ng aming sala” noong siya ay 14 na taong gulang. Nang kunin niya ang aklat, nakadama siya ng “magiliw na impluwensya ng Banal na Espiritu kung kaya niyakap ko ito sa sobrang tuwa, habang bumubulong ng, ‘Ito ang katotohanan, katotohanan, katotohanan!’”

Hindi naging madaling para kay Eliza ang maniwala. Ang kanyang ina at kapatid na babae ang unang sumapi sa Simbahan. Nakilala ni Eliza si Joseph Smith at naisip niya na ito ay “matapat.” Narinig niya ang dalawa sa Tatlong Saksi—mga lalaking nakakita at nahawakan ang mga laminang ginto—na nagsalita tungkol sa aklat, at noon lang niya narinig ang gayong “mga kahanga-hangang patotoo.” Gayunpaman, hindi niya gustong magpadalos-dalos at malinlang. Inisip niya na ang lahat ng ito ay maaaring “nagkataon lang” at inabot siya nang apat na taon sa pag-aaral ng mga banal na kasulatan bago “nakatiyak … ang kanyang puso” at nagpasiya siyang magpabinyag. (Janiece Johnson, “A Witness of One’s Own,” Ensign, Dis. 2020, 37)

Paano ako pagpapalain ng pagkakaroon ng sarili kong patotoo?

Itinuro ni Pangulong Dieter F. Uchtdorf, dating Pangalawang Tagapayo sa Unang Panguluhan:

Pangulong Dieter F. Uchtdorf

Maaaring sabihin ng ilan na napakahirap sundin ang mga hakbang o hindi ito sulit na pagsikapan. Ngunit sinasabi ko na ang personal na patotoong ito sa ebanghelyo at sa Simbahan ang pinakamahalagang bagay na maaari ninyong matamo sa buhay na ito. Hindi lamang ito magpapala at gagabay sa inyo sa buhay na ito, kundi may tuwirang epekto rin ito sa inyong buhay sa buong kawalang-hanggan. (Dieter F. Uchtdorf, “Pagtanggap ng Patotoo sa Liwanag at Katotohanan,” Liahona, Nob. 2014, 22)

Ibinahagi ni Pangulong Russell M. Nelson:

Pangulong Russell M. Nelson

Hindi na ninyo kailangang itanong kung ano ang totoo (Moroni 10:5). Hindi na ninyo kailangang isipin kung sino ang [tunay] na mapagkakatiwalaan ninyo. Sa pamamagitan ng personal na paghahayag, magkakaroon kayo ng sariling patotoo na ang Aklat ni Mormon ay salita ng Diyos, na si Joseph Smith ay propeta, at ito ang Simbahan ng Panginoon. Anuman ang sabihin o gawin ng ibang tao, walang makapag-aalis ng patotoo na ikinintal sa inyong puso’t isipan sa kung ano ang totoo. (Russell M. Nelson, “Paghahayag para sa Simbahan, Paghahayag para sa Ating Buhay,” Liahona, Mayo 2018, 95)

Mga Karagdagang Aktibidad sa Pag-aaral

Pagbabahagi ng kanilang mga patotoo sa Aklat ni Mormon

Para tapusin ang lesson, maaari mong bigyan ang bawat estudyante ng kopya ng Aklat ni Mormon kung saan maisusulat ang kanilang patotoo. Maaaring ibigay ng mga estudyante ang mga kopyang ito ng Aklat ni Mormon sa isang taong kilala nila na sa palagay nila ay handang tanggapin ito. O kaya, maaaring ibigay ng mga estudyante ang mga kopyang ito ng Aklat ni Mormon sa mga lokal na missionary upang ibahagi sa kanilang pag-proselyte.

Gumawa ng visual upang maunawaan ang Moroni 10:3–5

Upang matulungan silang maunawaan ang mga salita sa Moroni 10:3–5, maaaring gumawa ang mga estudyante ng isang visual na katulad ng matatagpuan sa bahaging “Taludtod sa Taludtod” ng magasin na Para sa Lakas ng mga Kabataan. Tingnan sa Pebrero 2021, Pebrero 2022, o sa marami pang mas bagong edisyon para sa mga halimbawa.

Moroni 10. “Pinapayuhan”

Ipaalala sa mga estudyante na ang ibig sabihin ng salitang pinapayuhan ay matinding hinihikayat o hinihimok. Maaari mong sabihin sa mga estudyante na alamin kung ilang beses ginamit ni Moroni ang salitang ito sa Moroni 10. Ano ang paanyaya ni Moroni na gawin natin? Ano ang ilang partikular na paraan na masusunod natin ang mga paanyayang ito?

Matutulungan tayo ng Espiritu Santo na malaman ang katotohanan ng lahat ng bagay

Maaaring basahin ng mga estudyante ang Moroni 10:5–7 at alamin kung paano sila matutulungan ng Espiritu Santo sa lahat ng kanilang pag-aaral. Talakayin kung paano makakaimpluwensya ang kaalamang ito sa pag-aaral ng ebanghelyo at sekular na pag-aaral ng mga estudyante. Maaari mo ring talakayin kung paano tayo matutulungan ng Espiritu Santo na matukoy ang katotohanan sa kamalian.