Taludtod sa Taludtod

Ang Kapulungan sa Langit

Nakita ni Abraham ang mga espiritung nagtipon bago isinilang ang sinuman sa mundo.

Abraham 3:22–23

22 Ngayon ipinakita ng Panginoon sa akin, si Abraham, ang mga katalinuhan na binuo bago pa ang mundo; at sa lahat ng ito ay marami ang marangal at dakila;

23 At nakita ng Diyos ang mga kaluluwang ito na sila ay mabubuti, at siya ay tumayo sa gitna nila, at kanyang sinabi: Ang mga ito ang gagawin kong mga tagapamahala; sapagkat siya ay nakatayo sa mga espiritung yaon, at kanyang nakita na sila ay mabubuti; at kanyang sinabi sa akin: Abraham, isa ka sa kanila; ikaw ay pinili bago ka pa man isinilang.

mga katalinuhan

Ang mga katalinuhan sa banal na kasulatang ito ay mga nilalang. Ang mga katalinuhang binanggit dito ay mga anak ng Diyos na may mga katawang espiritu.

inorganisa bago pa ang mundo

Ang mga nilalang na nakita ni Abraham ay inorganisa bilang mga espiritung anak ng Diyos. Pinagsama-sama sila sa isang Kapulungan sa Langit. Ang Kapulungang ito ay naganap bago pumarito sa lupa ang sinumang tao. Dito ipinaliwanag sa lahat ang plano ng kaligtasan ng Ama sa Langit.

mga marangal at dakila

Bahagi ng ibig sabihin ng pagiging marangal at dakila ay maging kagalang-galang at matuwid at gumawa ng maraming kabutihan. Kabilang dito ang paggawa ng maliliit at mga karaniwang bagay na ipinagagawa sa atin ng Diyos.¹

mga tagapamahala

Ang uri ng mga tagapamahala na binabanggit sa talatang ito ay hindi mga hari o pangulo. Sila ay mga espirituwal na lider tulad ng mga propeta at iba pa na may mga tungkuling maglingkod sa mga anak ng Diyos.

pinili bago ka pa man isinilang

Ikaw ay pinili bago ka isinilang para gampanan ang mahalagang papel sa gawain ng Diyos. Ngunit kailangan mong patuloy na piliin ang kabutihan para magkaroon ng gayong pagkakataon.²

Mga Tala

1. Tingnan sa Howard W. Hunter, pangkalahatang kumperensya ng Abr. 1982 (Ensign, Mayo 1982, 19–20).

2. Tingnan sa Mga Paksa ng Ebanghelyo, “Foreordination,” topics.ChurchofJesusChrist.org.