« ថ្ងៃទី ១០ ខែ កញ្ញា ។ តើខ្ញុំអាចទទួលបានការលួងលោមពីព្រះយេស៊ូវគ្រីស្ទនៅពេលដែលមនុស្សជាទីស្រឡាញ់បានស្លាប់ដោយរបៀបណា ? កូរិនថូស ទី១ ១៤–១៦ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិឆ្នាំ ២០២៣ ( ឆ្នាំ ២០២២ )
« ថ្ងៃទី ១០ ខែ កញ្ញា ។ តើខ្ញុំអាចទទួលបានការលួងលោមពីព្រះយេស៊ូវគ្រីស្ទនៅពេលដែលមនុស្សជាទីស្រឡាញ់បានស្លាប់ដោយរបៀបណា ? » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិឆ្នាំ ២០២៣
ថ្ងៃទី ១០ ខែ កញ្ញា
តើខ្ញុំអាចទទួលបានការលួងលោមពីព្រះយេស៊ូវគ្រីស្ទនៅពេលដែលមនុស្សជាទីស្រឡាញ់បានស្លាប់ដោយរបៀបណា ?
ប្រឹក្សាជាមួយគ្នា
ដឹកនាំដោយសមាជិកថ្នាក់ម្នាក់ ឬគណៈប្រធានកូរ៉ុម មានរយៈពេលប្រហែល ១០–២០ នាទី
នៅដើមការប្រជុំ សូមសូត្ររួមគ្នានូវ បាវចនាយុវនារី ឬ បាវចនាកូរ៉ុមបព្វជិតភាពអើរ៉ុន ។ បន្ទាប់មកសូមដឹកនាំការពិភាក្សាមួយអំពីកិច្ចការនៃសេចក្តីសង្រ្គោះ និងភាពតម្កើងឡើង ដោយប្រើសំណួរមួយ ឬច្រើនដូចខាងក្រោម ឬសំណួររបស់បងប្អូនផ្ទាល់ ( សូមមើល ក្បួនខ្នាតទូទៅ ១០.២, ១១.២ ) ។ ដាក់ផែនការដើម្បីអនុវត្តតាមអ្វីដែលបងប្អូនពិភាក្សា ។
-
ការរស់នៅតាមដំណឹងល្អ ។ តើការងាកទៅរកព្រះអម្ចាស់អាចជួយយើងប្រឈមនឹងឧបសគ្គ និងការសាកល្បងតាមរបៀបណា ?
-
ការមើលថែដល់អ្នកខ្វះខាត ។ តើយើងស្គាល់នរណាខ្លះដែលត្រូវការការអធិស្ឋាន និងមិត្តភាពរបស់យើង ?
-
ការអញ្ជើញមនុស្សទាំងអស់ឲ្យទទួលយកដំណឹងល្អ ។ តើផែនការចែកចាយដំណឹងល្អអ្វីខ្លះត្រូវបានលើកមកពិភាក្សានៅក្នុងការប្រជុំក្រុមប្រឹក្សាយុវវ័យវួដ ? តើថ្នាក់ ឬកូរ៉ុមរបស់យើងអាចចូលរួមដោយរបៀបណា ?
-
ការបង្រួបបង្រួមក្រុមគ្រួសារសម្រាប់ភាពអស់កល្បភាពអស់កល្បជានិច្ច ។ តើការធ្វើកិច្ចការពង្សប្រវត្តិអាចពង្រឹងទំនាក់ទំនងយើងជាមួយនឹងព្រះវរបិតាសួគ៌ និងព្រះយេស៊ូវរបៀបណា ?
នៅចុងបញ្ចប់នៃមេរៀននេះ សូមធ្វើកិច្ចការដូចខាងក្រោម តាមការគួរ ៖
-
ថ្លែងទីបន្ទាល់អំពីគោលការណ៍ដែលបានបង្រៀន ។
-
រំឭកសមាជិកថ្នាក់ ឬកូរ៉ុមអំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។
បង្រៀនគោលលទ្ធិ
ដឹកនាំដោយអ្នកដឹកនាំជាមជ្ឈិមវ័យ ឬយុវវ័យម្នាក់ រយៈពេលប្រហែល ២៥–៣៥ នាទី
រៀបចំខ្លួនខាងវិញ្ញាណ
នៅពេលមនុស្សម្នាក់ដែលយើងខ្វល់ខ្វាយហៀបនឹងស្លាប់ វាអាចរឿងដ៏ឈឺចាប់ ។ ការបែកចេញពីមនុស្សដែលយើងស្រឡាញ់នាំមកនូវអារម្មណ៍នៃទុក្ខសោក និងភាពសោកសៅដ៏ខ្លាំងក្លា ។ ប៉ុន្តែប៉ុលបានបង្រៀនថា នៅទីបំផុត « សេចក្តីជ័យជំនះបានលេបសេចក្តីស្លាប់បាត់ហើយ » ( កូរិនថូស ទី១ ១៥:៥៤ ) ដោយសារតែដំណើររស់ឡើងវិញរបស់ព្រះយេស៊ូវគ្រីស្ទ ។ និយាយម្យ៉ាងទៀត « ទ្រនិចនៃសេចក្ដីស្លាប់ »—ជាការឈឺចាប់ និងភាពអស់សង្ឃឹមដែលយើងមាននៅក្នុងជីវិតរមែងស្លាប់—« ត្រូវបានលេបបាត់នៅក្នុងព្រះគ្រីស្ទ» ( ម៉ូសាយ ១៦:៧–៨; សូមមើលផងដែរ កូរិនថូសទី១ ១៥:៥៤–៥៧ ) ។
នៅពេលណាមួយ មនុស្សគ្រប់គ្នានឹងដកពិសោធន៍នូវសេចក្ដីស្លាប់នៃមនុស្សជាទីស្រឡាញ់ ។ តើបងប្អូននឹងជួយដល់យុវវ័យដែលបងប្អូនបង្រៀនឲ្យរកឃើញការលួងលោមចិត្តនៅគ្រាដ៏លំបាកទាំងនោះ តាមរយៈសេចក្ដីជំនឿរបស់ពួកគេលើព្រះយេស៊ូវគ្រីស្ទដោយរបៀបណា ? សូមគិតពីសំណួរនេះ នៅពេលបងប្អូនរៀបចំបង្រៀនដោយអាន កូរិនថូស ទី១ ១៥, ម៉ូសាយ ១៦:៧–៩ និង គោលលទ្ធិ និង សេចក្ដីសញ្ញា ៤២:៤៤–៤៦ ។
រៀនជាមួយគ្នា
បងប្អូនអាចអញ្ជើញសមាជិកថ្នាក់ ឬកូរ៉ុមឲ្យចែកចាយពីពេលដែលពួកគេមានអារម្មណ៍នូវអ្វីមួយដែលមានទ្រនិច ។ បន្ទាប់មកបងប្អូនអាចសួរពួកគេថា តើហេតុអ្វីបានជាប៉ុលបានប្រើពាក្យ « ទ្រនិច » ដើម្បីពិពណ៌នាពីសេចក្ដីស្លាប់ ( សូមមើល កូរិនថូស ទី១ ១៥:៥៤–៥៦ ) ។ សូមទុកពេលឲ្យពួកគេពីរបីនាទីដើម្បីរំឭក កូរិនថូស ទី១ ១៥ ហើយចែកចាយសេចក្ដីពិតដែលពួកគេរកឃើញអំពីរបៀបដែលទ្រនិចនៃសេចក្ដីស្លាប់ត្រូវបានយកឈ្នះ ។ បន្ទាប់មកសូមពិចារណាពីសកម្មភាពដូចខាងក្រោមនេះ ដើម្បីជួយយុវវ័យឲ្យយល់ដឹងកាន់តែប្រសើរ អំពីរបៀបដែលព្រះអង្គសង្គ្រោះអាចលួងលោមចិត្តយើង នៅពេលមនុស្សម្នាក់ដែលយើងខ្វល់ខ្វាយហៀបនឹងស្លាប់ ។
-
បងប្អូនអាចបំបែកសមាជិកថ្នាក់ ឬកូរ៉ុមជាគូ ហើយសុំឲ្យដៃគូនីមួយៗពិនិត្យមើលឡើងវិញរួមគ្នាពីវគ្គបទគម្ពីរមួយចំនួននៅក្នុង « ធនធានគាំទ្រ » ។ ពួកគេអាចសរសេរចម្លើយចំពោះសំណួរដូចជា « តើសេចក្ដីពិតដ៏សំខាន់អ្វីទៅដែលខ្ញុំសង្ឃឹមថាចងចាំ នៅពេលខ្ញុំបាត់បង់មនុស្សជាទីស្រឡាញ់ ? » សូមឲ្យពួកគេដាក់បញ្ចូលព័ត៌មានមកពី វគ្គបទគម្ពីរនៅក្នុងចម្លើយរបស់ពួកគេ ។ បន្ទាប់មកសូមអញ្ជើញពួកគេឲ្យចែកចាយនៅក្នុងថ្នាក់ពីសេចក្ដីពិតដែលមានន័យបំផុតចំពោះពួកគេ និងហេតុផលដែលសេចក្តីពិតនោះមានន័យចំពោះគេ ។
-
សូមពិចារណាពិនិត្យមើលឡើងវិញរួមគ្នា ពីដំណើររឿងមួយនៅក្នុងសារលិខិតសន្និសីទទូទៅ ដែលបង្ហាញពីរបៀបដែលបុគ្គលម្នាក់បានរកឃើញសេចក្ដីសង្ឃឹមលើព្រះយេស៊ូវគ្រីស្ទ នៅពេលមនុស្សម្នាក់ដែលពួកគេខ្វល់ខ្វាយហៀបនឹងស្លាប់ ។ ឧទាហរណ៍នៅក្នុងសារលិខិតរបស់ស៊ីស្ទើរ រ៉េណា អ៊ី អាប៊ើតូ « The Grave Has No Victory » ( Liahona ខែ ឧសភា ឆ្នាំ ២០២១ ទំព័រ ៨៥–៨៦ ) ឬសារលិខិតរបស់អែលឌើរ អេស ម៉ាក ផលម័រ « Our Sorrow Shall Be Turned into Joy » ( Liahona ខែ ឧសភា ឆ្នាំ ២០២១ ទំព័រ ៨៨–៨៩ ) ។ បងប្អូនប្រហែលជាទទួលការបំផុសគំនិត ឲ្យចែកចាយបទពិសោធន៍របស់បងប្អូនផ្ទាល់ ឬអញ្ជើញយុវវ័យឲ្យចែកចាយពីរបៀបដែលពួកគេរកឃើញការលួងលោមចិត្ត និងសេចក្ដីសង្ឃឹមលើព្រះយេស៊ូវគ្រីស្ទ បន្ទាប់ពីមនុស្សជាស្រឡាញ់ម្នាក់បានស្លាប់ ។
-
បន្ទាប់ពីពិចារណានូវសេចក្ដីត្រូវការរបស់សមាជិកថ្នាក់ ឬកូរ៉ុមរបស់បងប្អូនរួច សូមបង្ហាញវីដេអូមួយ ឬច្រើននៅក្នុង « ធនធានគាំទ្រ » ។ សូមឲ្យយុវវ័យចែកចាយចំណាប់អារម្មណ៍របស់ពួកគេ ។ តើការដឹងថា ព្រះយេស៊ូវគ្រីស្ទបានមានព្រះជន្មរស់ឡើងវិញជះឥទ្ធិពលដល់របៀបដែលយើងមើលទៅសេចក្ដីស្លាប់យ៉ាងដូចម្ដេច ? សូមអញ្ជើញសមាជិកថ្នាក់ ឬកូរ៉ុមរបស់បងប្អូន ឲ្យចែកចាយទីបន្ទាល់របស់ពួកគេអំពីព្រះអង្គសង្គ្រោះ និងដំណើររស់ឡើងវិញរបស់ទ្រង់ ព្រមទាំងរបៀបដែលចំណេះដឹងនេះនាំយកសេចក្ដីសង្ឃឹមដល់ពួកគេ។
-
យ៉ូហាន ១១ ពិពណ៌នាពីបទពិសោធន៍របស់ព្រះអង្គសង្គ្រោះជាមួយនឹងសេចក្ដីស្លាប់របស់មនុស្សជាទីស្រឡាញ់—គឺមិត្តរបស់ទ្រង់ឈ្មោះឡាសារ។ ប្រហែលជាសមាជិកថ្នាក់ ឬកូរ៉ុមអាចអាន ខទី ១–៤៥ ជាមួយគ្នា ហើយកាលដែលពួកគេអាន ពួកគេអាចចែកចាយរឿងទាំងឡាយដែលពួកគេរៀនមកពីគំរូរបស់ព្រះអង្គសង្រ្គោះ ។ តើយើងអាចរៀនអ្វីខ្លះចេញមកពីដំណើររឿងនេះ ដែលអាចផ្តល់ការលួងលោមលួងលោមដល់យើង នៅពេលនរណាម្នាក់ដែលយើងខ្វល់ខ្វាយហៀបនឹងស្លាប់ ? តើយើងអាចធ្វើតាមគំរូរបស់ព្រះអង្គសង្រ្កោះពី « [ ការ ] ទួញយំជាមួយនឹងអ្នកណាដែលទួញយំ … ហើយ [ ការ ] កម្សាន្ដទុក្ខដល់អស់អ្នកណាដែលកំពុងត្រូវការកម្សាន្ដទុក្ខ » ដោយរបៀបណា ? ( ម៉ូសាយ ១៨:៩ ) ។ តើយើងរៀនអ្វីខ្លះទៀតនៅក្នុង គោលលទ្ធិ និង សេចក្តីសញ្ញា ៤២:៤៥–៤៦ ដែលអាចជួយយើងឲ្យធ្វើការណ៍ទាំងនេះ ? បងប្អូនអាចចង់បង្ហាញវីដេអូ « One-on-One (Ministering with Love) » ( ChurchofJesusChrist.org ) ។
ទីបន្ទាល់របស់យើងពីការស្តារឡើងវិញរបស់ព្រះ យេស៊ូវគ្រីស្ទផ្តល់ឲ្យយើងនូវក្តីសង្ឃឹម នៅពេលមនុស្សដែលយើងស្រឡាញ់ស្លាប់ ។
ធ្វើសកម្មភាពដោយសេចក្ដីជំនឿ
សូមលើកទឹកចិត្តសមាជិកថ្នាក់ ឬកូរ៉ុមឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីធ្វើតាមការបំផុសគំនិត ដែលពួកគេបានទទួលនៅថ្ងៃនេះ ។ ពួកគេអាចចែកចាយគំនិតរបស់ពួកគេបាន ប្រសិនបើពួកគេចង់ចែកចាយ ។ សូមអញ្ជើញពួកគេឲ្យគិត អំពីរបៀបដែលការធ្វើតាមចំណាប់អារម្មណ៍របស់ពួកគេនឹងពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។
ធនធានគាំទ្រ
-
អេសាយ ២៥:៨; កូរិនថូស ទី១ ១៥:២០–២២; ម៉ូសាយ ១៦:៧–៩; អាលម៉ា ៧:១១–១២; ១១:៤២–៤៤; ២២:១៤; ២៨:១២–១៤; ៤០:១១–១២
-
ដាល្លិន អេក អូក « What Has Our Savior Done for Us? » Liahona ខែ ឧសភា ឆ្នាំ ២០២១ ទំព័រ ៧៥–៧៧
-
ម៉ូអ៊ីសេ វីលេនូវ៉ា « Favored of the Lord in All My Days » Liahona ខែ វិច្ឆិកា ឆ្នាំ ២០២១ ទំព័រ ៤៤–៤៦
-
វីដេអូ ៖ « Dealing with Death: Sunday Will Come », « Finding Hope through the Resurrection of Christ », « He Will Give You Help », « Until We Meet Again » ( ChurchofJesusChrist.org )
ការបង្រៀនតាមរបៀបរបស់ព្រះអង្គសង្គ្រោះ
ការបង្រៀនទាក់ទងនឹងការបម្រើដោយក្ដីស្រឡាញ់ និងការជួយអ្នកដទៃឲ្យទទួលបានពរជ័យនៃដំណឹងល្អ ហើយជាញឹកញាប់ ជំនួយនេះគឺជាអ្វីដែលសមាជិកមិនសូវសកម្មនៅក្នុងថ្នាក់ត្រូវការ ។ យើងទាំងអស់គ្នាចាំបាច់ត្រូវធ្វើការរួមគ្នា ដើម្បីឈោងទៅជួយអស់អ្នកទាំងឡាយណាដែលកំពុងមានបញ្ហា ហើយក្នុងនាមជាគ្រូបង្រៀនមួយរូប អ្នកអាចនឹងស្ថិតនៅក្នុងតួនាទីពិសេសមួយដើម្បីជួយ ។